Tagged: 新加坡菜

0

【新開!$30啖啖蟹肉熱狗 平食新加坡正宗風味】The Hot Dog Submarine

要喺香港食到好食又抵嘅新加坡菜,就要去深水埗試吓呢間開咗唔夠一個月嘅The Hot Dog Submarine,原來老闆係新加坡人,喺香港生活咗廿幾年,一直都好鍾意落手落腳煮啲正宗新加坡菜俾朋友,終於決定走入深水埗,最近開咗呢間小食店。 一次過打通三個舖位嘅The Hot Dog Submarine,明亮嘅黃色令到成間舖都朝氣十足。老闆話,唔少客人都同佢反映話個熱狗包唔夠熱,佢就即刻買入焗爐,就係為咗整返個香噴噴嘅蟹肉熱狗俾大家,真係勁貼心!小編當日仲遇到幾位客人,個個都大讚老闆好有心。 熱辣辣無得輸,一路食蟹肉辣醬熱狗 (HKD30),啲蟹肉一流落嚟,咬落仲可以食到分量十足嘅蟹絲,淋上茄醬,同帶甜嘅蟹肉辣醬非常夾,老闆仲話:「唔想太在意成本,最緊要可以將地道嘅新加坡菜帶俾香港嘅朋友。」 惹味香辣嘅蟹肉黑椒醬熱狗 (HKD30)絕對可以改變你對黑椒嘅感覺,香濃嘅黑椒醬無搶咗蟹肉嘅風頭之外,仲令到蟹肉更加吸引。鐘意味濃嘅一定要試吓呢款,每日賣完就無㗎啦!仲唔快啲去試! 有別於平時小食檔嘅魚蛋燒賣,The Hot Dog Submarine精挑細選嘅蟹肉咖喱菠蘿魚蛋同燒賣 (各HKD15),魚蛋肥大彈牙、燒賣煙韌有口感,再淋上香噴噴嘅蟹肉咖喱菠蘿,酸甜辣都俾晒你食! The Hot Dog Submarine 地址:深水埗欽州街西九龍中心5樓蘋果商場5K86~88號 電話: 6291 3626 營業時間︰星期二至日11:30-20:30 (星期一休息)

0

【用心親民星馬菜】隨心

人生順逆無常,有無諗過如果事事順心,人生仲會唔會一樣精彩?定係事事順心反而會覺得乏味呢?有時選擇隨性,放鬆一啲,未嘗唔係一件好事。隨心而行、隨心咁生活,或者去鰂魚涌食馬來西亞菜隨心,都係一樣簡單隨意又舒適。 小店裝潢雖然簡單,但係並唔代表馬虎。牆上貼滿一幅幅特色畫作,環境舒適整潔。 海南雞飯(HKD78),雞肉非常嫩滑,外皮有彈性,感覺上一啲都唔油膩,亦唔會好肥。值得一讚係海南雞已經去骨,可以一啖食晒,感覺更加爽,仲有三種口味嘅醬汁可以搭配添!油飯散發淡淡香味,同爽滑嘅雞肉非常夾。再飲埋杞子雞湯,成個餐雞味濃郁,愛食雞嘅朋友要試試啦。 沙嗲串燒6串(HKD60)串燒包括有豬肉同雞肉各3串,燒完好香好惹味。再點埋特製沙嗲醬,初入口味道香辣後帶少少甜味。加上醬入面帶有少許花生粒粒,更加有多重口感。豬肉串食落肉汁豐富,好香口;雞肉串嫩滑,質感比較軟。 鍾意重口味可以試下新加坡炒貴刁(HKD75),味道濃烈得嚟有少少辣,好惹味又有鑊氣!濃濃嘅醬汁煮到上面各樣食材都好入味,特別係大蝦,將原本嘅爽甜蝦肉加添一分惹味,層次更豐富。  馬來西亞肉骨茶(HKD98)以豬骨、豬肉同埋中藥材熬製,藥材份量非常多,好足料!無論聞落定食落藥材味道都相當濃郁,湯內嘅豬肉煲到又腍又入味!據聞肉骨茶仲有行氣活血嘅功效,鍾意食肉骨茶嘅朋友一定要試! 海鮮喇沙(HKD80)食喇沙個湯底真係好重要!呢個湯底有少少辣,椰香十足又有好香花生味,味道香濃。麵條彈性十足,唔會一夾就斷。加埋豐富海鮮,有蝦、蟹棒、帶子、魚片、豆卜同埋糖心蛋,將每樣食材浸入香濃湯底,加倍鮮味! 隨心 地址:鰂魚涌海光街12號地舖 電話號碼:2117 3588 營業時間:星期一至日:11:00-22:00