Tagged: 新店

0

【新開英式酒吧大玩港式桌上遊戲 「有味」雞尾酒×Cold Cut】Save Bar

尖沙咀作為其中一個酒吧集中地,想突圍而出都要花啲心思。新開嘅Save Bar就大玩懷舊味道,咪睇呢度裝修走英倫風,喺度可以玩到唔少港式兒時遊戲㗎。入行十年、負責人之一Giann講到酒吧嘅理念就超興奮「其實去酒吧唔一定就係玩到癲,有時唔開心都會想搵個靜少少嘅地方抒發吓,但又唔使去到清吧咁靜,我哋都想照顧到呢班人。而且好多香港人鍾意懷舊feel,透過一啲連繫勾起好多回憶,所以我哋嘅桌上遊戲都加入香港人細個玩嘅Board Game,就連Cocktail嘅設計都行呢個方向。」。講到咁有故事性,即刻睇吓有咩咁特別先! 入到嚟聽住酒吧播放八十年代嘅音樂,更加令小編投入其中,而且環境好適合打卡呃like喎。 呢度嘅枱面都可以顯示7款桌上遊戲,仲係免費任玩添,因為佢哋覺嚟飲酒已經係消費,遊戲只係應有提供嘅服務,呢個諗法真係好貼心呀!小編見到蛇棋同波子棋就好有感覺,細個真係玩唔少囉。 另外亦有賭枱遊戲可以揀㗎。 邊玩梗係邊摸酒杯底啦,呢度既然行懷舊風,7杯招牌Cocktail分別以「VINTAGED」嘅英文字命名,賣嘅唔止係味道,亦係心思呀,依家就介紹其中幾款啦!呢杯Vooden(HKD138)用木盒蓋起呈上,打開意味尋找回憶;用料上加入自家以白酒調製嘅五花茶,配合舊時嘅人放工去涼茶舖休息嘅感覺;雖然帶有甜味,一入口都幾辣喉㗎! 酒吧會為每位點IMAGINATIONS(HKD128)嘅客人影張即影即有相,意味你啱啱嚟到Save Bar嘅時候同酒色一樣咁清澈,但走嘅時候可以好似慢慢顯現嘅相咁,帶走屬於你嘅回憶。呢杯相對甜啲同清新啲,因為加入佛手柑利口酒同梳打,感覺同氣泡酒有啲似。 以85%黑朱古力自家製嘅朱古力片扮成黑膠唱片,配襯留聲機造型杯嘅Emajor(HKD108)係咪好有味道呢?當中用咗自家釀嘅Layer Grey Gin,帶有陣陣花香;另外再加少少蜜糖同檸檬汁,味道微澀又有濃郁嘅酒香。食埋朱古力片再飲一啖,味道會更加香甜。 咪以為雞尾酒都有奶蓋,面頭其實係自家用接骨木花整成嘅蛋白泡沫,下面就加咗新鮮嘅紅菜頭汁同蘋果汁令味道甜啲又健康啲,酒味唔會太突出;不過飲之前記得攪勻呀,可以再減淡紅菜頭汁嘅蔬果味。 想叫啲小食佐酒的話,呢度都有凍盤㗎。PARMA HAM & MEAT COLD CUT PLATTER(HKD178)有巴馬火腿、Salami同煙三文魚,可以要求用火槍輕炙Salami,咁就會油香啲又滑啲。 SALMON ROLL WITH ASPARAGUS(HKD98)少有配合蘆筍,健康得嚟又唔會太油,啱晒女士呀! DUCK BREAST WITH SUN-DRIED(HKD78)比較肉感,但係伴上油浸蕃茄乾米餅真係畫龍點睛!意式製法蕃茄乾好香濃,配埋米餅可以中和鴨胸嘅飽滯感。 呢度咁著重回憶,亦都想大家可以喺度製開心嘅回憶。所以另一位鍾意攝影嘅負責人,會隨機為客人用菲林機留影,等你下次嚟嘅時候可以喺存放呢啲照片嘅相簿入面搵返出嚟,搵到就可以免費拎走喇。 唔少人都喺荔園或者開心樂園玩過掉波波同擲豆袋遊戲,喺度只要消費滿指定金額就可以玩,仲會按成績送獎品俾你添。Giann話已經有人贏過大獎,小編試吓發覺都唔係勁難喎。獎品會不定期更換,嚟到記得問吓有咩喇。   Save Bar 地址:尖沙咀金巴利道40號MW...

0

【度小月分店進駐深水埗V Walk 獨家限定三款魷魚主題菜】度小月

鍾意食台灣菜嘅朋友對度小月應該一啲都唔陌生,佢最近開第三間分店仲走入深水埗新商場V Walk。新店除咗有招牌肉燥飯同擔仔麵之外,更推出三款獨家限定嘅魷魚主題菜同三款夏日開胃菜,帶啲新鮮感俾大家!另外,喺8月10日前嚟食仲有全店8折嘅新店優惠添。 V Walk喺南昌西鐵站上蓋,位置唔難搵。環境開揚嘅店面仲睇到店員喺度熬煮肉燥,貫徹返度小月嘅特色。呢度過咗中午時段仍然有唔少客人幫襯,幾乎滿座! 除咗有得食一眾招牌菜之外,新店仲獨家推出三款以魷魚為主題嘅限定菜式,全部都充滿台灣地道風味㗎! 食台灣菜又點少得魷魚羹呢?呢道沙茶魷魚羹(HKD38)有濃郁嘅沙茶香味,啱晒重口味嘅朋友仔!而且每一羹都潷到大大嚿魷魚同埋紅蘿蔔、木耳絲等唔同配料,咁足料好抵飲。 魷魚筒喺台灣叫中卷,呢款三杯中卷(HKD88)亦係地道嘅台灣快炒小菜。以三杯醬汁加入香葉、紅椒絲等配料快炒,入晒味嘅魷魚口感非常彈牙又唔韌,食落好惹味呀! 而加入露筍、紅蘿蔔、紅椒絲、西芹炒嘅台式炒花枝(HKD88)面頭打咗芡,有好香嘅麻油味,但入口唔油膩;花枝片質地軟腍彈牙,餸飯一流! 新店趁住夏天加推三款夏日小菜俾大家醒醒胃。有冇聽過咩係木須肉呢?其實木須肉(HKD88)就係以嫩豬肉同木耳炒蛋嘅特色中菜,蛋炒得乾身而嫩滑。 另外,仲有薑汁蕃茄(HKD38)同清香豆腐(HKD38)兩款冷盤,涼浸浸又口感清爽,夏天食就啱晒喇。   度小月 (深水埗新分店) 地址:九龍深水埗深旺道28號V WALK 二樓L2-142&L2-143號舖 電話:8300 2003 營業時間:星期一至五:11:30-22:00,星期六、日:11:00-22:00

0

【「我是酸奶君」過江殺入旺角 王牌紫米酸奶消滯極品】我是酸奶君

珍奶熱潮雖然冷卻咗,但行街總係想買杯嘢飲。喺深圳以酸奶起家嘅我是酸奶君最近登陸旺角,將來自雲南72小時慢酵嘅高山稀酸奶配黑紫米、水果、牛奶等配料調出各式各樣嘅酸奶飲品帶俾大家。佢哋有句slogan「 稀釋來自城市的浮躁」,唔知你飲完會唔會身心都舒暢啲呢? 如果啱啱食完飯好飽,落單記得講「少黑紫米」。不過寫明係冷飲嘅款式冇得轉熱飲,但可以走冰;而兩款熱飲亦冇得變凍飲㗎。 皇牌飲品梗係吃米酸奶(HKD29/500cc[冷]),想濃厚啲亦有吃米特濃酸奶(HKD33/500cc[冷])。酸奶同黑紫米嘅組合有咬口,又唔會撐得太飽。 跟住有同酸味好夾,但又果香十足嘅百香果果(HKD38/500cc[冷])。顧名思義係加咗百香果啦,消滯真係一流! 再嚟有莓果粒粒(HKD38/500cc[冷]),士多啤梨令飲品清香又唔會太甜。 不過講到水果,又點會冇芒果呢?!芒芒果海(HKD38/500cc[冷])加咗黑紫米,有口感又飽肚啲。 如果想飲大杯啲,可以試加埋茉莉綠茶嘅VC酸奶益生菌系列,全部都係700cc㗎。其中益生草莓君(HKD40/700cc[冷])仲加咗少少檸檬,飲落再開胃啲添。   我是酸奶君 地址:旺角豉油街60 -102號地下A舖 電話:從缺 營業時間:星期一至日:10:00-02:00

0

【孖Deliveroo簽約合作 台式小店「請坐」真.復活】食焦

一直好得網民歡心嘅台式小店請坐,近日有好消息公佈。兩位台灣媽媽上月尾已經喺自家專頁出po,留言「尖叫聲!某英國企業看見我和T的外型及臉書人氣與故事,在幾個月的討論後,正式和我們簽約。其實我們連自己都不敢相信會有這麼一天。」粉絲知道喜訊都留言恭喜!等咗幾日,終於揭曉,原來係同外送App Deliveroo合作! 兩位台灣媽媽今次會喺中央廚房戶戶小廚炮製食物,由Deliveroo外送,暫時服務地區只限銅鑼灣、灣仔同金鐘!粉絲當然即刻支持,仲po埋相出嚟話終於可以食返台灣媽媽嘅味道喇!而兩位媽媽仲隱約透露埋另一個好消息,就係實體店已經準備中,好快面世,至於地點喺邊?好多人都估會唔會開返喺西環! 其實當兩位台灣媽媽宣佈會同一間英國企業合作,仲未開估係Deliveroo之前,有唔少粉絲都有留言提醒佢哋今次簽約要睇清睇楚先好,唔好再好似上次咁易信人,最後累埋自己,搞到要停業!講返少少歷史,上次為咩要停業?長話短說,就係兩位台灣媽媽疑似遭到另一位股東侵股,又攞埋請坐個商標,俾人喺尖沙咀開咗間A貨請坐……最後兩位媽媽將西環店無奈停業。 兩位台灣媽媽嫁到香港17年時間,由最早期嘅小店「吃什麽」、到西環「請坐」,再到獲米芝蓮美食推介,然後爆出停業風波,期間真係一步一腳印!今次俾Deliveroo睇中合作外賣服務,據兩位媽媽所講,原來係多得一個熟客牽線,呢位熟客就係Deliveroo嘅員工,全靠佢向老闆講咗「請坐」故事而成功拉線!依家難得「復活」,大家有機會食返媽媽味道嘅蛋餅同魯肉飯啦,下一步,梗係盡快開新店,請大家坐坐啦!