Tagged: 新蒲崗

0

【容記港九狂開5店 冬天恩物雞煲翅+羊煲】容記小菜王

上年攞咗米芝蓮嘅容記小菜王今年發大嚟搞,最新一間開喺新蒲崗。雖然容哥退出咗,但食物水準都唔錯,每間舖嘅大廚都會跟足方法同分量去煮,令出品一致性高啲。下個星期就轉冷喇,呢度嘅煲仔類同小炒類,食完包你成身暖笠笠! 裝修格調走新派啲,好光猛又好寬敞,晚市六點就已經有客人開飯喇。 濃湯雞煲翅(HKD368/單點)有八両翅,同湯底分上,大約分到6-7碗,分量都幾多。湯底入口有啲火灸味同強勁嘅鮮甜味,原來大廚先將一隻鮮雞斬兩份,一份用嚟熬湯,先蒸兩個半鐘令啲肉鬆散啲,然後煎到金黃色起少少焦,即刻撞滾水就有奶白色湯底,仲起埋膠;另一份雞就用返雞湯煲熟,成窩上可以食埋。 湯底會喺客人面前煲滾之後落魚翅,不過魚翅唔需要滾好耐,熱返就食得。 如果想食得抵啲,喺17:30-21:00入座就有得點晚飯孖寶(HKD328-388,星期六、日及假期另加HKD40),除咗有原份濃湯雞煲翅,仲可以揀配清蒸沙巴仔(約14両至1斤)、古法炆龍躉件或上湯焗加拿大龍蝦(約1斤),仲喺魚缸新鮮即撈㗎。咁樣一個價錢有兩味餸,堅抵到爛囉,大廚話希望攞個口碑,等大家都食得滿足呀! 古法黑草羊煲(HKD298,21:00後入座HKD148)都係冬天暖身嘅不二之選,一煲有1斤羊肉,完全唔羶!皮肉都炆都好軟腍入味,未點腐乳已經好夠味。仲有大量馬蹄同枝竹鋪喺底,同埋本身已經煮得夠時間,好快就食得。 雖然今次唔係主力介紹米芝蓮菜式,但都要試呢度嘅揚名國際燒肉(HKD98/細)。用新鮮腩排每日即醃即燒,燒肉嘅皮脆到隔兩個位都聽到嗦嗦聲,醃得好入味,點芥末反而會搶咗本身嘅肉味。提提大家燒肉中午只限堂食,夜晚17:30開始先提供斬料外賣,一般20:00左右就賣晒喇。 跟住到呢度嘅鑊氣小炒,味道濃郁,送酒真係好夾㗎!拔絲鳳梨豬頸肉(HKD88)味道同咕嚕肉差唔多,但煮法調節後做到拔絲效果,即使放耐咗都唔會變漿。厚切豬頸肉只係上咗好薄嘅炸漿,煮完之後肉質保持到爽彈有咬口,感覺令人好滿足。 小編平時好怕食韭菜,因為怕有草青味,但呢個容記小炒王(HKD88)唔單止冇草青味,韭菜依然好鮮嫩惹味。除咗夠鑊氣,仲因為佢比平時食嘅多料,有大量銀魚仔、魷魚、蝦乾、蝦片同腰果,爆炒後令鹹香味同鮮味更加突出。 豉椒味菜炒鵝腸(HKD88)用新鮮鵝腸,冇咩鵝油,唔會覺得好肥。質感好爽滑有彈性,同打邊爐食到嘅完全係兩回事!   容記小菜王 地址:新蒲崗寧遠街10-20號渣打銀行大廈地下F號舖 電話:2341 2088 營業時間:星期一至日:07:00-15:30,17:30-00:00

0

【貼地茶記打邊爐出晒名 雙龍海鮮鍋鮮甜多料】玫瑰餐廳陳儀興

呢排天氣真係好似女人咁好難捉摸呀!趁住仲有少少涼意,小編約埋班fd打吓邊爐喇,早就聽聞新蒲崗有間茶記玫瑰餐廳陳儀興打邊爐好食到出晒名,梗係唔執輸去試吓啦! 今次嗌咗呢個雙龍吐珠海鮮鍋(預訂價HKD298;原價HKD308),鍋底用蔬菜墊底,有栗米、南瓜、蕃茄同菇類,全部索晒海鮮嘅鮮味,正呀! 至於主角海鮮方面就有本地龍蝦仔、貴妃蚌、蝦、大大隻元貝同大蜆,款款都超鮮甜,肉質彈牙。呢個鍋係4人分量,大家早一日預訂就減10蚊!原價係HKD308㗎。 打邊爐除咗要有好嘅海鮮,湯底亦非常重要㗎!巨龍海鮮鍋用咗多款海鮮配料熬製而成,飲落啖啖龍蝦鮮味,鮮甜得嚟又清新,最重要係一啲都唔油膩,啱晒一眾怕肥又想打邊爐嘅為食貓喇! 如果嫌食海鮮唔夠喉嘅話,店內都提供多款火鍋配料俾大家選擇。小編揀咗呢個黑松露墨魚丸(HKD98)喇,咬入口相當彈牙,仲咬到粒粒墨魚添;而且黑松露特有嘅「煤氣味」亦相當出,聽侍應講,原來呢款墨魚丸係廚師親手打㗎!果然係機器做唔到嘅口感! 另外不得不推介呢個魚鰾(HKD68),其實小編咁大個人都未食過,因為一直覺得賣相麻麻,血淋淋又脹卜卜咁。不過侍應哥哥話,「平時你哋食嗰啲花膠呀,咪就係魚鰾本人囉,曬乾咗之嘛!」咁小編即管試吓,食落係有少少腥嘅,不過咬得出啖啖骨膠原嘅感覺,好「膠」呀! 雖然係海鮮鍋,但打得邊爐又點可以唔食牛喎!呢款超正牛爽肉(HKD68)食落滑嘟嘟,從肉上嘅花紋可以睇到佢嘅脂肪比例冇一般肥牛咁高,啱晒怕肥嘅女士們呀!另外如果男士們始終都係愛肥牛嘅話,亦可以嗌埋呢個招牌手切本地肥牛(大)(HKD218),比起平時食開薄過塊紙嘅肥牛呢,呢度嘅肥牛真係好有咬口,而且好有牛味,非常新鮮!   玫瑰餐廳陳儀興 地址:新蒲崗爵祿街33A-37A號百勝工廠大廈地下 電話:3583 1123 營業時間:星期一至六:07:00-23:00;星期日:18:00-22:30

0

【新蒲崗隱世小店 懷舊風歎fushion菜】Le Sucre

大多數人對新蒲崗嘅印象可能係舊工廠區,無咩嘢好食,但其實喺Mikiki商場對面嘅越秀廣場都可以搵到真‧隱世小店,就係Le Sucre,為食嘅小編決定嚟試一試佢! 用黑膠唱片做裝飾嘅Le Sucre,feel得到嘅懷舊風,地方雖然唔係好大,但座位好舒適,幾個朋友一齊嚟,一路傾偈一路享受美食,啱晒放工聚會休息吓。 鹹鴨髀就食得多嘅小編,見到呢款法式香酥油鴨脾伴日本太陽蛋及法包 (HKD148)咁大隻都有啲驚喜,切開咁誘人嘅太陽蛋同鴨髀放上多士上面一齊食,原來味道係咁夾! 又有驚喜,啖啖都係肉嘅香蒜辣汁忌廉蟶子皇扁意粉 (HKD168),怕辣嘅朋友記得嗌小辣,扁意粉同忌廉完全依附喺一齊,食落好多汁,入面嘅辣味更令人停唔到口添! 未上檯都聞到黑松露香氣嘅雞翼配黑松露醬 (HKD58),咪以為炸嘢一定好乾身,外脆內Juicy,食落就知大廚有心思。小編點住黑松露醬咁食雞翼,真係停唔到口。 大廚極力推薦我哋嘅意大利蛋提拉米蘇配雲呢拿雪糕 (HKD98),真係用咗意大利蛋嚟整,食落香滑又唔膩,口感仲好似食緊蛋餅添啊!叫小編正餐食呢個一樣無問題。 Le Sucre 地址:新蒲崗寧遠街3-23號越秀廣場地下G01號舖 電話:96838484 營業時間︰12:00 – 23:00 (註︰每月第二及第四個星期三營業時間為12:00 – 17:00)