Tagged: 新開

0

【深水埗居酒屋獨創果味和食 「蟹黃」撈飯配蘋果叉燒】夜館

可能係全港首間主打水果入饌嘅日式居酒屋?!有別於一般日式食堂,深水埗新開嘅串燒居酒屋夜館主打水果做主題嘅健康和食料理,農家蟹黃撈飯配蘋果叉燒、果味雞扒定食、特色釀雞翼等等都係呢度獨創嘅特色菜。呢度更會密密換新菜、推新品,令大家有更多新鮮感,即刻睇吓有咩好食先! 由門口入到嚟店面都有唔少日本裝飾元素,而且仲有唔同品牌嘅日本酒樽滿佈成間居酒屋,好有日本地道小店嘅感覺。 小編見黑板上大大隻字寫上廚師推介,究竟呢道農家蟹黃撈飯配蘋果叉燒(HKD98)有幾特別先?叉燒用自家醬汁加入蘋果燘煮,蘋果香味融入叉燒當中,入口清甜不膩,而且叉燒選用梅頭肉嚟煮,肉質軟腍。另外,所謂「農家蟹黃」就係蟹黃嘅平民版,用咗甘荀、南瓜同薯仔加入蟹汁壓成蓉,做法非常創新,撈飯一流。 呢款果味雞扒定食(HKD55)棄用和食常用嘅味醂同現成日式醬油,自行研發用水果調配嘅醬汁,好食兼有益!雞扒連鮮橙一齊煮,橙汁嗦埋入雞肉度,酸甜開胃。定食裡面仲唔止有一塊大雞扒,仲拼咗兩隻雞翼,相當抵食喎。 去居酒屋就梗係要食日式串燒啦,平時原隻雞翼串燒就食得多,釀咗雞髀肉嘅雞翼又食過未呢?夜館特色釀雞翼(HKD38)係呢度嘅必食串燒,師傅將雞翼拆單邊骨,再釀上撈咗杞子同淮山嘅雞髀肉,燒到皮脆肉嫩嘅雞翼串食落有兩種雞肉質感,果然係心機菜! 賣相咁搶眼嘅響鈴彩椒(HKD38)喺三色椒入面加咗少量雞肉,師傅專登唔釀得咁滿,令佢有好似響鈴咁嘅效果。燒過嘅彩椒可以鎖住釀肉嘅肉汁,都係值得一試嘅佐酒小食! 日式串燒又點止咁少喎,好似即叫即燒嘅鹽燒牛舌(HKD38[上])同鹽燒豚肉(HKD28[下])都好啱佐酒㗎。鹽燒嘅方式可以食到食材嘅新鮮原味,而串燒蘸嘅秘製醬汁都會加入唔同嘅水果嚟提味。 依家唔少地方都有得食水果串燒,其中最受歡迎就係燒菠蘿。呢度嘅焦糖燒菠蘿(HKD58)比平時就咁燒有啲唔同,師傅將原條菠蘿燒到一半之後蘸上砂糖,再燒至融化帶陣焦香,一咬落去啲菠蘿汁唧晒出嚟,夠晒juicy。 除咗嘢食,呢度嘅重點梗係日本酒啦!店主會不時搜羅唔同嘅靚酒同食客分享,仲會駐場為客人調製唔同嘅特色Cocktail添。右邊嗰杯Roku Gin Tonic(HKD88)嘅Gin酒用咗櫻花、柚子、山椒等六種日本草本材料釀造,飲落層次豐富;而左邊嘅Chita Highball(HKD98)就用咗「知多」呢款單一穀物威士忌調製而成,入口比較順滑,唔係咁多地方可以飲到㗎!   夜館 地址:深水埗長沙灣道54號地下4號舖 電話:3596 7891 營業時間:星期二至日:12:00-02:00

0

【親子餐廳萬聖節合家歡活動 揸車去勻大型玩樂空間】Local自駕遊

周末又係親子樂嘅時間,一於揸車去勻本地熱門嘅親子餐廳啦。同場加推萬聖節限定嘅親子Brunch同埋變裝派對,未諗定今個星期帶小朋友去邊放電?就要睇落去喇!   1. 黃埔新開大型親子餐廳遊樂場 今個月喺黃埔啱啱新開嘅Campfire Play,佔地35000呎,係一間超大型嘅親子餐廳兼室內遊樂場,啱晒一家大細周末嚟親子樂。呢個歡樂波波池就係其中一個主題遊樂專區喇,另外仲有巨型繩網陣、轉轉水樂園、沙漠尋寶同互動城市4個專區。小朋友可以喺度玩高卡車、砌巨型積木等等放電,實玩到唔捨得走啦。 呢個親子空間係要買入場券入場嘅,另有「玩+食」自助餐,俾你哋邊玩邊歎中西料理、創意甜品。呢度仲會不定期舉辦唔同嘅課程同興趣班,想知更多詳情就要留意佢哋官方專頁喇。   Campfire Play 地址:黃埔環海街11號海名軒5樓 電話:從缺 營業時間:星期一至五:12:00-21:00,星期六、日:09:30-21:00   2. 數碼港萬聖節限定親子Brunch 就快到萬聖節喇喎,不如今個周末就去數碼港食個萬聖節Brunch應吓節啦!艾美酒店Prompt餐廳就推出咗一連兩日嘅萬聖節周末早午餐,除咗有即開生蠔、紐西蘭青口、澳洲西冷扒之外,仲有一系列全新設計嘅Halloween主題美食,夠晒氣氛啦! 食嘢之餘,可以玩埋Trick or Treat尋寶遊戲,去酒店唔同地方攞糖,餐廳仲準備咗魔術表演、面部彩繪同萬聖節水晶球工作坊添。呢兩日嘅下午2-4時,數碼港商場大草地仲會播放合家歡嘅萬聖節主題電影,食完Brunch睇埋電影就最圓滿喇!   萬聖節周末早午餐 供應時間:10月26-27日12:00-15:00 價錢:HKD588/成人、HKD288/兒童 (另收加一服務費) **無限暢飲紅白酒、啤酒、萬聖節特色雞尾酒及無酒精雞尾酒 艾美酒店Prompt餐廳 地址:薄扶林數碼港道 100號 電話:2980 7417 營業時間:星期一至日:06:30-22:30   3....