Tagged: 日式

0

【將軍澳限定menu 勁揼本原隻龍蝦吐司】 Mukia Japan Toast

將軍澳中心餐廳愈開愈多,上個月開張嘅Mukia Japan Toast,啱啱好喺正轉角位,舖頭唔算大,不過就好受附近返工一族嘅支持,一件日式吐司都夠晒分量,做lunch都無問題。 舖仔細細,但就感覺好休閒,即叫即整嘅Toast就喺正食客面前製造,絕對乾淨企理。 每日限量15份嘅原隻龍蝦吐司(HKD112),每日原隻拆肉放喺烤香咗嘅麵包上面,仲有香甜嘅蘋果薯仔沙律,口感更加清甜。 分量都好夠,建議2-4人買兩款,咁咪可以share,又試多啲啦! 同樣係將軍澳限定嘅日式芥末醬和牛什菌吐司(HKD79),有香軟嘅和牛片,微辣嘅芥末醬為吐司生色不少,夾埋煎蛋同爽口嘅什菌菇,又出乎意料地幾夾喎! 有拉麵又有小食嘅極尚‧海老多士定食(HKD118),仲可以配埋指定咖啡,和牛片一樣嫩滑唔會咬唔爛,湯底仲係每朝用豬骨熬製,鮮甜味美! 小編就揀咗補十幾蚊差價嘅鮮果乳酪草莓沙冰(HKD38),勁大杯,入面有西瓜、哈密瓜同士多啤梨,Topping嘅乳酪同沙冰配合得啱啱好,酸甜嘅口感,啱晒少女有得飲有得打卡。 Mukia Japan Toast 地址:將軍澳唐德街9號將軍澳中心地下G92號舖 電話:3586 3600 營業時間︰星期一至日 10:00-22:00

0

【認真!入到嚟最緊要Hea 家的感覺唔嚟過唔覺】Casa

香港人日做夜做,最大心願都係辛苦完一日有得舒舒服服咁抖返下。想無憂無慮咁hea返陣,去呢間位於西貢嘅Casa飲返杯,食返餐就一定啱晒你。”Casa”西班牙文解做「家」,佢地非常非常認真咁令你可以放輕鬆,出街去食餐飯都可以feel home! 餐廳用嘅檯凳都好講究舒適度,包保唔會坐到你周身唔舒服,大家仲可以喺入面行下、飲下、食下,總之你想點就點,開心舒服就得! 講到家,大家一定諗到家常菜,但係呢度嘅食物係包羅晒環球美食,不過用日式煮法送上,夠晒特別!呢個Tuna & Avocado (HKD100)就係日本墨西哥Fusion,吞拿魚用咗柚子醃製,配埋牛油果、蘿蔔同wasabi醬,入口清新口感又夠豐腴! 想食肉就一定要試Beef Tenderloin (HKD100)選用新西蘭牛肩脊,啖啖都彈牙又多肉汁,配埋wasabi辣辣地好惹味呀! 大阪燒小編就食得多,呢度嘅Okonomiyaki (HKD50)就好得意咁分開一件件咁上,入面有大量椰菜,蛋漿食落軟綿綿地唔油膩。上面再加埋蜜糖、燒汁、沙律醬同香蔥,味道香濃。 Casa 電話:5594 0007 地址:西貢海傍廣場1號兆日大廈地下1號舖 營業時間:星期一至日:10:00-00:00

0

【味蕾最高享受!九龍城巧手上品居酒屋】Sakaya

Sakaya位於九龍城獅子石道,食物以串燒為主,主打雞、和牛同埋海鮮。選材上乘講究,全部都由廚師精心巧手製作,簡單如燒蠔亦都會嚴選北九州蠔,加上自家製醬汁配搭,處處盡見心思。餐廳環境幽靜,講究情調,最適合同朋友一齊把酒聊天! 店外放滿日式碗碟同酒樽,再加上木製外牆,喺泰國菜館滿街嘅九龍城令人眼前一亮。 餐廳室內燈光較暗,想同朋友靜靜地傾計非常適合! 北九州燒生蠔(HKD68/隻)採用北九州蠔,肉質非常鮮甜,入口軟滑。再加上自家製醬汁,鮮嫩多汁,令人欲罷不能! 白露筍黑豚串(HKD38/串)  採用黑豚肉捲白露筍,口感清爽唔會膩,白露筍吸收咗黑豚肉嘅肉汁,配上沙律醬更加有入口即溶嘅感覺。 雞掌心(HKD45/串)以人手切出雞掌心,工序十分繁複,非常考驗廚師手藝。雞掌心脂肪均勻,燒完之後香氣四溢,雞皮金黃香脆而雞肉柔嫩多汁,加上size啱啱好一口一件,真係好食到停唔到口! Sakaya 地址:九龍城獅子石道15號地下 電話:2382 6988 營業時間:星期一至日:12:00-15:00;18:00-23:00

0

【浪漫二人前 瀛爆日式火鍋套餐】勝手

火鍋係香港人最愛,通常一大班人想坐低傾下計,烚下烚下就啱晒。如果想人少少食火鍋,食得專門啲,可以去邊呢?銅鑼灣勝手就係一個好地方,人少少都可以好好享受日式火鍋,而且唔係放題形式,而係以套餐形式選擇,食物質素更有保證! 小編今次重點介紹Shabu Shabu二人套餐,套餐共包括七種食物。今次套餐嘅前菜係前菜九點,顧名思義,一共有九種前菜,非常豐盛。啱晒shabu shabu等緊野熟果陣,可以同朋友一路食一路慢慢傾計。 然後必須隆重介紹一下套餐可以揀選嘅北海道活毛蟹。北海道活毛蟹全身都有細小絨毛,毛色金啡,蟹殼比較薄,價格十分矜貴。相比其他蟹,北海道活毛蟹嘅肉纖維細密,會見到蟹肉一絲一絲好緊密,蟹肉亦都填滿蟹身蟹腳,甚少「虛位」。食落唔止啖啖肉,蟹肉又幼嫩又鮮甜,相比其他蟹,更清新鮮甜,味道更持久不散。再加上濃郁蟹膏散發淡淡海水味,食完整個口腔都會有陣陣蟹香鮮甜縈繞不散,十分高享受! 套餐價錢係根據主菜而定,小編揀咗鹿兒島西冷和牛A5(150g)套餐(HKD1680),A5和牛脂肪分佈十分平均,肉質鮮嫩帶有濃香牛肉味,油脂令入口感覺更油潤滑溜,食落有入口即溶嘅感覺。另外仲有一隻北海道活毛蟹添!  Shabu Shabu又點可以無蔬菜呢?放心,除咗主菜之外仲有新鮮什錦菜籃,無花無假,真係每樣食材都好新鮮!食落啖啖都有鮮甜蔬菜味道,一洗肉類嘅油膩感之餘, 鍾意食稻庭烏冬嘅朋友必定要試一試手打稻庭烏龍麵,質感煙煙韌韌,但係入口出奇順滑,仲有少少爽滑彈牙,值得一試! 至於甜品,小編今次跟餐嘅甜品係紅豆奶凍,甜香嘅味道留喺口裡面久久不散,為你整個套餐畫上一個完美句號。除咗食物之外,餐廳都有提供多款唔同類型嘅清酒可供選擇。大家一邊慢慢品嚐豐富美食嘅同時,可以飲返幾杯,享受寫意時光。 勝手 地址:銅鑼灣百德新街55號華納大廈地下E號舖 電話:2577 2628 營業時間:星期一至日:12:00-15:00,18:00-23:00

0

【尖咀隱秘日式食堂】東京食堂

尖沙咀雖然有好多商場連鎖餐廳,但係食得多都想試下新口味,唔想再食嚟食去果幾味!小編發現一間位置非常隱秘嘅東京食堂,佢位於尖沙咀柯士甸大廈裡面。當你走入小巷,望向左邊,見到大大隻Minions就知道無去錯地方啦! 小店只有十個位左右,經常都大排長龍!但係因為質素有保證,就算要等都好值得! 蒲燒鰻魚(半)(HKD68)選用日本原條鰻魚,鰻魚肉質肥美,入口感覺軟腍,配料有鮮甜粟米同多汁車厘茄。醬汁由小店自家調製,香甜味美! 除咗可以嗌一條鰻魚之外,仲可以選擇套餐。原條蒲燒鰻魚飯(HKD128)套餐包括麵豉湯和珍珠米,份量非常足夠。珍珠米選用日本珍珠米,入口帶甜味,配上飯素更覺惹味。整個套餐配上木托盤和筷子,體現出一份淡淡日系感覺。 小店最具人氣食物就係大阪燒(HKD98),無論製法以及材料都依照日本做法,而且即叫即做,客人落單之後先會調粉漿,再落椰菜絲,煎豬肉片。最後混和日式燒餅汁再灑上紫菜和木魚絲,香氣四溢! 大阪燒內裡十分嫩滑,加入咗大量椰菜絲感覺有啲爽口,口感豐富,完全唔會覺得膩。 餃子雞翼(2件)(HKD24)雞翼迷必定要試試餃子雞翼,咬落會有豐富肉汁滲出,而且口感嫩滑無比,價錢亦合理,必定要試一試! 東京食堂 地址:尖沙咀柯士甸路15A柯士甸大廈地下D舖 電話:5616 6159 營業時間:星期一至日:12:00-16:00;18:00-21:30