Tagged: 日本直送

0

【宮城海產期間限定 時令劍魚片盛宴鮮味】割烹 櫓杏

想食新鮮嘢?唔一定要飛日本嘅,由依家到12月10日,割烹 櫓杏會推出宮城三陸海之幸祭期間限定,即係可以食到日本東北部宮城縣嘅新鮮海產。小編一於試吓佢有幾鮮啦!位於尖沙咀嘅割烹 櫓杏,環境開揚闊落,重點係望到海景呀!食埋新鮮海產好夾啦! 熊本×宮城三陸海之特別一人套餐(HKD1380), 特別套餐包括前菜,刺身,蒸、燒、炸、鍋、醋、湯物,壽司同甜品。所有食材都用宮城縣出產嘅海鮮炮製,原汁原味由頭食到落尾,捧住個肚走啦。過千元一個一人餐,價位當然唔算親民啦,但有齊咁多款食物兼新鮮運到,呢個價錢叫一個但可以share食,值喎! 蒸物之特製茶碗蒸。用咗三文魚籽同燻製三文魚加落茶碗蒸入面,煮嘅過程三文魚嘅鮮味滲到入蛋中,配埋高湯蒸煮,每一啖蒸蛋都散發住魚鮮味,而且雞蛋嫩滑、鮮味十足,食過返尋味呀! 鍋物有宮城產劍魚片涮涮鍋,平時食牛涮鍋就食得多,魚涮鍋又食過未呢?仲要係好少見嘅劍魚片,將肉質結實肥美嘅劍魚切片,配合自家製微辣嘅昆布湯底,突出咗劍魚原有味道同埋鮮味,小編覺得好好食呀! 輪到醋物出場宮城產稻草燻真蠔。真蠔食落去肉質結實又飽滿,配上特製嘅番茄醬,一啖咬落去,蠔身就即刻滑入口中,成個口腔充滿住海水嘅鹹味,經過稻草嘅燻香令真蠔嘅味道更加突出,真係愛蠔之人必食之選呀! 除咗呢個特盛套餐,餐廳仲有其他宮城直送嘅特色料理,仲唔快啲拉大隊去食返餐勁?   割烹 櫓杏 地址:九龍尖沙咀彌敦道63號國際廣場28樓2801號鋪 電話:2818 0031 營業時間:星期一至日:12:00-14:30,18:00-23:00

0

【激鮮!日本海鮮即捕直送】焱丸水產

大家食開日本料理都知,食材新鮮最緊要!焱丸水產標榜每日將日本海鮮即捕空運到港,鮮味滿分。仲由日籍大廚設計咗多款嶄新又獨特嘅菜式同埋季節性料理,令你唔駛飛去日本,留喺香港都可以品嚐日本地道風味美食同埋築地最新鮮嘅水產。 鮮味海栗湯(HKD198)每日限定只有20份,絕對不可不試。湯底以新鮮海膽及各款海鮮煮成,飲落味道非常鮮甜。湯底煮滾後,加埋蔬菜同海鮮,海鮮輕輕煮一分鐘就可以食啦!而煮過海鮮嘅湯底,鮮味會變得更加濃郁,呢個時候加埋烏冬或者飯再煮多陣,就製成咗海鮮湯飯或海鮮湯烏冬,有機會一定要試下呀! 松葉蟹の煲(HKD228)肥美嘅松葉蟹一定係秋冬必選!首先以新鮮嘅海鮮餚湯,再加入鮮味濃郁嘅蟹膏,再擺埋肥美嘅松葉蟹腳同埋各款鮮甜時令蔬菜落去。當松葉蟹腳同埋蟹膏遇上,就會將蟹嘅鮮味進一步帶出。最後再加入珍珠飯、雞蛋及葱花,就即刻可以食到鮮甜味美嘅蟹粥啦。 貝の風呂浴(HKD98)湯底不含味精,以多款新鮮小魚加入昆布餚製而成,再加入貝類海產,味道獨特而鮮甜。主要貝類包括時令花甲、扇貝、大蜆等,煮好嘅貝殼類海鮮吸收咗魚湯嘅鮮甜,鮮味爆燈! 刺身壽司定食(HKD198)日本料理又點少得刺身及壽司?食材同樣係由日本空運到港,好鮮味!呢個刺身壽司定食,壽司方面有三文魚腩、魚籽、蟹膏、帶子同北寄貝等;刺身就有吞拿魚、鱆紅魚同海膽,款款都非常肥美又鮮甜,鍾意食魚生嘅你千祈唔好錯過啦! 海の幸(HKD88)具備3種獨特食法,兩款刺身飯唔單止可以自選,仲可以蘸特別調配嘅芝麻醬配搭或者用紫菜包住食。再唔係又可以將茶壼入面嘅茶湯同魚生飯混合,用佢嘅微熱令魚生滲出油分,令魚生肉質更加嫩滑,三種食法都好好味! 焱丸水產 (えんまる水產)  本店地址:尖沙咀棉登徑23號華楓大廈地下5&6號鋪 電話:2654 8200 營業時間:星期日至三:12:30-15:00;18:00-00:00      星期四至六:12:30-15:00;18:00-02:00 地址:銅鑼灣謝斐道440號駱克大廈B座C2地舖 電話:2907 2838 營業時間:星期日至三:12:30-15:00; 18:00-00:00      星期四至六:12:30-15:00; 18:00-02:00

0

【雪雪聲滋味將軍拉麵!】武士拉麵

講起尖沙咀金巴利街一帶,大家可能會標簽係韓國街,但喺佈滿韓式餐廳嘅街道中有間以日本武士命名嘅日式拉麵餐廳,真係萬綠叢中一點紅,格外醒目!武士拉麵嘅每一碗拉麵都以日本將軍命名,而且都係最出名嘅將軍,每個將軍代表著唔同口味湯底,咁神秘?!小編都忍唔住去同將軍會面。 傳統日式拉麵小店裝潢,由門簾已經感受到濃郁日本風,店内武士裝飾擺設更加係獨具一格,深信老闆對日本武士熱愛程度一定唔低。另外小店雖然唔大,但服務夠周到,牆上嘅衣架係提供俾客人掛外套衣服。 武士拉麵嘅湯底可以話係小店嘅生招牌,豬骨湯底係每日新鮮豬骨文火煲8個鐘,骨膠原都出曬嚟啦。湯底仲加咗魚介,魚介由六款唔同類型魚乾熬製,再加入雞骨及蔬菜等材料煮十幾個鐘而成。德川將軍拉麵(HKD88)就有齊呢兩種味道。香濃豬骨湯底,濃而不膩,帶有清甜魚香。日本空運過嚟嘅叉燒肥瘦均勻,原來餐廳有精心挑選過再加上特製醬汁微烤,所以更加入味。 食唔慣重口味嘅可以試下呢個豐臣將軍拉麵(HKD98),一上檯香蔥味已經撲鼻而來,湯底並無想象中油膩,反而好清香。拉麵口感煙靭彈牙,小編「雪雪聲」就食曬碗拉麵,再飲啖麵湯落肚,香濃味道從舌尖一直傳到胃度,簡直「一級棒」ichiban! 食拉麵點少得溏心蛋(HKD10),褐色外皮,半凝固嘅黃蛋極具誘惑,小編都忍唔住咬一啖,滿口嘅香濃嫩滑,每一口都幸福感爆棚! 武士拉麵 地址:尖沙咀柯士甸路15號柯士甸大廈B座地下 電話:2369 3211 營業時間:星期一至日:12:00-15:00;18:00-22:30