Tagged: 日本菜

0

【日式料理新店3大主打 壽司×蕎麥麵×日本酒】SUSOSHU

高質嘅日式餐廳都有自己獨特嘅賣點,而尖沙咀新店SUSOSHU就以「壽司 Sushi」、「蕎麥麵 Soba」同「日本酒Nihonshu」三大元素做主打。呢度有正宗日本地道手法嘅午餐同晚餐,無論係料理款式定係壽司款式,都會用上日本多個地方直送嘅新鮮食材,務求令你有置身日本嘅感覺。依家新張期間,午餐第二位仲有7折優惠添。

0

【頑固壽司登港午市$138起 15道廚師發辦日廚主理】頑固壽司

頑固壽司Ganko Sushi喺大阪起家,嚟到香港尖沙咀開第100間分店,最引嚟熱話嘅就係由日籍主廚 Muneta親自主理嘅高CP值廚師發辦套餐,介紹之前睇吓環境先。 日本風格俾人感覺好柔和同輕鬆,最入面就係主廚壽司吧枱。 餐廳午市套餐有9款定食,由魚生、燒物到天婦羅都有。而晚市當然要試由日廚主理嘅Omakase啦,師傅會按食材調整菜式,但基本一定有15道菜,相當抵食喎。依家先介紹幾款午市套餐啦! 海鮮丼定食(HKD198)配咗茶碗蒸、小鉢同味噌湯。丼飯配咗三文魚、三文魚籽、海膽、松葉蟹腳、牡丹蝦等8款魚生,用料豐富之餘仲件件都好新鮮添。 天婦羅壽司定食(HKD178)有齊雜錦天婦羅同壽司5貫,而且仲係鰤魚、三文魚子、平目魚、三文魚同鐵火卷。輕食得嚟滿足到想試齊天婦羅同魚生壽司嘅朋友,同時都配有茶碗蒸、小鉢同味噌湯。 鰻丼定食(HKD138)嘅鰻魚都幾大件同入味,冇好肥膩嘅感覺,有咬口唔會一夾就散。丼飯嘅飯量幾多,食晒成分都好飽肚。 嚟到時市嘅Omakase廚師發辦套餐(HKD720),小編當日試到18道,但會視乎食材以15道為基準。呢四款前菜之中,螢光魷魚(左上)係時令菜式,連同燒平貝殼(帶子)配山椒菜醬為一款;另外,仲有櫻花𩶘魚湯(右上)俾你清一清口腔嘅味道再試下一道海螺配蜜柑啫喱(右下),而微微燒過嘅大拖羅(左下)配上用日本百年歷史醬料廠嘅生七味醬同柚子胡椒醬,特別有風味又可以減但油膩感。 灑上青檸皮同岩鹽嘅平目魚壽司(後)、中拖羅壽司(左)同埋用深海魚赤綠(右)整成嘅炙燒壽司,味道濃郁而口感就偏軟腍。 鮟鱇魚肝(左)燒過後放上梅味七味醬,配搭櫻花蝦天婦羅(右)相當惹味。 再嚟四道清新嘅菜左,右邊配上紫蘇葉嘅針魚壽司係師傅推介嘅單點壽司之一! 北海道馬冀海膽壽司、特色嘅柚子大根壽司(右上)等都係令人回味嘅壽司! 最後仲有冇經漂白製作嘅蕨餅甜品,蘸上黃豆粉再加醬汁一齊食,幾爽口㗎。 如果想試簡單又多完化嘅選擇,特上壽司拼盤12貫(HKD320)都啱你喎。12款壽司有齊港人大愛嘅拖羅、牡丹蝦、帶子、北海道馬冀海膽等熱選壽司款式,件件都用料十足,絕對令你品嚐到魚鮮嘅肥美口感同味道。   頑固壽司 地址:尖沙咀河內道18號 K11購物藝術館1樓 106號舖 電話:3905 2316 營業時間:星期一至五:12:00-15:00,18:00-22:00,星期六、日及公眾假期:12:00-22:00

0

【DIY簡易版一人和食(下) 蘿蔔豚角煮×湯水篇】炊咩

上星期教咗大家DIY和食前菜,今次當然到主菜啦。平時做嘢辛苦要食好啲,肺炎之下就更加要注重啲。不過咁樣唔代表難煮,相反可以好簡易添。今次整埋蘿蔔豚角煮同紅菜頭野菜湯,再結合上次嘅前菜就有齊三餸一湯成set和食喇。事不宜遲,即刻整完在家呃吓like 啦! 蘿蔔豚角煮 材料與分量: 白蘿蔔 – 1/4條 五花肉 – 150-200g 薑 – 10g 水 – 約1500-2000ml 糖 – 2茶匙 清酒 – 1湯匙(可以按個人口氣味調整) 蠔油 – 2湯匙 鰹魚醬油 或 日式醬油 – 3-4湯匙 做法: 1. 將白蘿蔔洗淨削皮處理好,切塊狀後汆水3分鐘隔水備用,令蘿蔔變軟少少同去除草澀味,之後會較易入味。 2....

【DIY簡易版一人和食(上) 常見蔬食炮製冷熱前菜】炊咩 0

【DIY簡易版一人和食(上) 常見蔬食炮製冷熱前菜】炊咩

最近肺炎疫情持續蔓延,對外出食飯都可免則免,再加上學校停課同Home office,變相大家留喺屋企時間多咗。小編們有見及此,一於教大家整返幾味!只要用白蘿蔔、紅蘿蔔、紅菜頭、油炸豆皮同豬肉5款常見嘅食材再加啲調味料,就可以煮到三餸一湯,簡單易整之餘仲可以有成set和食料理,咁喺屋企都有呃like嘅日式家常菜啦。今次上集就先教兩款日式冷熱前菜!   開胃醃蘿蔔 材料與分量: 白蘿蔔 – 1/4條 鹽水 – 約1茶匙鹽 白醋 – 100ml 食水 – 300ml 砂糖 – 適量(按個人口氣味調整) 做法: 1. 將白蘿蔔洗淨削皮處理好,按個人喜好切成粒 、薄片或條狀。 2. 放入鹽水浸泡約1個鐘,去除蘿蔔嘅苦澀味。 3. 準備醃醋,水同醋嘅比例係 1:3。 4. 再按個人口味加入砂糖(建議用茶匙做單位),小編落咗1-2茶匙味道就偏酸,鍾意偏甜嘅朋友要落多幾茶匙喇。 5. 將蘿蔔隔開鹽水,出用廚房紙吸乾表面水分。 6....

0

【《新加坡米芝蓮指南2019》首現三星 兩間法國餐廳包辦殊榮】新加坡米芝蓮2019

《新加坡米芝蓮指南2019》新出爐,依家又開始多假期,如果去開新加坡不妨試吓指南介紹嘅餐廳。其中兩間法國餐廳包辦自2016年新加坡首屆米芝蓮之後,第一次出現嘅三星殊榮添。另外,介紹多五間兩星餐廳,有埋中、日、歐陸菜,等你有多啲選擇啦。 三星餐廳 Odette2015年開業,環境簡約有現代感,主打精緻嘅現代法國菜,擺盤仲好似畫咁靚。但其實呢間餐廳係主廚Julien Royer向祖母致敬,教佢點用純正嘅食材烹調菜餚。Julien Royer成日攞獎,而傳家寶甜菜、香熏有機蛋、脆皮鯛魚、檸檬撻等都係呢度嘅熱門菜式。   Odette 地址:1 St Andrew’s Road, #01-04, Singapore 電話:+65 6385 0498 營業時間:星期一:19:00-20:15(最後入座時間),星期二至六:12:00-13:15(最後入座時間),19:00-20:15(最後入座時間)[星期日及公眾假期休息] 人均消費:約SGD151起   另一間三星法國菜餐廳Les Amis,氣派嘅裝潢加上傳統嘅法國菜,自1994年開業就吸引唔少人嚟。喺度可以品嚐時令嘅法國菜式之外,仲有恆溫恆濕控制嘅酒窖,大約收藏到3,000支酒,佢嘅葡萄酒清單亦係亞洲區餐廳之中數一數二添。而魚子醬天使麵、法式豬肉批、近江牛馬鈴薯梳乎厘都係呢度嘅熱門菜式。   Les Amis 地址:1 Scotts Road, #01-16, Shaw Centre, Singapore 電話:+65 6733 2225...

0

【三大日本過江龍天婦羅丼飯 金子半之助質勝天丼抵食】金子半之助、天吉屋、天丼

日本過江龍天婦羅丼飯次次登陸香港都牽起陣熱潮,近排唔少朋友仲問小編金子半之助、天吉屋同天丼邊間好食啲,所以即管嚟個大比拼啦!以5星為滿分,睇吓脆漿、天婦羅款式、CP值同變化度四方面,佢哋邊間跑出先。   金子半之助 金子半之助現時只有三款丼飯,而每款丼都有六款天婦羅。包括2隻鳳尾蝦、以墨魚粒同干貝製成嘅雜錦海鮮餅、溫泉蛋、海苔同小青龍(荷蘭豆),最後一款先會唔同。呢碗招牌嘅江戶前天丼(HKD138)就配咗25cm超長穴子魚天婦羅,視覺夠晒震撼之餘都幾飽。天婦羅外脆內嫩,juicy又夠水分,唔會好快就軟腍腍。醬汁方面鹹甜度適中,而天婦羅用高純度芝麻油炸會加咗味,基本唔使再落醬汁。加上佢哋用咗特別嘅丼碗保溫,食到咁上下啲飯都仲暖。而解膩小菜都好有驚喜,因為一般嗁漬物都好酸,但呢度嘅漬牛蒡好清甜;海帶伴薑就相對酸辣啲,但有一淡一重味嘅選擇幾貼心。   脆漿:★★★★☆ 天婦羅款式:★★★☆☆ CP值:★★★★☆ 變化度:★★☆☆☆ 總分:13星(總分20星)   金子半之助 地址:葵涌興芳路223號新都會商場1樓107-108號舖 電話:2661 8212 營業時間:星期一至日:11:30-22:30   天吉屋 天吉屋嘅前菜沙律可以無限添加,五款丼之中嘅天婦羅都會有啲唔同,最多嗰碗有十款㗎。香港限定軟殼蟹丼(HKD158)嘅軟殼蟹都幾多,有5、6嚿,都算大件啖啖肉;仲有用皇帝菜同櫻花蝦整成嘅什錦炸物、茄子、南瓜同溫泉蛋做配料。如果想食飽啲,呢款落單嘅時候,可以追加白飯(加HKD15)。但係脆漿幾快腍,加上主角軟殼蟹肉本身都係軟腍,所以口感冇平時嘅天婦羅咁脆口,會有啲油膩感;不過佢其他丼之中嘅黑虎蝦肉質好爽口彈牙,三間之中佢嘅蝦最出色。醬汁本身鹹少少,可能因為師傅淋得幾多,撈勻都可以唔使再加。不過其他丼飯之中,天幕御膳(HKD148)可以有三個食法,例如變成茶漬飯;而天吉雙品(HKD108)仲可以一份有齊飯同烏冬,配搭變化會多啲。   脆漿:★★☆☆☆ 天婦羅款式:★★★★☆ CP值:★★☆☆ 變化度:★★★☆☆ 總分:11星(總分20星)   天吉屋 地址:旺角朗豪坊11樓25-29號舖 電話:3105 0986 營業時間:星期一至日:00:00-22:30(22:00截單)   天丼 天丼最平嗰款丼飯只係HKD49,當食個Tea都ok,所以真係冇得同佢鬥CP值。而且喺丼款、天婦羅款式同麵款都係三間過江龍入面最多,有時仲會推出期間限定添。呢款海老穴子天丼(HKD82)係呢度最貴同最天婦羅嘅丼飯,配咗黑虎蝦、長穴子、本菇、蟹柳、南瓜、四季豆同紫菜。佢嘅脆漿唔算厚,亦唔會勁快腍,但金子半之助嘅畫花會幼細啲,所以相比之下佢嘅穴子輸個馬鼻啦。佢嘅飯幾多吓,所以醬汁唔夠撈到落底;可以免費追加醬汁,但建議唔好加太多,如果唔係會鹹咗啲。...

0

【沙田高CP值居酒屋夏日優惠 鐵板A4和牛香滑爆汁】北海道食堂

沙田中心商場有唔少餐廳,原來入面有間高CP值居酒屋北海道食堂!佢嘅刺身、定食、壽司同日式鐵板燒本身已經抵食,依家到8月尾仲有夏激安祭,HKD78起就食到六道大眾鍾意嘅菜式,睇埋落去包你即刻約飯友一齊嚟呀! 餐廳呈L型設計,每邊座位都好闊落,不過另一邊先見到鐵板燒位置。 第一款係海膽迷必食嘅活海膽(HKD78/隻),每日限量20客,鮮甜味爆晒燈好難忍口囉。 跟住到有勁量魚籽嘅兩款丼飯,同樣每日限量20客。三文魚親子爆丼(HKD98/上)鋪滿三文魚之後再淋五、六勺魚籽,或者食吞拿魚蓉三文魚子爆丼(HKD98)都同樣令人滿足㗎。 如果鍾意食刺身,咁就要試九州長崎直送嘅池魚刺身(HKD88)。原條池魚分量好多,厚切同薄切都有,令口感豐富啲,啖啖肉勁抵食。 跟住到兩款日式鐵板燒喇!鐵板活鮑魚(HKD78/2隻)原隻喺鐵板上邊燒邊薄切,加咗少少鹽同胡椒調味,再炒多幾吓就上碟,質感好爽口㗎。 而和牛迷一定要試每日限量20客嘅鹿兒島A4和牛牛肩胛(HKD108)!師傅炒香蒜片後以蒜油煎呢塊80g嘅牛肩胛,期間只係加少少鹽同胡椒調味。肉汁多到一咬即刻爆出嚟,肉味幾香又唔覺得膩,加埋蒜片一齊食仲更加惹味解膩添。 話明呢度係高CP值,介紹一款正價都超抵食嘅鐵板廣島蠔套餐(HKD118/午,HKD138/晚)。6隻脹卜卜,煎到外面少少焦香,內裡juicy嫩滑嘅蠔,配埋炒野菜、味噌湯、茶碗蒸、漬物、白飯同柚子蜜,無論午市定晚市食都夠晒豐富!   北海道食堂 地址:沙田橫壆街2-16號沙田中心商場3樓50及57號舖 電話:2625 1078 營業時間:星期一至日:12:00-22:00

0

【浜燒水產專門店限定新菜 $98任食甲羅燒回本】漁獲浜燒

浜燒水產專門店嘅食物一定要夠新鮮同鮮味,而啱啱喺尖沙咀開分店嘅漁獲浜燒就推出唔少新店限定菜式,有蟹釜飯、河豚料理、豆喜知次塩釜燒等,保證俾你試到層出不窮嘅鮮味係點。新店仲有任食味噌蟹甲羅燒優惠,正到咁,即刻睇真啲有咩食! 餐廳環境幾有日本feel,坐滿人一定仲好氣氛囉。 為咗慶祝新店開張,由即日起至5月31日嘅星期日至四,呢度推出全枱任食味噌蟹甲羅燒優惠(原價HKD78/件,依家每位HKD98任食)。每件甲羅燒都由店員喺你面前即席烹調,睇住勁量蟹膏煮熱再配脆口多士,每啖都勁滋味呀! 要食到清香嘅海鮮鮮味,好似酒蒸雜貝(HKD268)咁煮都幾好。每日精選五款時令貝類,例如貴妃蚌、北寄貝、馬刀貝、黃金貝、象拔仔等等,用加入昆布嘅酒鍋即叫即蒸。酒香加上貝類嘅鮮甜冇得輸囉,最後飲埋湯就掃晒所有精華喇。 鍾意食蟹嘅朋友,不如試吓時令蟹釜飯(HKD498)。將原隻時令螃蟹放喺飯面,再加入意大利翠玉瓜、鮮冬菇、西芹、白魚仔、蟹肉等配料煲成蟹釜飯。食之前撈勻啲飯、蟹膏同蟹肉,令蟹嘅甜味道更充分滲入米飯,真係好想獨食呀! 豆喜知次塩釜燒(HKD298)係迷你版喜知次,油脂比例高啲。塩釜燒係用大量蛋白鹽包起豆喜知次烤焗,鹽分滲入魚肉,同時又保持肉質甘甜嫩滑。 河豚唔係度度食到,但新店有三款菜式俾大家揀!河豚鍋(HKD388)湯底用河豚魚頭骨加昆布、鰹魚煲成。河豚魚件配埋多種蔬菜一齊煮,更加突出河豚嘅清甜,又唔會搶咗主角嘅鮮味。 想惹味啲就有燒河豚一夜干(HKD98),肉質彈牙又少骨,啱晒佐酒啦。 特別啲就有白子唐揚(HKD98),河豚白子比乳酪更幼滑嫩口,蛋白質豐富好補身添。炸過後外皮鬆脆,點埋微辣嘅蒜蓉沙律醬就更開胃。   漁獲浜燒 地址:尖沙咀厚福街8號H8 11樓 電話:2618 8842 營業時間:星期一至日:17:30-01:00

0

【$168平食原隻松葉蟹丼 老闆:希望搵到日本味道!】茶屋町

深水埗除咗多頹飯食,其實近年都開始有唔少新力軍進駐,好似呢間茶屋町就係其中之一喇!以日本鐵路為主題嘅小店,店內有唔少布置都同火車主題有關,幾有日本風情㗎!點解揀喺深水埗開餐廳?老闆話唔係想賺啲咩錢,只係希望將佢熱愛嘅日本飲食文化帶嚟香港,俾大家都試到!佢話開業至今真係唔少客人話喺呢度搵到日本旅行時食到嘅味道,相信呢啲feedback就係老闆繼續努力嘅最大動力!  除咗店內有唔少火車嘅擺設之外,客人嘅用餐位置隔離更有一個模擬火車窗,等大家一路用餐一路想像吓喺日本火車上食便當嘅旅行氛圍。 今次小編極力推介原隻松葉蟹飯(HKD168/原價298),每日只賣10隻,夜晚6點後開始供應,賣晒就冇㗎喇!你以為百幾蚊隻蟹實係細細隻㗎?錯喇,隻蟹相當足秤㗎!其實自己買隻蟹返嚟都唔止呢個價,呢個價錢堅良心呀!提提大家,$168呢個價錢只要大家用Facebook Like&Share佢哋專頁帖子就可以享用㗎喇! 蟹蓋同蟹身嘅肉,店家已經好貼心咁幫大家起晒出嚟,再用芝麻醬作調味,大家揭開個蟹蓋就食到啖啖蟹肉,好疏肝呀!雖然用芝麻醬調味,不過醬汁酸甜得嚟並冇搶去蟹肉鮮味,撈埋蟹子拌飯食就一流喇!呢隻蟹嘅蟹腳非常之肥大,肉質非常鮮甜,大家可以問店員攞蟹鉗慢慢拆肉食! 除咗松葉蟹之外,小編覺得牛面頰飯(HKD92)同樣咁出色呀!店員話日本餐廳普遍比較少用牛面頰做料理,呢道菜係主廚用法式慢煮嘅方式鎖實日本醬油汁,Slow cook足3個鐘,夠晒腍! 平時食法國菜都有機會食到紅酒燴牛面頰,通常比較好咬口,感覺充滿骨膠原咁。今次食呢個慢煮版又有另一種感覺,食落有骨膠原嘅彈牙感之外,肉質真係好嫩喎!日式醬油入晒味,唔錯呀! 除咗主食之外都有自家製甜品㗎!材料大部份都係用日本貨,一啲都唔馬虎!呢個期間限定嘅Tea Set(HKD148)以士多啤梨為主調,總共有7款甜品,分別係草莓大福、紅豆燒餅、草莓奶凍、抹茶千層蛋糕、黃豆粉蕨餅、煉奶士多啤梨同埋芭菲。當中最吸睛當然就係呢個士多啤梨芭菲啦!自家製雪糕超濃奶香味,加埋依家當造超甜嘅日本士多啤梨,極級享受呀! 另外草莓大福同抹茶千層蛋糕亦係自家出品。大福嘅糯米皮夠晒煙韌軟糯,好有日本風味;至於抹茶千層蛋糕就犀利喇,用日本頂級嘅靜岡抹茶粉整成,甘香得嚟中間嘅cream超軟滑,正! 唔知大家知唔知道,日本人好鍾意將新鮮士多啤梨配煉奶一齊食,成件事真係好邪惡!不過日本人用嘅煉奶當然唔係我哋喺香港用開嘅鷹嘜啦,店家為咗還原日本口味,特登喺日本入呢款森永煉奶。甜得嚟冇咁肥膩,用嚟點士多啤梨真係一流呀!不過香港普遍零售店應該暫時都冇得賣嘅,大家要食就要去呢度朝聖喇!   茶屋町 地址:深水埗長沙灣道217號 電話:2660 7722 營業時間:星期一至日:12:00-22:00

0

【日籍師傅主理街市居酒屋 靜岡蒸蛋地道風味好滿足】街霸

講起「葵」字頭嘅美食集中地,除咗諗起葵涌廣場之外,其實工業大廈雲集嘅葵興都有好嘢食㗎!今次街霸就帶大家到葵涌和宜合道街市入面嘅平民居酒屋滿足食堂。 居酒屋喺街市入面,座位唔算好多,但係餐牌上嘅食物款式就好多選擇喇!餐廳嘅廚房同用餐區中間隔開咗一個舖位,由於小店人手唔多,有咩需要可以直接走過去廚房搵店員幫手。 滿足食堂由日本人佐藤先生主理,佢04年被日本白木屋派嚟香港做總廚兼總經理,可能喺大公司做得耐想試吓自己把刀嘅關係,2016年佢正式落戶和宜合道街市嘅小檔位,為附近居民帶嚟地道日本美食。 最出名係呢個梳乎厘狀嘅HuwaHuwa靜崗蒸蛋(HKD42)。開頭小編見到蒸蛋仲以為係細細兜嗰種日本蒸蛋,點知一嚟到見到係一大煲!蒸蛋望落去好鬆軟,用匙羹一潷開見到下面竟然係雜菌湯!街霸之前冇見過呢款蒸蛋,後來上網google發現呢味「梳乎蛋湯」係靜崗一間老店嘅獨有菜式,後來愈來愈多人仿效。 呢個蒸蛋唔係我哋平時食開嗰種「蒸水蛋」,食落好似一陣泡沫咁樣,真係有少少梳乎厘feel,只不過佢係日本傳統嘅鹹食。口感非常有趣,蒸蛋混埋底下嘅雜菌清湯非常清爽,雜菌湯用咗金菇、薄切嘅雞髀菇等,飲落另有一番特別風味。 另外同樣係日本傳統食品之一嘅茶漬飯亦係招牌之一。好多日本餐廳都會提供茶漬飯,因為茶漬飯食落清爽解膩同時又可以增加飽足感,日本人習慣用佢作為一餐飯嘅句號。不過香港嘅日式餐廳就唔係度度有得食喇,可能同港日兩地嘅飲食習慣有啲唔同啩,我哋通常一餐都食到飽到上心口,應該解膩嘅茶漬飯都食唔落喇,哈哈。 明太子茶漬飯(HKD38),唔好睇佢細細碗好似唔抵咁呀,以比例嚟講,明太子分量真係超多,可以一啖飯一啖明太子咁食!叫得做茶漬飯都預咗比較清淡,點知食落一啲都唔淡,明太子發揮到好好嘅調味作用。飯上面嘅高湯非常好味,冇落到味精但依然開胃,食落好清爽,街霸大力推薦呀!另外仲有芥辣八爪魚茶漬飯(HKD38)同三文魚茶漬飯(HKD38),下次可以試埋另外兩款喇! 另外街霸亦食咗炸雞排定食(HKD62),定食包沙律、漬物、海帶湯、雞排同埋飯。分量算幾大份,一個人食絕對會飽到上心口,如果大家想食多幾款,不妨嗌一個定食share再點小食呀! 雞排炸至金黃,望落去好靚仔,而且有埋隔油鐵架仔,熱辣辣炸起嘅雞排唔會因為太熱上碟而黐到一嚿嚿,夾起每嚿都係清爽又嫩肉,雞皮同肉唔會分晒家,好味!   街霸最愛:今集又有雙冠軍喇,我覺得茶漬飯係必食嘅!因為食完之後真係令我徹底對茶漬飯改晒觀,真係好有日本風味!另外靜岡蒸蛋都係不得不食,街霸暫時喺香港搵唔到第二個地方有得食,喺街市竟然食到靜岡馳名嘅老料理喎,食落清新解膩,綿密嘅蒸蛋感覺好奇妙!喺葵廣對面巴士站搭43A喺打磚坪街落,10分鐘內就到喇! 満足食堂 地址:葵涌和宜合道24號和宜合道熟食市場C6號舖 電話:5491 8102 營業時間:星期一至二:12:00-15:00;18:00-22:00;星期四至日:12:00-15:00;18:00-22:00