Tagged: 旺角

0

【家上海佛跳牆宴買一送一 新推客飯餐外賣75折】家上海

家上海推出全新奧海城限定嘅佛跳牆海皇宴,兩位起仲買一送一,計埋茶芥同加一都係百幾蚊位就試到一系列招牌菜同新鮮海產炮製嘅淮揚菜,啱晒鍾意養生同中菜嘅朋友喎。 店內環境寬敞,亦有少量戶外坐位。 佛跳牆海皇宴(HKD298/位)以淮安四小碟(右)打頭陣,前菜有花雕醉轉彎、鎮江冰官肴蹄、四喜烤麩同埋涼拌陳醋紅蜇頭。呢幾款冷盤開胃得嚟唔會好濃味,而且係必食嘅經典淮安菜。 跟住當然係每日新鮮原盅燉製嘅鮑魚花膠佛跳牆!以老雞、雞腳、金華火腿同豬肉做上湯嘅主要材料,加埋花膠、鮑魚、干貝同海參呢啲名貴食材一齊燉,湯色清澈但味道濃郁,而且滋養氣血,補而不燥㗎。 薺菜年糕燴桂花魚片將大大塊桂花魚片油泡再湯煮,魚肉鮮嫩冇骨,加埋軟糯嘅年糕一齊食就有唔同口感添。 你仲可以揀鮑汁撈飯或濃湯魚翅撈飯,矜貴之餘仲好鹹香惹味添。 仲有用韓國米餅整成嘅乾燒蝦球配鍋巴,爽口彈牙嘅蝦球大隻到要分幾啖先食晒,甜辣醬嘅醬汁令人食得更滋味。最後食埋酒釀湯丸啦!清甜嘅酒釀配芝麻湯丸唔會好甜膩。 餐廳依家仲特別推出外賣自取75折優惠,連新出嘅一至二人客飯餐(原價HKD138-398)都一樣有折㗎。兩餸一湯嘅一人客飯餐C都幾豐富,麻香嘅雞絲粉皮配鑊氣嘅海派回鍋肉好夾,加埋上海酸辣湯、絲苗白飯同豆漿都幾飽㗎。想知仲有咩套餐同小菜可以外賣就睇下面嘅餐牌啦!   家上海 地址:大角咀海泓道1號奧海城三期地下G19-21號舖 電話:2869 2228 營業時間:星期一至五:11:45-16:30, 18:00-22:30,星期六、日及公眾假期:11:30-16:30,18:00-22:30 限聚令下營業時間:星期一至日:11:30-18:00(堂食)|11:30-20:30(外賣)

0

【旺角新派川菜中西合壁 辣控必試辣到噴火套餐】祥仔辣辣

煮開西餐,尤其擅長法國菜嘅大廚張錦祥Ricky,平時好鍾意食辣,出街食飯都會自備辣味香料。最近佢就開咗以川辣菜為題嘅祥仔辣辣,作為祥仔概念行政總廚都同精於四川菜嘅大廚誠哥交流,部分菜式會加入世界各地嘅西式香料,譬如印度黃薑、法國南部香草、泰國檸檬、台灣金不換等,出奇地令辣香層次有更多變化喎。 餐廳環境有啲中日式同古現代混合嘅感覺,感覺都幾輕鬆自在。食物方面都一樣俾大家「有得揀」,大部分嘅菜式都可以自選少辣、中辣、大辣,甚至地獄辣。Ricky話如果你可以生食指天椒或者成包18禁薯片,歡迎你挑戰地獄辣呀!如果冇特別指明辣度,都會以中辣烹調,所以小編都試呢個辣度體驗吓先。 食辣要食得出色除咗挑戰辣度,仲會享受帶酸、麻、香、甜等唔同嘅辣味,所以辣到噴火精選套餐(HKD388/兩位)就將呢啲味道注入六道菜式。前菜先試酸辣開胃嘅惹火山木耳同埋肉質嫩滑嘅川味口水雞,呢兩款人氣川菜未至於辣到噴火,但開始有麻香嘅感覺留喺口喇。 招牌菜可以二揀一,先睇呢盤水煮安格斯牛肉,紅卜卜咁真係幾嚇人,但加入迷迭香令麻香更有層次,食慾即刻大增!入口即刻俾麻辣味衝擊到要飲水,但肉味依然明顯,呢樣真係估佢唔到。不過餐廳會按時節轉換肉類,下次嚟就可能轉款喇。 相比之下,同樣落咗迷迭香嘅祥仔招標酸菜魚會辣啲,但開頭會俾自家製嘅酸菜掩蓋辣度,但後尾真係愈食愈辣同麻痺呀!鱸魚厚薄適中冇咩骨,質感滑不留口添,大力少少都會夾斷魚肉㗎。 套餐仲包埋三款特色小菜,噴火小籠包係罕見嘅口味,湯汁微辣幾惹味,唔蘸醋都好夠味,不過呢款就冇得揀辣度喇;香芹豬肉手水餃內面冇加辣,怕辣嘅朋友可以蘸少啲醬汁;乾煸四季豆反而爽甜唔辣喎。 最後食埋冰凍嘅黃金南瓜露解辣收尾,清涼甜滑,而好似海底椰嘅亞塔子仲增加咬口添。 食唔到咁多都有其他選擇,好似午市套餐嘅麻婆豆腐石鍋飯(HKD78)都俾足誠意,炒飯底配上滑嫩甜辣嘅麻婆豆腐,食晒都幾飽㗎。 而全日供應嘅招牌辣辣撈丁(HKD58)先麻後辣好惹味,撈勻櫻花蝦同蛋汁一齊食唔止香滑,好似冇咁邪惡添!   祥仔辣辣 Ricky’s Spicy Kitchen 地址:旺角彌敦道639號雅蘭中心2樓201號舖 電話:2885 1910 營業時間:星期一至日:12:00-15:00,18:00-23:00

0

【旺角活化唐樓天台變茶室 三式和食×茶香班戟】蟲二

想搵個地方放空吓,旺角嘅蟲二就值得一去喇!呢間天台茶室最近就由百年唐樓活化嘅上海街618,打造成房內同戶外露天空間兼備嘅茶室。喺咁熱鬧嘅市區劃出寧靜一角享受中日料理,仲有兩款喺本店3rd Space人氣極高嘅茶香燒海鹽芝士麻糬班戟添。 蟲二呢個店名其實係指「風月無邊」,當「風月」去邊後就淨低「虫二」喇。雖然本店係上環普慶坊3rd Space嘅西式cafe,但呢度就主打中日料理,風格好唔同!日式擺盤融合中菜元素,室內有好多偏中國風嘅壁畫㗎。而cafe更設有露天空間,上嚟食嘢可以放鬆吓平日緊張嘅心情。 一汁三菜(HKD140/配熱茶)係呢度其中一款招牌料理,日式擺盤賣相好簡約別緻。成set有一款主菜、兩款漬物、慢煮蛋同柴魚湯。以漬物做配菜都落足心思,去皮車厘茄用咗杏脯汁醃製,仲有兩塊花蜜漬山藥添,夠晒特別。而個飯其實有兩種食法,除咗就咁配餸食之外,食到一半可以將慢煮蛋加入飯撈勻,再落柴魚湯當茶漬飯咁食。 三揀一嘅主菜就有赤味噌清酒燉豬肉、紅酒黑醋無花果燉牛肋粒同埋蘋果野菜咖喱日式雞肉,今次就試吓佢哋嘅燉牛肋粒啦!牛肋粒同蘿蔔都切成一口size,方便入口,而且都燉到非常軟腍,肉質有咬口又唔韌。個菜名有無花果,但搵唔到佢?原來無花果已經燉到融晒,令成道菜更加清甜,仲有淡淡無花果獨有嘅果香添! 3rd Space上環店嘅班戟咁出名,嚟到呢度梗係唔可以錯過啦!呢款伯爵茶傳統班戟(HKD85)並唔係梳乎厘班戟嚟嘅,而係比較有口感嘅厚身班戟,質感鬆軟有蛋香。賣點之一就係淋喺香蕉上面嘅海鹽芝士忌廉醬,炙燒後口感薄脆,味道微鹹,就好似濃稠版嘅芝士奶蓋咁,非常特別呀! 一切開原來內有乾坤!班戟中間夾住煙韌嘅伯爵綠茶味麻糬,配埋面頭嘅牛乳雪糕同芝士忌廉香蕉一齊食就夾晒喇! 想fresh啲可以試吓呢杯熱情果梳打(HKD55),入面嘅熱情果醬都係自家調配,酸甜度適中,飲落清爽開胃。 茶座嘅茶具都充滿日式簡約風格,好似香茅薄荷茶(HKD55)就用茶壺裝住上枱俾你慢慢斟嚟飲,唔驚啲茶凍得快。呢款聞落帶有淡淡薄荷香味,入口幾清新舒爽。   蟲二 地址:旺角上海街618號頂樓天台 電話:9220 9785 營業時間:星期一至日:12:00-22:00

0

【旺中小食店大大盒炸物$15三款 脆口惹味任加30種醬料】平霸

旺中出名多平嘢,今次平霸就帶大家去到一樓嘅美食立食區度尋寶,聽聞呢間365炸雞嘅小食性價比夠晒高,$15三款大大盒炸物,仲有成30種調味醬料任加?!想知質素如何就睇埋落去啦! 呢間小食店舖面細細,門面貼滿餐牌,有咩賣都一眼睇晒。 $15就有三款小食似乎幾抵食喎,梗係要試試佢啦!一睇個餐牌真係眼都花埋,炸物嘅選擇竟然有成三十種咁多,有選擇困難症嘅朋友真係唔知點揀好。 平霸最後揀咗炸雞粒、拉絲芝士條同啤酒薯條(HKD15/3款)。呢度啲小食都係即叫即炸,小編落單前未有人點嘢,等咗5分鐘左右就有得食。本來以為15蚊應該都會細份啲,點知竟然幾大盒喎,每款分量望落唔少之餘,拎上手仲熱辣辣添! 呢款拉絲芝士條真係拉到絲㗎!一咬落去就有外脆內軟嘅質感,入面嘅水牛芝士味道唔算好濃,但都幾香口。而啤酒薯條嘅炸漿同平時食開嘅唔同,個感覺有啲似食緊薯格咁,雖然冇咩啤酒味,但鹹香十足好惹味。 而炸雞粒分量唔少,都有成8、9粒,炸漿夠薄又煮得透心,成粒外至內都熱辣辣!加埋唔同嘅調味料就試到各種風味喇。 特別要介紹呢間小食店嘅一大特色,就係有成30幾種醬料嘅醬料架!客人可以依照自己嘅喜好自由加入唔同嘅調味醬料,西、日、韓、台等口味都有,好有新鮮感。除咗平時食開嘅醬料外,仲有比較偏門嘅調味料,好似麻辣小龍蝦、黃金鹹蛋黃、Pizza味等等。 除咗性價比極高嘅炸物之外,呢度嘅芝士撈麵都幾平喎。其中一款就係吉列芝心豬扒芝士撈麵(HKD18),俾吉列脆皮包住嘅豬扒肉質夠腍,仲有一層融化緊嘅芝士夾喺中間,雖然啲芝士冇一咬即流心嘅效果,但用兩款芝士mix埋嘅夾心都對得住佢個價錢有餘。而芝士撈麵就似放咗大量芝士粉落去,味道偏鹹,食晒成碗會有少少膩。另外,仲有海鮮芝士撈麵(HKD20)、什錦芝士撈麵(HKD18)同招牌炸雞中翼芝士撈麵(HKD18)俾你揀,如果芝士味唔啱你食,全部亦可以免費轉沙爹汁。如果肚仔餓,平平哋食佢嚟填肚都係唔錯嘅選擇。 舖頭不定期都會做買一送一優惠,今期就有三式燒賣(原價HKD15)。本身7粒一份嘅燒賣買一送一後有成14粒,唔買都對唔住自己啦。話明三式燒賣,裡面其實有黑松露豬肉燒賣、蝦肉燒賣同魚肉燒賣三款。燒賣嘅size比平時食開嘅細粒少少,但口感都幾彈牙,而且有三種口味食晒都唔會悶,其中黑松露豬肉燒賣就最好食。不過略嫌蒸得過熟,有啲燒賣皮同肉會分離。   365炸雞 地址:旺角彌敦道688號旺角中心一期一樓F88A 電話:6279 7023 營業時間:星期一至日:11:30-23:00

0

【美意菜餐廳旺角新店新Menu 藝術裝潢歎重量級菜式】Amaroni’s

美意餐廳Amaroni’s嘅又一城店踏入20周年喇,一向以性價比高、分量多嘅美式意菜做主打,儲埋唔少捧場客㗎。最近終於喺旺角MOKO開咗新分店,仲有新Menu俾啲新鮮感大家添。 一走入餐廳,見到店內掛有古典吊燈、油畫等等,就好似時光倒流咁,夠晒經典復古喎。 前菜先食呢道野莓雞肉沙律(HKD135/Regular)開吓胃!以士多啤梨、啤梨片、焦糖核桃同菲達芝士做配料,再加入紅莓油醋撈啲雞肉同沙律菜,入口好清新。 主菜就要試旺角新店首推嘅Chef’s Designer Pizza特色拿坡里薄餅(HKD148-162),餐廳將餅皮發酵過程改良,食落特別煙韌鬆脆㗎。面頭鋪上巴馬火腿,充滿意式風情。 嚟呢度仲要食埋佢哋嘅經典千層麵(HKD152/Regular),每一層闊麵都加咗巴馬臣芝士同水牛芝士喺裡面,食落有濃郁嘅芝士香味之餘,仲有拉絲添,簡直係雙重滋味呀! 仲有大大碟嘅蕃茄醬蜆肉意大利粉(HKD132/Regular),貫徹意菜嘅風格以羅勒茄醬同大量蜆肉炒意粉,酸甜惹味。 最有代表性嘅意大利甜品就非意大利芝士蛋糕(HKD78)莫屬喇,佢亦都係呢度嘅招牌甜品嚟嘅。特製忌廉、浸滿咖啡酒同Espresso嘅手指餅層層堆疊, 面頭灑滿可可粉同黑朱古力碎,入口就有超濃嘅咖啡同酒香。 而呢款獨家自製嘅意式甜卷(HKD68)都係經典嘅意大利甜品,喺脆皮內填滿creamy嘅雲呢嗱醬,又有淡淡櫻桃利口酒嘅酒香,加上脆口嘅朱古力碎真係好邪惡,但喺香港唔易食到㗎!   Amaroni’s New York Italian Restaurant & Café (MOKO店) 地址:旺角太子道西193號新世紀廣場5樓526號舖 電話:2368 8256 營業時間:星期一至日:11:00-22:30

0

【日本過江牛肉丼飯$25起 鰻魚肥厚嫩滑有驚喜】Sukiyaすき家

每個人去日本其都有個必食food list,唔知你嘅list有冇牛肉丼飯呢?走高質親民價嘅Sukiyaすき家上星期正式過江嚟到旺角開店,即刻牽起排隊熱潮。呢度丼飯款式逾 40款,最平嘅細牛肉丼飯25蚊有交易;店內會按唔同時段推出個別款式,例如05:00-11:00就有早餐,15:00-00:00就有鍋物,連壽喜燒(HKD60)都有呀! 排隊嘅朋友注意,堂食同外賣分兩條隊嘅。堂食的話食低後按枱面嘅掣,店員會埋嚟幫你落單同提供水。 店內有兩幅畫,一幅係日本富士山,另一幅就描繪香港維多利亞港景色,係咪好有親切感呢?香港menu仲增設香港限定嘅雙拼款式,不過小編當日朝早十點嚟到未返齊貨,所以試唔到,不過都試咗其他款式,即刻睇吓邊款令你流口水啦! 牛肉元氣早餐(HKD29)啱晒鍾意有米氣嘅朋友,仲有齊前菜、味噌湯、牛肉同溫泉蛋拼秋葵,睇見都豐富呀!其中前菜本身係配漬物,但如果賣晒就有機會轉成泡菜,最終用料視乎當日食材而定。 用美國牛肉煮成嘅牛肉本身已經裝咗牛肉汁喺入面,但無論食邊款牛肉飯都好,想多汁就要落單時講埋,廚部會喺製作嘅時候直接加埋。想就咁夾滑嫩嘅肉配飯食又得,或者跟日本人食法,加少少豉油落溫泉蛋同秋葵撈勻後,連埋牛肉放晒落飯再撈埋一齊食亦得,咁樣口感會更加滑溜,仲不失日本蛋嘅香氣添;加上秋葵令呢份早餐增添一份清新感,唔覺得一早食肉會膩喎。 想惹味啲可以試吓泡菜燒肉丼(HKD48/M),牛肉輕輕煎過令肉邊有少少脆口同更加香,配埋爽口嘅泡菜就更濃味。 呢度雖然主打係牛肉,但估唔到鰻魚牛肉丼(HKD79/M)都令小編充滿驚喜!鰻魚厚肉冇骨,入口滑嫩有油香而唔會過肥,真係幾高質。 咖喱係日本人另一款傳統菜式,炸雞芝士咖喱(HKD62/M)雖然有兩隻辣椒,但入口只係比平時嘅日式咖喱辣啲,大部分人都食到嘅。撈式兩款芝士碎令咖喱杰啲,但芝士味唔算濃,所以唔會好膩。炸雞皮脆肉滑唔會太鹹,成碗嘅調味都控制得幾好。 飲品選擇唔多,但布甸宇治抹茶(HKD32)同布甸牛奶朱古力特飲(HKD29)嘅抹茶同朱古力味都好濃郁!牛奶味相對輕啲,布甸就非常滑溜,想有口感啲就唔好攪太多喇。   Sukiyaすき家 地址:旺角亞皆老街31號地下 電話:從缺 營業時間:星期一至日:24小時

0

【麻迷必試5間麻辣專門店 平食麻辣燙+串串香放題】辣妹來了、湯火功夫麻辣燙、麻辣妹、爆汗串串、Chilli Fagara

麻辣控一見到麻辣菜就流晒口水,尤其依家呢啲涼涼哋嘅天氣更加令麻辣癮發作。今次小編搵咗5間專賣麻辣菜式嘅專門店,要平嘅有,要精緻嘅有,要任食都一樣有!   1. 速食麻辣燙 喺葵涌廣場嘅辣妹來了HKD25起就有一大碗麻辣燙,辣度有四級,仲好似車仔麵咁自選配料。配料有HKD4、HKD6、HKD8同HKD10四個價,有成52款食物,嗌一碗當餸買返屋企食都得喎。   辣妹來了 地址:葵芳葵涌廣場1樓1183號舖 電話:3622 1353 營業時間:星期一至日:11:00-22:00   2. 麻辣燙變拌麵 喺銅鑼灣嘅湯火功夫麻辣燙有招牌麻辣燙、蕃茄湯底、泰式冬陰功湯底同經典麻辣拌(劃一HKD37)四款兩素一葷麻辣燙,唔夠可以另外加配料,不過一碗嘅麵量其實都幾多。每張枱仲有麻椒油、辣椒油同醋俾你任加,咁樣你想要幾麻幾辣都得啦!如果覺得太辣,可以加啲醋中和吓。   湯火功夫麻辣燙 地址:銅鑼灣謝斐道482號兆安廣場地下4-6號舖 電話:2148 6788 營業時間:星期一至日:11:00-23:00   3. 麻辣菜館 旺角嘅麻辣妹有四款麵食,其中重慶小鍋(HKD25)可以揀米線、薯仔粉、紅薯粉或水晶粉,而辣度就有五級。配料價錢分HKD6、HKD8同HKD9三個類別。不過想食飽啲仲可以嗌麻辣小食(HKD15-68),例如配特製辣椒粉嘅潮州魚蛋、可以自選麻辣度嘅口水雞、豬大腸、海帶等。   麻辣妹 地址:旺角通菜街27號 電話:9309 5990 營業時間:星期一至日:12:00-23:00   4. 串串香放題...

0

【台灣冠軍牛肉麵香港連開兩店 湯濃肉腍必試火炙小牛膝】洪師父牛肉麵

一聽係過江龍,大家都會諗嚟到香港可唔可以保持水準先?洪師父牛肉麵為咗解決呢個問題,唔係用台灣食材咁簡單,而係將湯底、牛肉等用料喺台灣店煮好再冷凍包裝運嚟香港,保證唔會走味咁話喎,唔怪得神速就喺東涌同油麻地連開兩店啦。依家就即刻試佢哋嘅冠軍牛肉麵先。 五花牛腩(HKD88)係2007年牛肉麵節比賽—清燉冠軍,湯底好清澈,但味道幾濃,入口順滑。呢款有牛腩同牛小排,肉質軟腍易咬。麵條可以揀台式幼麵同粗麵,不過清湯就同幼麵夾啲。 組麴蕃茄麵(HKD88)係2008年牛肉麵節比賽—創意冠軍,唔講都唔覺原來以蕃茄融入湯底已經咁多年。再提提大家,所以湯底都係台灣煮好,再冷凍包裝運過嚟,所以啲蕃茄都係台灣貨!呢款味道幾香甜,但唔會好杰身,依然似到牛肉湯味添。同樣都有牛腩同牛小排,呢款配粗麵會吸味啲,而且放耐咗都只係厚少少,唔會勁發漲。 想試多啲配料又想特別啲,就要嗌攞到2010年牛肉麵節比賽—紅燒冠軍嘅唯吾獨專(HKD328),呢碗可以2-3個女仔食㗎!不過想抵啲一定係點二人套餐(HKD398),會包埋兩款自選台式小食同兩杯飲品。 泊埋五花牛腩即刻睇到size嘅分別!唔係淨睇湯碗,連肉都大嚿好多,而選用嘅部位都好刁鑽;好似牛腱只用兩邊尖尖,油脂少啲又有咬口;牛肚就用蜂巢牛肚邊最「Q」嘅位置,質感好爽彈:連牛筋都特別大條,但煮得軟腍,又唔會失去咬勁,平衡得幾好。 小牛膝同樣連埋炆煮嘅湯汁一齊包好冷凍,嚟到香港加熱同火炙。大家記得唔好掛住影相,最好一上菜就試咗湯先,因為小牛膝火炙過嘅味會慢慢滲落湯,變成另一種層次。 紅燒湯本身已經好濃厚,因為混合咗秘製三寶湯同小牛膝嘅湯,幾重牛味。想再有層次啲可以加少少辣椒油,因為入面加咗牛脂一齊煮,所以入面有真「牛油」㗎! 但最估唔到綜合鮮肉湯水餃(HKD42/牛湯底)都係包好先運嚟香港煮,高麗菜(右)就比青韭菜(左)口味清啲;飽得滯想解膩可以飲返杯檸檬薏仁水(HKD18)。   洪師父牛肉麵 (旺角店) 地址:油麻地彌敦道565-567號銀座廣場地下1號舖 電話:2838 3978 營業時間:星期一至日:11:00-22:00

0

【泰式半自助午餐任食沙律吧 主菜首選$88足料船麵】象屋泰國餐廳

要食得抵又多選擇?旺角象屋泰國餐廳嘅泰式半自助午餐一定啱你,自選泰式主菜(HKD88起)有9款,船麵、燒豬頸肉飯、肉眼扒等等都好受歡迎;仲包埋任食嘅鹹甜點泰式沙律吧,即刻睇吓有幾正啦! 餐廳環境都充滿泰式感覺,12:30左右就開始有食客嚟喇。 如果食半自助午餐,可以喺9款主菜之中揀1款,仲可以任食沙律吧長枱上約15款食物,有泰式木瓜大蝦沙律、椰汁糕、春卷、咖喱角等等。如果淨食沙律吧(HKD79)都可以,同半自助午餐一樣會跟杯茶或咖啡。 食得泰國菜梗係有牛肉船麵(HKD88),亦係9款主菜之中最抵嘅。牛腩同牛丸分量幾多,煮得好入味。湯底香濃唔會太鹹,麵仲好似粉絲咁嗦晒湯汁添。 如果想食炒麵,泰式雞肉金邊炒(HKD93)唔會炒到乾晒,幾香口惹味,唧埋青檸汁就更加濕潤易入口。雞肉大大粒但依然嫩滑,肉量都唔少添。 如果你鍾意食牛扒,不妨試吓少有嘅美國肉眼扒配薯菜及羅望子汁(HKD148)。肉眼扒烤焗後淋上酸甜惹味嘅羅望子汁,食晒都唔覺膩。加上炒到啱啱熟嘅椰菜仔,爽口得嚟幾fresh㗎。 如果食唔到午餐,呢度嘅晚市小炒、甜品同下午茶都一樣吸引。好似呢款辣椒膏炒大蜆(HKD148),肉質嫩滑彈牙冇咩沙,辣度適中惹味唔會蓋過蜆嘅鮮味。 不過香芒黑白糯米飯(HKD88)始終係泰式甜品首選,餐廳特別用透明外殼裝起大量椰絲同香甜多汁嘅芒果肉,打開外殼就會灑落黑白配嘅糯米飯,味道同打卡都係一流呀! 而星期六、日15:30-17:30新推嘅周末二人專享下午茶餐(HKD158)都同樣抵食。 兩碗椰香十足嘅青咖喱雞飯配上脆炸櫻花蝦、素春卷、蝦餅、一口芒果糯米飯、香甜嘅斑蘭撻同榴蓮味濃郁嘅榴蓮撻6款鹹甜小食;加上兩杯咖啡或茶,啱晒鍾意香口食物嘅你,食晒都飽肚㗎。   象屋泰國餐廳 地址:旺角太子道西193號MOKO新世紀廣場4樓453號舖 電話:2386 6882 營業時間:星期一至日:11:00-22:00

0

【大富翁自助晚餐歎各「地皮」美食 抽「機會」卡贏獎品返屋企】花月庭

全球首次官方授權嘅「大富翁自助晚餐」喺旺角花月庭有得食喇,棋盤遊戲上嘅「地皮」、「機會卡」、「棋子」等重點都化身成各款美食同甜品。而且有一連串遊戲,有「機會」贏取美食、唔同版本嘅大富翁遊戲或即將喺山頂開幕嘅全球首間大富翁夢想世界™主題館入場門票,即刻睇吓點樣又食又拎啦! 想玩遊戲贏獎品嘅朋友就要留意活動1同活動2喇: 活動1 凡惠顧自助晚餐,即可獲「機會」卡乙張,換取指定矜貴美食。 推廣期:8月至11月 活動2 讚好及追蹤Royal Plaza Hotel Facebook專頁或Instagram 帳戶參加遊戲,即有機會贏取唔同版本嘅大富翁遊戲、即將喺山頂開幕嘅全球首間大富翁夢想世界™主題館入場門票、自助餐券等豐富獎品。 推廣期:8月至10月 活動3 「大富翁先生」喺餐廳門口嘅拍照區準備就緒同大家合照。 推廣期:8月至11月 今次嘅美食都以香港各區「地皮」為主題,即刻睇吓有咩正嘢啦!代表蘇豪區嘅蠔吧除咗有生蠔之外,仲有松葉蟹腳、太平洋熟海蝦、龍蝦鉗等鮮甜嘅凍海鮮。 而比鄰嘅中環可以話係歐美美食集中地,所以挑選燒羊鞍(左)、燒美國肉眼(中)同德國鹹豬手(右) 為食客帶嚟異國風味。肉嫩多汁嘅肉眼同羊鞍外層帶焦香,而德國鹹豬手外皮香脆鬆化,鹹香味道令人想一食再食。 而代表香港「地王」太平山嘅就有青胡椒牛油忌廉火炙龍蝦(上),將青胡椒切碎加入忌廉煮成醬汁,味道香而不辣,火炙後嘅焦香令龍蝦肉更加惹味。而尖沙咀代表係香煎鴨肝伴多士香檳葡萄果醋汁(下),味道香濃但有果醋汁解膩,入口更加甘香。 以香港做主題,當然要有啲港式風味菜式。好似代表香港仔嘅避風塘豉椒花甲(右上)、豉椒蟶子仔(下)同豉油皇魷桶仔(左上) 等小炒會輪流供應,口感爽滑彈牙又惹味。另外,仲有九龍城區嘅泰式海南雞飯、銅鑼灣嘅日式刺身壽司同深水埗嘅即煮粉麵等都係唔可以錯過㗎! 最後梗係食代表旺角東站同旺角嘅甜品區啦!香橙松露朱古力蛋糕將大富翁先生匿藏喺棋盤裝飾嘅藍色寶盒內夠晒心思;仲有奶黃包(下)、楓葉夏威夷果仁花生醬慕絲蛋糕(中)同菠蘿紙杯蛋糕(上) 通通以大富翁頭像、棋盤、房子、旅館作造型裝飾,不過以上幾款只限星期五至日輪流供應。不過唔使失望,仲有下面咁多款甜品俾你慢慢歎!   花月庭×大富翁自助晚餐 供應時間及收費:星期五、六及公眾假期前夕供應日期:即日起至11月30日 供應時間及收費:星期日至四及公眾假期 – 全時段(18:00-22:00):HKD628/成人,HKD418/小童,HKD488/長者 – 第一優惠時段(17:45-19:45):HKD528/成人,HKD348/小童 – 第二優惠時段(20:00-22:00):HKD528/成人,HKD348/小童 –...