Tagged: 旺角

0

【九龍區5大肥美卜卜蜆 18禁辣度+獨食貝貝鍋】 潮窩私房火鍋、為食仔海鮮火鍋專門店、魚魂98、鮮蒲、回到味來

上深圳覓食嘅朋友唔少人會食卜卜蜆,唔會好滯又抵食。不過吓吓搭車上去都幾攰。小編搜羅集結喺紅磡同旺角五間有做卜卜蜆鍋嘅餐廳,等大家想食就即刻食到。而且有潮洲蒜香味、18禁爆辣版、高級版、任食同一人獨食鍋俾你揀,梗有一款啱你! 紅磡 1. 潮窩私房火鍋 新開潮式火鍋 喺紅磡新開嘅潮窩私房火鍋現時只做晚市,佢哋嘅火鍋湯底有港式同潮州風味。其中呢款招牌卜卜蜆鍋底(HKD168)嘅蜆肉質飽滿,入口有濃郁嘅蒜香味,但食完又唔覺得口腔有蒜味。湯底鮮甜唔過鹹,可以當湯飲返碗添。 View this post on Instagram 阿拉斯加蟹? 兩食,蟹腳打邊爐,蟹身就做花雕蒸蛋!鮮甜、嫩滑、多膏諗起都流口水? 鍾意食海鮮的朋友,訂座時可以預留你喜愛的海鮮喔???????! A post shared by 潮窩•私房火鍋 (@chillcuisine_hotpot) on Jul 10, 2019 at 5:47am PDT 而且呢度除咗火鍋料新解,就連阿拉斯加長腳蟹、象拔蚌(市價)等刺身都好吸引!因為佢哋每日攞貨,保證新鮮,想食最好預先order留貨喇。   潮窩私房火鍋 地址:紅磡灣中心20號 電話:9584 5588 營業時間:星期一至五:18:00-00:00,星期五至日及公眾假期:17:00-00:00...

0

【日本人氣天丼過江推香港限定 軟殼蟹丼啖啖肉夠鮮香】天吉屋

鍾意食日本菜嘅朋友都好少唔鍾意食天婦羅,大家試咗最新喺日本過江,進駐旺角朗豪坊嘅天吉屋未呢?Menu有五款食物,配丼同烏冬都有,其中一款係香港限定嘅軟殼蟹丼,啱晒香港人口味添。想知小編試咗邊幾款就睇埋落去啦! 好多人食手卷都會叫軟殼蟹,所以推出香港張定嘅軟殼蟹丼(HKD158)直頭係針對香港人口味啦。 軟殼蟹都幾多,有成5、6嚿,都算大件啖啖肉;不過軟殼蟹肉本身軟腍啲,所以冇平時嘅天婦羅咁脆口。呢個丼仲配咗用皇帝菜同櫻花蝦整成嘅什錦炸物、茄子、南瓜同溫泉蛋,分量幾多,點埋蛋漿食仲更加香添。如果想食飽啲,呢款落單嘅時候,可以追加白飯(加HKD15)。 另一款小編會用「多嘢玩」嚟形容,因為天幕御膳(HKD148)有三個食法,天婦羅可以就咁點汁食、配飯淋上秘製天丼醬汁、或者用高湯、芥末同紫菜自製茶漬飯都得,而且係唯一一款可以無限添飯㗎。餸料有黑虎蝦、軟殼蟹、海紅鯛配紫蘇葉、什錦炸物(呢款係洋蔥同魷魚)、茄子、四季豆、南瓜同炸紫菜8款天婦羅,一次試到幾多款式。 天吉雙品(HKD108)嘅烏冬有兩款俾你二揀一。溫食係配讚崎烏冬,有冷柚子皮、乾海草同蔥花調味;冷食就配稻庭烏冬,以冷柚子皮同紫菜調味,兩款味道都幾清爽㗎,啱晒夏天食。另外仲配咗碗細丼飯,都有黑虎蝦、什錦炸物(呢款係洋蔥加櫻花蝦)、茄子、溫泉蛋同四季豆。呢款相對其他款式輕量啲,不過方便又想食丼飯,又想食烏冬嘅你囉。   天吉屋 地址:旺角朗豪坊11樓25-29號舖 電話:3105 0986 營業時間:星期一至日:00:00-22:30(22:00截單)

0

【台灣人氣麻辣牛肉麵勝面登港 湯底慢煮3日牛香撲鼻】勝面

成日都係拉麵店過江,今次終於到台灣牛肉麵喇!以人氣精燉牛腱心同招牌麻辣牛三寶出名嘅勝面,2018年攞咗《犇Fun嘉年華台北國際牛肉麵節大獎》,依家喺旺角朗豪坊已經開業一排都不斷有人嚟潮聖。究竟係咪台味十足?等小編話你知啦! 店內裝潢行簡約風,灰白色為主調感覺幾乾淨。每位店員以普通話同大家溝通,令你好似置身台灣咁,不過你可以用廣東話落單嘅。 餐廳用嘅三款麵都喺台灣入貨,有新竹米粉、關廟麵同手工刀削麵俾大家揀,如果點拌麵就會配一客蛋花湯。不過小編今次試晒湯麵,事關佢用美國牛肉同牛骨,文火慢煮湯底72個鐘,味道香純清爽。 所以一嚟先食原汁原味嘅人氣精燉.牛腱心湯麵(HKD68),湯底夠甜又唔羶,飲晒都得喎。牛腱煮得好軟腍嫩滑,用力啲夾都易散開。呢款配關廟麵幾吸味,質感似冷烏冬,幾彈牙。 跟住到限量供應嘅招牌麻辣.牛三寶湯麵(HKD82),當日三點左右就聽到店員話售罄喇。湯底可以揀小、中、大辣,小編呢碗小辣開頭似譚仔5小辣,但後勁接近3小,味道香麻中帶甜。餸料有牛腱心、牛頰肉、牛頸脊、滷豆腐同鴨血咁多款,性價比幾高。而且新竹米粉唔會點發脹,食晒都唔會滯。 想有米氣落肚就一定要點台式甜不辣拼花枝丸滷肉飯(HKD62),呢碗差不多有兩碗飯量㗎!滷肉主要用腩肉整成,入味唔過鹹,但口感一啲都唔肥膩。仲配咗台灣直送嘅甜不辣同花枝丸,炸過後更加充滿台灣味。 小菜有冷熱款式,呢味香港限定嘅涼拌綜合手撕無骨鹽水雞(HKD65)有1/4隻雞嘅雞肉、豆腐、青瓜、雞蛋同甜不辣,帶微微蒜香幾開胃。 另外一定要試嘅係芝士肉鬆雞蛋手工手抓餅(HKD38),外皮脆脆哋,夾住滿滿嘅肉鬆同芝士,煙韌鹹香好惹味! 呢度仲有好多飲品,左邊嘅鴉片黑糖波波奶茶(HKD30)用奶茶代替鮮奶,感覺冇咁甜。仲有加入綠茶調配嘅果茶系列,有紅葡萄柚、百香果、荔枝、鳳梨等口味;右邊嘅初嚐春日(HKD30)就用咗芭樂,果味好濃,但仍然飲到淡淡嘅茶香,蒟蒻仲好爽口添,感覺勁清爽解滯。   勝面 地址:​旺角朗豪坊11樓25-29號舖 電話:3105 9826 營業時間:星期一至日:12:00-23:00(星期日至四22:00截單,星期五、六及公眾假期前夕22:30截單) *設有加一服務費(入座最低消費為HKD50/位)

0

【和牛拉麵屋招牌慢煮沾麵 香滑A4和牛薩摩雞白湯】阿久根和牛拉麵屋

和牛除咗火鍋、燒肉之外,仲可以點食好?鼎爺仔仔李泳豪繼開咗阿久根和牛立燒店之後,開埋阿久根和牛拉麵屋,今次主打係和牛沾麵添。用阿久根招牌嘅A4和牛配上用鹿兒島走地薩摩雞熬成嘅雞白湯,絕對係一眾和牛愛好者必食之選!除咗和牛之外,仲有其他靚料㗎,快啲睇埋落去啦! 拉麵屋開喺街角,門面唔算顯眼,但好有日本風味,店門側仲有露天吧枱俾客人坐添。 呢款招牌慢煮A4和牛•雞白湯沾麵(HKD128)以肉質鮮嫩嘅A4西冷和牛代替叉燒,醃製後低溫慢煮八個鐘㗎;煮到約兩、三成熟就煨日式叉燒汁,入味又充滿肉汁。配上熬咗廿個鐘嘅奶白色雞白湯,湯頭濃郁唔油膩,係呢度嘅必試首選! 另外特別啲有香煎虎蝦•濃蝦湯沾麵(HKD98),除咗面頭隻厚肉虎蝦之外,湯頭都用咗兩種蝦熬足九個鐘。鮮味嘅濃蝦湯加埋櫻花蝦同自家製嘅蝦油,味道鮮上加鮮喎。 呢度都有拉麵款式,炙燒豚肉•濃骨湯拉麵(HKD68)嘅豚肉表面火炙有陣陣焦香,食落肉質偏瘦,唔會太肥膩。豚骨湯底用豬骨加少量雞腳熬成,味道濃郁鮮甜,唔覺唔覺就飲晒啲湯添。 想配小食嘅話可以試埋呢款和牛餃子(HKD68/3件),入面嘅餡料當然係用A4和牛啦,牛香十足㗎。   阿久根和牛拉麵屋 地址:旺角廣華街13號廣輝大廈地下1號舖 電話:2388 5468 營業時間:星期一至日:12:30-15:00、18:00-22:00

0

【「我是酸奶君」過江殺入旺角 王牌紫米酸奶消滯極品】我是酸奶君

珍奶熱潮雖然冷卻咗,但行街總係想買杯嘢飲。喺深圳以酸奶起家嘅我是酸奶君最近登陸旺角,將來自雲南72小時慢酵嘅高山稀酸奶配黑紫米、水果、牛奶等配料調出各式各樣嘅酸奶飲品帶俾大家。佢哋有句slogan「 稀釋來自城市的浮躁」,唔知你飲完會唔會身心都舒暢啲呢? 如果啱啱食完飯好飽,落單記得講「少黑紫米」。不過寫明係冷飲嘅款式冇得轉熱飲,但可以走冰;而兩款熱飲亦冇得變凍飲㗎。 皇牌飲品梗係吃米酸奶(HKD29/500cc[冷]),想濃厚啲亦有吃米特濃酸奶(HKD33/500cc[冷])。酸奶同黑紫米嘅組合有咬口,又唔會撐得太飽。 跟住有同酸味好夾,但又果香十足嘅百香果果(HKD38/500cc[冷])。顧名思義係加咗百香果啦,消滯真係一流! 再嚟有莓果粒粒(HKD38/500cc[冷]),士多啤梨令飲品清香又唔會太甜。 不過講到水果,又點會冇芒果呢?!芒芒果海(HKD38/500cc[冷])加咗黑紫米,有口感又飽肚啲。 如果想飲大杯啲,可以試加埋茉莉綠茶嘅VC酸奶益生菌系列,全部都係700cc㗎。其中益生草莓君(HKD40/700cc[冷])仲加咗少少檸檬,飲落再開胃啲添。   我是酸奶君 地址:旺角豉油街60 -102號地下A舖 電話:從缺 營業時間:星期一至日:10:00-02:00

0

【新開熱石燒牛扒店CP值爆燈 激抵和牛扒任食配菜】牛極

想食CP值高嘅牛極熱石燒牛扒唔使淨係去深水埗喇,佢哋啱啱喺旺角開分店,五款牛部位價錢夠晒貼地,每款仲有三個分量俾大家揀。最平嘅牛肩肉眼扒HKD80就食到,豪氣啲食和牛都係百幾蚊有交易。跟扒包埋嘅沙律、白飯同麵豉湯仲係任食㗎,包你食到飽呀! 店面招牌咁當眼,各位食肉獸實唔會搵錯啦。 點餐係用門口呢部自助點餐機,揀好食邊款牛扒就直接落單俾錢,幾方便喎。 落咗單就去點餐機背面嘅自助區啦,可以自取任飲任食嘅沙律、白飯同麵豉湯食住先。 牛扒會先燒到大約一成熟,落少少鹽同黑椒調味,再放喺預熱到300度高溫嘅火山石板度上枱。切開牛扒後利用石板嘅熱力,再煎至你要嘅熟度!呢款牛肩肉眼(HKD80/180g)係抵食首選,啱晒要求性價比高嘅食肉獸! 港人鍾意嘅西冷牛扒(HKD130/200g)都有得食。 想食得高級啲可以試吓日本和牛(HKD170/200g),睇見啲雪花紋就流晒口水喇! 提埋大家,餐廳試業一排調整咗價錢,呢幅圖係最新資料呀。   牛極 地址:旺角通菜街78號地舖 電話:6388 8002 營業時間:星期一至日:12:00-23:00

0

【山下菓子×粉紅兔兔 限定menu又食又拎】山下菓子

旺角嘅山下菓子Kingsley Café and Meal 又有新搞作,今次同P助與粉紅兔兔聯乘推出限定cafe menu!唔止食物變成P助與粉紅兔兔嘅可愛造型,餐廳都以佢哋大玩烹任教室主題。打卡、食嘢買精品都同場搞掂,睇吓邊款啱你啦! 餐廳變妝之後,好多位打卡呀! 小動物百寶盒(HKD168)有餐前小吃、沙律同燒雞,成個百寶盒咁,食完仲可以帶返屋企㗎!    P 助與粉紅兔兔粉紅卡邦尼意粉(HKD88)特別配合粉紅兔兔嘅顏色,睇見都少女心爆發囉。 P助與粉紅兔兔千層蛋糕(HKD58)用優質奶油製成嘅忌廉,配上薄薄嘅餅皮,配埋棉花糖、生果等配料,一定甜入心。 粉紅兔兔迷你鮮果卷連P助Cremia雪糕杯(HKD88)嘅鮮果卷冇添加任何乳化劑同防腐劑,係全人手製造㗎,加埋時令新鮮水果同日本直送嘅Cremia雪糕,愈食愈滋味。 飲品方面都有精品跟埋送俾你: – 熱飲附送咖啡杯 – 凍飲就送可愛嘅牛奶樽 – 每款特飲分別配咗四款吊飾 現場仲有唔少精品俾你買走: 環保食物袋(HKD120 ) 帆布袋連毛絨零錢包(HKD170)   山下菓子Kingsley Café and Meal  地址:旺角彌敦道700號T.O.P商場3樓315號舖 電話:3905 1470 營業時間:星期一至日:12:15-22 :00

0

【罕有希臘菜自助餐登陸旺角 希臘芝士焗龍蝦鹹香鮮味】The Place

提起地中海菜系,要數花款多又有惹味烤焗菜式?點少得希臘菜呀!旺角香港康得思酒店嘅餐廳The Place,最近推出以希臘菜為主題嘅「味遊希臘」自助餐,亮點除咗有大受歡迎嘅即開生蠔、香煎鵝肝之外,梗係歎勻多款精緻希臘菜式啦。自助晚餐比午餐多啲款,一於睇吓晚餐有咩特別菜式先。 餐廳空間感幾重,坐得夠舒服。Buffet bar又夠晒大,拎嘢食都唔使同人逼。 先嚟前菜開開胃!呢款檸檬油醋漬章魚,一塊塊章魚嗦晒檸檬香味,酸尾尾好醒神。 熱盤小食必試希臘烤肉串,夠香口又啖啖肉。 仲有各式希臘經典沾醬,俾大家試真啲希臘風味。 菲達芝士焗龍蝦係今次自助餐主打嘅海鮮熱盤之一,用咗希臘原產嘅菲達芝士嚟焗龍蝦,提起龍蝦嘅鮮味,又有陣令人流口水嘅鹹香! 呢款鹽焗香草三文魚配青瓜乳酪醬最特別嘅係喺個醬身上,因為青瓜乳酪醬係希臘傳統醬汁,同三文魚肉特別夾㗎! 仲有傳統希臘菜必食嘅希臘特色烤羊腿,一眾羊肉迷咪錯過呀!臨尾記得食埋蜂蜜榛果千絲捲、鮮莓乳酪芭菲、希臘乳酪等等甜品先埋單。   「味遊希臘」自助餐 供應日期:即日起至6月30日 供應時間: 自助午餐供應時間:星期一至日:12:00-14:30 收費: 星期一至五:成人:HKD358/位,小童及長者:HKD278/位 星期六、日及公眾假期:成人:HKD428/位,小童及長者:HKD328/位 自助晚餐供應時間:星期一至日:18:30-21:45 收費: 星期一至四:成人:HKD638/位,小童及長者:HKD458/位 星期五、六及公眾假期前夕:成人:HKD698/位,小童及長者:HKD498/位 星期日及公眾假期:成人:HKD658/位,小童及長者:HKD478/位 (另收加一服務費)   The Place 地址:旺角上海街555號香港康得思酒店L樓層 電話:3552 3028 營業時間:星期一至日:06:30-00:30

0

【親民價拉麵冇偷工減料 $98限定海膽拉麵超滿足】一生懸麵

一生懸麵喺日文有努力、盡全力去做嘅意思,所以店主Gary用嚟做拉麵店店名。點先盡全力去做?好似豚骨湯每日用三十斤豬骨加三十斤雞腳熬最少十個鐘,就知認真又足料喇!最初牛頭角總店已經出名抵食分量足,分店開到去旺角繼續呢個理念喎,點解咁堅持?「本身我好鍾意煮嘢食,做咗十五年西餐、五年日本餐。之後見愈來愈多人鍾意食拉麵,覺得好厲害就去日本學師,嗰時做咗義工半年先打動到位師傅教我。當時傾咗個日本拉麵品牌返嚟,依家就開『一生懸麵』,做親民價拉麵。人哋九十幾蚊碗都咁多人食,我賣六十幾蚊會開心啲囉。係冇咩錢賺,如果為錢我就唔做呢個價啦,希望分店大啲、多啲人食到。」講到咁抵食,即刻睇吓限定嘅海膽拉麵有幾足料啦! 簡約日本小店風格俾人感覺好乾淨整齊。 雲丹拉麵(HKD98)係限定產品,做到3月15日就會稍停一段時間,之後有機會加入日常menu。點鮮咁受歡迎?「有啲人幾鍾意海鮮類,呢個麵嘅湯底加咗40g韓國海膽一齊煮,所以比平時嘅豚骨湯再厚身啲同杰少少,加埋面頭再鋪40g輕輕火灸過嘅海膽,真係好抵食。」雖然味濃但唔會過鹹,質感仲幾滑,想佢快啲正式加入日常menu就快啲同老細反映喇! 「二郎系」拉麵,係日本其中一個拉麵派系,簡單啲講即刻啲料又多又足又亂咁堆晒啲材料!有食客就覺得一生懸麵呢個名古居二郎系拉麵(HKD68)嘅材料唔夠「亂糟糟」,Gary又點睇?「係㗎,我都想整亂啲㗎!如果喺名古居嘅二郎系拉麵,擺盤會將所有食材一『pat pat』咁撻上麵度,但嚟到香港如果唔了解嘅可能會誤會我哋求其,所以冇整太亂。」咁小編都撈亂啲先食喇!其實初時見咁大堆蒜頭,有啲擔心味道唔夾,點知蒜味滲入豚骨湯底係異想融合喎,唔會搶咗湯底嘅味又層次豐富啲。厚切豚肉肥瘦大約2/8比例,入口唔會油淋淋。大約煮兩個鐘,上枱前再火灸,令香味更濃郁,兩大塊肉令人食得好滿足!湯底睇落油膩,但入口幾順滑,飲晒都冇問題喎! 另一個受歡迎嘅係濃香櫻蝦沾麵(HKD78),湯底加咗海量櫻花蝦,食到底都仲有,不過豚骨湯質感好似比名古居二郎系拉麵薄啲嘅?「因為配櫻花蝦,所以溝埋豬骨湯同魚介湯用嘅比例調整過,而呢款用魚介湯會多啲。」好在味道唔會淡咗,因為沾麵嘅湯本身比拉麵鹹啲,反而想冇咁濃味可以先唧啲青檸汁喺麵度。 唐揚炸雞(HKD32)一碟5大件,幾令人滿足。外皮脆口,炸漿又唔厚,唔點沙律醬都好夠味,點咗就中和返啲!   一生懸麵 地址: 旺角通菜街73號地下 電話:2748 1001 營業時間:星期一至日:12:00 -22:00

0

【越式All Day Breakfast夠創意 椰青焗飯海鮮滿到瀉】Le Viet

想搵間坐得舒服、食物質素唔錯嘅越菜餐廳可以試吓Le Viet喇,餐廳推出咗充滿越南風味嘅越式全日早餐,同平時食開嗰啲All Day Breakfast好唔同㗎!餐廳近期仲喺旺角開咗新分店,今日等小編去睇吓有咩好食啦! 餐廳格調充滿越南度假風情,而且空間都幾大,有唔少座位。 話晒都係越南餐廳,連All Day Breakfast都有越菜特色!呢個豐盛全日早餐(HKD108)望落真係豐富,有一大碗越南雞粥、越式蒸粉包、多士、菜脯煎蛋,仲有好多杯唔同款式嘅食物,啱晒同小編一樣乜都想試吓嘅人!小編試咗碗雞粥,雞件分量都幾多,冇乜特別嘅調味之下都幾鮮甜,想濃味啲都可以加啲芫荽蔥花、肉鬆或者魚露。 食完碗粥其實都飽咗一半,好彩其他食物都細細份,可以逐樣試吓。最左邊係越式柚子大蝦沙律,大蝦夠爽甜,加咗酸酸甜甜嘅柚子入去好Fresh,下面啲蘿蔔絲嘅口感又爽脆,幾開胃;最右邊嘅係一款西式甜品焦糖燉蛋,焦糖面燒得夠脆,燉蛋滑得嚟好有奶香,不過就嫌佢太細杯,唔多夠喉囉! 全日早餐入面嘅越式蒸粉包係越南菜嘅餐前小食,除咗餡夠多,面頭仲放咗扎肉、乾蔥,蘸魚露嚟食真係好惹味! 嘩!呢款超載椰青焗飯(HKD103)真係同佢個名一樣呀!店員將成個椰青搬上枱嘅時候,小編真係嚇親,因為賣相都幾誇張吓,原個椰青上面放滿勁多海鮮同椰汁飯,再淋咗好澎湃嘅椰漿。焗飯分量超多又足料,應該起碼3個人share先食得晒。呢個椰青焗飯食落椰香味好重,出奇地同啲海鮮又夾到喎,不過味道上就會帶有少少甜味,如果鍾意椰香味嘅可以一試! 小編就好鍾意食呢道金不換白酒煮蜆配法包(HKD158)喇!隻隻蜆又大又飽滿,仲吸晒啲白酒同香料味,煮得好入味。食落都幾重金不換味,又夠鮮甜。煮過蜆嘅汁有好濃鹹香味,可以話係成道菜嘅精華,用跟埋嘅法包蘸汁嚟食就一流喇!不過呢道菜係旺角店嘅限定菜式嚟,想食就要去旺角喇。 想試返傳統啲嘅越南菜就可以嗌碗Pho嚟食喇,呢個特別火車頭(HKD78)除咗生牛肉之外,仲有牛丸、牛柏葉同牛腩,成碗湯粉都有濃郁嘅牛肉味!   Le Viet (旺角分店) 地址:旺角彌敦道636號銀行中心1樓101-106,108-109號舖 電話:2521 6322 營業時間:星期一至日:08:00-00:30