Tagged: 時代廣場

0

【米芝蓮三星廚魔主理 慢煮北京烤鴨鮮嫩多汁】鴨大哥

想食北京烤鴨,識揀梗係去銅鑼灣時代廣場嘅鴨大哥啦,由米芝蓮三星大廚「廚魔」梁經倫(Alvin)主理,水準一定有返咁上下,所以有唔少食客都去捧場㗎! 鴨大哥開到去新加坡,衝出香港都咪話唔厲害,小編一於試試佢嘅招牌鴨先。 酸辣湯嘅開胃感一向吸引人,鴨絲酸辣湯(HKD60)就更上層樓。木耳絲同筍絲等材料充滿爽口感,又有鴨肉嘅甘甜味,酸辣度啱啱好唔會太辣,做開胃菜非常唔錯! 呢度嘅北京烤鴨(HKD228/半隻)以慢煮方式製作,保持鴨肉鮮嫩多汁,皮薄香脆又唔多肥膏。配埋青瓜、京葱、蘿蔔同蜜瓜包住一齊食,清新爽甜嘅感覺可以減低油膩感,呢個配搭係出乎意料咁好喎! 北京烤鴨二食 – 蒙古式炒鴨崧(HKD70)都幾惹味同有鑊氣,好似生菜包咁食又好清爽,成件事好夾。 蜆蚧煎釀唐生菜膽(HKD128)彈牙嘅口感令人食完一件又一件,仲有粒粒蜆肉啜嚟食,真係好滋味。 呢度嘅點心都唔錯,雪菜鴨絲芋角(HKD38)炸得勁鬆脆!餡料又足,粒粒都好飽滿!雪菜不但減咗啲油膩感,仲令味道更加香口。   鴨大哥 地址:銅鑼灣勿地臣街1號時代廣場10樓1001B號舖 電話:2882 8600 營業時間:星期一至日:11:30-15:00;18:00-23:00

0

【午市套餐蠔食推介 海膽虎蝦鱸魚任你揀】CLUB ALBERGUE 1601

銅鑼灣Times Square食通天一向都係美食集中地,今次小編就去咗呢間主打西餐嘅CLUB ALBERGUE 1601,環境超闊落,除咗有長吧枱同咖啡吧之外,仲有蠔吧同空中花園添! 中午想同朋友小聚又點?呢度都算得上係好選擇,事關CLUB ALBERGUE 1601嘅Lunch set食物好豐富,頭盤包餐湯蒜蓉多士仲有隻蠔添!跟住仲有多款意粉同飯可以揀,分量都算大份,所以同朋友Share食就可以試到多啲口味喇。餐廳仲有Special Green嘅餐牌俾素食嘅朋友,照顧周到好貼心啊! 海膽煙意大利腩肉蛋黃汁意大利粉(HKD198)加咗大大嚿海膽嘅Carbonara真係睇見都流晒口水呀,香濃嘅蛋黃汁加上鮮甜海膽味道超夾! 虎蝦帶子意大利飯(HKD188)2大隻虎蝦加埋煎香咗嘅帶子,成功俘虜海鮮迷嘅心呀,另外小編覺得意大利飯質感唔錯,有咬口得嚟唔會太硬,同出面啲意大利飯真係有分別! 雪花鱸魚湯飯(HKD338)如果Lunch唔想太Heavy亦可以試吓呢個鱸魚飯,湯底好鮮甜,感覺清新。 另外每個Lunch Set都可以加$20歎返杯經典咖啡或者加$30食個芝士蛋糕或者伯爵茶奶凍㗎,咁就夠晒滿足喇!   CLUB ALBERGUE 1601 地址:銅鑼灣勿地臣街1號時代廣場食通天11樓1105號舖 電話:2573 3344 營業時間:星期一至日:12:00-23:00

0

【素Pizza輕食新口味 黑蒜羽衣甘藍香氣逼人】PizzaExpress

喺銅鑼灣行街睇戲食飯,有時都想輕食得嚟又食好啲。去時代廣場嘅PizzaExpress都係好選擇,仲發現佢哋都幾多素食添。 環境好開揚,又可以睇住師傅整Pizza,香氣飄飄,未食已經引到你口水流。 頭盤意式焗肉丸(HKD68/一客;HKD103/兩客)幾彈牙,配嘅麵包外脆內煙韌,好有口感,配埋肉丸嘅茄醬好惹味。 黑蒜羽衣甘藍薄餅(HKD138)係意想不到嘅甘甜惹味!雖然主料係黑蒜同羽衣甘藍,唔係落咗好多香草,但一上枱就香氣逼人,引到隔離枱都想食。13″嘅Size都幾大,不過素菜又唔會令你覺得滯,女仔食都唔怕肥。 意式野菌蝴蝶粉(HKD128)分量足,蝴蝶粉煮得幾彈牙,淋咗少少松露油增加香氣。汁嘅幼滑程度啱啱好,味道算清而不膩。 另一驚喜係意式無花果乾咖啡蛋糕(HKD68),無花果有少少糖漿包住咁,一啖連埋雪糕、蛋糕同熱咖啡一齊食,冷熱交融嘅口感真係好令人大滿足,仲要唔會好甜,真係超好食! PizzaExpress 地址:銅鑼灣勿地臣街1號時代廣場12樓1203號舖 電話:2506 0688 營業時間:星期一至日:11:30-22:30

0

【型格生蠔吧食得潮 蟹肉黑魚子味蕾衝撃】CLUB ALBERGUE 1601

喺時代廣場嘅CLUB ALBERGUE 1601真係夠晒多元化,食西餐得!怒食生蠔又得!靜靜哋飲返杯又得喎,仲有空中花園添!環境係點?睇埋落去啦: 呢度地方闊落,吧枱飲兩杯又得,坐低歎一餐又得。 蟹肉黑魚子火箭菜沙律(HKD178)啖啖蟹肉好足料,咬爆黑魚子「卜卜」聲嘅口感仲滋味,配埋香脆嘅法包就更加滿足喇。 蒜片辣椒(HKD138)啱晒素食嘅朋友,爆香咗嘅蒜片幾香口,加上辣椒提味清得嚟都幾惹味。 生蠔吧嘅蠔每日新鮮直運,試晒咁多款已經好豐富。 空中花園好浪漫,攬住咕?飲杯嘢,傾吓偈好梳乎。   CLUB ALBERGUE 1601 地址:銅鑼灣勿地臣街1號時代廣場食通天11樓1105號舖 電話:2573 3344 營業時間:星期一至日:12:00-23:00

0

【蒜頭狂迷指定餐廳 甜品計「蒜」都咁夾 】Mad for Garlic

呢間喺銅鑼灣時代廣場充滿韓風嘅意大利菜,用咗重口味嘅蒜頭串聯成本menu,由前菜到甜品都無一倖免。由12月15日到1月1日就可以食到Mad for Garlic嘅聖誕套餐,即刻睇吓呢場「蒜」術大戰有幾重口味! 大玩韓風講氣氛嘅Mad for Garlic,入到去就見到歐陸酒窖式嘅卡位設計,好似去咗旅行咁好feel,地方寬闊,仲有半開放式廚房,可以見到廚師製作過程,小編特別鍾意! 造型得意嘅MFG特色蒜蓉包塔,睇落無從入手?唔使怕,侍應會幫你壓平切開,等客人可以細件啲咁食,好貼心啊! 睇落以為只係普通白湯?梗係唔係啦,呢款蒜香薯仔濃湯除咗有薯仔嘅甜味,仲有淡淡蒜香,湯嚟啫!食落唔會太重味,因為主菜先係重頭戲啊! 想要重口味嘅千祈唔好錯過熱板烤MFG招牌蒜頭山肉眼扒,捉緊時間喺熱辣辣嘅鐵板解決呢塊充滿蒜片嘅嘅肉眼扒,切開一小塊配埋大啖蒜片,成個口腔都充滿蒜味。 唔想咁重口味,可以揀蒜香扒石斑配香煎帶子,一樣走唔甩嘅蒜味,但配上味道淡啲嘅石斑,蒜頭就做咗個調味嘅作用,再加上煎到啱啱好同時外脆內軟帶子,想揀邊樣就跟你口味啦! 用無辜表情望住你食嘅蒜頭香蕉朱古力醬薄餅配自家製雲呢嗱雪榚,意想不到嘅配合!以蒜味配合香甜嘅香蕉,小編就會將一啖雪糕放上薄餅度,然後放晒入口,就唔會覺得啲朱古力醬太過甜啦!   Mad For Garlic Christmas Menus MFG特色蒜蓉包塔 蒜香薯仔濃湯 (兩客) 凱撒沙津 伴焗南瓜及脆芝士 熱板烤MFG招牌蒜頭山肉眼扒 或 蒜香扒石斑 配香煎帶子 蒜頭香蕉朱古力醬薄餅 配自家製雲呢嗱雪榚 供應期限︰12月15日到1月1日 價錢︰HKD688 (兩人份)   Mad For...

0

【約埋閨蜜過聖誕 超嫩火雞雪人糖果屋】Greenhouse

喺時代廣場食通天以溫室做主題嘅Greenhouse,係唔少一家大細享用晚餐嘅落腳點,嚟緊12月20至12月26日嘅聖誕套餐,大班朋友一齊食就記得打電話卜定位喇!無論環境定食物都令人有置身戶外嘅感覺,座位仲好闊落,正中位置仲有小屋造型嘅長枱,唔少人都會約埋朋友享受喺小屋位置享用晚餐,連打卡位都安排好,仲唔快啲去試吓! 頭盤Let’s Start一次過俾你試晒生蠔、大啡菇、煙肉帶子串、香辣雞翼同吞拿魚他他,樣樣都勁吸引,單係頭盤都已經好似聖誕禮物咁多驚喜,仲未滿足就要繼續食落去啦! 用慢煮處理嘅Slow Cooked Turkey with Tiger Prawn係主菜嘅其中一個選擇,保持多汁嫩滑嘅口感,再加上煎香嘅大蝦,配合微酸嘅黑醋,簡直係味覺享受。 一家大細嘅聖誕大餐又點少得甜品Happy snowman,有聖誕樹造型嘅朱古力布朗尼同得意到爆嘅雪人,用小鐵鍋裝住蘋果金寶,香甜嘅蘋果味同鬆脆嘅口感令人停唔到口。   Christmas Set Dinner Appetizers Let’s Start Teriyaki oyster, deep fried chicken wings, tuna tartare, robata porabello, robata scallop Soup Butternut Squash Soup...

0

【正宗上海風味 俐落刀法片出松子魚】上海小南國1987

喺上海總店已經有30年歷史嘅小南國,進軍香港亦都有15年,位於銅鑼灣時代廣場嘅上海小南國1987分店,除咗秉承上海菜濃油赤醬嘅特色,亦照顧本地口味。講到正宗上海菜,令小編心動嘅絕對係豐富嘅前菜為一餐打響頭炮。 走入上海小南國1987,迎接客人嘅係典雅又摩登嘅格局,門口嘅酒櫃,就令人感受到上海氣派。餐廳仲有包廂提供,絕對提供咗一個舒適嘅環境歎美食! 前菜喺上海菜擔當咗重要嘅角色,而上海小南國1987亦都喺前菜方面花咗好多心思。以小碗上碟嘅紹興花雕醉雞(HKD80),一入口係濃烈嘅花雕香味,肉質仲好滑溜添! 賣相一流嘅當家松子桂花魚(HKD288),師傅以俐落嘅刀法將魚肉片出而不離皮,醬汁輕易就掛喺魚肉身上,每啖魚肉都可以食到酸甜味,直頭內外兼備呀! 一晚至少出三、四十盤嘅如意鍋燒黑豚肉 (HKD298),肉質完全唔會粗糙,非常滑溜,睇上去顏色雖然好深,但絕對唔會過鹹,皮脂肉分佈平均,食落口都唔會覺得油膩。注滿熱水嘅碗座保持溫度,非常貼心! 生拆蟹粉豆腐(HKD158)看似好易做,但要保持滑溜又唔炒到碎開係好考師傅嘅功力,將蟹粉同豆腐融為一體,每一啖都品嘗到蟹嘅鮮味。 上海小南國1987 地址:銅鑼灣勿地臣街1號時代廣場11樓1103號舖 電話:2874 8899 營業時間︰星期一至日 11:30-15:00;18:00-23:00

0

【日本即日新鮮運送 刺身拼盤薄片顯功夫】鮨穴

日本料理食材當然要「鮮」,呢間喺時代廣場嘅鮨穴,無論係平時常見嘅串燒、刺身定係天扶良,都製作認真,除咗款式夠多之外,仲有每日由日本新鮮運送生猛海鮮到港,保證食得夠「鮮」! 入到去吧檯,少不免會被檯上嘅海鮮吸引,原來除咗用嚟做刺身,仲會有埋爐端燒,連唔太鍾意食凍嘢嘅朋友都照顧埋啊! 呢款精選特上刺身拼盤 (HKD688) 必有日本海膽、牡丹蝦、北海道帆立貝同好受香港人歡迎嘅厚切吞拿魚,話咗係特上,梗係仲有日本空運抵港的時令刺身,一共8款,連山葵都係手磨,絕對認真。左口魚就多人食,今次小編就介紹你試右口魚薄切,味道清甜易入口。 啖啖串燒啖啖肉,為咗食多幾款試真啲,小編散叫咗幾款串燒,包括有牛脷塩燒(HKD58)、羊扒 (HKD 88)、日本黑豚肉五花腩(HKD 48)、帆立貝 (HKD 68) 、雞軟骨(HKD 28)、日本銀杏(HKD 42)同青椒仔 (HKD 28)。小編最推薦羊扒同牛脷塩燒!唔會燒到乾身嚡口,入面仲Keep住Juicy,記得趁熱食啦! 為咗保持食材嘅新鮮同味道,餐廳仲特別喺日本購入恆溫炸爐,令到特上雜錦天扶良 (HKD398)每件都平均受熱,每次落單時再調配炸漿,保證每樣食物都新鮮處理。用上芝麻油,將天扶良炸到金黃色又不失鮮味,其中一款三蟹卷,用紫菜包住再炸,入面有齊蟹肉、蟹子同蟹膏,蟹味一次過衝入味蕾。 鮨穴 地址:銅鑼灣勿地臣街1號時代廣場12樓1202號舖 電話:2506 1232 營業時間︰星期一至日 12:00-23:00

0

【煲仔飯終極食法 終極完美脆卜卜煲仔飯焦】利苑酒家

睇《食神》成日都話要去中國廚藝學院度學藝,你又知唔知利苑其實都有「飲食少林寺」同「名人飯堂」嘅美譽呢?因為喺選料過程到烹調技巧都極盡心思,出品要求嚴格,所以喺度做廚師隨時可以練到一身好武功。想睇場戲先再食飯,去時代廣場食通天都唔錯,一落樓下3分鐘就到利苑喇。 食中餐又點可以唔嗌個煲仔嚟食呢?XO醬蟹肉粉絲煲(HKD130)真係無花無假,個煲入面勁多勁多蟹肉,啲粉絲索晒XO醬精華好入味,成個煲勁惹味香濃!一上菜大家就搶晒。 有無人知道其實利苑係一間海鮮酒家?原來佢地啲海鮮都非常不錯啊!鍾意食海鮮就一定要食金蒜金菇蒸元貝(HKD68),元貝大件到切埋分開3件俾你食,配埋蒜蓉香蔥好惹味,一啖食晒成件鮮味爆燈又彈牙。 重點到喇!食好味嘅煲仔飯唔一定要走到街頭,想食勁量飯焦就一定要嚟呢度。蝦乾豬頸肉臘味煲仔飯(HKD160)熱辣辣嚟到,一打開即刻出晒煙,豬頸肉嘅肉香都跟住出晒嚟。將豉油加落個飯度,粒粒米飯都吸晒蝦乾同豉油嘅味道,底下仲有好多飯焦添! 鍾意食飯焦一定要試呀,大過薯片成塊脆卜卜,唔痴牙,焦香又好味! 怕直接食飯焦熱氣?小編提提你呢度可以幫你整埋上湯飯焦,唔會咁熱氣之餘,仲要係免費添!只要你話想整埋上湯飯焦,店員就即刻幫你去煮。 煮出嚟仲留有飯焦嘅少少香味,配埋上湯,加入芫荽調味,更易入口同消化,啱晒唔鍾意食硬飯嘅人又唔會做咗大嘥鬼! 飯後甜品當然要試佢地招牌擂沙湯丸(HKD33),薄薄嘅糯米皮包住黑芝麻餡,口感煙韌,味道夠晒香濃! 利苑酒家 電話:2506 3828 地址:銅鑼灣勿地臣街1號時代廣場食通天10樓 營業時間:星期一至日:11:30-15:00;18:00-23:30

0

【日日排隊等位 米芝蓮都推介!】金滿庭京川滬菜館

相信不少香港人都認識金滿庭呢間京川滬菜館,由2002年到今日,大大話話都已經15年喇!餐廳不論內在環境同菜單都力求完美,所以好短時間內得到好多飲食獎項,仲拎過米芝蓮推介添!一班追求品質,對食物有要求嘅吃貨,又點可能錯過。唔好成日覺得同屋企人先會食中菜,其實同一班識飲識食嘅friend出嚟食飯,都可以去呀。小編最鍾意去銅鑼灣時代廣場食通天嘅金滿庭,方便就腳之外,朋友遲到都唔怕,可以去商場shopping! 唔好以為叫得三文治一定同麵包有關,呢個豆腐三文治(HKD68)用滑溜豆腐夾住肉鬆同榨菜,入口滑得嚟味道又夠香濃! 如果鍾意食包點,可以試下黃金腿蓉卷(HKD36),外皮夠晒脆口,裡面嘅火腿蓉鹹香四散,食完個口仲有陣陣香味。 究竟紫薯點解會咁有魅力?點解每個女仔見到紫薯都會心動?就連金滿庭都要推出紫心蕃薯浸莧菜(HKD86),俘虜各位女士嘅心。 招牌擔擔麵(HKD44)講到明得獎,叫得做擔擔麵天王,點可以唔試!麵條彈牙,花生碎夠多食落有口感,湯底亦唔會太杰身,食得出有啲功架。 榨菜肉末配叉子燒餅(HKD98)燒餅香口得嚟食落唔會覺得油,將啲榨菜同肉末一羹羹塞入去,味道香濃唔會膩。 食京川菜又點可以唔嗌返碟辣嘢食下?巴蜀辣子雞丁(HKD98)腰果夠晒脆口,配埋雞肉同辣椒一齊炒,夠晒麻辣刺激又香口! 大力推薦要留肚食金滿庭嘅甜品,好食過出面糖水舖!酒釀桂花丸子(HKD34)滑捋捋丸子入面有流心黑芝麻,絕對唔hea!甜度適中,淡淡桂花味,感覺非常養生。 金滿庭京川滬菜館 電話:2506 2525 地址:銅鑼灣勿地臣街1號時代廣場13樓1301號舖 營業時間:星期一至五:11:45-16:30,17:45-23:00;星期六至日:11:45-23:00;公眾假期:11:45-23:00