Tagged: #暗瘡

0

【夏天塊面爆汗又爆油 食咩先可以急救控油?】懶健康貼士

夏天又濕又熱,好多人嘅面油多到可以煎蛋呢!已經成日洗面抹面、但好快又再油光滿面?溫度的確同皮膚油脂分泌有關,溫度每上升攝氏1度,皮膚排油量就增加10%;而且夏天仲會出汗,又油又水嘅狀態,就更加油光滿面。除咗同濕度、油性皮膚、荷爾蒙、年齡同性別有關外,其實飲食都有影響㗎,例如經常食高脂、高鹽、辛辣、煎炸同肥膩濃味嘅食物,都有可能刺激皮脂腺變得活躍。 飲食習慣改善到油光面滿? 消化系統出現問題最終會呈現到肌膚表面,所以要有健康肌膚就先要從飲食著手,攝取足夠營養素同維他命係改善膚質關鍵:如進食含有蛋白質嘅魚類、堅果同白肉;穀物類如糙米、蕎麥同藜麥,仲有蔬果類如蕃茄、西蘭花同紅菜頭都係非常有助控油嘅食物。 糙米 | 豐富膳食纖維,排出廢物養成美肌 比起白米, 糙米保留咗好多營養,含有更多纖維素、維生素B群同維生素E等,可以增加膳食纖維嘅攝取量,可以促進腸道蠕動,幫助排便,加速排出體內廢物同毒素。如果經常便祕,毒素不斷累積,容易跟住全身循環影響皮膚,造成粉刺、痘痘等問題! 三文魚 | Omega-3降低發炎,保養皮膚 除咗三文魚,鯖魚、鮪魚、秋刀魚同沙甸魚都含有較高嘅Omega-3脂肪酸,能減少體內發炎反應、幫助調節免疫力,有利於肌膚保養,幫助降低皮膚過敏機會。最好用蒸、烤方式料理,避免油炸、煙燻,以免食到有害物質。唔鍾意食魚愛或者係素食者,可以改食果仁類如核桃,當作植物性的Omega-3脂肪酸來源。 鮮艷蔬果 | 防止皮膚乾燥衰老,維持皮膚表皮同毛孔組織健康 鮮艷蔬果如紅蘿蔔、蕃茄同奇異果等含有豐富維他命A、C、E同天然抗氧化劑,除維持皮膚組織健康同將破壞皮膚嘅自由基清除,以保護皮膚細胞健康同抗衺老之餘,亦能有效對付油脂腺增加分泌油脂而形成的暗瘡。維他命A因有消炎功效,能減低發炎情況同修補組織,而維他命C就有助形成骨膠原同連接組織,保持皮膚平滑同彈性,改善油光面滿。   總之有均衡飲食、多食顏色鮮艷生果蔬菜同多飲水仲要作息定時,記得要放鬆情緒,加上注意個人衞生同埋防紫外光保護,就可以有剥殼雞蛋嘅靚靚肌膚啦!   Michelle Lau 營養諮詢公司NUTRILICIOUS創辦人及首席營養師(加拿大人類營養學碩士)。專注範疇包括運動營養學、體重管理、兒童和婦女營養學。致力推廣均衡營養飲食概念,為多間機構提供營養飲食服務及為顧客提供度身訂造的飲食計劃 。作為一個熱愛跑步和烹飪者,她深信 “Life is so endlessly delicious.” Follow her on ig/fb@nutriliciousss

0

【7大抗炎減油脂食物 皮膚靚返暗瘡Bye Bye】懶健康貼士

開始熱喇,又到暗瘡朋友煩惱嘅日子……暗瘡有好多種,唔食煎、炸、甜、辣等等刺激食物好基本,但係都未必解決到兩個問題:油脂分泌旺盛同紅腫發炎!搽藥膏就梗㗎啦,但係食咩可以減輕油脂分泌同發炎嘅情況呢?睇睇呢啲食物邊款啱你: 減少油脂分泌 白蘿蔔熟食可以降火利尿、幫助消化。佢嘅膳食纖維含量豐富(尤其係蘿蔔葉),促進腸道蠕動提升排毒作用,可以改善皮膚粗糙同粉刺等問題。 紅蘿蔔同樣有豐富纖維之餘,佢吸水力強,可以加強腸道蠕動。另外,紅蘿蔔仲含有降糖物質,例如檞皮素、山標酚可以降低血脂。 生青瓜含有一種叫丙醇二酸嘅物質,可抑製糖類物質轉變為脂肪,但都唔好因為咁而暴食甜食㗎! 綠茶含有嘅茶多酚同維他命C可以促進脂肪氧化、幫助消化同降脂。 抗炎食物 苦瓜中嘅奎寧有利尿活血、消炎退熱嘅功效。而苦瓜素仲有「脂肪殺手」之稱,可以減少攝取脂肪同多糖。苦瓜性質偏寒,孕婦不宜多吃。 冬瓜性質偏寒,可以清熱解毒、排膿、清胃降火同消炎。 綠豆喺《本草綱目》記載,有消腫下氣、清熱解毒、調和五臟、滋潤皮膚嘅功效。綠豆粉可以治療瘡腫;綠豆皮可以消炎解熱毒,所以夏天好多人煲綠豆湯飲㗎。