Tagged: 松葉蟹

0

【$168平食原隻松葉蟹丼 老闆:希望搵到日本味道!】茶屋町

深水埗除咗多頹飯食,其實近年都開始有唔少新力軍進駐,好似呢間茶屋町就係其中之一喇!以日本鐵路為主題嘅小店,店內有唔少布置都同火車主題有關,幾有日本風情㗎!點解揀喺深水埗開餐廳?老闆話唔係想賺啲咩錢,只係希望將佢熱愛嘅日本飲食文化帶嚟香港,俾大家都試到!佢話開業至今真係唔少客人話喺呢度搵到日本旅行時食到嘅味道,相信呢啲feedback就係老闆繼續努力嘅最大動力!  除咗店內有唔少火車嘅擺設之外,客人嘅用餐位置隔離更有一個模擬火車窗,等大家一路用餐一路想像吓喺日本火車上食便當嘅旅行氛圍。 今次小編極力推介原隻松葉蟹飯(HKD168/原價298),每日只賣10隻,夜晚6點後開始供應,賣晒就冇㗎喇!你以為百幾蚊隻蟹實係細細隻㗎?錯喇,隻蟹相當足秤㗎!其實自己買隻蟹返嚟都唔止呢個價,呢個價錢堅良心呀!提提大家,$168呢個價錢只要大家用Facebook Like&Share佢哋專頁帖子就可以享用㗎喇! 蟹蓋同蟹身嘅肉,店家已經好貼心咁幫大家起晒出嚟,再用芝麻醬作調味,大家揭開個蟹蓋就食到啖啖蟹肉,好疏肝呀!雖然用芝麻醬調味,不過醬汁酸甜得嚟並冇搶去蟹肉鮮味,撈埋蟹子拌飯食就一流喇!呢隻蟹嘅蟹腳非常之肥大,肉質非常鮮甜,大家可以問店員攞蟹鉗慢慢拆肉食! 除咗松葉蟹之外,小編覺得牛面頰飯(HKD92)同樣咁出色呀!店員話日本餐廳普遍比較少用牛面頰做料理,呢道菜係主廚用法式慢煮嘅方式鎖實日本醬油汁,Slow cook足3個鐘,夠晒腍! 平時食法國菜都有機會食到紅酒燴牛面頰,通常比較好咬口,感覺充滿骨膠原咁。今次食呢個慢煮版又有另一種感覺,食落有骨膠原嘅彈牙感之外,肉質真係好嫩喎!日式醬油入晒味,唔錯呀! 除咗主食之外都有自家製甜品㗎!材料大部份都係用日本貨,一啲都唔馬虎!呢個期間限定嘅Tea Set(HKD148)以士多啤梨為主調,總共有7款甜品,分別係草莓大福、紅豆燒餅、草莓奶凍、抹茶千層蛋糕、黃豆粉蕨餅、煉奶士多啤梨同埋芭菲。當中最吸睛當然就係呢個士多啤梨芭菲啦!自家製雪糕超濃奶香味,加埋依家當造超甜嘅日本士多啤梨,極級享受呀! 另外草莓大福同抹茶千層蛋糕亦係自家出品。大福嘅糯米皮夠晒煙韌軟糯,好有日本風味;至於抹茶千層蛋糕就犀利喇,用日本頂級嘅靜岡抹茶粉整成,甘香得嚟中間嘅cream超軟滑,正! 唔知大家知唔知道,日本人好鍾意將新鮮士多啤梨配煉奶一齊食,成件事真係好邪惡!不過日本人用嘅煉奶當然唔係我哋喺香港用開嘅鷹嘜啦,店家為咗還原日本口味,特登喺日本入呢款森永煉奶。甜得嚟冇咁肥膩,用嚟點士多啤梨真係一流呀!不過香港普遍零售店應該暫時都冇得賣嘅,大家要食就要去呢度朝聖喇!   茶屋町 地址:深水埗長沙灣道217號 電話:2660 7722 營業時間:星期一至日:12:00-22:00

0

【週末帶埋寵物 食原隻松葉蟹Paella!】Roofy Bar & Cafe

而家喺香港,個個都鍾意特色野。小編路過山林道,見到一間店面綠色為主嘅餐廳Roofy Bar & Cafe,單睇店面已經非常有個性。原來餐廳以Cafe × Bar為概念,除咗可以帶比食客新鮮感之外,仲可以發揮到廚師特色,務求大家食飯飲酒同樣盡興!有狗狗嘅朋友仔,逢星期六、日仲可以帶埋狗狗嚟食返個brunch添! 餐廳裝潢帶少少美國風情,最緊要都係感覺舒適。 首先係相機食先必備嘅原隻松葉蟹海鮮焗飯(HKD878),大約6-10人份量,跟返西班牙傳統Paella用煎pan上 。大大隻松葉蟹加上多種海鮮,好似青口、帶子、魷魚一齊放喺煎pan,未食已經可以呃咗視覺上嘅like先!食落款款海鮮都好鮮味,同成班鍾意食海鮮嘅朋友一齊食夠晒開心。 食厭咗中式燒腩仔?可以試試呢一味西班牙啤酒烤五花腩(HKD170)咪睇好似簡簡單單一份烤肉,其實準備工夫好充足!廚師會先以啤酒Estrella醃3日,再喺早一日先用啤酒麥芽發酵,令肉質更鬆化,然後再慢煎,將皮煎至脆身!食嘅時候配上葡萄芥末子醬,食落香口之中肉質帶點軟腍豐腴,有中式燒腩仔嘅香脆而肉質帶多重鬆化嘅感覺,好值得一試! 粟米片配牛油果醬+蕃茄沙沙(HKD88)佐酒小食又點少得粟米片呢?嚟到點一客粟米片,感覺唔油膩,配上牛油果醬同蕃茄沙沙感覺更清新,仲可以點多支手工啤酒同朋友慢慢傾計添! 店內仲有提供多款手工啤酒,好似呢幾款啤牌啤酒就夠晒盞鬼。咁多位賭俠傳人,記得同埋朋友試試啦!每張啤牌都有唔同味道同濃度,同班friend湊夠數整返個俘虜或者四條都幾好玩! Roofy Bar & Cafe 電話:2782 5772 地址:尖沙咀山林道46-48號運通商業大廈地下20-27號舖 營業時間:星期一至五:1430-23:00;星期六、日及公眾假期:12:00-00:00

0

【激鮮!日本海鮮即捕直送】焱丸水產

大家食開日本料理都知,食材新鮮最緊要!焱丸水產標榜每日將日本海鮮即捕空運到港,鮮味滿分。仲由日籍大廚設計咗多款嶄新又獨特嘅菜式同埋季節性料理,令你唔駛飛去日本,留喺香港都可以品嚐日本地道風味美食同埋築地最新鮮嘅水產。 鮮味海栗湯(HKD198)每日限定只有20份,絕對不可不試。湯底以新鮮海膽及各款海鮮煮成,飲落味道非常鮮甜。湯底煮滾後,加埋蔬菜同海鮮,海鮮輕輕煮一分鐘就可以食啦!而煮過海鮮嘅湯底,鮮味會變得更加濃郁,呢個時候加埋烏冬或者飯再煮多陣,就製成咗海鮮湯飯或海鮮湯烏冬,有機會一定要試下呀! 松葉蟹の煲(HKD228)肥美嘅松葉蟹一定係秋冬必選!首先以新鮮嘅海鮮餚湯,再加入鮮味濃郁嘅蟹膏,再擺埋肥美嘅松葉蟹腳同埋各款鮮甜時令蔬菜落去。當松葉蟹腳同埋蟹膏遇上,就會將蟹嘅鮮味進一步帶出。最後再加入珍珠飯、雞蛋及葱花,就即刻可以食到鮮甜味美嘅蟹粥啦。 貝の風呂浴(HKD98)湯底不含味精,以多款新鮮小魚加入昆布餚製而成,再加入貝類海產,味道獨特而鮮甜。主要貝類包括時令花甲、扇貝、大蜆等,煮好嘅貝殼類海鮮吸收咗魚湯嘅鮮甜,鮮味爆燈! 刺身壽司定食(HKD198)日本料理又點少得刺身及壽司?食材同樣係由日本空運到港,好鮮味!呢個刺身壽司定食,壽司方面有三文魚腩、魚籽、蟹膏、帶子同北寄貝等;刺身就有吞拿魚、鱆紅魚同海膽,款款都非常肥美又鮮甜,鍾意食魚生嘅你千祈唔好錯過啦! 海の幸(HKD88)具備3種獨特食法,兩款刺身飯唔單止可以自選,仲可以蘸特別調配嘅芝麻醬配搭或者用紫菜包住食。再唔係又可以將茶壼入面嘅茶湯同魚生飯混合,用佢嘅微熱令魚生滲出油分,令魚生肉質更加嫩滑,三種食法都好好味! 焱丸水產 (えんまる水產)  本店地址:尖沙咀棉登徑23號華楓大廈地下5&6號鋪 電話:2654 8200 營業時間:星期日至三:12:30-15:00;18:00-00:00      星期四至六:12:30-15:00;18:00-02:00 地址:銅鑼灣謝斐道440號駱克大廈B座C2地舖 電話:2907 2838 營業時間:星期日至三:12:30-15:00; 18:00-00:00      星期四至六:12:30-15:00; 18:00-02:00