Tagged: 果汁

0

【台灣文青果汁店登陸 天然味濃飲得健康】花甜果室

咁多間過江龍嘅珍珠奶茶長開長有咁款,開始厭未呢?如果真係驚咗成街都黑糖乜乜乜,依家有個新鮮選擇俾大家喇!同樣都係台灣過江龍,不過就主打純天然果汁,就係最近都有唔少好評嘅花甜果室喇!創辦人一直想大推健康果汁飲品,仲決定向香港市場進軍,等香港人都可以飲返多啲果汁,健康啲嘛!店內嘅每款果汁名仲改到好有詩意又有創意,百份百文青feel呀! 芭比情歸何處(HKD36),店內銷量冠軍,好受港人歡迎㗎!材料用咗士多啤梨、燕麥、藍莓同鮮奶,利用水果本身嘅色素做到一個天然嘅漸變效果,好靚好夢幻!飲之前記得要攪勻佢,唔係就會好淡㗎喇。 鈕扣(HKD36),有香蕉、菠蘿、橙汁同覆盆子碎,飲落酸酸甜甜,十分清爽,消暑一流!顏色方面非常夏天,飲一杯已經爽晒!細心啲睇,原來每個杯面都有唔同嘅手寫字款勵志句子,小編即刻收到晒滿滿嘅正能量,非常有心思! 他,與她的香水味(HKD45),呢個味道小編最鍾意。用火龍果、蘋果汁同自家製嘅蜂蜜乳酪,面層仲加咗椰子絲,飲落味道最突出!火龍果味好濃郁,一啖落肚就飲到沙冰嘅清涼,同時又有乳酪嘅口感,飲完都幾飽肚! 日安燕麥蕉莓泥(HKD36),有甜蕉、燕麥、鮮奶同藍莓,呢杯俾我嘅感覺雖然清淡咗少少,不過每一啖都有水果嘅存在,加上滿滿嘅燕麥,飲完覺得成個人都健康咗囉!   花甜果室 地址:尖沙咀加連威老道52號嘉蘭大廈地下C號舖 電話:6276 4280 營業時間:星期一至星期日:12:00-22:00

0

【細味大坑素食天地 自家製餡餅原汁原味】素食微調

平時食得太多肉,有時真係會忍唔住想Green Monday一吓!今次小編帶大家嚟到大坑呢間素食微調,入面有多款自家製嘅特色素食,等大家食素都唔會好似淨係食菜咁慘,其實素食都可以有好多選擇、好精彩㗎! 素漢堡包(HKD88)入面有有機豆腐、大蘑菇、南瓜蓉、蕃茄同素芝士等。其實係一個超大分量嘅burger,食完先發現原來burger冇肉食都可以好好味。小編本身係食肉獸,但食完素burger一啲都唔抗拒,反而仲愛上咗佢添!你唔會覺得自己食緊素,味道非常好味,重點係好飽肚。 微調流心餡餅(HKD128),餅皮係自家製,非常有心思!醬汁用咗西芹頭、核桃同腰果等打成,再加上紫心蕃薯、波菜同素芝士等,相比其他餐廳嘅餡餅,真係好味好多添!事關佢食落一啲都唔膩,完全零負擔,切開層次分明,好靚㗎。 土耳其卷-清新素卷(HKD53),好多外國人同香港人都好鍾意食。入面會有牛油果、鮮茄、青瓜同雜菜等,食落口非常清新!而且佢啲牛油果係非常新鮮,超好食,一嚟夠飽,二嚟方便消化,小編like爆呀! 薯蓉堡壘(HKD60/3件),可以自選款式,小編就揀咗芋蓉堡壘、薯蓉堡壘同甜粟紫心蕃薯。芋蓉堡壘會先將芋頭打成蓉,然後再用焗爐烤到香香脆脆;而薯蓉堡壘入面加咗有機藜麥,再配啲黑松露喺上面,感覺夠fresh又夠營;最後就係甜粟紫心蕃薯,本身紫心蕃薯已經好清甜,再加上又爽又甜嘅粟米,加晒分呀! 飲品方面,小編試咗兩款鮮榨果汁,一款係左邊番石榴+紅菜頭+蘋果(HKD30)可以幫助抗氧化,飲落酸酸甜甜;紅菜頭又唔會有腥味,反而多咗蘋果嘅清香,飲完即刻覺得自己健康咗;而另一款就係右邊羽衣甘藍+香蕉+菠蘿+波菜(HKD45),呢款飲落有少少檸檬味道,加咗香蕉所以好飽肚㗎!   素食微調 地址:大坑銅鑼灣道144號 電話:2802 6126 營業時間:星期一至日:10:00-22:00

0

【冷壓果汁霉素超標要下架 營養師教你分真假排毒】懶健康貼士

呢個星期消委會公佈咗測試40款冷藏果汁樣本嘅結果,其中2款澳洲牌子嘅冷壓果汁驗出霉素超標要即時下架!其實近年冷壓果汁大熱,仲講到話有排毒功能,甚至有千幾蚊嘅排毒減肥套餐出現。究竟點樣嘅果汁先夠好,定係食原隻水果最健康?小編搵咗註冊營養師謝詠瑩 等佢講吓有乜好建議: 冷壓果汁有咩好處同壞處? 冷壓果汁嘅技術的確有助保留某啲營養素,尤其係水溶性維他命,例如維他命B、C、葉酸等較易受熱力破壞嘅營養素,但維他命C需要加熱到大約70°C先會明顯流失。雖說傳統嘅榨汁機或攪拌機喺快速轉動時會產生熱力,但會唔會加熱到一個高溫點會破壞營養素呢?呢方面需要更多數據支持。而且好多營養素都比較耐熱,例如纖維、鐵、鈣等等。   冷壓果汁有冇排毒功能呢? 好多時冷壓果汁果糖太高,部份人會腸胃唔舒服而引致肚瀉,誤以為有排毒效果。但排毒係指排走便便,或經過排汗將身體內唔需要嘅代謝物排走,同埋肝臟會幫助分解有毒物質,再經腎臟排出身體。而原個水果食先會食埋纖維,促進腸道蠕動排走便便就係真正排毒。 冷壓果汁真係比鮮榨果汁健康嗎? 以今次消委會報告嘅橙汁樣本為例,鮮榨橙汁每100毫升平均約有35毫克維他命C;而經過巴斯特消毒法或冷壓嘅果汁樣本,每100毫升平均約有33毫克維他命C,其實唔係相差得好遠。但係邊款果汁都好,如果隔晒渣,纖維會比食原個蔬果低,而抗養化營養素都會伴隨纖維被抽走。   點樣分真假冷壓果汁? 要睇營養表係咪100%純鮮果,正常唔會寫水或濃縮果汁嘅字眼。   原個生果 vs 冷壓果汁 vs 濃縮果汁 vs 天然果汁排次序,最好到最差係咩呢? 1. 原個生果:纖維最豐富又食埋落肚,會增加飽肚感;而可以減慢吸收糖分嘅速度,血糖會比較平穩。 2. 冷壓果汁:無加熱咁多,keep到多少少維他命C。 3. 天然果汁(盒裝或包裝好嘅100%果汁):通常經過巴斯特消毒法,以比較高溫少少處理過,容易啲流失維他命C。不過有啲會再添加返維他命,最後都要睇營養標籤做比較,未必差過冷壓果汁。 4. 濃縮果汁:通常經過好高溫加熱,然後再加水份,會流失更加多營養素,例如葉酸、維他命B雜等等,仲有好多其他添加劑。 1日可以飲幾多果汁呢? 香港衛生署建議每日應該食2份水果,1份水果大約等於180毫克果汁,但唔建議一次過飲360毫克當食咗2份。建議每日最多飲180毫克嘅鮮榨果汁,因為食用新鮮水果嘅纖維同水溶性維生素比較高。   想排毒食咩水果最好呢? 木瓜、熱情果、火龍果同纖維素效高;西梅有天然瀉藥成分。下面嘅數據俾大家參考唔同水果嘅纖維量: 保存水果小貼士:可以加少少檸檬汁,當中嘅維他命C可以令水果無咁易氧化。 消委會公佈40款市面常見嘅冷藏果汁測試結果,好多都誇大營養成分,其中有2款冷壓果汁驗出棒曲霉素超標要下架! (棒曲霉素常見於發霉嘅蔬果同穀物,嚴重會引致腸胃充血、抑制免疫反應、損害神經、影響胎兒發育) 二款果汁有棒曲霉素超標須下架:...

0

【一杯夠頂肚 超濃厚果汁幫你排埋毒】Zero Plus

今時今日,人人都注重健康飲食,最好可以多啲選擇添。平時要飲杯有質素嘅鮮果汁都可能去到中上環先揾到,依家荃灣都有啦!Zero Plus嘅店主留意到香港成日飲果汁都係兩、三種傳統蔬果壓榨,經常以甘筍做底就算,佢反而想似外國咁,可以混合多款唔同種類嘅蔬果。除咗鮮果汁,蔬果汁之外,仲有營養代餐、鮮果昔同乳酪沙冰,全部甜度都嚟自新鮮蔬果,無人造糖份㗎。      舖頭設計時尚簡約,小編以為入咗coffee shop,感覺幾西式,唔似一般見慣成個凍櫃都係蔬果。店主花嘅心思不單單係舖面設計,點樣混合一杯飲品都參考好多地區配方,先設計出今日主打嘅健康營養瘦身飲品。一講到瘦身大家就覺得要捱餓,店主話唔洗咁辛苦㗎!佢揀牛油果做主要特飲,因為牛油果油除咗蘊含大量維他命E,當中嘅不飽和脂肪和蛋白質含量比一般水果高好好好好多!除咗咖啡之外,所有飲品仲可以加蛋白粉,為身體提供更多能量所需。 小編大愛呢杯Mind Reload(HKD38),飲得營養豐富又飽肚,大大個牛油果做主角,仲有杏仁、香蕉含高蛋白質同熱量,而燕麥可以代替澱粉質做早餐,完成一朝工作都唔覺餓,杏仁奶質感薄啲唔會滯,真係男男女女大人細路都啱飲! 簡單啲當營養補充的話,可以揀Avo Shakes (HKD34),牛油果配鮮奶,淨係睇顏色都已經好fresh,飲完腸道一定好健康。 Lunch之後小編建議點杯Berry Blaster (HKD34),雜莓酸酸地解滯又幫助消化,仲有蜜糖、希臘乳酪同鮮奶,每樣都係對皮膚好,女士必選! 務求照顧到多啲人,連素食都有選擇!熱烘意式三文治Avocado w/ Italian Pesto Sauce (半份HKD22/全份HKD38) 全份有半個牛油果咁多,絕不戲場,真係物超所值!三文治配上意大利青羅勒醬,大大減低漿口感覺,又保持到素食應有嘅清新。 Zero Plus 電話:2890 6000 地址:荃灣荃錦中心212號舖 營業時間:星期一至五:07:30-19:30 星期六:09:00-20:00 星期日及公眾假期:12:00-20:00

0

【大玩mix & match 潮飲太空主題果汁】Bana Bana

相信好多人都鍾意飲啲有味嘅飲品,不過支樽飲品好多高糖分又高防腐劑。如果想飲得健康,鮮榨果汁係一個好好嘅選擇。坊間賣鮮榨果汁嘅店舖好多,但選擇唔多,或者只係得既定配搭。今次小編搵到一間以太空為主題嘅果汁店,可以任意選擇自己鍾意嘅蔬果,多款選擇,總有一款啱你口味。 店舖主調係白色,加上火箭、太空人等裝飾,櫃檯都係行簡約太空路線。 嚟到大家首先要拎一架火箭仔,將你鍾意嘅蔬果擺入去,齊齊化身太空人,去唔同蔬果星球探索。 小編目測,大約有20款嘅水果同蔬菜比大家選擇,大家可以將一至三樣蔬果放喺火箭,然後比錢,又好玩又方便快捷。 如果因為太多選擇而心大心細,唔緊要,店舖好貼心咁推出每日精選,以時令蔬果榨成特選果汁,幫大家揀埋最有營蔬果。 每杯果汁都係HKD28(個別蔬果需加HKD3),每張收據都好貼心咁有埋生果嘅營養資訊比大家參考。 推薦口味有(芒果+野莓+益力多) 三種材料加埋酸酸甜甜,因為入面有益力多,有助腸道健康。 (紅菜頭+梨+蘋果) 紅菜頭有抗氧化功效,可以防癌、抗衰老,加埋其他兩種生果,清甜味道平衡返紅菜頭嘅草青味,達至平衡嘅感覺。 Banabana 地址:旺角染布房街17A號地舖 營業時間:星期一至日: 13:00-23:00 地址:尖沙咀赫德道2A地下 營業時間:星期一至日: 13:00-23:00

0

【女士大愛!超人氣自選酵素果汁】Bexp.

去過韓國都應該會知道當地有間人氣自選果汁店叫Beesket,由於自選方法好得意,色彩繽紛,好多人都會慕名去飲返杯健康果汁。呢個品牌已經喺好多國家開左分店,香港一間飲食集團終於將Beesket引入香港,進駐銅鑼灣喇!但佢地覺得香港人生活習慣比較急速,所以特別開設呢間Beesket Express。 牆上面一個個好似蜂巢嘅格仔都代表一種蔬果,客人只需要拎一個蜂巢杯,選擇3種心儀味道放去杯入面,就可以去收銀處俾錢喇。蜂巢杯分紅色同綠色兩款,如果揀紅色代表Original,做出嘅果汁會似smoothie保留更多水果纖維,又會加入菠蘿酵素,令到杯果汁立即升級!綠色代表Squeezed Juice,已經隔走纖維,飲落更順口。 如果有選擇困難症或者怕自己選出黎味道會好奇怪,亦可以點預設好嘅味道,都幾多選擇嫁!價錢大概HKD30-46,唔算好平,但果汁加入左酵素感覺更值得!選擇完成之後,去到收銀處就可以放入呢個感應器上面!然後就會見到屏幕上面顯示出卡路里,營養成份同埋價錢。店員好快就會為你準備好果汁,即叫即做,保證超新鮮!值得一讚係呢個品牌對每一個消費細節都好細心鋪排,到飲品完成都仲會再print多張單仔再提多你一次你所選擇嘅果汁入面卡路里同營養成份!Bexp. 由1月13-16內,只要Like and Share就立即減$10!要試就快喇! Bexp. 地址:銅鑼灣景隆街5號 營業時間:星期一至日12:00-23:00