Tagged: 比賽

0

【台灣爭鮮大胃王挑戰 92磅索模鯨吞105碟壽司】食焦

台灣爭鮮啱啱搞完咗個大胃王挑戰賽,男女大胃王正式誕生啦!男人食量驚人唔出奇,女大胃王竟然係位性感辣模,仲要只係得92磅瘦瘦的,佢誇張到喺限時50分鐘內,鯨吞咗105碟壽司,食完仲要面不改容好似唔夠飽咁喎! 比賽係咁嘅,只要食完一碟碟嘅壽司,疊高啲碟高過自己身高就叫挑戰成功,唔使俾錢喇!參加挑戰之前,各位勇士都要喺門口量度身高,再睇返個相對表,睇吓自己要食幾多碟先可以贏囉!好似140cm高,相等於90碟壽司嘅高度、155cm就係100碟,而女大胃王嘅身高呢就係158cm,照道理食過100碟都已經贏,結果佢喺限定嘅50分鐘內食咗105碟! 仲未止㗎,食完105碟仲未夠喉,索模自己再加點咗12碟,即係總共食咗117碟,超額完成嚇死人啦!咁驚人嘅消息即刻喺網上瘋傳,呢位女大胃王成為風頭人物,佢仲喺自己fb度就話「終於趕上台中最後一天 破本店第一名 紀錄了 105多盤 #怒吃 謝謝美女店長、師傅 辛苦了 #一直切跟不上我吃的速度」!現場消息仲話個個都拍爛手掌為佢歡呼添喎! 呢位影開性感相嘅索模大胃王名叫張語昕,做咗爭鮮大胃王之後變咗風頭躉,接受埋電視訪問,佢話自己當日其實食完都只係得七分飽,又話遲啲想去日本參加大胃王比賽,等人知道台灣都有女大胃王!其實張語昕唔係第一次被封大胃王㗎喇,兩年前佢試過30分鐘內食咗15碗總共3公斤嘅魯肉飯而成名,睇嚟女神個胃口一直都咁驚人,好大食呀!