Tagged: 沙律

0

【輕食外賣店素菜+茶飲 朱古力蛋糕味嘅茶係咩?】素學堂

今次素學堂帶大家去到葵涌嘅Green Impression Tea Bar,呢度主要做外賣生意嘅,堂食座位唔多,只得大約4個。近半年加多咗好多素菜選擇,除咗有唔同嘅素沙律輕食,仲有小食同果茶賣,佢哋仲係德國D&B嘅獨家代理,D&B係歐洲歷史最悠久嘅茶葉生產商,有好多稀有品種嘅混合茶同花果茶㗎! 呢個糖心雞蛋米牛油果沙律(HKD45)用咗糖心雞蛋、大麥米、黑豆、牛油果、紅甜椒同BB波菜配青檸黑醋汁,酸酸甜甜味道好清新;有雞蛋同大麥米嘅關係,食完都夠飽肚㗎! 小編幾鍾意呢個大蘑菇蕎麥麵沙律(HKD42),裡面有大蘑菇片、四季豆、甘荀絲、紫椰菜同蕎麥麵配芝麻醬,加埋一齊食口感都算豐富。 層層疊疊健兒沙律杯(HKD28)就啱女士們多啲喇,如果有一兩餐想食清啲俾腸胃休息吓,呢個沙律係必食呀! 特色烤茄子薄餅(HKD38)買嚟當lunch食都唔錯喎,餅底厚度適中,蕃茄醬上面有6塊烤茄子,茄子唔會切得太薄,又有烤過嘅香口感。 烤素菜意大利香草軟包(HKD48)小編就覺得幾適合做早餐,至少每一啖都有餡料,而菇味都幾香,不過最好就叫店員烘返熱嚟食,因為凍咗無咁好味呢! 素食All Day Breakfast (HKD68)就有黑松露炒蛋、雜菌、蕃茄、粟米、美式焗豆、雜菜沙律、多士/麵包,配熱餐飲一杯,男士們食可能會唔夠飽! 小編都係第一次接觸呢杯蜜綠樹混合茶,朱古力蛋糕風味(HKD24),最初都唔明個名係咩意思,原來係呢隻蜜綠樹嘅茶葉,聞落會有種似雲呢拿加奶油嘅味道,再混合埋其他茶葉,味道就變咗會有啲似朱古力蛋糕,好搞鬼啫!當然飲落就梗係冇朱古力蛋糕味啦,反而係本身蜜綠樹茶葉嘅味道,即係有種甜甜哋又帶少少奶油味嘅茶香。 最後呢個鴛鴦杯(HKD19)就做緊推廣價優惠,可以一次過滿足你兩個願望,右邊係檸檬普洱、左邊係意大利血橙水果茶,兩隻味都唔會好甜,而水果味就好突出,都幾清新!當然仲有其他味道俾大家選擇啦!   Green Impression Tea Bar 地址:葵涌葵昌路72至76號life@KCC 1樓105號舖 電話:2809 2136 營業時間:星期一至六:08:00-20:00,星期日及公眾假期:11:00-20:00

0

【飲飽食醉西式啤酒宴 沙律薄餅甜品加料手工啤】掌門精釀啤酒

掌門精釀啤酒係台灣幾出名嘅手工啤酒品牌,香港店嘅酒都由台灣運嚟以保持一致品質。繼尖沙咀店之後,上月喺西營盤開分店,用酒煮嘅菜式多咗,星期六、日仲有Brunch食添,等小編帶大家睇吓新店有咩好食啦! 餐廳位置喺西營盤高街小斜坡之上,餐廳環境就好開揚。 沙律都可以落酒?掌門四款沙律之中有兩款加咗酒,火箭菜意大利火腿無花果沙律(HKD108)仲係廚師推介添!廚師喺沙律汁落咗精釀啤酒「酸酸」,酒味比較薄,但味道酸啲,撈埋新鮮嘅無花果、火箭菜、Parma Ham好開胃又夠fresh!最鍾意佢加埋核桃,有咬口,感覺更加健康。 意式辣肉腸薄餅(HKD118)喺搓薄餅底嘅時候以招牌精釀啤酒「55%小麥」代替水,令薄餅口感煙韌啲,不過一樣焗得好香脆。餅底搓得算薄,意式辣肉腸同車打芝士海量式鋪滿喺面,食肉獸最愛呀! 海鮮意粉(HKD148),大廚喺炒意粉時,加入以大量美式啤酒花為風味特色的暢銷酒款「柒拾肆-加強版」,務求強調香氣,襯托海鮮鮮美。 安安檸檬芝士蛋糕(HKD58)用咗啤酒花能增加果香,質地好順滑同厚實。芝士味同檸檬味都好出,配埋雲尼拿果仁有多重享受添。 試完用酒煮嘅菜,輪到新店星期六、日嘅Brunch喇,一樣好足料囉!三杯雞多士盒(HKD78)外形有啲似台灣小食「棺材板」。嫩滑嘅雞髀肉用薑片、蒜頭、辣椒同葱爆香,惹味又有少少辣,再回鍋落埋「三杯」,即係黑麻油、生抽、老抽同冰糖一齊炒。收乾之後再加埋九層塔,肉有少少焦又好鬼香。不過最點睛係溫泉蛋喇!篤爆佢,將蛋汁同雞肉撈勻更香滑。加埋即烘脆口多士盒,真係飽到上心口。 仲有將蛋漿加入蘑菇、雞肉粒、薯仔粒、紅椒、青椒、菜同肉腸,煎成厚厚嘅香腸淡色艾爾意大利蛋餅(HKD68)。口感好豐富,因為落咗勁多料。蛋餅煎到啱啱好,仲有啲蛋汁添。 當然要飲杯酒落肚啦,新款Cocktail之中,小編幾鍾意狂野烏梅(左:HKD68/杯)。以味道辛辣嘅Tequila龍舌蘭酒同Cherry Brandy櫻桃白蘭地做基酒,加上重口味的烏梅汁同清新嘅青檸汁。入口即刻feel到酒精濃度高,酸中帶甜都啱夜晚飲。 仲有炭燒西柚(中:HKD68/杯),相比之下感覺好清爽,lunch飲都好舒服。以Gin酒做基酒,簡單配上西柚汁同炭燒烏龍茶,口感順滑,同時加入西柚粉紅色糖漿都唔會覺得甜,反而餘韻有種果茶嘅香氣添。 如果都係鍾意啤酒,大吉大利(右:HKD49/250ml)都唔錯,以科隆Kolsch啤酒加入大量新鮮金桔製成,因為「吉」同「桔」係同音字,所以攞個好意頭叫做「大吉大利」。味道清新但有啲酸甜果香,反而冇咩啤酒花嘅苦味。   掌門精釀啤酒 地址:西環西營盤高街53-65號地下富裕大廈地庫 電話:2650 0511 營業時間:星期一至日:12:00-23:00

0

【軟殼蟹沙律由面油到入心 青木瓜絲完全唔fresh】伏務台

好多人都鍾意食炸嘢,但口感就好影響你like唔like佢。好似黃埔嘅早安越南咁,見到網民對佢嘅軟殼蟹沙律外形O晒嘴,仲話「軟殼蟹沙律變炸麵包沙律」。的確就咁睇個樣係唔會認得佢係軟殼蟹,但好唔好味呢?小編試完,最強烈感覺係「油淋淋」! 門面好正常嘅一間餐廳,三點左右下午茶時間唔多人,只有兩、三枱客。 落order叫傳說中嘅軟殼蟹沙律(HKD83),5分鐘左右好快上枱,外形同網民放上網張圖個樣差唔多,分量睇落都好似幾多咁。初時見炸軟殼蟹表面濕濕哋,以為淋咗汁喺面,點知一咬原來係油呀……好失望。出色嘅炸軟殼蟹係會濕潤得嚟少少爆汁,而唔會係「油淋淋」囉!呢個唔單止表面係油,連入面都俾油浸濕晒! 咬開呢件俾大家睇睇,炸漿裡面好似濕水麵包咁,不過係俾油浸濕囉……炸漿同蟹嘅比例大約1:2左右,炸漿都幾厚。蟹肉有啲位實實哋,初時有少少鹹味,食多幾啖就冇咩味,於是轉攻沙律。 沙律堆到好似一座小山咁,除咗青木瓜絲,仲有椰菜絲、青瓜絲、花生同炸蒜等等。入口有大量酸甜中帶辣嘅醬汁調味,都算濃味。有咁大量嘅青木瓜絲都冇平時入口應有嘅清甜味,解唔到炸軟殼蟹嘅油膩感,反而令成個沙律濃味咗囉。   小編伏氣:如果以83蚊一個軟殼蟹沙律嚟計算正常價,但質素就麻麻哋,因為「油淋淋」程度接近街邊煎釀三寶咁油到入心;而且沙律又俾唔到fresh嘅味覺去解油,其實食1/3已經唔想食喇。食到一半想飲啖水先醒起侍應冇俾過水嚟,望吓其他枱都係冇俾水招呼客人,感覺好慳囉。 入伏點:早安越南(黃埔店) 入伏價:(HKD91已加一) 中伏by #為食加菲貓 美術by #車雲 攝影by #為食加菲貓

0

【西日fusion純素小店 牛油果漢堡脆炸驚喜】素學堂

觀塘東廣場餐廳林立,開業大約2年半嘅Veggle Cafe都算穩打穩紮。大廚兼老闆喺fb專頁講:「要令更多人接受全素嘅唯一方向,就只有做最好最美味嘅素食!」,想知道係咪好似佢咁講?當然要一試真偽啦! 店舖空間唔大,只有20個座位左右,想留住食客就一定要真材實料喇。 自選沙律配雞心豆醬(HKD$75/500g)可以喺每日6-7款沙律餸菜中,揀最多6款。今次小編叫咗5款: 紅菜頭配橙:紅菜頭好清甜,一咬啲汁爆晒出嚟呀!配埋橙酸酸哋,好啱夏天食。 芒果沙葛藜麥:呢款最驚喜,清新、醒胃同爽甜嘅組合,仲好飽肚添。 日式蕎麥冷麵:簡簡單單加啲醬油調味就得,鹹鹹哋好易食唔停口。 黑椒麻油西蘭花:烚熟咗嘅西蘭花用黑椒麻油撈勻,淡淡嘅麻香令人好回味。 薄荷香草汁雜果配羽衣甘藍:薄荷味唔會好重而搶味,生果同羽衣甘藍嘅組合好fresh。 話就話揀咗5款餸,但加加埋埋有成9種食物;另外仲有2塊中東包,真係飽到上心口囉,因為跟餐仲配蔬菜湯同熱飲呀! 威靈頓菜卷配甘筍薯蓉黑松露汁(HKD110)嘅靈感來自威靈頓牛柳,係一道有層次嘅菜式。薄脆酥皮包住兩大重點:一係燒過嘅蔬菜、茄子、甜椒同南瓜,味道比平時鮮甜;二係由菇菌打成嘅黑松露菇菌醬散發出好濃烈嘅黑松露味,係成個菜嘅靈魂呀!威靈頓菜卷下面墊住甘荀薯蓉,唔止有薯蓉,仲有啲未壓爛嘅薯仔粒增加口感,食落絕不單調。燒汁就用燒蔬菜流出嚟嘅精華,加重料黑松露醬製成,每一啖都濃郁香口。 小編最愛就係脆炸牛油果蕃茄醬漢堡(HKD110),配自選沙律+蕃薯條+熱飲。麵包好鬆軟,都係純素,冇蛋、奶同牛油,但充滿麥味。餡料多到要分層食,炸牛油果即使表面嘅炸漿炸到金黃色,但牛油果依然保持青綠結實;蕃茄醬就有好濃嘅香草同欖油味;黑豆好腍,加埋其他蔬菜一齊食好有口感!另外好鍾意佢蕃薯條,比薯條更香甜脆口。 Tofumisu(HKD25/套餐升級加HKD15)主要由豆腐製成,連素忌廉都無落,但質感好滑;而平時整Tiramisu唔可以缺少嘅Espresso一樣落足料,香濃嘅咖啡味加老闆自製嘅無蛋奶素手指餅,回甘又唔會太甜。 食完感受到老闆花勁多心思喺每個菜式之中,分量連男士食都飽就知絕不欺場,難怪一直有捧場客啦!   Veggle Cafe 地址:觀塘成業街7號東廣場地下G13A及15號舖 電話:2456 3330 營業時間:星期一至四:12:00-21:00(截單時間20:45);星期五、六:12:00-21:30(截單時間21:00);星期日:12:00-20:30(截單時間20:00)

0

【牛油果百變食得又飲得 3大輕食店吸睛首選】素學堂

「好脂肪」唔怕食,1個牛油果熱量大約有230千卡、21克總脂肪(大約4茶匙油),不過近7成係不飽和脂肪,就係「好脂肪」喇!佢幫助增加好嘅膽固醇,同時降低壞膽固醇同預防心血管疾病。牛油果仲含有鉀、葉酸同葉黃素,幫助降低體內嘅鈉水平同降低血壓。咁正嘅食物當然有餐廳將佢收入menu啦,今次小編走訪3間餐廳,介紹佢哋嘅牛油果素食俾大家。 以花會友 :jrink 喺大坑嘅:jrink以售賣特色茶飲爲主,仲有其他輕食(沙律、多士等等),食物會以花做點綴,好嘗心悅目。 牛油果吐司沙律(HKD80)以歐式麵包做底,口感偏乾同麥味重啲,上面搽咗牛油果蓉,有微微檸檬嘅酸味,幾fresh。沙律菜上再灑上食用鮮花,配埋嫩滑流心蛋,篤爆佢撈落沙律菜食,味道會更香濃。   :jrink 地址:大坑安庶庇街21號地舖 電話:2284 4203 營業時間:星期二至六:12:00-20:00;星期日:12:00-18:00(星期一休息)   咖啡×水果 Athletic Juice & Espresso Bar 咖啡小店Athletic Juice & Espresso Bar隱身喺灣仔星街,仲有健康果汁同用蔬果打出嚟嘅冰沙,夏天飲唔到熱咖啡都可以歎杯透心涼嘅飲品解渴啦。 Avolatte(HKD48)將牛油果刮空倒入Latte取代咖啡杯,仲可以食埋墊底嘅牛油果蓉㗎。果香蓋過咗Latte嘅咖啡味,但奶香味夠,味道都幾match。   Athletic Juice & Espresso Bar 地址:灣仔星街2E號地下 電話:2385 1013 營業時間:星期一至五:07:00-19:00;星期六、日:07:30-19:30...

0

【花生醬點止淨係搽麵包 整曲奇變沙律一樣掂】mui mui家政課

花生醬係唔少人屋企嘅必備食材,不過大部分人通常都係用嚟搽麵包。有無諗過,其實花生醬都可以變出好多唔同美食呢?4種材料就整到花生醬曲奇?花生醬變沙律汁又係咩感覺?一於跟住mui mui用花生醬整另類美食啦! 花生醬曲奇(約20塊) 材料與分量: 花生醬 – 220克 糖 – 30克 蛋 – 1隻 麵粉 – 15克 做法: 1. 花生醬、糖、蛋拌勻。 2. 加入麵粉拌勻。 3. 拿適量麵團, 用手搓成圓球, 放上焗盤,用叉將麵團輕壓紋。 4. 放入已預熱180度的焗爐焗12分鐘。放涼,完成! 花生醬香煎魚柳沙律 材料與分量: 比目魚柳 (或任何魚柳皆可) – 1件 混合沙律菜...

0

【蝦青素幫到好記性 雪梨蝦沙律開胃補腦】懶健康貼士

成日冇記性?其實攰可能都係令你健忘嘅其中一個因素,所以為免虛耗身體機能,梗係要補補啦!呢個時候蝦幫到你! 蝦 —— 當中嘅蝦青素有強效抗氧化能力,外國仲叫蝦青素做Super Vitamin E,因為佢嘅抗氧化能力係維他命E嘅550~1000倍;同時蝦青素有抗炎作用,可以增強免疫力。有研究指出,蝦青素對大腦有益,提升認知功能,對帕金森病同老年性痴呆都有幫助。快啲整個梨蝦沙律補補腦啦! 梨蝦沙律 材料: 鮮蝦 8-10隻 青瓜 1條 雪梨 1個 檸檬汁 1個檸檬 橄欖油 2茶匙 鹽 半茶匙 香草 隨喜好落 1. 將鮮蝦洗淨用鹽調味,灼熟切片,放涼備用; 2. 將青瓜及半個雪梨洗淨後去皮切粒; 3. 半個雪梨磨蓉; 4. 將蝦、青瓜、雪梨粒、雪梨蓉、檸檬汁攬勻(香草同橄欖油隨喜好落),食得! 記性返晒嚟,飛甩Memo紙。

0

【歐美大熱玻璃瓶沙律 變奏版泰式風味好易搞】mui mui家政課

愈來愈多人注重生活習慣,除咗多做運動,近年都流行健康飲食。外國人會將唔同嘅蔬果一層一層放喺玻璃瓶入面,色彩繽紛之餘都包含咗唔同嘅營養,所以呢個沙律成為咗近年嘅最潮食品。一個玻璃瓶搞得掂,簡單又好味,mui mui今次教整呢個仲係泰式風味,邊個話食沙律唔可以多變化? 材料與分量: 西蘭花 – 20克 粉絲(乾) – 8克 南瓜– 30克 車厘茄– 3粒 急凍蝦仁 – 4隻 生菜 – 2片 醬汁 柚子蜜- 1湯匙 蜜糖 – 1/2湯匙 檸檬汁 – 2湯匙 水 – 1湯匙 做法: 1. 醬汁材料混合備用。...

0

【緬甸米線黃薑加料 塘虱魚濃湯鮮味大爆發】緬甸招牌湯米線

香港人好愛米線,酸辣、蕃茄、清湯都各有擁躉,不過小編呢期鍾意何文田嘅緬甸招牌湯米線,冇味精又可以試到新口味吖嘛,拍攝當日仲不斷有人慕名而来添。 舖位細細,小店式經營反而同客人close啲。老闆娘Agnes話緬甸嘅香料同泰國都幾似,但佢哋會特別鍾意用黃薑,除咗香味吸引之外,仲可以增強免疫力同對血管健康有益㗎。唔好以為黃薑會搶晒啲味,Agnes嘅手勢控制得好好㗎!為咗盡力保留緬甸嘅調味,隔一段時間佢就返家鄉入貨,不過要配合香港人口味,麵款就揀返米線同蝦子麵。 老闆娘媽媽係緬甸人,傳授咗唔少心得俾佢,一定要識嘅係Mohinga鮮魚濃湯米線(HKD46),因為喺緬甸冇人唔識,地位好似國麵咁勁!湯底用塘虱魚同雞肉熬真係冇得輸,但每啖湯都有啲魚肉,用料十足勁鮮甜!配菜都好豐富,有勁脆口嘅緬甸特產碗豆餅、豆卜、魚片同緬甸炸脆香料,同湯汁混為一體好滋味!鍾意食辣嘅朋友仲可以加緬甸辣粉。 曼德勒係Agnes媽媽出生嘅城市,所以menu都有當地風味嘅菜色。曼德勒鮮茄滋味撈麵(HKD45)同平時食嘅港式風味比會甜啲,用料一樣落足蕃茄同肉碎,蝦子麵都有兩個㗎,一定食到飽肚走人;配埋緬甸炸脆香料同XO醬,其實幾惹味。 曼德勒紅燒腩肉配飯(HKD52)燜得肉腍而爽口,有啲東坡肉Feel,鹹淡適中,配飯真係一流! 本身以為緬甸特產茶葉沙律(HKD42)係清新口味,但原來係辣嘅,不過都好滋味。主食材有發酵過嘅茶葉、蝦乾、鮮蕃茄、菜同炸脆花生等等,口感層次豐富,天冷天熱都啱食。 新出嘅黃薑脆脆雞翼(HKD42)簡直係超級香脆!勁鍾意食雞翼嘅小編大愛呢款!面頭嘅炸脆做得好幼細,雞翼皮脆肉滑,香口程度令你好想配啤酒,不過呢度好健康,所以叫返杯養生飲品啦。 緬甸羅望子特飲(左:HKD15冷熱同價)味道好似酸梅湯咁,可以清熱排毒。 養生八寶花茶(HKD15)建議大家浸耐啲先飲,咁花香同其他材料嘅味道可以出啲。 總括嚟講緬甸菜雖然會多用香料,但味道唔會好似印度菜咁濃烈,反而一路食一路感受到淡淡嘅香料味滲出嚟;重中之重係呢度唔落味精,汁都撈埋都冇咁罪惡。   緬甸招牌湯米線 地址:何文田勝利道12號地舖 電話:9717 4328 / 9332 8640 營業時間:星期一至日:11:00-22:00

0

【型格生蠔吧食得潮 蟹肉黑魚子味蕾衝撃】CLUB ALBERGUE 1601

喺時代廣場嘅CLUB ALBERGUE 1601真係夠晒多元化,食西餐得!怒食生蠔又得!靜靜哋飲返杯又得喎,仲有空中花園添!環境係點?睇埋落去啦: 呢度地方闊落,吧枱飲兩杯又得,坐低歎一餐又得。 蟹肉黑魚子火箭菜沙律(HKD178)啖啖蟹肉好足料,咬爆黑魚子「卜卜」聲嘅口感仲滋味,配埋香脆嘅法包就更加滿足喇。 蒜片辣椒(HKD138)啱晒素食嘅朋友,爆香咗嘅蒜片幾香口,加上辣椒提味清得嚟都幾惹味。 生蠔吧嘅蠔每日新鮮直運,試晒咁多款已經好豐富。 空中花園好浪漫,攬住咕?飲杯嘢,傾吓偈好梳乎。   CLUB ALBERGUE 1601 地址:銅鑼灣勿地臣街1號時代廣場食通天11樓1105號舖 電話:2573 3344 營業時間:星期一至日:12:00-23:00