Tagged: 沙田

0

【週末2人日式下午茶 靜岡蜜瓜甜點×極上壽司】帝都酒店櫻田日本餐廳

週末放鬆吓,不如歎個Tea啦!主打和食嘅帝都酒店櫻田日本餐廳推出咗靜岡蜜瓜日式下午茶(HKD448),甜點配極上壽司,仲附送2杯手調製作嘅蒸餾咖啡或柚子茶,人均二百幾蚊就食到。想解思鄉情就book位試吓啦!

0

【人氣扒房新店踩入沙田 限時$58牛肉飯+增設早餐】Top Blade Steak Lab

由何文田開到銅鑼灣,人氣扒房Top Blade Steak Lab都係地舖,今次開第三間分店終於走入商場喇。負責人之一Oscar話:「今次商場主動搵我哋,俾咗個相宜嘅租金,咁啱我哋都想開分店就試一試。呢度比另外兩間店大好多,其實都係一種挑戰。我哋依然想推廣Flat Iron牛扒俾更多人知,因為一隻牛呢個部位只係開到5-7件扒,少有而質地同肉味都幾出色,加上橫切同直切口感都唔同㗎。」。主餐牌變化唔多,但新店多咗早餐;而配合夜晚禁堂食安排,全線暫時增設HKD58起嘅外賣餐牌添。

0

【帝逸自助餐近百款環球美食 必試爐端燒×紅咖喱雪糕】帝逸酒店Alva House

位於沙田石門嘅帝逸酒店開業唔夠一年,已經吸引好多客人幫襯佢哋嘅自助餐,仲經常full booking添!究竟呢間Alva House有咩咁吸引?佢哋嘅「環球美食巡禮」自助餐有近百款各地嘅精選菜式、即製手工意式雪糕回歸之外,仲會時不時加入新元素。今個月尾就會推出鮑魚龍蝦粥、榴槤主題甜品等冷熱盤。不過咁多嘢食食邊樣先?即刻跟住小編睇吓有咩推介啦!   除咗有各式芝士、Ham等多款開胃前菜,餐廳嘅沙津菜係用同本地農民合作嘅水耕菜作為食材,有機之餘仲有品質保證,新鮮又爽口㗎。 自助餐必歎菜式當然有刺身啦!6款即切時令款式選擇都唔少,帶子、三文魚、舌拿魚等都好肥美,啱晒鍾意食刺身嘅人呀! 至於港人最愛嘅海鮮冷盤有基本嘅龍蝦同長腳蟹,不過連麵包蟹都有真係幾驚喜。海鮮啖啖肉,質素亦相當有誠意。 冷盤之中仲有即開生蠔專區,選用美國生蠔,每隻開出嚟都好肥美,食落仲好creamy! 講到帝逸自助餐嘅主打區域,不得不提即場燒烤專區,呢個區域有即烤爐端燒、厚切鴨肝多士、香煎金菇肥牛卷、即炸天婦羅等特色邪惡料理! 燒烤食物由於係新鮮即整,每道菜式拎上手都熱辣辣,食落去仲好juicy!小編推薦一定要食鴨肝多士,煎到金黃色嘅鴨肝非常甘香仲唔膩添! 即點即切嘅美國戰斧牛扒鮮嫩多汁,肉味濃郁。 呢度少有地提供兩款即點即切牛扒俾大家揀,實物比起相更加震撼,非常足秤。 仲有賣點之一係呢度嘅肉食特別多選擇,唔鍾意食牛肉可以揀烤原隻西班牙乳豬、蜜糖烤雞,或者比較中式嘅京式片皮鴨、沙田特色乳鴿、雞粥、海南雞等。 熱食區亦絕對唔馬虎,除咗基本粉麵區,亦設有新鮮牛肉同埋本地養殖嘅花尾龍躉做賣點嘅粥區, 大大條龍躉放喺你面前,你都咪話唔吸引呀! 食到咁上吓就可以嚟到甜品區,除咗有得任食Mövenpick雪糕,更加要試呢度即場自家製嘅意大利手工雪糕。雪糕質地軟滑之餘,味道亦非常多元化,除咗有蜜柑、榴槤等鮮果口味,其中一款竟然係泰式咖喱紅辣椒味,就咁睇同普通雪糕無異,但食落口就會有濃郁嘅椰香咖喱味,慢慢更會感受到一股辣味嘅後勁慢慢浮現,認真有趣喎! 甜品區仲有大把賣相吸引嘅甜品任你揀,好似呢啲用新鮮生果整嘅靚靚果撻咁。 由六月尾開始,自助餐會有新菜推出,到時過嚟試一定要試鮑魚蟹鉗弼呢啲咁鮮味嘅菜式呀! 仲有一系列榴槤主題甜品都係今個尾推出,榴槤控必試呀!呢度嘅酒店自助餐選擇真係唔少,而父親節慶祝優惠可以俾大家食平啲,想試嘅朋友快啲book枱喇!   「環球美食巡禮」自助餐 午餐供應時間:12:00-14:30 價錢: 星期日至五:HKD328/成人、HKD228/小童及長者 星期六:HKD388/成人、HKD268/小童小童及長者   晚餐供應日期: 18:30-21:30 價錢: 星期日至四:HKD638/成人、HKD418/小童及長者 星期至日:HKD698/成人、HKD448/小童小童及長者 *另須加一服務費   Alva...

0

【沙田高CP值居酒屋夏日優惠 鐵板A4和牛香滑爆汁】北海道食堂

沙田中心商場有唔少餐廳,原來入面有間高CP值居酒屋北海道食堂!佢嘅刺身、定食、壽司同日式鐵板燒本身已經抵食,依家到8月尾仲有夏激安祭,HKD78起就食到六道大眾鍾意嘅菜式,睇埋落去包你即刻約飯友一齊嚟呀! 餐廳呈L型設計,每邊座位都好闊落,不過另一邊先見到鐵板燒位置。 第一款係海膽迷必食嘅活海膽(HKD78/隻),每日限量20客,鮮甜味爆晒燈好難忍口囉。 跟住到有勁量魚籽嘅兩款丼飯,同樣每日限量20客。三文魚親子爆丼(HKD98/上)鋪滿三文魚之後再淋五、六勺魚籽,或者食吞拿魚蓉三文魚子爆丼(HKD98)都同樣令人滿足㗎。 如果鍾意食刺身,咁就要試九州長崎直送嘅池魚刺身(HKD88)。原條池魚分量好多,厚切同薄切都有,令口感豐富啲,啖啖肉勁抵食。 跟住到兩款日式鐵板燒喇!鐵板活鮑魚(HKD78/2隻)原隻喺鐵板上邊燒邊薄切,加咗少少鹽同胡椒調味,再炒多幾吓就上碟,質感好爽口㗎。 而和牛迷一定要試每日限量20客嘅鹿兒島A4和牛牛肩胛(HKD108)!師傅炒香蒜片後以蒜油煎呢塊80g嘅牛肩胛,期間只係加少少鹽同胡椒調味。肉汁多到一咬即刻爆出嚟,肉味幾香又唔覺得膩,加埋蒜片一齊食仲更加惹味解膩添。 話明呢度係高CP值,介紹一款正價都超抵食嘅鐵板廣島蠔套餐(HKD118/午,HKD138/晚)。6隻脹卜卜,煎到外面少少焦香,內裡juicy嫩滑嘅蠔,配埋炒野菜、味噌湯、茶碗蒸、漬物、白飯同柚子蜜,無論午市定晚市食都夠晒豐富!   北海道食堂 地址:沙田橫壆街2-16號沙田中心商場3樓50及57號舖 電話:2625 1078 營業時間:星期一至日:12:00-22:00

0

【隆亨街市2大食檔稱霸 世界級蠔餅+無敵炸雞髀】街霸

今次街霸去到沙田,睇吓早排翻新咗嘅隆亨街市有咩好食先! 雖然街市唔算話好大,但街霸一眼就瞄準最多人聚集嘅角落,見到大家都排緊隊等食喎!到底有咩咁吸引呢? 首先呢間有位可以坐低嘅粥品店仲生美食,不過吸引街霸嘅並唔係佢哋嘅粥,而係布拉櫃桶腸粉! 呢個蔥花雞蛋腸(HKD16)街霸不嬲都好鍾意食㗎!不過就唔係咁多舖頭有做,因為每份都即叫即做,製作需時嘛!反而普通白腸粉就唔需要咁多工夫,落完單一秒就出到貨,快嘛! 16蚊我expect嘅分量係將一份腸粉開二啦,點知係2大份開做4!望落腸粉好似偏厚,但食落又夠滑喎!加埋蔥花同蛋,仲有腸粉嘅靈魂-豉油、花生醬同甜醬,夠晒醒神!分量大大份,16蚊食飽飽,正! 食完腸粉都有啲飽,但一場嚟到都要繼續食食食!喺粥店隔離呢間只做外賣同立食嘅寶泰車仔麵,見到Menu貼到成間舖滿晒,煎釀三寶啦、蠔餅啦,連酸辣粉都有喎!街霸今日就決定食蠔餅、酸辣粉同老闆極力推介嘅生炸雞髀! 蠔餅分大型版(HKD40)同輕型版(HKD28),仲可以揀多蠔(+HKD5)、多多蠔(+HKD10)、超蠔(+HKD15)同超多蠔(+HKD20),仲有超富蠔(+HKD30)添!咁多個choice,真係有啲選擇困難症喎,今次先試「多蠔」嘅輕型版啦! 街霸一收到個蠔餅,就O嘴望住老闆:「呢……個係輕型版?」輕型版都咁大份,大型版會有幾大型?真係嚇親人喇!雖然只係加咗5蚊要多蠔,但同平時嘅蠔餅比起嚟,蠔量都係偏多!街霸依家有啲好奇究竟超富蠔會唔會係蠔仔煎蠔仔,完全見唔到餅呢?食落蠔餅熱辣辣,蠔仔仲相當新鮮,隻隻脹卜卜。30幾蚊我覺得抵喎! 食完蠔餅再食埋生炸雞髀(HKD20)!手掌咁大隻雞髀,即叫即炸,口水都流呀!咬落Juicy又夠滑,超邪惡囉! 除咗炸物,呢碗酸辣粉亦係熱門item,街霸一於食埋一份呀!我揀咗生炸雞全翼酸辣紅薯粉(HKD29),咁大碗粉加隻雞全翼都係30蚊有找,真係良心小店喎!所以呢度都有唔少學生哥幫襯,夠抵嘛! 街霸不嬲都無辣不歡嘅,不過第一次食就試個小辣先啦,費事辣到爆菊!又真係幾惹味喎,唔好睇個湯底好似好淡色,其實幾辣吓㗎!面頭嘅酸菜唔會太搶fo,同個辣度配合得啱啱好!豬骨湯底一啲都唔油,唔係單純用辣椒油堆砌辣味,幾正宗喎!至於隻雞全翼就同頭先嘅雞髀一樣咁好味,咬落有汁「標」出嚟,肉又夠滑。呢間小食店瓣瓣掂,唔怪得咁受歡迎啦!   街霸最愛:今集最驚喜就係蠔餅喇!大件夾抵食,蠔仔仲夠晒新鮮,如果收工買返屋企當宵夜就正喇!同埋街霸真係超好奇超富蠔究竟會有幾多蠔呢?如果有沙田友試過就記住開心share喇! 仲生美食 地址:沙田大圍田心街1號隆亨邨隆亨商場地下LH2-3號 電話:從缺 營業時間:星期一至日:07:30-20:00 寶泰車仔麵 地址:大圍田心街1號隆亨邨隆亨商場地下隆亨市集4號鋪 電話:5702 9781 營業時間:星期一至日:06:30-20:00

0

【留定肚呀!大閘蟹嚟喇! 一蟹幾味中西日式任你揀】富臨薈、十里洋場、壽司芳

秋風起,除咗三蛇肥,更加係「蟹腳肥」!又到咗最啱食蟹嘅季節喇!小編今次為大家精選三間中日式食大閘靚蟹嘅好選擇。提提大家,雖然依家各種蟹都當造,但係食嘅時候都要適可而止呀,切忌食壞身子! 太湖大閘蟹 富臨薈  首先介紹嘅就係有得食太湖大閘蟹(HKD88/4兩)嘅富臨薈!「太湖大閘蟹」咁出名,除咗蟹黃靚之外,肉質亦非常細緻嫩滑,令人回味無窮呀!一隻靚嘅大閘蟹其實並唔需要過多嘅調味或者花巧嘅烹調,富臨薈嘅主廚就選擇咗用紫蘇葉清蒸,靚嘅蟹清蒸可以充份保留蟹嘅原汁原味,包保食到啖啖蟹汁豐腴嘅蟹黃蟹膏呀! 小編大力推介嘅係呢個西班牙膏蟹飯(HKD680)!雖然呢個飯唔係用大閘蟹做,以西餐常見到嘅意大利燴飯作為藍本,用海鮮上湯煮白米,令每粒飯都鮮味十足;另外再加兩隻超大碼嘅西班牙膏蟹同飯一齊焗,蟹香同飯嘅鮮味融為一體。食法亦非常講究,食嘅時候將蟹肉另放碟上,將蟹蓋上嘅蟹膏倒入白飯中攪勻,啖啖都係蟹膏嘅油香,超奢侈呀真係!   富臨薈 地址:沙田正街11-17號偉華中心2樓9A-9B舖 電話:2570 0168 營業時間:星期一至日:10:00-23:00   泰韓蟹宴  十里洋場 中西式有富臨薈,想帶點點泰韓味就可以試吓十里洋場啦!呢個椰香蟹粉盅(HKD120/位)用咗最上乘嘅泰國椰子,先將蛋白加入椰青內蒸熟,然後再把露筍、蝦仁等配料放入蟹粉炒香,再倒入原個椰子入面。大家記住趁熱食呀,食法係將蛋白與蟹粉拌勻,濃郁嘅蟹香配以椰子清香真係冇得彈呀。 蟹粉水晶蝦球(HKD388)亦非常精緻,大廚將蟹粉造成醬汁,彈牙嘅大虎蝦肉點落蟹粉醬入面,每一滴都係精華,令蝦球鮮味即時升倍,忍唔住要飲埋個汁添呀! 蟹粉鍋巴(HKD160/2件)係近年流行嘅經典大閘蟹菜式,相傳「鍋巴」呢種料理方式係來自韓國,有少少似飯焦嘅質感。大廚會將鍋巴炸好,再用鹹蛋黃炒香,放上鮮拆蟹粉,令到蟹香滲入鍋巴入面,索晒蟹味嘅鍋巴濃郁香口,冇得頂。   十里洋場 地址:香港銅鑼灣恩平道28號利園二期101號舖 電話:2338 5500 營業時間:星期一至五:11:30-15:30;18:00-23:30;星期六及日:11:30-16:30;18:00-00:30   超豪大閘蟹宴  壽司芳 講到蟹,又點少得出名精緻嘅日式料理呢!北海道長腳蟹就食得多喇,唔知日式嘅大閘蟹料理大家又食過未呢?大阪米芝蓮二星過江龍壽司芳推出咗香港限定Omakase(HKD2980/每位),總共有17-21道料理,當中有唔少都用咗大閘蟹作為原材料製作,菜式充滿創意得嚟又非常貼近港人口味。 小編覺得呢個大閘蟹膏軍艦值得一試,壽司大家平時就食得多,但大閘蟹壽司應該都幾新穎。以傳統壽司作為基調並將大閘蟹融入其中,蟹膏入口即溶,甘香嘅味道同加咗壽司赤酢嘅壽司飯配合,絕妙口感。 另外大閘蟹北海道毛蟹黑魚子飯亦相當精緻,用北海道毛蟹、大閘蟹粉,仲有白海膽同埋法國亞基坦鱘魚子,款款食材都相當矜貴,連伴碟嘅啫喱都係用陳年花雕玫瑰露加陳年黃酒製作,散發住淡淡酒香呀。 黃金大閘蟹大福。大福係日本常見小食,餡料多數都係甜嘅,而呢個特別版本嘅大閘蟹大福就以煙韌嘅皮包住鹹蛋黃、大閘蟹蟹肉加埋蟹黃製成嘅餡料,啖啖都係大閘蟹嘅精華。想試勻晒成個Omakase嘅Menu就要Book定位喇,手快有手慢冇啊!   壽司芳 地址:九龍尖沙咀金馬倫道8號The Otto酒店1樓 電話:2657...

0

【定食中伏滑蛋變蒸蛋 乾柴豬扒重口味鹹爆】伏務台

A1-Bakery出品嘅麵包一直係小編早餐嘅第一位,麵包全部鬆軟又好味。不過麵包出色,唔代表做第二樣嘢都掂囉…… 好似最近小編去咗A1-Bakery旗下嘅副線Balencia Bakery & Cafe食飯,水準就差到令小編打咗個凸,估唔到咁伏喎! 小編叫咗滑蛋豬扒鍋定食(HKD86),呢個價錢講真係偏貴喎,不過喺午餐時段同下午茶時段會包埋飲品,配白飯同味噌湯。好喇,全部食物上晒枱,咦,點解碗味噌湯唔同咗樣嘅?梗係即刻問侍應啦,唔問係唔會講㗎喎,要開聲問句,先知原來賣晒味噌湯,所以轉咗是!日!餐!湯!其實可以落單前同個客講清楚啫,如果好想飲味噌湯點算呢?眼前呢個組合實在好唔協調囉! 先講吓呢個是日餐湯,好多滴油鋪喺面喎,睇見都唔係咁開胃。不如又玩吓估湯仔吖,呢碗嘢你估係乜湯呢?小編最初以為係忌廉乜乜湯之類啦,原來,侍應話係周打魚湯喎!吓,哦,好呀! 一啲魚味都飲唔出,仲要係蔬菜為主! 主角出場喇!其實滑蛋同豬扒呢兩樣食材,煮得出色當然要啲技巧啦,但至少,係好難會煮得難食嘅!不過偏偏呢碟就……睇睇個賣相,核突唔在講,連味道都好唔合格! 就咁睇,已經睇唔出滑蛋嘅色水,出奇地食落係蒸蛋嘅口感。滑蛋變蒸蛋,仲要係「蒸」到好老嘅蛋,唔配飯就咁食仲要鹹到飛起,到底加咗幾多鹽落去? 到豬扒喇,只係輕輕用筷子一夾,個炸皮居然成塊甩咗出嚟,皮肉分離,成餐飯真係好多 「驚喜位」。 豬扒非常薄切,而炸粉同豬扒嘅厚度比例幾乎係1:1喎! 食咗一啖豬扒,同樣鹹到飛起呀!豬扒韌得嚟又冇肉汁,乾柴柴咁款,連鍾意食肉嘅小編食咗一啖都想放棄喇!   小編伏氣:老實講,真係冇諗過滑蛋豬扒可以煮到咁難食,要蛋味冇蛋味,啲豬扒又乾又老,仲要索價86蚊,連埋加一差唔多成嚿水!俾一百蚊食呢個滑蛋豬扒定食,只能說非!常!不!值!喺7仔買嘅叮叮飯仲好食過佢呀! 入伏點:Balencia Bakery & Cafe(沙田分店) 入伏價:滑蛋豬扒鍋定食(HKD86) 中伏by #愛吃的旅人 美術by #車雲 攝影by #愛吃的旅人 《伏務台》星期一伏務大眾,歡迎各界報料。

0

【沙田廣源市場食靚粥 港產虎紋珍奶有驚喜】街霸

自從呢兩、三年開始愈來愈多街市新開張或者進行大翻新,行街市都可以係一種樂趣。今集街霸就帶大家嚟到新鮮滾熱辣嘅廣源市場,啱啱上個月頭先開㗎咋,沙田區嘅朋友咪錯過喇! 街霸之前未去過廣源邨,今次意外發現佢哋成條邨嘅結構好似一個山城咁樣,成條邨嘅牆身設計都係用上面banner background嗰種磚頭設計,有種復古嘅工業風,幾有style㗎! 街霸去過唔少翻新嘅街市,多數都係乾淨、整齊,同時風格亦相當統一,即係冇乜特色!不過呢個廣源市場嘅設計算係相當有心機,好多細節位例如地磚呀、櫈呀等等都有復古味,唔錯唔錯。 好,講完環境就講吓有咩好食啦!其實食店種類都幾多㗎,仲打破咗街市小食檔通常冇得坐低食嘅不明文規定,呢間米皇就係食粥品嘅,質素唔錯! 小編叫咗碗艇仔粥(HKD28),分量真係幾大份,同埋超級足料呀!豬皮呀、魚肉呀等等,食極都仲有!另外粥底非常綿滑,入味得嚟又唔會太鹹! 食粥梗係唔少得嗌個炸兩(HKD18)過吓口癮啦!炸兩嘅精髓除咗甜醬、花生醬之外,個腸粉皮夠唔夠薄同滑都好重要㗎!呢個炸兩就真係每個細節都做得剛剛好,好食啊!街霸最怕食到啲腍晒唔脆口嘅炸兩…… 另外呢間汕尾美食主打潮式小食,menu都幾多選擇㗎!見到隔離枱食緊手拉腸粉好似好滋味咁,等街霸都試返碟先! 手拉腸粉(HKD18)嘩,比我想像中大份好多喎……啱啱先食完一大碗粥嘅我吞一吞口水,肥就肥啦!其實呢個腸粉係可以依自己喜好加唔同餸落去嘅,例如加蛋呀、炸兩呀、叉燒或者叉燒蛋,都係盛惠20蚊咋!20蚊嘅價錢但係一餐飯嘅分量,好抵呀! 唔好以為「白雪雪」就淡茂茂冇厘味道喎!食落好驚喜,好少有腸粉真係食得出米槳嘅味道,有彈性得嚟又滑嘟嘟。唔怪得咁多街坊捧場啦,18蚊真係超抵呀! 輪到幸茶舍算係喺街市度少見嘅茶飲店喇!成間舖頭感覺好親民,都幾多街坊幫襯㗎!飲品選擇非常多,睇個menu咁大size就啦,街霸對虎紋黑糖珍珠奶茶(HKD22)最感興趣喇!話晒呢排咁多過江龍湧嚟香港,唔知本地薑嘅出品又如何呢? 就咁睇呢,的確係有虎紋嘅,不過就真係唔夠老虎堂同埋鹿角巷咁靚喇。店員有提醒要搖勻先飲,街霸將佢上下搖咗大概10吓左右,就變成下面咁樣喇! 搖完杯嘢之後個虎紋都冇咩分別咁嘅……正常會消失咗一大半㗎喎。不過飲落係有黑糖香嘅,而奶茶味道就似港式奶茶味,同平時飲開嘅台式珍奶感覺唔太似,呢個夠晒港式風情呀!   街霸最愛:本身街霸唔算係一個「粥控」,不過米皇嘅粥真係令我忍唔住食晒一大碗呀,粥底綿滑得嚟唔會太「杰」,夾埋個炸兩食簡直係perfect match!分量同價錢成正比,又有位可以坐低慢慢歎,街霸見到唔少街坊都約埋一齊食呢! 廣源市場 地址:沙田廣源邨廣源市場 電話:不詳 營業時間:不定  

0

【主打日式素食料理 $38歎即製素鰻魚便當】素學堂

舖頭細細嘅知味駅素食隱身喺沙田愉翠苑街市,雖然座位得幾個,但知音人多籮籮,尤其係家長呀,訪問期間眼見好多人嚟買外賣!因為呢度主要售賣日式素食料理,連素刺身都有,俾小朋友食都唔使驚呀!菜式都有唔少選擇,由壽司、刺身、天婦羅、便當樣樣有,全部新鮮即製添!佢哋都有做到會服務,素食朋友想開Party都冇難度啦! 呢度價錢親民,但用料絕對唔馬虎!好似天婦羅,老闆就用咗日本南瓜,用料靚連非素食者都會嚟幫襯㗎。 手撕雞冷麵(HKD38)不論外形同味道都同真嘅極度似,配榨菜絲、青瓜絲、芝麻醬一齊食好香口!白色素麵口感幾清爽彈牙,夏天食就最啱喇。 日式燒汁素鰻魚飯(HKD38)用圓形日式便當盒裝,同餐廳比都唔失色。飯選用珍珠米,壽司醋只係落少少,味道唔會好酸。素鰻魚扒由腐皮卷成,層層疊幾有口感;淋咗燒汁同炒香咗嘅白芝麻好香口。最後食埋黃蘿蔔、酸薑同埋青瓜仲可以消滯添。 香芒吉列卷(HKD26/4件)顏色鮮艷好吸睛。芒果好香甜,壽司卷入面包咗炸素魚塊、子薑同青瓜,入口酸甜清香,都幾開胃。 老闆建議台式燒肉刈包(HKD22/2件)新鮮即食係最好,刈包熱食會軟熟啲,口感同味道似中國嘅饅頭。入面有一塊香脆可口素炸豬扒、開胃酸青瓜、蕃茄同自家製嘅酸甜微辣芥末沙律醬,好豐富呀!   知味駅素食 地址:沙田牛皮沙街2號愉翠苑街市地下2號舖 電話:9458 5190 營業時間:星期一至日:10:00-20:30(老闆隨心放假,記得留意佢哋Facebook呀)

0

【「好好肉」得返2粒仔肉 沙田榴槤黑店多客中招】食焦

呢個時候唔少榴槤控都出動,諗住趁當造嗒返啖又香又濃嘅榴槤肉!不過遇著啲生果檔衰黑心,專入渣貨就真係黑仔喇!好似有網友喺沙田瀝源邨檔生果檔,210蚊買咗兩個榴槤,買嗰陣店員仲話「好好肉」,點知返到屋企一開,五瓣肉有三瓣係冇嘅,另外兩瓣只係得返2粒肉仔,係一毫子咁大嘅肉仔喎!唔嬲就假啦! 嬲還嬲,都要影咗相先,跟手落去檔嘢度嘈啦梗係,點知檔主竟然唔肯退貨!苦主留言「仲話我地(哋)搵佢錢(笨?),因為越來越多街坊圍觀才最後退了$100!」。網友喺群組po咗事發經過同張得2粒肉仔嘅榴槤相,原来有唔少街坊都瀨過嘢喎,呢間生果店個朵已經臭晒喇! 有網友留言話「果間不嬲都係黑店嚟㗎喇!好耐之前幫佢買榴櫣點知揀個生嘅唔熟返到屋企先知呀!然後落去搵佢話佢比(俾)個唔熟嘅榴櫣我,然後老板(闆)好串咁話唔熟咪返屋企蒸熟佢囉!」嘩,咁樣叫個客返去蒸熟佢都得?又真係離譜啲喎! 再睇返黑歷史,其實兩個月前喺另一個群組都有人中招,又係呢間呀!呢位苦主係買咗一個400蚊貓山王,返到屋企一開發現啲肉又黑又灰,仲要出晒水!當然店主又係唔肯換又唔肯退錢啦,只係話下次買就計返平啲喎!試問仲邊有下次呀?睇嚟呢間店真係好唔掂,榴槤似乎仲係中招嘅重災區添,下次仲肯幫襯佢,記得當場開咗榴槤先喇!