Tagged: 油塘

0

【極厚切餐蛋牛肉包】SPADE by Lassana

正所謂三個女人一個墟,只要有三個或以上女生坐埋一齊,就會有源源不絕嘅話題。由隔離班個插班生,公司樓下嘅男神,到街口士多陳伯隻狗病左,一律無所不談!今日小編介紹嘅就係位於油塘大本型嘅SPADE by Lassana(下稱SPADE)。 SPADE離地鐵站只有3分鐘路程,佢地嘅裝修同店舖風格令我諗起韓系女生造型。一般嘅café冷氣都會開到好大,尤其係商場café通常都用中央冷氣無得較。但係SPADE隔離就係商場嘅玻璃幕牆,令到有足夠陽光照入去,人生最正就係嘆住冷氣曬太陽,直頭想喺度瞓一陣。   見到一個個三層架,我就已經知要食咩!我鍾意呢個英式下午茶套餐(HKD98)嘅麵包好新鮮。透過開放式廚房,你可以見到佢地嘅麵包新鮮喺焗爐拎出嚟,所以唔驚食到隔夜麵包。小編習慣三層架由底層食起,食到第二層嘅時候,雪糕啱啱好進入最佳狀態!綠茶雪糕好滑,奶味同綠茶味調得合適,最後食埋頂層嘅多士啱啱好兩個人食唔會太飽。  SPADE嘅性價比實在係極高,中午開始全日供應嘅套餐連埋飲品都係50蚊左右,選擇多之餘,佢地仲會定期更新餐單!意大利西西里汁慢煮雞胸配薯蓉(HKD50) ,雞胸細嫰,每一啖都有香濃既蕃茄味好開胃,薯蓉都可以用西西里汁伴。 另一個推介係珍寶厚切午餐肉蛋牛角包 (HKD48),炒蛋好滑唔會過熟,要講下佢塊午餐肉真係好正,手掌咁厚嘅午餐肉配埋炒蛋同牛角包真係perfect match!每一口都好滿足,仲有一份雜菜沙律伴碟。 雖然呢度既主菜份量好足,但係記得都要留返個肚食甜品,因為呢度仲可以加錢食雪糕放題!同朋友食住雪糕傾八卦,其實開心可以好簡單。 SPADE by Lassana 地址:油塘高超道38號大本型地下G28號舖(港鐵油塘站A1出口) 電話:2346 0828 營業時間:星期一至五:12:00-22:00 星期六、日及公眾假期:09:30-22:00