Tagged: 油麻地

0

【足料小店必點爆餡手工餃子 惹味首選脆皮雞扒撈麵】平霸

平霸又捐窿捐罅搵好嘢食喇!今次俾小編搵到喺油麻地一個小角落嘅竹地小館,無論係餃子定麵食都大大份又好食,符合晒小編成日話「夠抵食都要夠好食」嘅理念。即刻睇吓究竟有幾正啦! 呢間小店喺轉角位,堂食座位大約有十個,不過疫情關係佢哋暫時只做外賣,拎返屋企食更安全呀。 佢哋究竟有幾抵食?成個餐牌最貴都唔過HKD40,撈麵都只係HKD20起。鍾意落廚嘅朋友可以買生餃(HKD35/12隻)返去煮,平均唔使3蚊一隻,超抵呀! 咁啱小編去到嘅時候師傅包緊餃子,佢哋話每日朝早開始包餃子,隻隻都係人手當日即製。餃子落足料,好有分量㗎!呢款韮菜豬肉餃真係超多韮菜㗎,鍾意食韮菜嘅朋友要試吓喇。 煎、湯餃(HKD35/10隻)同價,小編就試咗煎餃。熱辣辣即叫即煎,外皮香脆,食落夠多汁。 粟米豬肉餃(左)同招牌菜肉餃(右)粒粒都賬卜卜,皮薄爆餡,多菜少肉夠晒健康。呢兩款味道唔會重,都新鮮好食,但小編推介粟米豬肉餃多啲啲,食落比較有咬口。如果係正常食量嘅女仔,8粒餃子(HKD30)已經夠晒飽。 試埋大大碗嘅蔥油撈雞扒麵(HKD30)先,會配一碗白蘿蔔清湯㗎。厚肉嘅雞扒煎到皮脆肉嫩,撈麵嘅蔥油味唔算濃,反而醬油味比較突出,似醬油撈麵多啲,不過勝在食落唔油膩;嗜辣嘅朋友加少少佢哋自製嘅蒜蓉辣椒醬會更惹味。   竹地小館 地址: 油麻地廣東道838號金冠樓地下 電話: 3614 5672 營業時間:星期一至日:11:30-21:15

0

【油麻地椰子主題甜品店新登場 原個椰子凍+網紅水果碗】椰子日記

喺油麻地新開嘅椰子日記獨孤一味用椰子炮製出唔同嘅椰子甜品、飲品,估唔到一個椰子都可以有咁多變化。招牌嘅椰子凍、大熱嘅鮮果椰子碗、椰子雪糕等全部都以原個椰子上枱,夠晒原汁原味呀。除咗甜品,小店亦有一系列椰子主題飲品,鮮榨椰汁加上唔同配料,甚至自家製椰子奶蓋茶都唔錯㗎。嚟緊仲會推出冬季限定嘅椰子燉湯同暖笠笠嘅甜品添,想食記得捕實喇。 舖頭所用嘅椰子會視乎時節,主要選用海南或東南亞產地;椰子味雖然唔係特別濃,但比一般嘅厚肉,抵食啲。而甜品需要嘅其他新鮮水果,就由店主每日去果欄親自挑選,保證新鮮!雖然主要做外賣生意,但旁邊都有張吧台俾客人堂食,而且最近仲準備咗啲樽裝水免費俾大家拎嚟應急添。 呢度嘅椰子甜品全部都低糖健康,當中嘅甜味主要來自椰子水本身嘅清甜。嚟到必試招牌椰子凍系列,以自家製嘅椰子凍做甜品底部,面頭再加唔同嘅配料。 雜果芋圓椰凍(HKD44)係呢度嘅熱賣之選,以芋圓、火龍果肉、芒果肉鋪面,再灑上椰絲,用料都幾豐富喎。特製嘅椰子凍純白色,以椰子水同椰奶整成,口感同平時啲啫喱一樣咁滑嘟嘟,食落有椰子獨特嘅清甜味道;冇添加糖,咁就食甜品都食得健康過人啦。除咗椰子凍,就連芋圓同地瓜圓都係自家製,咬落煙煙韌韌,入面仲有啲芋蓉同蕃薯蓉增加口感,絕對係心機之作呀! 養生啲就有甜蜜桃膠椰凍(HKD52),軟腍嘅桃膠分量夠多,抵食!桃膠要預早一晚浸定,再用人手去除雜質,食落軟腍之餘都幾滑身。由於桃膠本身冇乜味,所以呢款椰子凍甜品加入黑糖同牛奶,會比其他款式多咗陣黑糖獨有嘅甜味。 歐美大熱嘅水果碗都可以喺度揾到喎!網紅椰子碗系列入面嘅黃金海岸椰子碗(HKD50)充滿熱帶風情,將新鮮芒果肉整成芒果沙冰做底,面頭再鋪上芒果粒、菠蘿同開邊熱情果,全部水果都好新鮮,入口夠晒fresh呀! 食甜品又點少得雪糕呢?椰子碗冰淇淋(HKD33)有三大球自家製嘅椰子味雪糕,雪糕以新鮮椰子水同椰奶整成,椰子味濃而不膩,面頭再灑上椰蓉脆脆做點綴,值得一試。 食完甜品仲可以叫店員幫你刨啲椰肉出嚟食添。除咗就咁食,舖頭建議可以帶個椰殼返屋企燉湯,清甜滋潤好有益㗎! 試埋佢哋啲椰子特飲先!左邊椰香雪絨白桃烏龍(HKD29)特製嘅椰子奶蓋幾稠身,飲落有濃郁嘅椰奶香,夾埋清香嘅白桃烏龍茶底,層次自然double up啦!而右邊就係鮮榨椰奶+芋泥青粿雙拼(HKD32),加入芋泥同透明爽口嘅青粿特別有咬口,不過呢杯相對甜啲,亦比較有飽腹感。   椰子日記 地址:油麻地彌敦道518-520號彌敦行地下B號舖 電話:6212 8907 營業時間:星期一至日:11:30-23:00

0

【網民報料油麻地café伏爆 實試漢堡套餐貨不對辦】伏務台

一講中伏餐廳就有網友留言,話油麻地嘅愛麗絲的秘密花園都好伏,仲引嚟一堆網民附和添。小編都做完一輪資料搜集,都發唔少人都有微言,咁梗係去實測吓啦! 呢間以愛麗絲夢遊仙境做主題嘅打卡café,俾大量網民指佢嘅價錢同食物質素唔成正比,單靠打卡都唔可以接受。 小編一入去已經聞到陣酸宿味,座位與座位之間都好迫,想像唔到四個人一齊坐可以點食飯。呢度作為打卡café,先睇睇裝修、影相道具同餐具都有啲殘舊,部分已經爆口,公仔甩毛都冇換新嘅;而且有啲道具裝飾勁厚塵,咁樣食嘢真係唔開胃囉。 不過點都要試埋食物質素,小編叫咗特偉兄弟孖寶(HKD78)。特偉兄弟孖寶係漢堡包餐,但上菜個樣同餐牌嘅圖有出入!明明圖示係雙色漢堡,但出嚟變咗單色;薯角就變咗粗薯條;沙律仲直接消失添!無論作為一間餐廳定打卡地點都好,呢啲落差真係有啲過份呀! 兩個漢堡包都煎得有啲乾同硬,用手大力啲都壓唔扁。中間夾住嘅漢堡扒雖然跟返餐牌做咗牛肉同雞肉豆腐兩款,但牛肉口感鬆散,味道超鹹;雞肉就又乾又實,冇咩雞肉味。 粗薯條貨不對辦已經令人勁失望,冇咩調味,仲條條都唔脆口,圖片嘅沙律醬就變成茄汁,成個感覺頹晒。而且分量唔多,就算以打卡做賣點都彌補唔到呀。 作為café當然要試吓佢啲甜品啦。紅心皇后的餡餅係雜苺軟心慕絲蛋糕,入口有陣隱隱嘅苦澀味同藥水味,甜得嚟都幾假,好似食糖嗰種咁。分量同樣好細,同樣嘅價錢喺街可以買到質素好好多嘅蛋糕或西餅喇。小編同網友嘅評價一樣,真係「不可一,不可再」。就算想影相打卡,同樣嘅價錢可以去新啲又乾淨,食物質素更好嘅café。   小編伏氣:4星(5星滿分) 入伏點:愛麗絲的秘密花園 入伏價:特偉兄弟孖寶(HKD78)、紅心皇后的餡餅(HKD56) 中伏by #MOMO 美術by #MOMO 攝影by #MOMO,BLUE 《伏務台》歡迎各界報料。

0

【攻陷少女心 味遊愛麗絲童話世界】愛麗絲的秘密花園 Wonder Garden Cafe

本報訊:最近多人墮進油麻地Wonder Garden Cafe愛麗絲秘密花園,生還者表示入面除咗有愛麗絲故事睇之外,仲有得飲愛麗絲變身飲品,同勁多唔同版本愛麗絲珍藏食飯!Alice迷真係千祈千祈唔好錯過呀! 一去到cafe走廊就已經見到倒轉嘅鋼琴、啤牌、黑白地磚同故事書頁……全部野都話緊比你知,你已經入咗愛麗絲世界啦! 入到去真係好有童話feel呀!好多人同緊愛麗絲食緊tea,森林feel嘅裝修加上種種愛麗絲元素,成個環境都令人融入咗童話故事。 相機食先一定要試下,掉進兔仔洞(鮮製菠菜忌廉雞肉長通粉)(HKD138)拱形青瓜加埋兔仔,就好似愛麗絲一開頭,比好趕時間嘅兔仔先生引到走咗入去個兔仔窿裡面。呢個長通粉嘅菠菜汁係用本地農場菠菜每日即製,夠晒健康同清新! 呢個Tea Time Forever!(HKD438/2位)豐富嘅愛麗絲元素,令你成餐都好有驚喜!個餐入面有10樣食物,連一杯飲品,其中最最最養眼梗係Alice Cup Cake啦,成個愛麗絲倒樹蔥插入cup cake、馬卡龍時鐘、啤牌朱古力曲奇、煙三文魚花花等,款款都勁有童話故事feel,相機食先必check! 嚟到又點可以唔飲佢地嘅魔法藥水呢?Alice(HKD52)以愛麗絲一身藍白色造型做構思,飲落其實係藍忌廉溝鮮奶,靚得嚟又夠晒香港特色,同場仲有好多款唔同魔法藥水,一定要嗌多幾個朋友去試下、睇下咩樣先得! 愛麗絲的秘密花園Wonder Garden Cafe 電話:6595 1177 地址:油麻地彌敦道577號高氏大樓6樓B號舖 營業時間:星期一至日: 12:30-22:30

0

【築地直送勁鮮甜 13款海鮮大爆丼!】豊洲水産海鮮丼専門店

前排掀起一股海鮮丼熱潮,小編都係海鮮丼忠實粉絲,一知道位於灣仔嘅豊洲水産海鮮丼専門店喺油麻地開分店,就即刻衝去食!店内所有海鮮都係由日本築地漁獲直送到港,等你可以品嚐到最新鮮嘅海鮮。 日式餐廳一向係簡約自然風格,加以傳統日式家具,淺啡色基調以及傳統木質桌椅餐,令人一入餐廳就覺得成個人好放鬆,無壓逼感。而小編一入去就俾呢個富有日本特色嘅布簾所吸引,日式風情濃厚。 半開放式嘅廚房,你可以坐喺吧檯望住師傅精心炮製海鮮丼嘅過程,轉眼間一碗新鮮日本直送嘅海鮮丼就出現係你面前啦。 鍾意食新鮮海鮮嘅你,今次有口福啦!大漁豊洲水產海鮮丼特盛(HKD388)一碗特盛海鮮丼大約800克,絕對可以兩個人開心Share。呢碗有成12種唔同海鮮㗎,小編對黑鮪赤身最著迷,塊塊赤身新鮮又肥美,完全可以滿足到對海鮮丼有追求嘅你。 謹製雲丹丼伴三文魚籽溫泉蛋(HKD398)每日限定20客咋,望住層層叠嘅海鮮都唔知由邊開始入手好。面層馬糞海膽係來自北海道,入口隨即喺口度化開,甘香濃郁。如果覺得呢幾款海鮮食完都唔夠喉,仲可以自己加Topping,有成13款海鮮配料(HKD866)任你揀 。 鹿兒島產軟骨魚蛋串(HKD48)唔係魚蛋咁簡單,啖啖肉嘅魚蛋入邊混有雞軟骨,令咬感更有層次,味道濃厚。 豊洲水産海鮮丼専門店 地址:灣仔謝斐道415-421號積福大廈地下B舖 電話:2808 0292 營業時間:星期一至日: 12:00-15:00; 18:00-23:30 地址:油麻地彌敦道 558 -560560560號譽發廣場 1樓 電話:2869 6289 營業時間:星期一至日: 11:00-00:00