Tagged: 沾麵

0

【住家清湯底拉麵榮登米芝蓮 多賀野過江必食醬油味】多賀野拉麵

喺東京有唔少人龍店,以清湯底聞名,仲米登米芝蓮嘅Takano Ramen多賀野拉麵都係其中一間,佢哋首間分店兼海外店上月喺尖沙咀K11 Musea開始試業。總店由一對日本夫婦主理,佢哋將由住家製作嘅清湯底拉麵帶到大家面前,而且呢個住家味道仲攞咗四屆米芝蓮,仲喺日本食評網Tabelog曾經取得3.99高分!依家佢哋嘅招牌麵食嚟到香港,麵款同總店一樣,但加咗飯類、小食同甜品,即刻睇吓有幾正啦! 多賀野拉麵總店負責人高野夫妻對出品好有要求,雖然將湯底同製麵技巧傳授俾香港店兩位師傅,但佢同先生每隔半年都會嚟香港監察品質。 店內環境好有日本風格,仲貼心咁設有屏風間格,為單獨嚟嘅食客增添私人空間。 製麵師傅依家每日約製作兩至三轉麵條,仲時不時拎起麵條度尺,務求保持同日本一樣嘅品質添。 麵嘅密度幾高,但口感仲係彈牙,亦唔會好易發脹。 先試相對淡味啲嘅粟國塩味拉麵(HKD128),湯底好清唔多油,但係用咗日本粟國出產嘅高質鹽嚟烹調,味道其實幾鮮味又唔會死鹹,飲晒都冇問題。 而最招牌梗係多賀野醬油拉麵(HKD128),湯底用上雞肉、雞骨、豬骨、豬軟骨、薑蔥蒜、魚乾等材料熬煮,出餐前再撞落單即煲嘅鰹魚乾精華湯汁,令清湯底都有香濃味鮮嘅效果;配料同粟國塩味拉麵一樣有火炙叉燒、香滑嘅溏心蛋同紫菜。如果想湯底再特別啲,可以將叉燒喺湯浸一陣,會有少少火炙味帶落湯度㗎! 佢哋嘅辣麵同一般嘅濃湯唔同,口味傾向中式少少。芝麻辛辣拉麵(HKD138)味道唔係好辣,加咗芝麻醬汁只係令湯杰啲啲啫,入口依然順滑。配料除咗火炙叉燒,仲有肉粒增加口感。 酸辣擔擔麵(HKD138)係香港大廚鍾意嘅口味,同樣唔係太辣,但酸酸哋嘅味道令人覺得好爽!而且加咗啲炒過嘅榨菜幾特別,配麵或肉一齊食更加爽口添。 豚鴨沾麵(HKD168)嘅湯底用上鴨肉、鴨骨、雞、蜆、菇等材料熬煮再撞鰹魚乾精華湯,只係比醬油味鹹少少,但食完加湯飲埋都唔會太鹹。 沾麵麵條粗啲,但湯底唔係杰身,所以唔會好掛湯。 想試小食的話,不妨點大隻又嫩滑嘅自家製吉列炸蠔(HKD78/3件),或見到一絲絲蟹肉嘅自家製蟹肉薯餅(HKD68/3件)。 呢度仲有山形果汁、汽酒同波子汽水(各HKD48/枝)同果味濃郁嘅雪葩。其中柚子雪葩(HKD68)比較甜啲,菠蘿雪葩(HKD68)就好清新。   多賀野拉麵 地址:尖沙咀梳士巴利道18號K11 Musea 2樓220號舖 電話:2881 8331 營業時間:星期一至日:12:00-22:00

0

【芝士海膽沾麵賣相差 芝士死鹹海膽失埋蹤】伏務台

香港人鍾意搞創新,但有時都會玩到過晒火變咗玩食物。好似尖沙咀元祖沾麵專門店嘅芝士海膽沾麵,本身就咁聽個名都覺得幾驚喜,但係網民就唔係咁諗喇,好多食評都話伏囉!究竟佢有冇對唔住「沾麵專門店」呢個稱號?當小編見到碗麵嘅真身……即刻想調頭走呀! 餐牌入面嘅相好細張,問店員啡色嗰嚿係咪肉?店員有啲尷尬咁話係,然後好誠實咁補咗句啲肉唔係好多,似肉碎。 好,上枱喇,呢碗芝士海膽沾麵(HKD78),唔知大家有冇聽到小編個心碎咗呢?塊紫菜冇沾湯都瞓低咗,其他配料好似求其掉落去咁。唔理係咪日本人經營,但咁頹嘅擺盤真係好少喺日本菜見到,賣相率先扣分! 而呢隻溏心蛋都幾搶眼,因為熟到一個點呀!仲唔係新鮮整,因為係凍嘅。 到重點嘅芝士湯,熱到不斷起泡泡。不過見到成個湯都係芝士,個腦諗起瑞士芝士火鍋,分別只係冇一直熱住……攪攪佢再三確認真係成鍋濃濃嘅芝士,而唔係湯面上加芝士。個湯鹹到GG,蓋過晒芝士應有嘅奶香味,就算沾麵湯比平常鹹都唔應該係咁囉。至於質地就似忌廉湯,小編額頭現咗三條黑線…… 係時候搵頭先店員講嘅肉,呢塊算大㗎喇,差唔多size有3-4塊啦,其他都係再細啲嘅肉碎。呢刻小編完全明白店員嘅尷尬!味道有少少焦香,然後又俾芝士嘅鹹味蓋過晒…… 呢個沾麵質地好似食緊烏冬咁,偏軟腍,冇咩彈性可言。 一路食就一路見到呢啲溶唔到嘅芝士,真係冇晒胃口,不過佢提醒小編:海膽呢?唔好話海膽碎,係連味都食唔到囉……小編有理由懷疑,究竟芝士海膽沾麵係咪堅落咗海膽呢?   小編伏氣:如果HKD78食一個沾麵並唔貴,但食一個賣相其差、味道勁鹹、肉量好似施捨你嘅沾麵,咁不如買現成料返屋企自己煮好過。連店員介紹嘅時候都覺得尷尬,不如連嗰少少肉都唔好落反而嚟得理直氣壯。俗語都話「唔怕生壞命,最怕改壞名」,真係說服唔到小編碗嘢係有海膽,咁點叫得做海膽沾麵呀? 入伏點:元祖沾麵專門店 入伏價:HKD78   中伏by #為食加菲貓 美術by #車雲 攝影by #為食加菲貓 《伏務台》星期一伏務大眾,歡迎各界報料。

0

【自家製沾麵新鮮新奇味 檸檬麵配黑蒜油湯最正】彩aya

喺元朗好多Fans嘅彩aya上年突然結業,令好多沾麵友痛失食堂!不過日籍主理人砂田信廣先生冇放棄對沾麵嘅熱愛,舖頭唔單止喺元朗重開,仲殺到去西環開分店添!點解咁多人支持?因為佢日日自家製作新鮮沾麵,麵嘅口味仲好獨特,小麥同黑胡椒係基本款,另外仲有“Today Special”,砂田信廣先生會去街市睇吓咩食材新鮮而調配,依家已經累積咗廿幾款,有伯爵茶、青檸、西蘭花同紅辣椒等等,想知小編今次試到咩味就繼續睇文啦! 砂田信廣先生用日本運嚟嘅全粒粉製作麵條,佢比小麥粉粒子大啲、貴好多、又易令麵條斷開,依家連日本當地餐廳都好少用喇。餐廳用返啲包裝袋嚟裝飾牆身,更加有風味呀! 要整好嘅麵條仲要呢部陪咗砂田信廣先生廿年嘅製麵機,嚟香港發展都要帶埋佢呀!由溝粉、製作麵卷到切割都靠佢。依家兩間店加埋日賣300碗左右,假日會再多啲,賣晒就收檔㗎喇。 呢度三款湯底,第一次嚟嘅日本人多數揀小麥麵配豚骨湯,香港人就揀Today Special配蝦味噌湯,而元朗店最好賣就係黑胡椒配黑蒜油湯,真係各有擁躉。 麵底就咁睇都幾大份,小編今次試到小麥味(左)、黑胡椒味(上)同Today Special嘅檸檬味(右),但係配咩湯底好呢?日籍店員西村先生咁樣推介: 小麥麵底配豚骨湯(HKD78)係最傳統又食到原味嘅味道。三款湯嘅配菜一樣,有2片叉燒、1隻溏心蛋、1片海苔同筍。豚骨湯每日熬10個鐘以上但唔算油膩,平時都話沾麵嘅湯比拉麵鹹,但呢個湯唔係鹹好多,飲得到喎!小麥味麵底同湯真係好夾,味道唔會互搶。麵質似粗身蕎麥麵,有咬口,亦有拉麵嘅彈性,但冇咁重鹼水味,真係唔錯! 叉燒偏瘦,唔多肥膏,麵幾軟腍,醃料味唔會好重,反而食到肉嘅甜味。 黑胡椒麵底配蝦味噌湯(HKD88)非常香!熱辣辣嘅黑胡椒麵上枱就聞到佢嘅香氣,微辣甘香好醒神!湯底本身好鮮甜,而京蔥令味道更加清香! Today Special檸檬麵底配黑蒜油湯(HKD83) 好啱夏天食,第一啖有微微嘅酸味,後續有檸檬嘅清香滲出嚟,但驚喜未完呀!黑蒜油湯帶有炸蒜嘅香氣,味濃但有檸檬麵平衡返,小編超鍾意呢個配搭! 呢度另一個特色係用日本蒜頭,自家製嘅炸蒜!好香甜脆口,加落湯底會更濃味! 提提大家,想知當日Today Special係咩就留意佢哋Facebook公佈啦。   彩aya 地址:香港島屈地街16號金陵大廈地下 電話:2440 0900 營業時間:星期一至六及公眾假期:11:30-15:00,18:00-21:00(星期日休息)

0

【一燈豪賣$238一碗沾麵 師傅教黃金十分鐘食法】麵屋一燈

以破紀錄連續5年高踞日本最高公信力食評網站Tabelog嘅麵屋一燈,終於登陸香港喺尖沙咀正式開業喇。今個月仲有海外分店開業先有嘅「一燈龍門」沾麵,只此一家喺香港食啦! 裝潢好日本風,如果坐窗枱位仲可以對住個海食添,都幾爽㗎。 睇住師傅煮熱騰騰嘅湯頭,真係引死人呀! 一燈龍門(HKD238)每日限量供應,因為湯頭每日新鮮製,賣晒就要等第二日喇!有原隻新鮮火灸波士頓龍蝦,有少少芝士提味,啖啖肉點埋特製嘅海膽汁就更加鮮甜香口。湯頭以波士頓龍蝦頭同鮮雞熬足八個鐘,再配以四種魚乾精華嘅魚介風味雞湯,精華湯頭非常鮮味! 創辦人阪本幸彥先生即席示範點先係正宗食沾麵,佢話日本店嘅客人有80%都食沾麵㗎: 沾麵已過冷河,所以唔建議將整個麵放入湯度,因為會令湯汁變凍。最好喺10分鐘內食完碗沾麵,如果傾偈耐咗,可以搵店員幫你熱返碗湯。 首先唔點汁夾一、兩條麵食,感受一吓麵嘅質感。 夾兩、三條麵落湯碗,沾汁幾秒就夾起食。 海膽汁可以幫龍蝦提鮮,亦可以遂少倒入沾麵撈勻食。 撈咗海膽汁嘅沾麵再放入湯頭點湯食。 如果剩餘嘅湯頭覺得太鹹,可以問店員加入魚介風味雞湯,按個人口味沖淡嚟飲。 招牌沾麵 —— 特製 濃厚魚介沾麵(HKD168)嘅湯頭以鮮雞再配合四種魚乾熬製超過十小時而成,鮮味得嚟冇豚骨湯咁漿口。雞肉丸子口味清新,仲有少少軟骨增加口感,再配塔嫩滑叉燒、雞肉,都幾飽吓。 想食拉麵都有兩款,特製 濃厚魚介拉麵(HKD158)將沾麵轉成幼身拉麵,軟硬度適中,都唔錯。 另一款係特製 芳醇鹽味拉麵(HKD148),味道相對清啲,湯頭以低溫慢煮成清雞高湯,但都仍然好夠味。   麵屋一燈 地址:尖沙咀廣東道3-27號海港城海運大廈3樓LCX 32號舖 電話:3102 3299 營業時間:星期二至日:11:30-22:30

0

【過江龍攻港 十級掛湯沾麵鎮店之寶】神山麵屋

香港人出名鍾意食拉麵,但係食得多都會想試下其他款式,沾麵就係另一款港人最愛。觀塘apm新進場嘅神山麵屋仲係猛龍過江添,麵友快啲嚟喇! 神山麵屋喺東京以獨有嘅豚骨白湯湯底而揚名,極尚濃郁嘅豚骨湯頭精華配搭多種日本魚介同日本秘製醬油煮成,小編飲啖湯都feel到濃濃嘅骨膠原精華。 鎮店之寶神山沾汁麵(HKD85)嘅厚燒豚肉真係唔講得笑,180度大火高溫烤煮之後勁入味,肉質依然保持嫩滑,小編唔點湯食都覺得夠晒鹹。豚肉表皮微微焦香,油脂溶化,口感層次豐富。特有嘅坑紋麵條掛湯能力極高,搞一搞夾起已經沾滿汁,配埋流心蛋一齊食會更加香滑。 另外仲有蕃茄叉燒拉麵(HKD85),湯底用新鮮番茄同多款雜菜熬製,非常濃郁。配上微微炒香嘅番茄粒同新鮮壓製嘅薯蓉,呢個組合幾新鮮。 餃子同沾麵係永恆嘅絕配,神山湯餃子(HKD38)係專為香港食客而試,日本無得食㗎。先煎後湯嘅餃子皮喺微脆同幼滑之間,唔會浸到爛蓉蓉,豚肉都鬆軟多汁㗎。 沖繩風味豚足(HKD48)最好先食豚足,因為豐富嘅骨膠原令喉嚨感覺幾黏,之後食返清甜嘅菠菜同蘿蔔可以順返條喉。豚足細火慢煮十四個鐘之後,皮肉腍到一個點呀! 唐揚豆池魚(HKD45)炸得好香脆,連骨食都得。入口有少少芥末味攻出嚟,少辣多脆。 直擊有片:https://goo.gl/mg8iAt   神山麵屋 地址:觀塘觀塘道418號創紀之城五期(APM)2樓 L21B號舖 電話:3148 1321 營業時間:星期一至日: 11:00-00:00

0

【激罕北海道正宗沾麵】梅光軒

之前介紹過銅鑼灣希慎地庫既拉麵店「梅光軒」,最近加盟左太古AEON Style開左新分店喇!由正宗日本師傅主理,湯底一樣係北海道本店原汁原味急凍直送!小編食完新推出北海道沾麵之後,飲晒成個湯底你就知有幾正啦。 同銅鑼灣格局差不多,舖面簡潔,客人都絡繹不絕,客似雲來。 坐鎮主廚及店長(左邊:細尾洋介)係百分百日本師傳,而新店開業期間,北海道梅光軒本店派埋始祖直屬傳人(右邊:Komatsu Shingo)由日本專程過黎香港打點一切,確保食物質素同北海道店一樣高水準!可想而知梅光軒對食物係絕對有一份非常高嘅要求同執著。 拉麵店堅持全部湯底由日本密封直送到港,保證同北海道質素一致,令每位食客都感受到原始風味! 梅光軒北海道本店師博於現場講解沾麵製作過程,講解激動又認真,原來要做出一碗好麵絕對不簡單,好多細節要注意!師傅為左令麵條質感更彈牙,煮好麵條後會特別處理,務求做到盡善盡美。 つけ麵 (沾麵)(HKD93)暫時只限太古AEON店出售,依款沾麵湯汁經過特別調配,濃郁帶一點點香辣,辣度平易近人,平時唔食得太辣都可以一試!店長特別配上鰹魚粉,令味道層次更豐富。 一食落口,香辣味瞬間爆發出來!沾麵特別選用粗身曲麵同一般拉麵中曲拉麵有點不同,令到麵條更「掛湯」,意思係令每一條麵條都可以「掛」上更多湯汁,非常有心思。 食完個麵通常都仲有濃湯剩底,依個時候就可以叫師傅加入清湯,咁好味當然唔可以浪費,成碗飲晒佢! 怕食太重口味?無問題!如果想飲到湯頭的真正味道,可選鹽味拉麵(HKD75),或放日本海鹽做調味,便可飲到湯頭內豬骨,雞,沙甸魚熬煮的真正味道。食落麵質彈牙,叉燒鬆軟,加上蔥花味道,令每啖口感都極為滿足。 另外仲有人氣醬油拉麵(HKD75)!想特別再提提大家拉麵上面嘅厚切筍都係北海道直送,好多識食之人都會再追加多一份厚切筍嫁。 梅光軒 太古分店地址:太古康怡廣場Aeon地下 銅鑼灣分店地址:銅鑼灣軒尼詩道500號希慎廣場B2層 電話:28703072