Tagged: 泰國菜

0

【東南亞主題餐廳登陸圓方 惹味午餐×香口小菜】Monsoon

ELEMENTS圓方新開嘅Monsoon主打現代東南亞街頭美食,唔單止菜式由屢獲殊榮嘅Will Meyrick設計,仲由「亞洲50最佳餐廳」Sarong Restaurant開店團隊之一嘅印尼籍大廚Gede Budiana主理。強強聯手嘅菜式有咩等別?你可以喺度品嚐到泰國、巴里、柬埔寨、印尼等燒烤、咖喱、湯麵等東南亞美食,即刻睇吓有幾正啦! 店內有大量藤製傢俱,而VIP房更加營造成「雨林」嘅環境,令人好似置身東南亞當地咁。 呢度嘅午巿套餐(11:00-14:30)款式大約兩星期轉一次,一定令你保持新鮮感。而且升級仲可以無限量添飲泰式奶茶(加HKD18),或者享用原個椰青、紅白餐飲同氣泡酒(加HKD38)等。其中前面嘅金不換炒雞肉碎配煎蛋、雞湯及泰國香米(HKD148)充滿泰式風味,以羅勒、辣椒、蒜蓉等香料炒香碎雞肉、長豆同粟米芯,熄火後放入金不換葉增添香氣;配上淡蘿蔔雞湯同放上太陽蛋嘅泰國「茉莉香米」絲苗白飯,一份午餐就試到唔同口味喇。而後面嘅香辣炒鮮蝦魷魚配青木瓜沙律及泰國香米(HKD168)以泰式辣椒醬快炒蝦、魷魚、青豆、粟米芯等材料,入口香甜惹味;加埋經典嘅泰式青木瓜沙律,酸甜辣嘅味道令人更加開胃添。 呢度嘅單點菜式都好大份,鹹蛋黃脆炸軟殼蟹沙律(HKD138)都夠3個人食㗎。將蝦乾、蒜同辣椒剁碎後加入青檸汁調味,撈埋茄子、花生碎粒、長豆、蕃茄、蘿蔔絲、椰糖、羅望子醬等製材料,配上脆口炸軟殼蟹同鹹鴨蛋,係惹味又邪惡嘅前菜呀! 如果你鍾意食魚,柬埔寨蒸咖喱三文魚(HKD132)都係唔錯嘅前菜。三文魚混合羅勒、香茅、紅咖喱、檳榔葉與椰子忌廉等調味,用香蕉葉摺成嘅葉碗蒸熟,配埋獨特nahm pla prik醬汁,香料味幾濃郁。 想分量多啲可以點主菜之一嘅芭蕉葉叢林咖喱魚(HKD168),以薑黃、羅勒、辣椒等醃製澳洲盲曹魚柳,用香蕉葉包住香烤整成。唔點特製嘅“nam pla prik” 甜辣醬都好惹味,魚肉仲好嫩滑添。 印尼索多慢煮牛肋骨湯(HKD148)經慢煮嘅牛肋骨,加入雞蛋 、馬鈴薯、番茄、亞洲芹菜、青蔥、青檸等多種香料燉煮成索多湯(Soto),湯底濃郁,牛肉亦好軟腍。配有鹹蛋、蝦片同白飯,係經典嘅印尼飲食文化。 巴東椰奶燉牛肋骨(HKD168)係香港人熱點嘅菜式之一,呢道菜椰奶味濃郁,但唔會覺得好油膩。以印尼巴東醬醃製和牛牛肋骨,加入辣椒、椰漿、羅勒等印尼香料快炒,再以慢火燉煮,令和牛更加入味。 飯後當然要食甜品啦,芒果黑糯米飯配芒果雪糕(HKD78[後])唔止有新鮮芒果,特別配埋芒果雪糕特別滋味。越南焦糖布丁配咖啡冰沙(HKD78[右])焦糖布甸配上香濃咖啡味冰沙,特別有越南風味。少見啲嘅就有花生朱古力奶油芭菲(HKD78),灑上香脆朱古力花生同糖碎增加口感。 而雞尾酒必試Monsoon(HKD78),混合伏特加、熱情果、新鮮檸檬、辣椒、泰國青檸葉糖漿同啤酒調製,好有果酒嘅感覺。而New Wild East(HKD78)選用紅肉火龍果混合Nusa Cana Rum酒、Vermout白苦艾酒、新鮮青檸、自家製菠蘿汁和Angostura 苦酒調製而成,啱怕甜嘅朋友入口。   Monsoon 地址: 尖沙咀柯士甸道西1號ELEMENTS圓方1樓1045號舖 電話:2511 0100 營業時間:星期一至日:11:00-23:00

0

【鬧市秘藏露天餐廳似綠洲 咖喱燜鴨髀「泰」香滑】RUAM

依家出街食嘢都想搵間露天餐廳,主打泰國菜嘅RUAM雖然置身喺灣仔商廈,但大部分座位都係露天㗎,仲有唔少盆景令你感覺更加relax。呢度嘅主食惹味得嚟幾清新,配埋小食、雞尾酒同甜品真係歎到令人唔想走囉。 呢度嘅佈置俾人感覺好似去咗外地旅遊咁,高度通風嘅感覺係香港餐廳少見嘅。 餐廳一到週末就有Brunch(HKD248起)俾大家食得盡興又他條啲,其中呢味Pad Thai Kung泰式大蝦炒金邊粉(單點HKD148)仲好受歡迎添。雖然有三款醬俾大家自己加調味,但本身味道已經酸甜開胃,要加的話都係加辣。大蝦、花生碎豆干同芽菜分量都唔少,撈埋一齊食口感好豐富㗎。 如果散叫,一定要試炸魷魚鬚(HKD98)!大大條魷魚鬚沾上少量炸漿,微脆彈牙嘅口感令人好滿足。本身味道有啲辣,但蘸埋醬汁就更加辣,而且感覺幾juicy喎。 如果有三、四個人齊齊食,不妨試吓烤全鱸魚(HKD338/時價)。搽滿泰式香料嘅鱸魚用錫紙包好就入爐烤,質地嫩滑仲好多肉。配上加入新鮮香料特調嘅醬汁,酸辣之中有種好fresh嘅感覺。想再惹味啲的話,呢道菜亦可以揀炸嘅煮法 食泰國菜一定要有咖喱!紅咖喱荔枝燜鴨髀(HKD188)配上兩塊薄餅,蘸上香辣又滑身嘅紅咖喱汁,加埋帶有香烤味又燜到鹹香軟腍嘅鴨髀肉,係完美嘅配搭呀!而大大粒荔枝肉咬落好多汁,令你難得食咖喱會有種清新嘅感覺。 平時食泰式甜品都會諗起芒果糯米飯,但呢度一定要試椰絲湯圓(HKD68)!湯圓包住製過嘅椰絲,甜中帶鹹有咬口,連埋煮過嘅椰漿汁一齊食好滋味㗎。 想Chill吓又點少得雞尾酒呢?One Night In BKK(HKD88)以芒果、新鮮橙汁、龍舌蘭、薄荷葉等調製,再用辣椒抹杯邊。配上兩片同樣沾有辣椒嘅青芒果,一杯俾你有齊甜、酸、辣嘅味道。   RUAM 地址:灣仔莊士敦道60號J Senses1樓9號舖 電話:3160 8535 營業時間:星期一至五:11:30-15:00,17:00-23:00,星期六:11:30-23:00,星期日:11:30-22:00

0

【泰式半自助午餐任食沙律吧 主菜首選$88足料船麵】象屋泰國餐廳

要食得抵又多選擇?旺角象屋泰國餐廳嘅泰式半自助午餐一定啱你,自選泰式主菜(HKD88起)有9款,船麵、燒豬頸肉飯、肉眼扒等等都好受歡迎;仲包埋任食嘅鹹甜點泰式沙律吧,即刻睇吓有幾正啦! 餐廳環境都充滿泰式感覺,12:30左右就開始有食客嚟喇。 如果食半自助午餐,可以喺9款主菜之中揀1款,仲可以任食沙律吧長枱上約15款食物,有泰式木瓜大蝦沙律、椰汁糕、春卷、咖喱角等等。如果淨食沙律吧(HKD79)都可以,同半自助午餐一樣會跟杯茶或咖啡。 食得泰國菜梗係有牛肉船麵(HKD88),亦係9款主菜之中最抵嘅。牛腩同牛丸分量幾多,煮得好入味。湯底香濃唔會太鹹,麵仲好似粉絲咁嗦晒湯汁添。 如果想食炒麵,泰式雞肉金邊炒(HKD93)唔會炒到乾晒,幾香口惹味,唧埋青檸汁就更加濕潤易入口。雞肉大大粒但依然嫩滑,肉量都唔少添。 如果你鍾意食牛扒,不妨試吓少有嘅美國肉眼扒配薯菜及羅望子汁(HKD148)。肉眼扒烤焗後淋上酸甜惹味嘅羅望子汁,食晒都唔覺膩。加上炒到啱啱熟嘅椰菜仔,爽口得嚟幾fresh㗎。 如果食唔到午餐,呢度嘅晚市小炒、甜品同下午茶都一樣吸引。好似呢款辣椒膏炒大蜆(HKD148),肉質嫩滑彈牙冇咩沙,辣度適中惹味唔會蓋過蜆嘅鮮味。 不過香芒黑白糯米飯(HKD88)始終係泰式甜品首選,餐廳特別用透明外殼裝起大量椰絲同香甜多汁嘅芒果肉,打開外殼就會灑落黑白配嘅糯米飯,味道同打卡都係一流呀! 而星期六、日15:30-17:30新推嘅周末二人專享下午茶餐(HKD158)都同樣抵食。 兩碗椰香十足嘅青咖喱雞飯配上脆炸櫻花蝦、素春卷、蝦餅、一口芒果糯米飯、香甜嘅斑蘭撻同榴蓮味濃郁嘅榴蓮撻6款鹹甜小食;加上兩杯咖啡或茶,啱晒鍾意香口食物嘅你,食晒都飽肚㗎。   象屋泰國餐廳 地址:旺角太子道西193號MOKO新世紀廣場4樓453號舖 電話:2386 6882 營業時間:星期一至日:11:00-22:00

0

【東京濃厚雞湯拉麵登陸尖沙咀 雞髀肉叉燒配雞白湯底】麺屋 武一

又一間日本拉麵登陸尖沙咀喇,今次係東京新橋起家嘅麺屋 武一,招牌雞白湯底濃度達10度,係用新鮮雞隻熬製13個鐘,再以雞骨架、洋蔥、蒜頭、昆布等材料煮成嘅清雞湯稀釋,但口感仍然好creamy。為咗配合素食客人口味,香港特別推出用15種新鮮蔬菜熬製湯底嘅蔬菜拉麵,加埋濃厚系雞湯底同清湯系雞湯底有三個系列,共10款拉麵俾大家揀。想再食得健康啲,仲有低糖質蒟蒻麵(加HKD10)可以選擇添,即係睇吓邊款麵啱你啦! 廚房開方式設計,睇住師傅煮麵特別餓囉。 呢度嘅叉燒用雞髀肉整成,口感嫩滑多汁;以和風高湯、昆布、特選醬油等材料熬製嘅湯汁低溫炆煮,都幾入味喎。 濃厚系雞湯底係呢度嘅招牌系列,其中濃厚醬油拉麵(HKD88[左上])嘅湯底用醬油加濃厚雞湯混合而成;濃厚鹽味拉麵(HKD88[右上])就以鹽味雞湯帶出雞湯嘅鮮味同香醇;濃厚味噌拉麵 (HKD88[左下])混合咗日本出產嘅赤味噌同白味噌再加入雞湯,味道會濃郁啲,呢款仲可以揀更惹味嘅濃厚辣味噌拉麵(HKD95[右下])。 清湯系雞湯底有兩款拉麵,東京醬油拉麵(HKD78[左])嘅湯底以雞隻同雞骨架熬成嘅清湯加醬油而成,鮮甜中帶點鹹香;鹽雞拉麵(HKD78[右])湯底就係清新嘅雞湯,味道香甜清爽。 為香港特別推出嘅蔬菜湯底就有四款,鹽味蔬菜清湯拉麵(HKD80[左上])同醬油蔬菜清湯拉麵(HKD80[右上])嘅湯底冇加肉類,睇落清淡但實際充滿蔬菜嘅甜味。不過雞湯有濃厚系列,蔬菜湯又點可以冇呢?!鹽味濃厚蔬菜拉麵(HKD85[左下])同辣味濃厚蔬菜拉麵(HKD90[右下])湯底就用咗洋蔥、紅蘿蔔、椰菜、粟米、菇、昆布、蒜頭、薑、薯仔等十幾種蔬菜打成蓉加入湯底,完全係一個蔬菜濃湯拉麵囉! 呢度仲有唔同嘅小食,鰻魚串(HKD40/串)肉厚肥美,外皮燒到帶點焦香,係幾惹味嘅。 薯仔沙律(HKD28)有埋半隻溏心蛋,同薯仔撈埋一齊食會更滑。   麺屋 武一 地址:尖沙咀棉登徑13-15號白蘭軒道3號棉登大廈地下A舖 電話:2191 3570 營業時間:星期一至日:11:30-23:30(截單時間:23:00)

0

【元朗熱爆船麵日賣三百幾碗 足料牛骨湯底香到暈】阿叔泰麵

最近喺元朗人氣急升,牛骨湯船麵紅到賣斷市,要休店三日調整供應量嘅阿叔泰麵依家專注於船麵款,慢慢先再推出其他麵類。點解揀做船麵?負責人之一倫哥就話:「大廚阿揚去泰國學廚半年,加上太太係泰國人,識整家庭船麵,設計menu嘅時候俾咗好多意見我哋。所以九成食材都搵到泰國當地嘅靚貨源。」。不過點解唔揀元朗市中心啲嘅位置開舖呢?「我哋都想吸引其他區嘅客入嚟試,冇咁近市中心反而方便啲人泊車。其實冇諗到咁多人支持,重開之後試過一日賣三百幾碗,係之前嘅double。」連泊車位都考慮埋,咁裝修同食物更加以客為先啦! 呢度冇收加一,幾抵食。不過想抵食又抵飲可以Like & Share阿叔泰麵嘅Facebook,攞埋杯贈飲。 既然船麵係牛骨湯底,咁就先試牛肉船麵(HKD58)。湯底除咗用大量牛骨煲12個鐘之外,仲加入八角同冰糖等材料,唔怪得未食已經聞到陣香氣,味道層次仲幾豐富添。有3件厚切牛腩粒、3粒牛丸、炸豬皮同通菜,都幾多料。牛腩粒真係好正,炆得腍又仍然有咬口,仲幾有肉香添。夾埋濃味得嚟又唔會過鹹嘅湯底,係perfect match呀!麵就有四款,米粉、金邊粉、泰式河粉同粉絲,全部都係泰國當地食材嚟㗎!呢款粗河粉好滑嘟嘟,厚度係港式炒河粉同幼河粉之間,都唔錯,而且夾咗幾次影相都唔會爛到碎濕濕。碗麵做返港人正常食一碗嘅分量,女仔食可能會飽啲啲添。 有牛就有豬,豬肉船麵(HKD52)都幾多人食,同牛肉船麵嘅分別就係轉用豬肉片同豬肉丸。豬肉片都幾大片,不過肉丸質感就冇牛丸咁彈牙,不過呢個麵冇肥肉,感覺冇咁滯。泰式米粉好幼身,而且唔會浸到發脹,由開始食到尾口感都唔會點變㗎。 泰式牛扒沙律(HKD52)雖然係凍食,但牛扒依然嫩滑有肉汁喎,仲有啲爽口筋腱位,質感唔錯。呢款喺餐牌上有2隻辣椒,如果食到譚仔三少辣嘅朋友會覺得呢份都有啲辣,不過接受到嘅。 抵食推介要數3式雞翼拼盤(HKD58),有齊酸辣凍雞翼、香茅魚露雞翼、紅咖喱雞翼一共9隻。Size正常,唔係特別細嗰啲喎。雖然呢三款個名好似重口味咁,但其實調味都算啱啱好。 想飲嘢不妨試吓香茅斑蘭特飲(HKD24),飲完感覺喉嚨好fresh,香茅同斑蘭味道又融合到。想啤一啤亦得,有象啤(HKD22)、勝獅啤(HKD25)同豹王啤(HKD22)。   阿叔泰麵地址:元朗西菁街20號益輝大廈地下3號舖電話:2887 3269營業時間:星期一至五:11:30-15:30,17:30-22:00;星期六、日公假假期:11:30-22:00

0

【網傳「照騙」炸雲吞超誇張 小編實測船麵先至伏】伏務台

小編之前見到有人share呢個「炸雲吞皮」,嘩,原來有餡㗎?乜粒肉仔咁細粒嘅?再睇真啲,餐牌上嘅炸雲吞入面嚿餡好大㗎噃!因咩解究用料慳咁成咁呢?小編決定一探究竟喇! 呢間泰麵膳喺旺角同尖沙咀都有分店,望落門面企企理理,齋睇外表伏味唔算濃嘅。 小編開頭諗住淨係試個炸雲吞,不過又覺得有啲餓,咁就順便試埋個招牌船麵啦!跟手上網睇睇評價,原來都有唔少網友對佢哋嘅船麵有啲意見喎…… 首先上枱係呢杯跟餐上嘅凍檸茶,小編開頭幾surprise凍飲唔需要額外加錢喎,不過飲落口基本上係冇任何檸檬味,紅茶味中仲有淡淡嘅青檸味成陣清潔劑嘅味道飄散,令人好不安……小編試伏多時,真係冇諗過連餐飲都中伏,仲要係大伏。 呢個就係牛肉丸船麵(HKD48)喇,下午茶價錢,其實都偏貴。湯底好深啡,質地偏濃稠,似係慢火熬製,聞落都幾香泰國特色嘅香料味。飲一啖覺得有啲太鹹,第二啖竟然飲到苦味?跟住食啖麵睇吓會唔會好少少啦,嘩,啲麵黐埋一餅嘢咁,要夾硬用兩隻筷子叉開先得。麵係幾掛湯嘅,不過質地又未免太黏喇!頭先聞到嘅香味飲落竟然蕩然無存,好似食緊一大嚿超鹹嘅粉團咁,完全唔知自己食緊咩! 麵唔好食,試吓啲牛肉丸啦。就咁睇外表比較「膠」,咬落完全冇牛味,係一粒正常嘅冇味丸囉。 主角炸雲吞(HKD12/跟下午茶餐)終於上枱喇!望落好似冇網友上次食到嗰嚿「超迷你餡炸雲吞皮」咁誇張喎,通常食炸雲吞,皮同餡比例都係皮比較多少少嘅。 咬咗一啖,嚿肉又真係薄如紙咁……雖然體積變大咗少少,但嚿肉薄到食咗落肚都唔係好覺,同埋個雲吞凍冰冰好似食緊冷盤咁!所以結論係,如果大家下次真係好想食「炸雲吞皮」,先好嗌呢個炸雲吞囉!   小編伏氣:今次伏得幾平均,每樣嘢包括埋餐飲都中伏,船麵湯底苦得嚟又鹹,啲粉一餅嘢咁,小編真係食唔落;凍檸茶又有陣清潔劑味;咁最正常係咪個炸雲吞?起碼你當自己食緊炸皮嘅話,其實都幾香口嘅,個甜酸醬都正常,不過嚿嘢都係凍囉! 入伏點:泰麵膳 入伏價:牛肉丸船麵+凍檸茶(HKD48) 炸雲吞(HKD12) 中伏by #肥仔文 美術by #車雲 攝影by #肥仔文 《伏務台》星期一伏務大眾,歡迎各界報料。

0

【黃竹坑地踎泰菜CP值爆燈 滿分青咖喱牛腩撈汁送飯】街霸

暑假唔經唔覺又到尾聲,今日街霸介紹呢間街市餐廳都係啱啱放完暑假喎,就係黃竹坑南朗道街市嘅青咖喱屋!唔好睇個名以為好普通,食物CP值同水準爆晒燈㗎! 環境同一般街市餐廳冇咩分別,最搞笑係每張枱上面都會放一枝假玫瑰花,搞到懶浪漫啫!望住枝花差啲唔記得自己喺街市食緊嘢囉! 其中一道招牌菜就係泰式海南雞飯(HKD48/午市)。呢個海南雞飯無論飯同雞嘅分量都好驚人,2個人share絕對冇問題。雞大嚿得嚟皮嫩肉滑超新鮮。唯一美中不足就係當日油飯賣晒,如果唔係就perfect喇! 啲雞賣相真係超靚仔,嚿嚿都油光十足,大件夾抵食,女仔食真係可以帶定個盒打包一半食多餐,CP值爆燈! 食泰國嘢又點少得泰式冬蔭功湯(HKD58/細)?又係超足料,大蝦大隻又新鮮,再望吓啲湯,唔係水汪汪㗎!海鮮同香料嘅精華喺晒湯入面,每啖超香濃惹味,送飯啱晒!順帶一提,呢個湯幾辣吓,唔太食得辣嘅朋友可能要問吓店員有冇得小辣喇! 話明係青咖喱屋,點都要試「青咖喱」啦!泰式青咖喱牛腩(HKD68)必食呀!又係超大份,咖喱味道濃而不鹹,唔係好食得出味精咁。撈汁送飯是常識吧,唔怕同你講,街霸食呢碗咖喱食到問店員加飯……你就知道呢個汁真係出事喇!好味到停唔到口,牛腩炆得夠晒腍,完全唔使用牙「齒」開啲肉搞到攝晒落牙隙咁,又夠晒入味。呢個我俾滿分! 食到有啲口渴,叫咗呢杯番石榴沙冰(HKD30)。由食物到飲品嘅分量真係從一而終咁……大份。呢杯沙冰大到嚇親我,凸咗出嚟嘅沙冰同杯裡面嘅分量差唔多,即係等於一般餐廳分量嘅double喎,30蚊真係超抵囉!味道甜得嚟唔係糖漿嘅假甜,係番石榴本身淡淡嘅果香味。唯一有啲無奈係實在太大杯,飲得唔夠快就會瀉出嚟,所以店員事先已準備好一隻碟仔,等你唔使流到周圍都係,都幾貼心嘅,哈哈! 街霸最愛:其實今集真係難以抉擇,不過必食嘅係青咖喱牛腩同埋番石榴沙冰。街市都食到高級泰菜嘅水準,價錢仲要超親民貼地。如果2個女仔去食,嗌一個飯一杯沙冰加個小食已經夠飽!無錯,連嘢飲都淨係叫一杯好喇……街霸上次同朋友一人一杯真係飲唔晒㗎! 青咖喱屋 地址:黃竹坑南朗山道熟食市場1樓5號舖 電話:6273 2861 營業時間:星期一至五:11:45-14:30;18:00-22:00;星期六:不定

0

【清邁拜師學藝煮泰菜 開店賣地道船麵$12食到】珍泰In泰式車仔麵

愈來愈多餐廳做泰式船麵,細細碗又惹味,唔少客人唔覺唔覺又一碗。連大角咀嘅珍泰In泰式車仔麵老闆娘Maggie,都因為喺泰國一試愛上船麵嘅味道,放棄高薪厚職嘅物流工作,去清邁拜師學藝,返嚟就同屋企一齊經營泰菜餐廳。 雖然係香港人開,但店內都充滿泰式裝潢。由牆紙到掛飾嘅大象圖案,都好有泰國風土氣息㗎! Maggie專登去清邁學呢碗泰式豬肉丸迷你船河(HKD12),用唔同香料製成正宗嘅滷水湯底。雖然係迷你,但材料都唔少㗎,有豬肉丸(或牛肉丸二揀一)、豬紅、豬膶同蘿蔔。每日14:30-18:00以HKD12優惠價限量供應,賣完即止,食兩、三碗做下午茶都抵呀! 湯麵嚟講,椰汁雞湯鮮墨魚粉麵(HKD48)都幾吸引。爽口彈牙嘅鮮墨魚唔多地方有用呢款餸,加埋椰香十足嘅湯底,再咬啖嫩滑雞肉同大冬菇,口感同味道層次都好豐富。 金牌雙髀飯(HKD48/下午茶)有齊嫩滑嘅招牌海南雞同泰式滷水豬髀,配埋黃油飯好香口。如果晚市食就HKD65,會送飲品同椰汁燉桃膠,幫你潤埋喉先走呀! 泰國菜中仲有必食嘅香葉肉碎煎蛋飯(HKD50),先篤爆太陽蛋嘅蛋黃同飯撈勻,口感會滑啲。加埋用辣椒炒香嘅豆角同肉碎,簡單得嚟勁惹味。 泰式咖喱之中,黃咖喱嘅辣最多人接受到。呢款黃咖哩牛肋條飯(HKD65)煮到牛肋好香軟,咖哩汁撈飯真係好正。如果想辣啲可以試紅咖喱,都係貴少少HKD68啫。 大家食泰國菜成日叫生蝦同蝦餅當小食,但唔好忘記仲有咖喱蟹呀!呢款咖喱炒軟殼蟹(HKD98)必須趁熱食,因為軟殼蟹炸完再用咖喱汁炒會易變腍,想保留到多啲脆口感覺就要食快啲喇。   珍泰In泰式車仔麵 地址:大角咀大全街26號地下 電話:2696 9928 營業時間:星期一至日:11:00-22:30

0

【天瑞街市有條小食街 掃盡泰川台美食話咁易】街霸

上星期街霸同你去完大埔墟街市尋寶,今次去邊呢?「天水圍好似冇啖好食㗎喎!」,呢句嘢講真街霸成日都聽到,話晒天水圍咁多個商場輪住翻新,翻新完之後開晒啲連鎖貴餐廳,街坊真係冇咩選擇㗎!不過咁,街霸覺得大家可以試吓去天瑞街市出面嘅小食街度搵食,除咗有港式格仔餅、燒賣魚蛋之外,仲有四川嘢、泰國嘢同埋台灣手抓餅添!今次一於一個街市食勻幾國菜啦! 呢條小食街由晏晝2-3點開到凌晨1-2點㗎,取代咗以前不定期會喺天瑞輕鐵站隔離出現嘅小販檔咁喎!一字排開嘅小食店感覺都幾乾淨企理,不過大多數係小店經營,人手唔會太多,宵夜時段要排吓隊喇! 呢間泰好味顧名思義就係食泰國嘢,街霸見佢個餐牌都有幾多選擇嘅,除咗比較輕食嘅炸春卷、扎肉沙律之外,仲有炒金邊粉、冬蔭功套餐(包白飯)呀、椰汁糕呀咁,幾多選擇㗎。 街霸試咗呢個豬頸肉沙律(HKD40)喇,沙律嚟講好似有少少貴,但係你睇吓,勁足料呀!佢啲豬頸肉有種蜜糖烤過嘅微炭燒味,夠晒惹味。沙律除咗生菜之外仲配有蕃茄、紅蘿蔔絲同大蔥,味道帶酸甜,清新得嚟又中和到豬頸肉嘅油膩感,正呀!呢盒嘢兩個人些牙啱啱好,食完唔會太飽,又可以再掃過! 如果你同街霸一樣鍾意食辣嘢,四川嘢啱晒啦!川味軒上至涼拌豬耳下至麻辣燙都一應俱全,今次街霸就叫咗重慶酸辣粉(HKD22)同埋拍青瓜(HKD25),唔好睇少呢兩樣嘢,俗語都有話,最簡單嘅嘢往往係最考工夫嘅,係咪先? 街霸叫咗小辣,望落去唔算滿江紅咁樣,不過都清楚見到粒粒辣椒碎(定花椒?),粉係粗身嘅紅薯粉,同傷心酸辣粉嗰種一樣。飲落個湯唔會好重口味,但辣味都夠嘅!不過我諗如果平時食譚仔十小辣嘅朋友仔就可能要叫姨姨再輕手啲喇,因為佢個小辣都有啲啲分量嘅,你當5小辣咁上下啦。22蚊嚟講算幾大碗,女仔實夠飽!仲可以加餸添! 拍青瓜其實都算幾驚喜,因為街霸曾經喺啲連鎖舖頭食過,一係太油一係就冇乜味,但呢個拍青瓜配料都好多,面頭嘅黃金豆同蔥花多到睇唔到青瓜咁滯。將青瓜同底下嘅秘製辣油撈好之後嗰種酸辣味道真係好刺激嗅覺呀,正!青瓜超級爽口,辣味有層次,吞落肚嘅時候嗰種麻辣先慢慢滲出嚟,好過癮!鍾意食辣嘅朋友唔好錯過!同酸辣粉一樣,呢個拍青瓜嘅小辣都唔嘢少,大家因應自己食辣嘅程度執生喇! 如果想食啲冇咁heavy嘅嘢,可以選擇呢間賣台灣手抓餅嘅日日店,黃金餅底(HKD10)另外再加配料上去,分別有基本嘅芝士(HKD5)、煙肉(HKD5)、火腿(HKD5)、煙鴨胸(HKD5),另外仲有啲fusion選擇,例如煉奶肉鬆(HKD10),不過街霸今日就唔試啲咁「新奇」嘢喇,留返你哋試完話俾我知啦! 街霸試咗黃金手抓餅,加咗芝士同火腿。有少少蔥油味幾香口,仲夾住啲芝士醬,問返老闆先知,原來「黃金」就係指啲芝士醬。哎吔,早知就唔加芝士加過第二樣啦!不過唔緊要,試啖先。咦,芝士味果然好濃,咬落口都有啲拉絲嘅感覺,不過雙重芝士感覺有啲啲膩喇! 除咗以上三間,隔離仲有間賣港式魚蛋燒賣、印尼撈同埋糖水舖㗎,下次去開濕地公園記住喺天瑞站落車試吓喇! 街霸最愛:豬頸肉沙律毫無疑問係街霸心目中嘅no.1呀,料多又好食,食完想翻兜添呀!(不過真係有啲遠……) 泰好味 地址:天水圍天瑞邨街市T13號舖 電話:無 營業時間:不定 川味軒 地址:新界天水圍天瑞邨街市T64號 電話:無 營業時間:10:00-01:30 日日店 地址:新界天水圍天瑞邨街市T52號 電話:無 營業時間:不定

0

【赤柱尋獲高質親民美食 巷中歎正宗泰越料理】赤柱中泰美食餐廳

放假想悠閒啲,不妨去赤柱市集內街後巷嘅赤柱中泰美食餐廳。呢度別具風味,師傅係泰國人、老闆娘係越南人,所以佢哋嘅泰、越菜式都好正宗,食品種類仲好多添! 午餐日日唔同,出菜速度快,環境仲好開揚闊落,有二人至十幾人嘅座位。 泰式豬手飯(HKD50)去咗骨,好方便!豬手分量都幾多,配埋酸菜同滷水蛋,口味幾清新。 青咖喱豬肉飯(HKD56)偏甜,椰子味比較重,但好開胃囉!豬肉入味又有咬口,撈飯食真係忍唔住想添飯! 紅咖喱牛肉飯(HKD56)相對青咖喱辣啲啲,牛肉好嫩滑,煮得啱啱好。 越南式火車頭湯河(HKD52)有新鮮牛丸、牛肉、牛筋、牛柏葉同牛腱 ,加埋超清甜湯底,可以一路食一路飲湯! 辣湯海鮮湯烏冬(HKD52)可以揀辣湯或清湯,但小編就推介辣湯喇,因為配埋海鮮嘅鮮甜真係perfect match!加上烏冬吸收晒辣湯嘅味道,好濃郁! 泰式小食拼盤(HKD108)有豬頸肉、蝦餅、春卷同無骨鳳爪,絕對滿足有選擇困難症嘅朋友!豬頸肉煎得好香脆可口,日日賣斷市㗎!蝦餅都係小編個人推介,相比出面食嘅更加彈牙有口感!仲有呢度嘅晚餐主打泰越式私房菜,可以按你嘅喜好或由廚師發辦。   赤柱中泰美食餐廳  地址:赤柱赤柱大街52-56號地下 電話:2813 7998 營業時間:星期一至五及日:07:30-17:30(星期六休息)