Tagged: 泰國菜

0

【清邁拜師學藝煮泰菜 開店賣地道船麵$12食到】珍泰In泰式車仔麵

愈來愈多餐廳做泰式船麵,細細碗又惹味,唔少客人唔覺唔覺又一碗。連大角咀嘅珍泰In泰式車仔麵老闆娘Maggie,都因為喺泰國一試愛上船麵嘅味道,放棄高薪厚職嘅物流工作,去清邁拜師學藝,返嚟就同屋企一齊經營泰菜餐廳。 雖然係香港人開,但店內都充滿泰式裝潢。由牆紙到掛飾嘅大象圖案,都好有泰國風土氣息㗎! Maggie專登去清邁學呢碗泰式豬肉丸迷你船河(HKD12),用唔同香料製成正宗嘅滷水湯底。雖然係迷你,但材料都唔少㗎,有豬肉丸(或牛肉丸二揀一)、豬紅、豬膶同蘿蔔。每日14:30-18:00以HKD12優惠價限量供應,賣完即止,食兩、三碗做下午茶都抵呀! 湯麵嚟講,椰汁雞湯鮮墨魚粉麵(HKD48)都幾吸引。爽口彈牙嘅鮮墨魚唔多地方有用呢款餸,加埋椰香十足嘅湯底,再咬啖嫩滑雞肉同大冬菇,口感同味道層次都好豐富。 金牌雙髀飯(HKD48/下午茶)有齊嫩滑嘅招牌海南雞同泰式滷水豬髀,配埋黃油飯好香口。如果晚市食就HKD65,會送飲品同椰汁燉桃膠,幫你潤埋喉先走呀! 泰國菜中仲有必食嘅香葉肉碎煎蛋飯(HKD50),先篤爆太陽蛋嘅蛋黃同飯撈勻,口感會滑啲。加埋用辣椒炒香嘅豆角同肉碎,簡單得嚟勁惹味。 泰式咖喱之中,黃咖喱嘅辣最多人接受到。呢款黃咖哩牛肋條飯(HKD65)煮到牛肋好香軟,咖哩汁撈飯真係好正。如果想辣啲可以試紅咖喱,都係貴少少HKD68啫。 大家食泰國菜成日叫生蝦同蝦餅當小食,但唔好忘記仲有咖喱蟹呀!呢款咖喱炒軟殼蟹(HKD98)必須趁熱食,因為軟殼蟹炸完再用咖喱汁炒會易變腍,想保留到多啲脆口感覺就要食快啲喇。   珍泰In泰式車仔麵 地址:大角咀大全街26號地下 電話:2696 9928 營業時間:星期一至日:11:00-22:30

0

【天瑞街市有條小食街 掃盡泰川台美食話咁易】街霸

上星期街霸同你去完大埔墟街市尋寶,今次去邊呢?「天水圍好似冇啖好食㗎喎!」,呢句嘢講真街霸成日都聽到,話晒天水圍咁多個商場輪住翻新,翻新完之後開晒啲連鎖貴餐廳,街坊真係冇咩選擇㗎!不過咁,街霸覺得大家可以試吓去天瑞街市出面嘅小食街度搵食,除咗有港式格仔餅、燒賣魚蛋之外,仲有四川嘢、泰國嘢同埋台灣手抓餅添!今次一於一個街市食勻幾國菜啦! 呢條小食街由晏晝2-3點開到凌晨1-2點㗎,取代咗以前不定期會喺天瑞輕鐵站隔離出現嘅小販檔咁喎!一字排開嘅小食店感覺都幾乾淨企理,不過大多數係小店經營,人手唔會太多,宵夜時段要排吓隊喇! 呢間泰好味顧名思義就係食泰國嘢,街霸見佢個餐牌都有幾多選擇嘅,除咗比較輕食嘅炸春卷、扎肉沙律之外,仲有炒金邊粉、冬蔭功套餐(包白飯)呀、椰汁糕呀咁,幾多選擇㗎。 街霸試咗呢個豬頸肉沙律(HKD40)喇,沙律嚟講好似有少少貴,但係你睇吓,勁足料呀!佢啲豬頸肉有種蜜糖烤過嘅微炭燒味,夠晒惹味。沙律除咗生菜之外仲配有蕃茄、紅蘿蔔絲同大蔥,味道帶酸甜,清新得嚟又中和到豬頸肉嘅油膩感,正呀!呢盒嘢兩個人些牙啱啱好,食完唔會太飽,又可以再掃過! 如果你同街霸一樣鍾意食辣嘢,四川嘢啱晒啦!川味軒上至涼拌豬耳下至麻辣燙都一應俱全,今次街霸就叫咗重慶酸辣粉(HKD22)同埋拍青瓜(HKD25),唔好睇少呢兩樣嘢,俗語都有話,最簡單嘅嘢往往係最考工夫嘅,係咪先? 街霸叫咗小辣,望落去唔算滿江紅咁樣,不過都清楚見到粒粒辣椒碎(定花椒?),粉係粗身嘅紅薯粉,同傷心酸辣粉嗰種一樣。飲落個湯唔會好重口味,但辣味都夠嘅!不過我諗如果平時食譚仔十小辣嘅朋友仔就可能要叫姨姨再輕手啲喇,因為佢個小辣都有啲啲分量嘅,你當5小辣咁上下啦。22蚊嚟講算幾大碗,女仔實夠飽!仲可以加餸添! 拍青瓜其實都算幾驚喜,因為街霸曾經喺啲連鎖舖頭食過,一係太油一係就冇乜味,但呢個拍青瓜配料都好多,面頭嘅黃金豆同蔥花多到睇唔到青瓜咁滯。將青瓜同底下嘅秘製辣油撈好之後嗰種酸辣味道真係好刺激嗅覺呀,正!青瓜超級爽口,辣味有層次,吞落肚嘅時候嗰種麻辣先慢慢滲出嚟,好過癮!鍾意食辣嘅朋友唔好錯過!同酸辣粉一樣,呢個拍青瓜嘅小辣都唔嘢少,大家因應自己食辣嘅程度執生喇! 如果想食啲冇咁heavy嘅嘢,可以選擇呢間賣台灣手抓餅嘅日日店,黃金餅底(HKD10)另外再加配料上去,分別有基本嘅芝士(HKD5)、煙肉(HKD5)、火腿(HKD5)、煙鴨胸(HKD5),另外仲有啲fusion選擇,例如煉奶肉鬆(HKD10),不過街霸今日就唔試啲咁「新奇」嘢喇,留返你哋試完話俾我知啦! 街霸試咗黃金手抓餅,加咗芝士同火腿。有少少蔥油味幾香口,仲夾住啲芝士醬,問返老闆先知,原來「黃金」就係指啲芝士醬。哎吔,早知就唔加芝士加過第二樣啦!不過唔緊要,試啖先。咦,芝士味果然好濃,咬落口都有啲拉絲嘅感覺,不過雙重芝士感覺有啲啲膩喇! 除咗以上三間,隔離仲有間賣港式魚蛋燒賣、印尼撈同埋糖水舖㗎,下次去開濕地公園記住喺天瑞站落車試吓喇! 街霸最愛:豬頸肉沙律毫無疑問係街霸心目中嘅no.1呀,料多又好食,食完想翻兜添呀!(不過真係有啲遠……) 泰好味 地址:天水圍天瑞邨街市T13號舖 電話:無 營業時間:不定 川味軒 地址:新界天水圍天瑞邨街市T64號 電話:無 營業時間:10:00-01:30 日日店 地址:新界天水圍天瑞邨街市T52號 電話:無 營業時間:不定

0

【赤柱尋獲高質親民美食 巷中歎正宗泰越料理】赤柱中泰美食餐廳

放假想悠閒啲,不妨去赤柱市集內街後巷嘅赤柱中泰美食餐廳。呢度別具風味,師傅係泰國人、老闆娘係越南人,所以佢哋嘅泰、越菜式都好正宗,食品種類仲好多添! 午餐日日唔同,出菜速度快,環境仲好開揚闊落,有二人至十幾人嘅座位。 泰式豬手飯(HKD50)去咗骨,好方便!豬手分量都幾多,配埋酸菜同滷水蛋,口味幾清新。 青咖喱豬肉飯(HKD56)偏甜,椰子味比較重,但好開胃囉!豬肉入味又有咬口,撈飯食真係忍唔住想添飯! 紅咖喱牛肉飯(HKD56)相對青咖喱辣啲啲,牛肉好嫩滑,煮得啱啱好。 越南式火車頭湯河(HKD52)有新鮮牛丸、牛肉、牛筋、牛柏葉同牛腱 ,加埋超清甜湯底,可以一路食一路飲湯! 辣湯海鮮湯烏冬(HKD52)可以揀辣湯或清湯,但小編就推介辣湯喇,因為配埋海鮮嘅鮮甜真係perfect match!加上烏冬吸收晒辣湯嘅味道,好濃郁! 泰式小食拼盤(HKD108)有豬頸肉、蝦餅、春卷同無骨鳳爪,絕對滿足有選擇困難症嘅朋友!豬頸肉煎得好香脆可口,日日賣斷市㗎!蝦餅都係小編個人推介,相比出面食嘅更加彈牙有口感!仲有呢度嘅晚餐主打泰越式私房菜,可以按你嘅喜好或由廚師發辦。   赤柱中泰美食餐廳  地址:赤柱赤柱大街52-56號地下 電話:2813 7998 營業時間:星期一至五及日:07:30-17:30(星期六休息)

0

【$98泰式邊爐任飲任食 無限時Encore配船河湯底】倪姐泰國美食

食泰國菜一定識去九龍城揾食,今次帶大家去倪姐泰國美食歎HKD98無限時任飲任食泰式邊爐,大家準備好個胃就行喇! 泰式特色迷你火鍋湯底正價HKD58,任食就HKD98都幾抵吖,仲有4款湯可以揀。 冬蔭功湯唔算好辣,充滿泰式香料味,仲有菌類一齊煲,幾足料。 泰式酸辣湯就鹹味較重,一樣有菌類一齊煲,如果配金邊粉吸湯就勁正! 船河湯唔係好油,酸辣嘅比例差不多,但未必啱港人口味。 泰式清湯係4款中最淡味,啱晒鍾意打邊爐又唔想咁熱氣嘅朋友。 食物包一份:肥牛或豬肉(二揀一)、泰式牛肉丸、豬肉丸、魚蛋、青口。食物都幾新鮮,冇咩雪味,肉質正常唔會霉;生菜、粉絲、金邊粉可以任食。 任食甜品有泰式椰汁糕味道好清香,底層係鋪滿嘅西米同粟米粒! 芒果沙冰(右)用新鮮呂宋芒打出嚟,真係好香甜!另外有青檸冰(左),兩款都係任飲。   倪姐泰國美食 地址:九龍城侯王道9號地下A舖 電話:2620 0188 營業時間:星期一至日:11:00-23:00 供應時間:星期一至四晚市

0

【泰越料理雙重滋味 大堆頭咖喱海鮮大餐】V.Thai泰越概念

最近香港愈開愈多泰國同越南餐廳,其實泰、越兩邊嘅食物款式同口味都好相似,一樣咁受港人歡迎啦!咁啱銅鑼灣嘅V.Thai泰越概念就係將兩者結合,主打泰越混合料理,既有泰菜嘅熱情又有越菜嘅清新,創造出一系列充滿東南亞風味嘅美食,甜酸苦辣鹹鮮,味味俱全,唔使煩食泰菜定越菜啦! 泰越拼盤(HKD128)拼盤入面有四款泰越小食,包括:大叻手打蝦餅、一口春卷、扎肉炸蝦片同香茅蝦糕單骨雞翼,款款都香脆可口,仲可以配埋充滿泰越風味嘅魚露或者甜酸醬,食落好開胃!想一次過試到唔同嘅泰越小食,呢個拼盤啱晒你。 三味醬蝦球伴鵝肝(HKD168)作為鵝肝愛好者嘅小編,見到呢道菜真係心心眼。底層用咗酥脆嘅鍋巴,最上一層係爽口嘅蝦球,中間就係肥美嘅鵝肝,見到都流晒口水喇!仲要有三重口感配合三味醬嘅 甜、酸、辣,多重滋味喺齒頰間互相碰撞,好正呀! 石鍋蟹肉五榖炒飯(HKD98)食完小食就輪到主菜啦!充滿質感同層次嘅健康五榖炒飯,加上幼嫩蟹肉增添鮮味,味道相對嚟講比較淡,不過就夠晒健康,五榖嘅飯香味令人一試難忘。 咖喱皇金瓜海鮮大選(HKD388)呢個送飯又係一流,散發誘人香氣嘅咖喱,鍋入面充滿住鮮甜南瓜同多款唔同嘅海鮮,有原隻肉蟹、大蝦同鮮魷等。各種海鮮吸收晒咖喱嘅味道,食落除咗好鮮甜,仲有少少嘅刺激辣味,又幾過癮喎! V.Thai泰越概念 地址:銅鑼灣渣甸街66號Aura on Pennington 3樓 電話:2153 3933 營業時間:星期一至日:11:30-22:30

0

【人氣過江龍新推tea set 平歎泰國宮廷料理】Blue Elephant

平時食開泰國菜都覺得食嚟食去都係嗰啲,冇嚟新意?唔緊要,今次泰國過江龍Blue Elephant新推出Afternoon High Tea Set(HKD168/2)包埋茶/咖啡,好抵喎!主打泰國宮廷料理,等你一次過食勻多款泰國美食。 呢個Tea Set用咗鳥籠嚟裝住,外表夠吸睛。主廚就大推藍色雀仔餃子,用咗蝶豆花嚟做外皮,全部人手製造,宮廷料理果然唔同啲喎!小編就覺得呢個Tea Set每款料理都有驚喜,好似個朱古力brownie入面竟然加咗辣椒,食落又甜又辣,估佢唔到呀!另外,個炸蝦都大有來頭㗎,係比利時創辦人諗嘅,將比利時嘅炸物配上泰國口味,入面加咗青咖喱同芝士,仲有埋原隻蝦肉,好滋味! 除咗Tea Set好食,其他菜式都一樣咁正。先講沙律,椰奶青檸汁帶子沙律(HKD168)用上椰汁同青檸汁去慢煮帶子,帶子已經半熟,食落一樣好鮮味,再加埋蛇皮果同蓮霧一齊食,夠晒醒胃,好refreshing添!主廚話唔想全部食物都係辣,就專登整個唔辣嘅,好食到停唔到口呀! 呢個蒸西米馬可配冬蔭功泡沫(HKD58)係泰國fusion菜,入面嘅餡用上果仁、肉碎同甜果漿慢煮,出面再用西米皮包住拎去蒸,再打上冬蔭功味嘅氣泡,功夫唔少㗎,食落甜甜辣辣又夠煙韌,呢味絕對喺其他泰國舖食唔到㗎! 到主角出場,泰式黃咖喱炒肉蟹(HKD528)醬汁全部人手製造,醬汁夠晒鮮甜,用嚟撈飯一流!食多兩碗都仲得!啲蟹有成斤幾重,食落啖啖都係肉,好滿足啫! 最後點少得甜品?黑白糯米飯配泰國芒果(HKD88)用上泰國水仙芒果,食落有陣花香味,好清甜,而且糯米飯上面啲椰絲係翻炒過,椰子味濃,仲有黑白糯米,配上椰汁同芒果汁,流晒口水啦! Blue Elephant 地址:尖沙咀廣東道3-27號海港城港威商場3樓3303號舖 電話:2328 2328 營業時間:星期一至日:11:00-22:30

0

【食得健康啲啦 專家炮製有營泰菜】Café Siam

成日都話要食得健康,如果有營養專家設計埋餐單,梗係食得開心又放心啦!好似今次Café Siam搵嚟營養專家Kim Murphy搞吓新意思,設計全新嘅Nutrilicious餐單,保留泰菜特色之餘仲加入咗天然食材,提供低鹽、低糖同非油炸嘅有營菜式,連素菜都有好多選擇,今次唔使驚啲食肉獸唔理素食朋友啦! 就咁睇顏色唔似泰菜嘅泰式清蒸鱸魚片 (HKD228),用咗自家炮製嘅泰式醬,令到本身鮮嫰嘅鱸魚味道更加突出,身為低GI(升糖指數)同低碳嘅粉絲,食多兩啖都唔驚爆Quota啦! 泰菜成日食到嘅青黃咖喱,嚟到Café Siam,帶俾食客嘅係南瓜紅咖喱配大蝦 (HKD128),大蝦新鮮爽口唔使多講,唔用魚露轉用咗南瓜天然嘅甜味,口感更加濃稠。 你以為越南先有米紙卷食?其實一樣係泰國街頭小食之一,呢款香芒大蝦米紙卷(HKD98),用咗新鮮芒果同大量蔬菜,加咗薄荷葉食落更加香,即刻Fresh晒。 去過泰國嘅朋友都知,沙律款式五花八門,呢款燒豬頸肉配青芒果沙律 (HKD128)就加埋青木瓜絲,有齊兩樣泰國沙律嘅Fit馬加持,酸甜嘅口感,主菜豬頸肉話咁快食晒喇! Café Siam 中環分店 地址:中環德己立街21號The Plaza 2-3樓 電話: 2851 4803 營業時間︰12:00-14:30 ; 18:30-23:00 堅尼地城分店 地址:西環堅尼地城科士街38號 電話:2855 0810 營業時間︰12:00-22:30

0

【舌尖上嘅異域風情 一桌東南亞菜餵飽你】青花ATUM

每次博殺買嘢都好似打仗咁攰,行完街一定要食嘢補充體力嘅。旺角波鞋街新商廈The Forest裡面有間青花,俾你喺石屎森林度有個綠洲抖抖,回氣之後再博殺。  呢度以花做主題,充滿東南熱帶風情。餐廳每季都會轉菜式,務求大家食到時節菜式又保持新鮮感。 重要嘅事講3次,撈起!撈起!撈起!(HKD78)將中式概念融入泰式食材。煙三文魚、芒果、青瓜、椰菜、青瓜同甘筍撈晒枯仔汁,酸酸甜甜又多蔬菜,勁開胃。 夏天食冷麵超清爽,檸檬柚子魷魚水冷麵(HKD88)用咗韓式水冷麵嘅方向去做,湯汁少少酸甜,味道好清新。彩色麵仲係印尼特色食品,口感似米粉,吸埋啲汁勁正。 燒菠蘿蟹肉炒飯(HKD128)係泰菜必食菜式之一,勁鍾意佢係原件燒菠蘿,份量足又香甜多汁!不過配菜同平時有啲唔同,用咗蟹肉同炸豬皮代替肉鬆,睇你口味鍾意咩喇。 椰皇雪葩(HKD42)超清甜,烘烤過嘅椰子脆片散發陣陣椰香味。花生同栗米有少少鹹香味,加埋一齊係意想不到嘅夾。   青花ATUM 地址:旺角奶路臣街17號The Forest 1樓107-108號舖 電話:3468 2558 營業時間:星期一至日: 12:00-22:30

0

【BFF飯聚泰開心 有辣有唔辣任君選擇】泰屋

想食正宗泰國菜,唔一定要入九龍城嘅!今次介紹嘅係鬧市中嘅泰國菜,位於旺角嘅泰屋,交通方便,最緊要食物質素高,仲有黎自泰國同印度嘅師父坐鎮,令到原本嘅泰國菜更加吸引。 包晒全層嘅泰屋,地方闊落,啱晒一大堆朋友一齊玩,嗌多幾嗰餸都唔驚啦! 原個南瓜皇咖哩海鮮(HKD148),用南瓜裝住咖哩,完全唔辣食落甜甜地,怕辣嘅朋友都唔驚!入面仲有青口、花甲、魚柳、魷魚同蝦五種海鮮,鮮味十足。 咖哩入面咁多汁又點可以浪費,蒜蓉烤包(HKD35)就完全滿足哂大家既胃口,仲有原味、薯仔、雞肉好多選擇,齋食又得,點汁都得! 食泰國菜點少得生蝦刺身呢,佢地嘅泰式生蝦刺身(HKD108),每條生蝦都獨立用一嗰酒杯仔裝住,最底會浸住泰屋特色醬汁,再放上爽口彈牙嘅生蝦。 原個菠蘿咕嚕肉(HKD82)旁邊有隻得意雀仔,由師父親手雕琢而成,好多客人都上黎同佢打卡架。呢款咕嚕肉好受外國人歡迎,食落酸酸甜甜,唔似中式嘅生炒骨,而係用炸完嘅肉片,好易入口。 雖然係泰國師傅主理,但好多選擇都可以有辣有唔辣,今次唔洗由得食辣嘅朋友自私食,約埋一齊啦喂! 旺角泰屋Sawadee Thai 地址:旺角彌敦道726號2樓 電話:2807 3366 營業時間:星期一至日:12:00-23:30

0

【必試榴槤薄餅!灣仔新派泰式滋味】MAZ Thai & BBQ

泰國菜唔一定要去到泰國食先至最正宗,喺灣仔就有間正宗泰國菜餐廳啦。MAZ Thai & BBQ有傳統同創意兼備嘅泰國籍廚師,仲有同樣對飲食質素有要求嘅老闆。呢度一到夜晚就化身小型酒吧,同朋友們一齊飲杯酒食泰菜最適合啦。 古銅色嘅招牌相當吸睛,復古得嚟又帶出現代感。餐廳橙黃色燈光俾人好溫暖感覺,裝潢都好別緻,有長形吧檯同沙發座位,分別兩種唔同風格。 即叫即做嘅木瓜沙律(HKD88),有熟蝦、木瓜絲、腰果、辣度仲可以自己選擇,加入指天椒味道更香濃獨特,醬汁甜鹹酸辣樣樣齊,係開胃佳品! 泰式汁煮新鮮荷蘭藍青口(HKD226)用泰式汁加入白酒煮成嘅青口特別香口,惹味香濃。檸檬葉更帶出藍青口鮮味,入口肉質肥美,味道夠鮮甜!辣辣地回味無窮,驚太辣都可以選擇小辣試下嫁! 泰式古法炒辣蟹(HKD328) 用泰國黑豆豉、香茅、辣椒加入少量酒炒成嘅醬汁,同肉蟹搭配恰到好處。辣蟹非常入味,啖啖蟹肉都充滿豉椒味,肉質好嫩滑,完全停唔到口。 D24榴槤薄餅(HKD66)呢份薄餅共有8件,2人共享絕無問題。餅底係用雲吞皮特製,焗完後更香脆,仲非常足料!榴槤蓉鋪滿整塊薄餅,配上檸檬皮碎有另一種味道。陣陣榴槤味撲鼻而來,小編聞到都流曬口水,食落香甜而不膩,榴槤迷必食! 泰式生蠔(HKD148)食完之後,小編仲沉醉係一口生蠔中,好滿足呀!特製醬汁覆蓋成隻生蠔,細細隻入口順滑又肥美。面層嘅配料係用蒜頭加檸檬皮碎炸至金黃色,同生蠔一齊入口,可以中和返海水味道,味道亦更惹味。 串燒拼盤(HKD68)有豬肉、牛肉、雞肉各2串,可以一次過滿足大家唔同口味。如果唔食牛肉,仲可以同餐廳提出用其他肉串代替,服務認真貼心。成個拼盤小編最愛牛肉串,肉質唔會太乾身又嫩滑惹味有咬感,沾埋沙爹醬汁甜甜地,香濃美味。 可能你同小編一樣,疑惑緊泰式生蝦(HKD98) 點解係呢種色?原來餐廳用嘅係用草蝦,味道更鮮甜。好多時食生野都驚唔衛生,呢個你唔洗擔心!餐廳將生蝦剝殼後淨入冰水,令肉質可以更爽口,再用梳打水清洗乾淨,確保乾淨衛生。食之前沾埋泰式生蝦醬就一級棒啦! MAZ Thai&BBQ 地址:灣仔蘭杜街2號地下E舖 電話:2343 6999 / 2341 0999 營業時間:星期一至日: 11:45-23:00