Tagged: 派飯

0

【善心餐廳大愛行動 日派近百飯盒送暖】膳心小館

喺牛頭角嘅膳心小館冇改錯名,因為老闆想以生命影響生命,透過行動去感染其他人更關心社會。好多獨居長者需要人關懷,老闆都想佢哋健健康康,所以喺一般人覺得師傅冇咁忙嘅下午茶時間,佢哋就去咗派飯,仲派足星期一至五呀!想支持呢間餐廳嘅你可以去堂食,佢哋嘅小炒都好有鑊氣㗎! 唔知係咪做善事人都開心啲呢?你睇師傅幾開心! 逢星期一至五,大約4:00-4:30去到石硤尾澤安邨派飯,準備嘅時候都唔少人等緊喇。 派飯都好足料㗎,睇見呢個京都豬扒啖啖肉都餓餓哋。不過俾長者食就專登整到口感鬆軟啲,客易入口,你想試就去堂食啦。 堂食環境都唔錯,座位好寬敞。呢度小炒類都幾有鑊氣同特別,等小編介紹3款要訂先有得食嘅菜色啦: 招牌珍寶黃金蝦 (時價/以重量計算)隻隻都超級大隻,好似虎蝦咁。再有足料鹹蛋黃封實隻蝦,鹹香味令你好想食完一隻又一隻囉! 牛魔王必試呢兩款,簡直係鑊氣之選呀!唔止咁簡單,呢兩道菜仲有升級版食添,價錢貴成一倍㗎,酸菜炒牛肉(HKD98)同乾炒牛河(HKD108),會用埋牛歡喜嚟煮添,更爽更滑呀! 呢度都有常餐供應,每日有8款(HKD48/款)跟菜、白飯同送碗湯俾你潤吓喉。你睇其中一款梅菜扣肉分量都幾飽吓,菜量都唔少,感覺都健康啲。   膳心小館 地址:牛頭角彩霞道55號彩頤居地舖 電話:8200 2727 營業時間:星期一至日:08:00-21:00

0

【台版「深水埗明哥」大愛 餘廚加料送暖流浪漢】食焦

唔好咁多怨氣喇!睇多啲好人好事,有時候個心都會暖啲㗎!香港有「深水埗明哥」派飯送暖,直頭係正能量代表,喺台灣都有個「明哥」翻版,一樣係暖男典範,最近俾台灣傳媒同網友讚爆!話說喺台中有間意大利餐廳「Dona多納pasta」,老闆兼大廚嘅呢位何宇淨先生,就為餐廳附近嘅流浪漢同露宿者街友,送上愛心便當。 每當深夜時分,喺台中公園附近街邊嘅變電箱上面,總會發現大概有十份包裝整齊嘅便當,就係由愛心大廚阿淨哥包辦。喺佢自家意大利餐廳打烊之後,淨哥都未收得工,佢會將當晚餐廳嘅餘廚,再加料炮製,好似上個星期寒風來襲,佢會將雞髀加米酒,整返味燒酒雞;又會用餐廳嘅蝦高湯熬生米煮粥,再加入皮蛋,真係食到暖笠笠。 寒冬嗰時就煮熱粥整米酒燒雞,又好似近幾日天氣暖返啲喇,淨哥就會煮茄汁鯖魚雞蛋麵,連唔同天氣溫度啱食啲乜,佢都諗好埋,真係超細心!煮好晒之後佢就會整成便當,有埋餐具set好晒,一份份咁擺喺餐廳對面街邊嘅變電箱度,等流浪漢自己嚟攞。 呢個舉動俾台灣嘅網友大讚感動,話淨哥送暖係台灣最美的風景添。今年32歲嘅淨哥,由洗碗出身做到大廚,舊年終於做老闆開埋餐廳,佢接受台灣傳媒訪問嗰時話,知道餐廳附近試過有流浪漢乞食情況,佢話知道每個人都有尊嚴,所以佢通常放低便當就轉身走人,佢話:「不必看見誰拿了食物,不必親手發放,不打擾的愛心就是尊重」。淨哥上個星期就喺fb度po咗段文,「9點送出奉食……剛剛10點去偷瞄一下……沒了!6盒炒飯&14碗雞湯都沒了!!!」呢份大廚愛心餐,好窩心呀!