Tagged: 海南雞飯

0

【Chatterbox Café帶八成招牌菜過江 必食新加坡名物文華雞飯】Chatterbox Café

新加坡文華大酒店有48年歷史嘅超人氣Chatterbox,進駐尖沙咀K11 MUSEA開咗Chatterbox Café,9月6日就開始試業喇!今次將總店八成招牌美食帶嚟香港,當中梗係有文華海南雞飯、招牌珍寶帶子喇沙、白胡椒肉骨茶等熱門菜式。價位係點?睇埋落去就知啦! 餐廳設計帶經典嘅峇峇娘惹風,加上畫咗各種動物嘅壁畫,感覺好似去咗旅行咁,未開餐已經令人放鬆晒。 一睇呢張咁經典嘅黑白照,就知招牌中嘅招牌係文華海南雞飯啦,即刻俾你睇實物! 文華海南雞飯(HKD118)成set都幾重分量,雞肉慢煮50分鐘,嫩滑鮮甜,一啲都唔覺肥,雞皮仲幾爽口添。油飯選用泰國舊米,幾香口、幼長又粒粒分明。 海南雞飯必配三款醬汁,黑豉油鹹甜適中又夠滑;薑蓉磨得好幼細,香而不辣亦冇油膩感;辣醬就係新加坡總店自製嘅,怕辣嘅朋友點少少試吓先好啲。不過Chatterbox新加坡總廚劉師傅話最正宗嘅食法唔係點一隻醬,而係潷好飯,放上雞件,再將三款醬一齊加啲上面,一啖入口先係最正!小編試完又真係更加有香鮮感喎,醬汁咁樣溝埋仲好夾添! 最後梗係飲埋鮮甜嘅雞湯配嫩豆腐收尾啦。 白胡椒肉骨茶配白飯(HKD108)嘅肉骨茶都辣得令人有暖胃嘅感覺,以豬骨、白胡椒粒同蒜頭熬製好濃味,配埋油條層次感多啲添。 招牌珍寶帶子喇沙(HKD158)湯底加咗花奶,口感滑之餘亦減退椰奶嘅飽滯感。而且帶子肉地非常厚,滿足度即刻大增。 乾炒喇沙意粉配豬扒(HKD98)惹味又啱食肉獸。意粉特別加入喇沙葉乾炒,令香氣更濃。大件厚肉又嫩滑嘅香煎豬扒用椰奶同喇沙醬醃製,同意粉嘅味道好夾,都幾抵食。 海鮮福建炒麵(HKD158)味道偏清但都落足料㗎。麵底以豬骨同蝦頭熬製嘅高湯浸過,配埋爽口大蝦肉、帶子、五花肉、芽菜特配料,口感好豐富㗎。 講到小食一定要試特色鹹蛋雞翼(HKD78/6隻)!雞翼尖連住雞中翼用咖喱粉醃過,但味道唔算突出,因為俾炒香到有少少起沙又夠味嘅鹹蛋黃包住!惹味程序令人想食完先傾偈,而且冇食到成口油嘅感覺喎。 傳統甜蝦醬蔬果花生沙律(HKD98)相對特色鹹蛋雞翼清啲,雖然有大量蝦醬,但係有沙葛、花生、青瓜、蕃石榴、菠蘿、蘋果、芽菜等材料,就算有埋切片油條都幾juicy㗎。 呢個招牌椰子雪糕(HKD88)喺新加坡整好再送嚟香港店,雪糕入面有粒粒椰子果肉,香甜有咬口真係好正;配埋紅毛丹同核桃同灑上可可粉,每啖都可以有唔同嘅感覺,要獨食先盡興囉。 一班人開心share可以揀珍寶美祿雪花冰配意大利芝士蛋糕(HKD108),大大碟夠3-4個人食㗎。美祿雪花冰本身已經幾邪惡,入面仲藏咗幾厚嘅意大利芝士蛋糕!不過連埋美祿波波一齊食又唔會極甜喎,加埋士多啤梨就多汁同再清爽啲。 想飲返杯就有凍涼粉豆漿(HKD32/左)同凍美祿恐龍(HKD32),見到層厚厚嘅涼粉同美祿波波係咪令你有選擇困難呢?   Chatterbox Café 地址:尖沙咀K11 MUSEA 地庫1樓B110舖 電話:2352 2173 營業時間:星期一至日:08:00-22:00

0

【酒店新推環球午市套餐$68起 平歎天婦羅+炭燒肉眼扒】Centre Street Bar

要食高質又物超所值嘅午餐,其實可以留意酒店嘅餐廳。好似喺西營盤,港島太平洋酒店入面嘅Centre Street Bar最近推出全新午市套餐,有齊中、西、日式共八款選擇。HKD68起包埋是日餐湯、鮮磨咖啡或紅茶,而且星期一至日嘅12:00-14:00都有供應,fit晒唔同日子放假或上班族去食。 呢個雜錦天婦羅(HKD108)幾抵喎,有大蝦、蟹柳、冬菇等等,款式多之餘配埋茶碗蒸添。 豬軟骨拉麵(HKD78)炆得軟腍入味,湯底又夠濃;一啖食埋溏心蛋更加滋味到暈。 炭燒安格斯牛肉眼(HKD158)就啱晒食肉獸,有炭香,又juicy有肉汁,食完人都開心晒。 鍾意食香口嘢嘅朋友,亦可以試吓炸果仁紅𩶘魚柳(HKD88)。香脆又嫩滑嘅魚肉點埋沙律醬,愈食愈停唔到口囉。 田園蔬菜三文治(HKD68)啱素食人士,多蔬菜又有牛油果。而且麵包烘咗底,交足貨喎。 唔少人鍾意食龍蝦伊麵,不過lunch整個入門版滿足吓先啦。滑蛋蝦球燴伊麵(HKD98)入口好鮮味滑溜,蝦球都幾彈牙。 如果你鍾意傳統中菜,或者同長輩嚟食,港式飲茶套餐(HKD128)就啱你喇。呢個套餐有齊點心、乾炒牛河同老火湯㗎。 招牌海南雞飯(HKD138)嘅雞肉嫩滑,油飯仲好香,值得一試喎。   Centre Street Bar 地址:西環西營盤干諾道西152號港島太平洋酒店UG樓 電話:2131 5901 營業時間:星期一至日:10:00-01:00 (有加一服務收費;而惠顧滿HKD300有兩小時免費泊車,包括免費電動車充電服務)

0

【海南雞飯唔合格黑豉油出事 肉骨茶唔正宗得返薑味】伏務台

食海南雞飯,名店都會中伏,小編諗住試返啲平民快餐啦,結果都係衰咗!好似九龍灣呢間栢檔極品海南雞飯價錢正常,但好易錯漏百出,味道亦有啲奇怪,總之唔對路啦! 座位唔算多,一眼睇晒就係一間快餐店格局。 舖名叫得做極品海南雞飯,咁一場嚟到當然要食栢檔極品海南雞飯(HKD48),油飯唔使加錢,幾抵食,食埋肉骨茶(HKD42)睇吓掂唔掂啦! 上到枱個賣相,normal囉!份雞都係左拼右拼砌出嚟㗎喇,一碟有齊雞髀雞胸肉咁啦。係人都知靚嘅海南雞,雞皮之間有層「啫喱」,小編呢碟就由左邊極厚「啫喱」到右邊冇晒「啫喱」,比例3:7左右啦!講真啲肉係幾嫩嘅,醬汁先係真正出事位。 三個醬汁都好唔正宗,首先辣椒醬似點泰式生蝦嗰款,不過有啲綠色疑似香草嘅物體,但又冇咩香草味喎,感覺怪怪哋;黑豉油就稀過乜咁,似屋企嘅生抽再甜啲,好似蒸魚豉油咁,唔係雞飯又濃又黑嘅醬油會有焦糖嘅香甜;另外碟薑蓉叫做味道正常少少嘅,所以小編只係不停點薑蓉食就算,完全享受唔到海南雞飯應有嘅三種醬料囉! 雞油飯煲得爛咗少少,香味有嘅,但唔算濃,只能夠話對得住個價錢。如果想飲湯或飲品就要加HKD8,但提提你,個湯唔係雞湯!如果對海南雞餐對有要求嘅朋友,呢度未必係你嘅選擇喇! 輪到個肉骨茶喇,一早講明係「單點」,但店員係都要落咗飯餐俾多碗飯嚟!小編又見到隔離枱點咗杯奶茶、結果俾咗檸茶,都幾亂吓喎!講返呢碗肉骨茶,一上嚟就聞到勁重藥材味,點知一入口係好重嘅薑味同藥膳湯嘅感覺!碗嘢見到有杞子、南棗、玉竹同黨參呢啲料,不過完全唔係肉骨茶嘅味,飲到尾仲有啲酸酸哋嘅味出咗嚟添竟然!飲咗半碗,條脷已經俾啲薑味辣到㷫㷫哋,唔想飲落去喇! 好啦,揾肉食啦,一碗有四件圖中嘅肉,呢件係最大嘅,但唔係條條有骨㗎,有啲係豬軟骨嘅位置,完全唔似係肉骨茶嘅肉囉! 勁多豆卜,有啲係煮咗好耐好腍嘅、但係有啲又好似啱啱落鍋咁,層皮硬硬哋喎!真係奇怪!   小編伏氣:價錢唔算貴,但服務真係一般,同店員講我係要單點肉骨茶唔係套餐嘅時候,佢仲黑面。其實隔離枱俾錯嘢飲都係同一個店員落單,佢自己都要檢討吓點解成日錯喇!至於食物味道,俾快餐價唔係要好食到上天,但都應該要正常質素囉,海南雞個怪味黑豉油真係倒米,加上薑味濃肉骨茶,辣到其他食咗乜味都唔知啦! 入伏點:栢檔極品海南雞飯 入伏價:海南雞飯(HKD48),肉骨茶(HKD42) 中伏by #為食加菲貓 美術by #車雲 攝影by #為食加菲貓 《伏務台》星期一伏務大眾,歡迎各界報料。

0

【 旺角泰式小店限定優惠 $20高質雞飯泰國水準】平霸

最近平霸喺網上見到呢間泰角海南雞有個慶祝一週年嘅期間限定優惠,泰式海南雞飯廿蚊有交易,食完個個都話正添!咁抵食又多人讚,平霸梗係唔可以執輸啦! 門口貼滿晒優惠宣傳poster,又有咁多剪報介紹,口碑就有喇,唔知味道食落如何呢? 睇睇個餐牌,除咗泰式海南雞飯個價錢咁平之外,其他小食原來都好抵喎!最平10蚊食到串燒喇! 主角泰式海南雞飯(HKD20)出場!就咁睇分量ok喎,起碼平霸係食得飽嘅,一碟有五、六嚿雞!店員仲話佢哋啲雞經專人嚴選,再配埋新鮮濃郁嘅秘製湯底熬煮,食落啲雞肉係重雞味嘅,仲好滑呢!最正梗係全部去晒骨,真係啖啖肉!食雞飯點可以冇醬點?有海南雞黑醬油同水門雞醬,平霸兩款醬汁都有試,味道又ok喎! 黑醬油本身帶微甜,同海南雞味道都幾夾,點嚟食更加突出到雞嘅鮮味。 水門雞醬同黑醬油就好大分別,味道帶微辣,醬汁充滿泰式香料味道,惹味得嚟又過癮。值得一讚係油飯做得非常入味,每一粒米飯都索晒雞汁,將雞肉、醬汁同油飯一啖放晒入口,超級好食呀!呢個海南雞飯平霸俾滿分呀! 泰式炸春脆(HKD10/4pcs),本來平霸冇抱任何期望,以為炸春卷都係normal嘢啦,點知,係好好食喎!炸到非常脆身,食到最後一嚿都仲保持香脆!重點係,10蚊有4件咁多喎,抵到爛啦! 入面配料好爽脆,有蘿蔔絲同雜菜絲等,就算冇肉都唔會話好寡好齋囉!點埋泰式辣醬就更加好食! 泰式無骨鳳爪(HKD20)酸酸味味 ,而且蕃茄味都幾出,係開胃嘅!鳳爪肉質彈牙爽口,分量又多,兩個人share食都冇問題!不過食食吓,嗰陣辣味先慢慢滲出嚟喎,好有泰式feel呀! 平霸仲發現埋另一個優惠添喎,依家只要like泰角海南雞嘅fb專頁,餐廳就會送你小食一客。食完海南雞飯想食多啲,like吓facebook又多個小食喇!   平霸小評:雖然廿蚊雞飯同有小食送嘅優惠係一週年期間限定,不過平霸問過店員,呢個優惠至到十月份都仲有㗎!咁平咁好食嘅雞飯,唔使去泰國,平霸以後搵到代替品喇! 泰角海南雞 地址:旺角通菜街1M-1T華發大廈地下F號舖 營業時間:星期一至四:11:00-22:30;星期五:11:00-23:00;星期六至日及公眾假期:13:00-22:30 《平霸》平食四方,歡迎各界報料。

0

【黃竹坑地踎泰菜CP值爆燈 滿分青咖喱牛腩撈汁送飯】街霸

暑假唔經唔覺又到尾聲,今日街霸介紹呢間街市餐廳都係啱啱放完暑假喎,就係黃竹坑南朗道街市嘅青咖喱屋!唔好睇個名以為好普通,食物CP值同水準爆晒燈㗎! 環境同一般街市餐廳冇咩分別,最搞笑係每張枱上面都會放一枝假玫瑰花,搞到懶浪漫啫!望住枝花差啲唔記得自己喺街市食緊嘢囉! 其中一道招牌菜就係泰式海南雞飯(HKD48/午市)。呢個海南雞飯無論飯同雞嘅分量都好驚人,2個人share絕對冇問題。雞大嚿得嚟皮嫩肉滑超新鮮。唯一美中不足就係當日油飯賣晒,如果唔係就perfect喇! 啲雞賣相真係超靚仔,嚿嚿都油光十足,大件夾抵食,女仔食真係可以帶定個盒打包一半食多餐,CP值爆燈! 食泰國嘢又點少得泰式冬蔭功湯(HKD58/細)?又係超足料,大蝦大隻又新鮮,再望吓啲湯,唔係水汪汪㗎!海鮮同香料嘅精華喺晒湯入面,每啖超香濃惹味,送飯啱晒!順帶一提,呢個湯幾辣吓,唔太食得辣嘅朋友可能要問吓店員有冇得小辣喇! 話明係青咖喱屋,點都要試「青咖喱」啦!泰式青咖喱牛腩(HKD68)必食呀!又係超大份,咖喱味道濃而不鹹,唔係好食得出味精咁。撈汁送飯是常識吧,唔怕同你講,街霸食呢碗咖喱食到問店員加飯……你就知道呢個汁真係出事喇!好味到停唔到口,牛腩炆得夠晒腍,完全唔使用牙「齒」開啲肉搞到攝晒落牙隙咁,又夠晒入味。呢個我俾滿分! 食到有啲口渴,叫咗呢杯番石榴沙冰(HKD30)。由食物到飲品嘅分量真係從一而終咁……大份。呢杯沙冰大到嚇親我,凸咗出嚟嘅沙冰同杯裡面嘅分量差唔多,即係等於一般餐廳分量嘅double喎,30蚊真係超抵囉!味道甜得嚟唔係糖漿嘅假甜,係番石榴本身淡淡嘅果香味。唯一有啲無奈係實在太大杯,飲得唔夠快就會瀉出嚟,所以店員事先已準備好一隻碟仔,等你唔使流到周圍都係,都幾貼心嘅,哈哈! 街霸最愛:其實今集真係難以抉擇,不過必食嘅係青咖喱牛腩同埋番石榴沙冰。街市都食到高級泰菜嘅水準,價錢仲要超親民貼地。如果2個女仔去食,嗌一個飯一杯沙冰加個小食已經夠飽!無錯,連嘢飲都淨係叫一杯好喇……街霸上次同朋友一人一杯真係飲唔晒㗎! 青咖喱屋 地址:黃竹坑南朗山道熟食市場1樓5號舖 電話:6273 2861 營業時間:星期一至五:11:45-14:30;18:00-22:00;星期六:不定

0

【天天海南雞又乾又嚡 飯唔熱雞湯鹹過鹽水】伏務台

新加坡過江名店天天海南雞飯入侵咗銅鑼灣喇,但係試業幾日就已經有伏評,俾人話雞肉好乾,小編就親身試吓係咪真中伏啦! 平日1:20pm已經排到要轉彎,打工仔真係要計過度過先好去食,因為小編排到2:00pm先入到去門口嘅吧枱再等一陣先正式可以搭枱食飯囉…… 點咗份傳聞中嘅雞肉好乾嘅天天海南雞飯盛惠HKD80,首先俾個雞湯嚇親,好鹹,味精Feel咁,咁細碗都飲唔晒。 第二個嚇親係分量,呢個價錢咁嘅size會唔會少咗啲?偷望吓隔離位,佢大份好多囉,分量好唔平均啫(詳情請到Facebook睇片)…… 第三個嚇親係小編冇為自己份雞髀肉海南雞而高興,因為睇都睇得出佢乾呀! 食入口真係又乾又嚡……飯又唔熱,真係開心唔落。本身淋喺雞面嘅雞汁有少少腥,聊勝於無啦;辣醬就太辣喇,會掩蓋一切味道;黑豉油就正常嘅,小編都係點佢穩陣。 第四個嚇親係飯唔熱,明白海南雞飯可以唔熱,但堂食點都想個飯係熱辣辣囉…… 五十年代奶茶個名咁勁,跟餐都要加HKD18都試埋啦!聞到少少茶香,不過都係唔熱嘅。滿心期待咁啜大啖啲,差啲噴出嚟,事關甜過碌蔗!媽呀!呢餐飯想點呀? 小編伏氣:成餐飯HKD98貴唔貴?呢個質素之下好L貴!因為試業期間免收加一咋!講真,明白有名氣嘅餐廳價錢都一定有返咁上下,但係唔該俾啲質素嚟。小編仲聽到老闆現場同食客講解,話啲雞每朝凌晨2:00am喺廣州劏完就即時運嚟香港,咁其實有幾新鮮呢?又送豆腐花俾隔離位嘅食客,話要佢哋等咁耐唔好意思。不過小編就冇呢個收禮福氣,可能等40分鐘都未係最耐……既然唔係個個送就咪講咁大聲俾其他人聽到啦!提提大家,天天海南雞飯午市2:30pm截單,人多需要搭枱;晚市話唔需要搭枱,但5人起先可以訂枱囉…… 入伏點:天天海南雞飯 入伏價:海南雞飯跟餐加奶茶 HKD98   中伏by #為食加菲貓 美術by #Man蝦 攝影by #為食加菲貓 《伏務台》星期一伏務大眾,歡迎各界報料。

0

【$20泰式海南雞飯 得個樣睇定堅有料?】平霸

平霸小編又出動,今次食啲咩?主角就喺May姐泰主埸。雖然開咗未夠半年,但都已經算有名氣,好多人食過都有讚冇彈!好,等小編又試吓,睇吓喺咪真係咁堅,又平又好食先! May姐泰主埸由泰國人主理,專做街坊生意,佢嘅主打招牌菜梗喺泰式去骨海南雞飯(HKD20),不過就只限外賣!雞飯即叫即整,拎到上手都仲係熱辣辣㗎!齋睇賣相都幾靚仔喎,聞落仲好香添!成個飯有成6、7件去骨雞,米飯用咗薑黃飯嚟做,有誠意喎,仲跟埋一小盒泰式酸辣醬喺飯度,一啲都唔偷雞呀! 食到落口,小編就覺得個雞爭咁啲喇,啲肉有少少嚡同埋偏硬身,雞皮就尚算滑溜;至於個薑黃飯做得唔錯,好香身,食落濕濕哋不過都叫做可以接受,個人覺得淋埋啲醬汁一齊食就更加正!酸酸辣辣夠晒開胃,撈飯食一流! 平霸小評:雖然味道同平霸小編想像中有少少出入,不過以20蚊嚟講仲要去埋骨,算係咁喇!食得過嘅,雖然唔可以話堅好食,不過香港地平靚正小店買少見少,得閒幫襯支持吓又得啫! May姐泰主埸 地址:太子太子道西96-100地下A舖 營業時間:星期一至六:11:30-2100(星期日休息)

0

【用心親民星馬菜】隨心

人生順逆無常,有無諗過如果事事順心,人生仲會唔會一樣精彩?定係事事順心反而會覺得乏味呢?有時選擇隨性,放鬆一啲,未嘗唔係一件好事。隨心而行、隨心咁生活,或者去鰂魚涌食馬來西亞菜隨心,都係一樣簡單隨意又舒適。 小店裝潢雖然簡單,但係並唔代表馬虎。牆上貼滿一幅幅特色畫作,環境舒適整潔。 海南雞飯(HKD78),雞肉非常嫩滑,外皮有彈性,感覺上一啲都唔油膩,亦唔會好肥。值得一讚係海南雞已經去骨,可以一啖食晒,感覺更加爽,仲有三種口味嘅醬汁可以搭配添!油飯散發淡淡香味,同爽滑嘅雞肉非常夾。再飲埋杞子雞湯,成個餐雞味濃郁,愛食雞嘅朋友要試試啦。 沙嗲串燒6串(HKD60)串燒包括有豬肉同雞肉各3串,燒完好香好惹味。再點埋特製沙嗲醬,初入口味道香辣後帶少少甜味。加上醬入面帶有少許花生粒粒,更加有多重口感。豬肉串食落肉汁豐富,好香口;雞肉串嫩滑,質感比較軟。 鍾意重口味可以試下新加坡炒貴刁(HKD75),味道濃烈得嚟有少少辣,好惹味又有鑊氣!濃濃嘅醬汁煮到上面各樣食材都好入味,特別係大蝦,將原本嘅爽甜蝦肉加添一分惹味,層次更豐富。  馬來西亞肉骨茶(HKD98)以豬骨、豬肉同埋中藥材熬製,藥材份量非常多,好足料!無論聞落定食落藥材味道都相當濃郁,湯內嘅豬肉煲到又腍又入味!據聞肉骨茶仲有行氣活血嘅功效,鍾意食肉骨茶嘅朋友一定要試! 海鮮喇沙(HKD80)食喇沙個湯底真係好重要!呢個湯底有少少辣,椰香十足又有好香花生味,味道香濃。麵條彈性十足,唔會一夾就斷。加埋豐富海鮮,有蝦、蟹棒、帶子、魚片、豆卜同埋糖心蛋,將每樣食材浸入香濃湯底,加倍鮮味! 隨心 地址:鰂魚涌海光街12號地舖 電話號碼:2117 3588 營業時間:星期一至日:11:00-22:00