Tagged: 海底撈

0

【拍片教9蚊人仔食海底撈 內地網紅被插後揭真相】食焦

食得鹹魚抵得渴,有時候做得網紅,一舉一動真係要小心啲㗎,稍為踩線分分鐘火燒連環船都似!好似最近有位內地網紅就衰咗,又要衝出嚟道歉喇!可能連佢本人都冇諗過會搞到咁大劑。呢位叫「superB太」嘅網紅,原先拍咗條片,教人去海底撈食平嘢!點平法?6個人用10蚊人仔去海底撈食個下午茶喎! 條數係點計呢?網紅當日一行6人去到海底撈,點咗一個唔使錢嘅清水鍋、一碗4蚊人仔嘅白飯,之後再叫侍應俾5杯冰,然後佢哋就開始行動出去攞生果喇,攞完返嚟就用自己帶嚟嘅榨汁機榨汁,6杯鮮果汁就咁整好!白飯落清水鍋加啲牛肉碎就變咗鍋粥喇,有得食又有得飲,呢個下午茶埋單14蚊,學生證仲有6.9折添,即係9蚊人仔就搞掂!俾佢原先想用10蚊嘅挑戰仲平咗1蚊雞添呀! 結果條片出咗之後一片罵聲,惹來唔少網民都鬧佢「丟臉」、「這樣低質素還好意思拍出來教人」……以為開開心心拍條平食海底撈嘅片,竟然咁樣收場!之後「superB太」都有再po文,仲自爆返當日嘅真相,佢話其實嗰日已經同店員講明咗佢哋會拍嘢,拍嘢以外佢哋有開多另一枱再叫嘢食嘅,仲出示埋另一張單係食咗差唔多二百蚊嘅單!不過臨尾佢都就寫話「不過你要罵就罵吧!」……似乎幾委屈咁款喎! 自爆埋真相都係收唔到科,網友依然繼續追擊,咁呢位網紅惟有再跪低,拍條片正式道歉,話已經知錯知衰,仲叫人千祈唔好學佢咁去海底撈照佢咁食法喎,片尾仲有文字寫明「謝謝大家的監督 我們會改正錯誤吸取教訓 做更多更好更正能量的內容」咁下次諗嘢拍之前真係要諗清諗楚喇!

0

【忽然叫停「自帶食物」 台灣海底撈經理爆內幕】食焦

台灣海底撈喺舊年底宣布,可以俾食客自帶任何火鍋料同埋酒水,仲唔收任何費用,淨係收返個鍋底錢!之前消息一出,引咗唔少食客跟住咁做㗎,不過最近又有新發展,勢估唔到,只係實行咗兩個月啫,連試用期都未過,台灣海底撈官方2月1號就喺fb公佈,食客自帶食物要喊停喇! 官方回應係咁嘅:「很抱歉地告知大家,海底撈台灣各店將自今年2月15日起不再接受顧客自帶食材,但是包廂仍然不設最低消費。希望獲得大家的體諒,深深感謝每位顧客對海底撈的支持!」網友隨即反應好大,話海底撈梗係俾班麻煩食客搞到頭擰擰,個個帶晒嘢食嚟,淨係俾個鍋底錢就得,實係搞到生意差咗好多啦…… 其實睇返啱啱開始嗰陣,的確係有唔少食客都自帶食物同酒水,又香檳又肥牛又龍蝦,海底撈無任歡迎之餘仲好服務到幫啲客預備埋冰盤放海鮮添(連結:https://goo.gl/zJHe8W )!係咪啲客愈來愈多要求,同埋個個俾返個鍋底錢就得搞到生意差晒呢? 又唔係喎,據台灣海底撈總經理李瑜話,雖然自帶火鍋料確係有影響業績,但最大原因係「是已經超出我們對食安的掌控範圍」。明喎!之但係李經理仲同傳媒爆咗個真正原因,原来係關強國海底撈事嘅!話說,大陸海底撈嘅部分門市,都可以俾食客自帶食材,只係一直都冇對外公開講啫,不過就喺上個月底,有強國網友翻牆睇到台灣店有呢個新搞作嘅新聞,就一發不可收拾喇! 強國食客一行四人,帶晒羊肉、海膽、澳洲和牛去海底撈開餐,除咗當場要求店員要切片裝盤,仲要求店員幫佢包埋雲吞,又用威士忌同水果整雞尾酒,搞來搞去,最後4個人只係計鍋底同醬料錢,盛惠74蚊人仔、即係91蚊港銀咋!咁搞法個個係咁唔得掂,於是海底撈中國總部先決定,下令所有分店停止俾客人自帶火鍋料,而最先受影響嘅就係台灣分店喇! 其實開放得俾食客自帶食材,都應該估到會咁啦,一早話係期間限定咪好囉,唔使搞到依家好似腰斬衰收尾咁嘛!

0

【准食客自帶火鍋料 台灣海底撈俾埋冰盤】食焦

過埋呢個星期,話咁快就要拜拜2017喇!講到今年嘅飲食界大事,點都唔可以少咗海底撈進攻香港,十月開咗第一間分店啦,你食咗未呢?香港暫時得一間,但喺台灣就已經有5間分店喇,臨近年尾,最近仲爆咗單大消息,就係台灣海底撈喺facebook專頁度公告,開放俾食客自帶任何食品同酒水,係任何呀!即係連火鍋料都唔拘,仲唔會加收任何費用添! 一出po,梗係有人like有人愁!網友同食客們當然激讚,個個留言話要即刻帶嘢食去實測;嬲豬嘅就係邊爐界嘅同行們,話海底撈咁做真係「破壞行規」、「想做爛個市咩」!唔理咁多,呢個星期真係有唔少人睇完個公告之後,就即刻行動去海底撈試吓堅定流! 有網友真係買咗唔少火鍋料去實測喇,有乜呢?有好大分量嘅肥牛啦、帆立貝啦,同埋唔少菇類蔬菜!結果點呢?據網友嘅形容係,店員見到完全冇任何驚訝,反而仲問網友需唔需要幫手用碟放好啲火鍋料,又問佢啲菇菇要唔要洗洗佢。睇返網友po出嚟嘅相,就見到啲肥牛唔止用碟裝好晒,仲細心到有埋冰鋪底,啲帆立貝更加用冰盤擺到靚一靚添!其他網友見到就留言大讚,話海底撈服務真係一流又細心喎! 有樣學樣,個個都自帶食物酒水去海底撈,有網友仲買埋原隻龍蝦去食,夾埋其他配料,用咗千一蚊台幣,即係唔使三百蚊港銀,就咁一餐計,去海底撈就淨係俾咗個火鍋湯底料,二百六台幣,即係六十零蚊港銀搞掂!自帶食物條數,同喺舖頭點火鍋料邊樣抵?真係要自己計清楚喇! 台灣海底撈呢個「創舉」,引來唔少人談論,佢哋嘅發言人就話唔係想破壞行規,其實只係參考大陸海底撈做法啫,仲話喺大陸嘅分店好多都係開放俾食客自帶食物!大陸同台灣係咁,咁香港分店又點呢?小編問咗香港海底撈,店員話可以自帶其他食物,不過火鍋料就因為衛生安全問題,係唔可以嘅!想學台灣網友咁買晒肥牛龍蝦入去食?唔得啦!不過話時話,唔點海底撈嘅火鍋料食,咁去嚟又為乜呢?

0

【激讚海底撈蕃茄湯底 網紅趕食早場唔使排隊】食焦

海底撈攻港試業咗一個星期,唔少人都即刻搶先去食趕住comment,有網紅YouTuber更加拍埋片直擊,好似arhoTV嘅Sunny,試業第二日就去咗捧場,條片仲引嚟過16萬view添。 Sunny同女友Creamy(都係網紅YouTuber)朝早十點三就去咗海底撈,成功唔使排隊就有得食(晚市每晚限派五十張籌,好快輪完,有籌喺手都仲要排)。不過一大朝早要隊餐咁heavy嘅邊爐,都算係挑戰喎!小編搵咗Sunny講多兩句,原來佢食上癮,短短三日就食足兩鑊海底撈,而且為咗唔使同人迫爆場,佢兩次都係食早場。 Sunny話:「我去第一朝好早,十點幾到咗,反而係佢哋(海底撈)啱啱開舖未準備好叫我等陣,跟住好快入到去,我哋算係第一枱客,之後先有啲大陸團陸續入嚟;第二次我哋就晏咗少少,十一點九先去到,不過都係等咗十五分鐘就有位。」 本身未食過海底撈嘅佢,係女友Creamy喺深圳食過想再食,Sunny陪食結果就食上癮。「點解連食兩朝?係真係因為個蕃茄湯底,我堅掛住個湯底,佢哋個蕃茄湯底好入味,」除咗個湯底,Sunny另一最愛就係個豬腦,因為佢唔食牛,所以佢話豬嘅選擇可以再多啲就好喇!「仲有個拉麵都係堅好食!」睇埋師傅即場表現,再加分添啦! 講到服務同環境,Sunny都一樣俾like,「新開好乾淨啦,啲員工又好有禮貌,睇得出佢哋係受過專業訓練咁,服務周到!」有乜唔好?咁梗係價錢可以再親民啲就good啦,「價錢平啲就最好啦,比起其他打邊爐都真係貴咗啲囉,我哋兩個人去食都要差唔多七百幾八百蚊,不過如果計埋個service係值嘅,同埋女仔又可以gel埋甲又抵返!」會唔會呢幾日再食?Sunny話要唞陣喇,可能下次試吓食夜晚又睇吓乜feel! 所以話,如果唔想同人迫,又食得落咁豐富嘅「早餐」,小編提議你朝早去食海底撈啦(不過首先你要閒日放到假囉)!