Tagged: 海膽

0

【蘇豪最新日式小店 巨型牛扒丼飯啖啖肉】真心

喺中環蘇豪區,有唔少西式餐廳,不過最近就有間日式小店真心登陸蘇豪喇,又多個選擇唔使咁悶。真心呢間日式小店,同時亦係間Sashimi bar,有得食刺身之餘仲有唔同嘅酒精飲品,食住刺身飲酒夠晒爽啦!餐廳嘅英文名叫ZEN,玩埋諧音「真心正」咁解! 老闆話除咗食物係真心正之外,每一樣食材都真心對待,連賣相都好花心思去擺靚佢,希望吸引到客人食慾,無論顏值同味道都要做足一百分咁話! 小店面積雖小,最吸睛係牆上嘅壁畫,將日本嘅名勝古蹟同旅遊景點都畫晒落去,等食客見到都好似身處日本一樣咁有feel。 吉列海鮮丼(HKD128)丼飯鋪滿炸生蠔、炸蝦同炸蟹鉗,睇見都令人食慾大增,流晒口水!炸物食起上嚟口感寧舍唔同,因為餐廳用咗自己調配嘅油嚟炸,食落更加酥脆香口。 炸生蠔食落外層酥脆,內裏鮮甜多汁,隱約仲食到少少海水味,一啲都唔腥呀。 炸蝦肉質彈牙,香脆可口,炸粉一啲都唔厚,放咗一陣唔會話即刻就淋晒,唔錯唔錯。 炸蟹鉗肉質同樣彈牙,面頭淋咗一層醬汁,食落甜甜哋,送飯一流。 霜降熊本牛扒丼(HKD198)犀利喇,牛肉由熊本直送,油花均勻,雖然未去到和牛級別,不過都做到和牛腍身嘅口感同油香味,真係好好味!牛肉仲多過米飯,食肉獸見到呢款丼飯真係會好開心㗎! 牛味超級濃郁,仲依稀見到牛肉粉嫩嘅顏色,仲要一啲都唔嚡口,嫩滑口感好滿足! 刺身拼盤A(HKD168)包括三文魚、八爪魚、北寄貝同帶子。呢四款都係大眾比較鍾意食嘅刺身,一上枱見到刺身嘅色澤咁靚已經知道係高質刺身!帶子係北海道頂級靚貨,鮮甜至極,唔需要點豉油,食返本身帶子嘅甜味已經非常足夠。 三文魚用上最靚嘅A grade挪威三文魚,油脂豐腴,又係食唔停。 北寄貝味道偏甜而且好煙韌,好有咬口。 海盜船-海膽吞拿(HKD128),將平平無奇嘅腐皮壽司變成加大碼,上面仲加咗海膽同吞拿toppings落去,又幾得意喎!除咗海膽吞拿呢個配搭,仲有海膽帶子、蟹膏蟹籽、鰻魚玉子等其他選擇。用雙拼形式配搭,一個價錢就食到兩款味道,係店內必食招牌之一! 海膽吞拿full到差唔多滿瀉,平時就咁食吞拿油分會較多,如果將佢減半,配埋海膽嘅鮮甜,中和油膩感之餘,本身又有甜甜哋腐皮壽司做底,味道非常match!三重口感勁豐富! 真心 地址:中環蘇豪士丹頓街21號地舖 電話:6999 6434 營業時間:星期一:12:00-15:00;星期二至四及星期日:12:00-22:00;星期五至六:12:00-23:00

0

【芝士海膽沾麵賣相差 芝士死鹹海膽失埋蹤】伏務台

香港人鍾意搞創新,但有時都會玩到過晒火變咗玩食物。好似尖沙咀元祖沾麵專門店嘅芝士海膽沾麵,本身就咁聽個名都覺得幾驚喜,但係網民就唔係咁諗喇,好多食評都話伏囉!究竟佢有冇對唔住「沾麵專門店」呢個稱號?當小編見到碗麵嘅真身……即刻想調頭走呀! 餐牌入面嘅相好細張,問店員啡色嗰嚿係咪肉?店員有啲尷尬咁話係,然後好誠實咁補咗句啲肉唔係好多,似肉碎。 好,上枱喇,呢碗芝士海膽沾麵(HKD78),唔知大家有冇聽到小編個心碎咗呢?塊紫菜冇沾湯都瞓低咗,其他配料好似求其掉落去咁。唔理係咪日本人經營,但咁頹嘅擺盤真係好少喺日本菜見到,賣相率先扣分! 而呢隻溏心蛋都幾搶眼,因為熟到一個點呀!仲唔係新鮮整,因為係凍嘅。 到重點嘅芝士湯,熱到不斷起泡泡。不過見到成個湯都係芝士,個腦諗起瑞士芝士火鍋,分別只係冇一直熱住……攪攪佢再三確認真係成鍋濃濃嘅芝士,而唔係湯面上加芝士。個湯鹹到GG,蓋過晒芝士應有嘅奶香味,就算沾麵湯比平常鹹都唔應該係咁囉。至於質地就似忌廉湯,小編額頭現咗三條黑線…… 係時候搵頭先店員講嘅肉,呢塊算大㗎喇,差唔多size有3-4塊啦,其他都係再細啲嘅肉碎。呢刻小編完全明白店員嘅尷尬!味道有少少焦香,然後又俾芝士嘅鹹味蓋過晒…… 呢個沾麵質地好似食緊烏冬咁,偏軟腍,冇咩彈性可言。 一路食就一路見到呢啲溶唔到嘅芝士,真係冇晒胃口,不過佢提醒小編:海膽呢?唔好話海膽碎,係連味都食唔到囉……小編有理由懷疑,究竟芝士海膽沾麵係咪堅落咗海膽呢?   小編伏氣:如果HKD78食一個沾麵並唔貴,但食一個賣相其差、味道勁鹹、肉量好似施捨你嘅沾麵,咁不如買現成料返屋企自己煮好過。連店員介紹嘅時候都覺得尷尬,不如連嗰少少肉都唔好落反而嚟得理直氣壯。俗語都話「唔怕生壞命,最怕改壞名」,真係說服唔到小編碗嘢係有海膽,咁點叫得做海膽沾麵呀? 入伏點:元祖沾麵專門店 入伏價:HKD78   中伏by #為食加菲貓 美術by #車雲 攝影by #為食加菲貓 《伏務台》星期一伏務大眾,歡迎各界報料。

0

【15蚊兩件抵食手卷 平靚正足料又好味】平霸

平霸搵食,今次輪到呢間隨您鍾意,主打超平價手卷,係一班食客嘅至愛呀!小編都唔執輸,幫大家試吓係咪又平又好食先! 特價手卷(HKD15/2個),有鰻魚手卷、三文魚手卷同什錦魚生手卷。小編就叫咗鰻魚手卷同三文魚手卷(講明先,小編係唔鍾意食刺身嘅,基本上餐牌上有得揀三文魚,都係唔會叫嗰隻)。不過,奇蹟發生了!我竟然食晒手卷嘅三文魚!!連我自己都唔敢相信呀。事關佢啲三文魚肥美得嚟又唔油膩,唔加豉油同wasabi就咁食都接受到,係正㗎喎;而鰻魚手卷就有少少遜色喇,鰻魚質地係幾彈牙嘅,不過就有啲啲腥味,但見佢咁足料,ok嘅! 軟殼蟹手卷(HKD18/2),未見過軟殼蟹手卷可以平到咁,仲要係有2件喎,抵到爛啦!食落去味道都唔錯㗎,軟殼蟹炸到酥酥脆脆,好香口,好食!唯一要彈嘅就係食完會好口乾囉! 新鮮海膽手卷(HKD12),嗱嗱嗱,凡事唔好睇表面呀!呢個海膽就咁睇好似得少少咁,但打開其實入面都仲有㗎!海膽好鮮甜,12蚊就有咁嘅質素,算係咁喇! 平霸小評:老老實實,其實呢間啲食物水準一啲都唔差㗎,又抵又好食!不過,服務態度就認真麻麻喇,如果可以改善埋呢點,咁就一流啦! 隨您鍾意 地址:灣仔堅拿道西15號地舖11號 電話:2833 2876 營業時間:星期一至日:11:00 – 01:00 《平霸》平食四方,歡迎各界報料。

0

【抵過自己飛日本 即日空運北海道築地魚生】スーパー丼 SUPERDON

想食海鮮丼,但隔離果個又怕魚生「生勾勾」?位於銅鑼灣嘅スーパー丼就啱晒你地去啦!因為佢地嘅食材全部都係日本空運到港,Menu仲好體貼咁有埋生同熟嘅丼飯任你揀,就算唔食生野都可以一齊食啦!    スーパー丼嘅裝修走簡約風,以白色同米色做主色調,加埋好多木嘅元素,感覺好似日系cafe,坐得舒服影相又靚! 北海道馬糞海膽丼(HKD388)一個海膽丼有齊晒海膽同三文魚籽兩大爆丼恩物!北海道馬糞海膽每一啖都鮮甜實肉,加埋大大粒三文魚籽晶瑩剔透,無論係相機定係自己食落肚都覺得好正。順帶一提,呢度每個丼飯都可以加(HKD20)轉定食,有埋沙律同麵豉湯。 熊本A5和牛火焰刺身丼(HKD388)角切嘅和牛燒到半生熟,啖啖都有入口即融嘅感覺!混和新鮮嘅北海道雞蛋,牛肉口感更加溫潤軟腍,再撈埋蔥花慢慢食就更加香口啦! 跟住就到熟嘅丼飯啦!北海道玉子黑松露和牛丼(HKD268)和牛牛扒大約7成熟,牛肉味道好濃郁,肉汁超豐富!加埋黑松露瀰漫住獨特香氣,再撈埋北海道雞蛋,啲牛肉好軟滑呀! 你最鍾意食咩天婦羅呢?呢個特上天婦羅丼(HKD168)有齊晒蝦、蘆筍、南瓜、蕃薯、茄子同菇,最多人鍾意嘅天婦羅全部都齊晒!天婦羅食落熱辣辣又唔油,脆漿唔會厚身杰撻撻,超級香脆!唔食生野可以嗌嚟試下。 除咗指定丼飯之外,大家去到仲可以自選丼飯或者加料嗌碟刺身㗎! スーパー丼 SUPERDON 電話:2668 1663 地址:銅鑼灣駱克道501號地舖 營業時間:星期一至四:12:00-23:00;星期五至六:12:00-00:00;星期日:12:00-23:00

0

【火鍋之匠人!必試旺角中日合璧火鍋餐】鍋匠

如果大家鍾意中式火鍋一大鍋慢慢打,但係又想食到日本火鍋嘅靚料,新開業無耐嘅鍋匠,就啱晒你啦!鍋匠揉合中日特色,無論中式定日式湯底、受港人歡迎地道食材抑或日本靚湯料樣樣都有,仲要位於旺角咁方便,啱晒同朋友慢慢歎! 除咗位於旺角夠晒方便之外,去到佢地樓下扶手電梯直上就可以直達門口,夠晒就腳! 店舖裝修帶有少少日本風情,簡約又雅致,氣氛甚佳,無論人多抑或人少都好適合慢慢坐低打邊爐。 鍋匠120分鐘火鍋放題套餐,包括沙律、前菜、精品之鍋、鍋物之湯、主食、鍋物、甜品同飲品。沙律係日式胡麻沙律,前菜係日式枝豆、梅子花生、芥末木耳三選一。沙律大大份,又爽脆新鮮,配上芝麻醬帶微微酸甜味道,清新又開胃! 精品之鍋有鍋匠雞煲同蕃茄薯仔粟米筒骨湯鍋二選一。雞煲可選大、中、小辣、不辣同麻辣,餐廳以秘製醬汁炮製,除咗香味夠晒香濃之外,食落每件雞塊都非常入味,又夠足料!食落啖啖都係濃香嫩滑雞肉。 鍋物之湯有6個選擇,包括有三款人氣日式湯底:藤原豆乳湯鍋、北海道昆布湯鍋同秘傳月見壽喜湯鍋;另外仲有三款傳統中式湯底,包括香濃沙嗲湯鍋、香茜皮蛋湯鍋同四川麻辣鍋。如果要加鴛鴦湯鍋,每鍋都係(HKD20)。如果鍾意食辣,不妨試試四川麻辣鍋!紅噹噹嘅湯底入面浸住唔少辣椒,將新鮮食材放落去,辣得嚟食得出食材新鮮,又麻又辣嘅感覺夠晒過癮。 套餐嘅價錢根據主食嘅肉類而定,分別有上級牛肉之火鍋套餐、手切頂級雪花牛肉之火鍋套餐、手切本地黃牛之火鍋套餐同鹿兒島A5黑毛和牛之火鍋套餐。手切本地黃牛(HKD298/成人,HKD268/小童或長者)。手切本地黃牛,脂肪分佈平均而且佈滿雪花,食落牛肉味道濃郁唔韌得嚟帶少少爽口。牛肉熟得好快,淥一淥就食得,食得咁爽,好快就食晒啦。鍋物嘅食材一共有15款選擇比大家任食任點,野菜同野菌類,都有成16款選擇,菜同菇都超級新鮮,就算本身唔鍾意食菜都會因為蔬菜嘅鮮甜而唔小心食多咗! 而家嚟到鍋匠仲有唔少優惠!好似呢個大大份嘅海鮮拼盤只要惠顧手切頂級雪花牛肉之火鍋或以上嘅套餐就可以跟餐送出,裡面唔止有脆肉鯇魚,仲有埋帶子添。樣樣都肥厚鮮嫩,真係好值得! 除咗海鮮拼盤嘅優惠之外,仲有唔少著數㗎!而家Book定檯先去,每2位仲有海膽送添呀,仲唔約人去大食特食? 鍋匠 電話:2481 1388 地址:旺角彌敦道613號飛達商業中心1樓 營業時間:星期一至日:16:30-02:30

0

【海膽進軍零食店 勁食北海道馬糞海膽手卷】松坂庫 magstore

提起松坂庫,你會唔會即刻諗起佢係專賣日韓零食嘅精品超級市場呢?其實松坂庫不斷有新搞作,除咗出過超 hit 嘅雪糕甜品,仲有做即叫即製手卷,樣樣水準都好高!你仲點可以唔睇下?記得記得,有手卷賣嘅舖頭為數唔多,要留意返佢地邊間分店先有呀! 原來最近推出四款手卷優惠,凡買任何野飲就可以用HKD35 (原價HKD45)優惠價享用,嘩,好似好抵咁,但又要試下係咪咁真材實料先得啦!    首先一試,就係日本拖羅配墨魚籽手卷,拖羅脂肪比例高,食落去同一般赤身吞拿魚口感完全唔同,入口充滿油香,加上墨魚籽味道嘅襯托,感覺矜貴。 馬糞海膽手卷絕對係佢地王牌之一,足半版海膽完全蓋住手卷,食落去並沒有腥臭味,反而充滿甘香,海膽迷唔可以錯過! 松坂庫 magstore(手卷限定) 將軍澳分店:將軍澳新都城2期1124-1126舖 銅鑼灣分店:銅鑼灣軒尼詩道396號德興大廈地下2號舖 旺角分店:旺角西洋菜街(好景商場對面) 尖沙咀分店:尖沙咀金馬倫道35號地下

0

【極嘆海膽汁焗扇貝】塔門仔海膽燒

食海鮮唔一定係西貢先至夠新鮮,近近地喺佐敦都有新鮮海鮮食!塔門仔海膽燒堅持每日喺西貢塔門入貨,每日嚴選食材,希望大家食到最新鮮嘅海鮮。 海膽汁焗扇貝(HKD78)扇貝迷一定要試試!多種海鮮入面,扇貝味道甜味比較突出,當扇貝遇上鮮甜海膽,味道出奇地夾!扇貝上面嘅海膽鮮甜,而芝士帶少少鹹味,烤過嘅表層好似有一陣薄膜覆蓋。芝士海膽入口即溶,連同扇貝鮮甜柔嫩,味道非常融和!如果一啖食晒,柔滑口感仲會充滿整個口腔,鮮甜味道久久不散!可惜小編係貓舌非常怕熱,所以放涼咗一陣……如果係唔怕熱嘅朋友食,感覺一定更正! 鹽燒活鮑魚(HKD88)鹽燒往往都最體驗到食材原本嘅鮮味,而呢款鹽燒鮑魚質素真係唔錯。一嚟到,食物已經散發陣陣海鮮香烤味。調味亦啱啱好帶出鮑魚嘅鮮味,唔會只得鹽嘅鹹味或被調味料覆蓋原有鮑魚味道。鮑魚入口質感好彈牙實肉,完全唔會腍,需要時間細細咀嚼,享受彈牙口感。鮑魚上面嘅洋蔥好香甜,提升整個鮑魚鮮甜味,值得一讚。 塔門招牌海膽炒飯(HKD98)海膽非常甜滑,米飯粒粒分明,口感煙韌彈牙,配上翠玉瓜非常爽脆鮮甜!將海膽汁同米飯混和,仲會粒粒散發海膽香味,又香又甜,而且完全零油膩感! 流心海膽大啡菇(HKD48)原本以為菇嘅口感煙韌,食起嚟未必有極為融和嘅感覺,估唔到海膽配上大啡菇,除咗可以入口柔軟,仲可以好鮮甜! 塔門紫貝天葵(HKD28)餐廳好體貼,怕大家食上癮會熱氣,特登供應自家製涼茶。較少見嘅紫貝天葵,味道酸酸甜甜,入口滑溜,清完熱又可以再食過。 塔門仔海膽燒 地址:佐敦寧波街27-31號地下B,C,D舖 電話:2505 2013 營業日期:星期一至日:17:00-02:00