Tagged: 海鮮丼

0

【百幾蚊歎盡日本直送食材 中環激鮮甜海膽丼飯】豊の丼

想食最近超人氣嘅海鮮丼?中環豊の丼全部海鮮日本空運到港,入貨非常新鮮,百幾蚊嘅價錢就可以食到超鮮甜海鮮丼,性價比超高!一齊去試下最「豊」富嘅海鮮丼啦! 店內裝修自然舒服,燈光柔和,相機食先想影靚啲完全無難度,同朋友坐低慢慢食海鮮丼都好寫意。 豊の盛丼(HKD168)店主為咗大家可以食到新鮮時令嘅刺身,所以每日佢地都會嚴選時令新鮮海產擺入去丼入面。店主話佢地大部分時間都有油甘魚同吞拿魚,今次小編咁啱個丼仲有埋鮪魚、飛魚、帆立貝、海膽、三文魚籽同松葉蟹膏,好豐富又夠晒特別,樣樣食材都超鮮甜,呢個價錢真係抵! 北海道松葉蟹丼(HKD148)同其他丼飯唔同,米飯一早已經混咗蟹喺入面,食落每一粒飯都有蟹嘅鮮味。丼飯上面有四隻肉質飽滿嘅蟹鉗同一個蟹蓋,蟹蓋入面裝滿嘅全部都係蟹膏!師傅將蟹膏拆晒出嚟擺入去再拎去焗,大家食果陣可以將蟹膏撈埋飯食,蟹膏嘅濃香融入個丼入面,正呀! 豊の海胆丼(HKD238)滿滿嘅馬糞海膽鋪晒喺面,加埋三文魚籽,想唔相機食先都唔得。食落海膽勁鮮甜,加埋三文魚子喺口腔入面爆晒汁真係鮮味滿分!之所以有呢個丼,事源店主有次去到日本旅行,見到當地有海膽丼覺得好豐盛,所以即刻帶埋返香港同大家分享。唔知幾時店主又去旅行搵到靈感帶好野食比大家呢? 豊の丼 電話:2728 2116 地址:中環威靈頓街73號地舖 營業時間:星期一至日:12:00-15:30;18:00-22:00

0

【鮮甜味道滿分!尖沙咀超肥厚海鮮丼飯】Moshi Moshi

最近日本海鮮丼大熱,以日式丼飯為主打嘅餐廳愈開愈多,想要別具一格就要花心思引人矚目。呢間位於尖沙咀金巴利道嘅Moshi Moshi,餐廳名已經令人印象深刻,因為 “Moshi Moshi” 日文 “もしもし” 其意思係Say Hello。好似同我地打招呼,叫我地去咁。 餐廳牆身係簡約木系,配以如雪花般嘅精美吊燈,設置座位不多,但俾人感覺相當舒適。 話明海鮮丼作主打點都要試下啦,呢個火炙北海丼(HKD96)以份量嚟講絕對物超所值,有三文魚、蟹柳又有帶子,仲要每款都有數件,而且飯量都唔少。原條厚切嘅三文魚火炙過油脂豐富到滲出,魚香味更爲突出。刺身配溏心蛋夠曬特別,溏心蛋醬料更係餐廳秘製。米飯亦都唔馬虎,係用日本久保田米,口感煙韌得嚟又彈牙。 無食到海膽小編唔甘心,一定要食埋海膽甜蝦油甘魚丼(HKD198)。油甘魚嘅油脂豐富色澤飽滿,甜蝦比一般市面上見嘅大,入口嫩滑。重點當然放最後先入口,來自加拿大空運過嚟嘅海膽色澤淡淡金黃色,完全吸引到小編眼球,味道甘香又肥厚。 Moshi Moshi除咗海鮮刺身新鮮,燒物都出色。芝麻雞翼(HKD34)脆漿唔厚粉,完全吸收醬汁,咬一口肉汁隨即爆出,好惹味。 Moshi Moshi 地址:尖沙咀金巴利道35號地下B舖 電話:2387 7200 營業時間:星期一至日:12:00-15:30;17:30-23:00

0

【築地直送勁鮮甜 13款海鮮大爆丼!】豊洲水産海鮮丼専門店

前排掀起一股海鮮丼熱潮,小編都係海鮮丼忠實粉絲,一知道位於灣仔嘅豊洲水産海鮮丼専門店喺油麻地開分店,就即刻衝去食!店内所有海鮮都係由日本築地漁獲直送到港,等你可以品嚐到最新鮮嘅海鮮。 日式餐廳一向係簡約自然風格,加以傳統日式家具,淺啡色基調以及傳統木質桌椅餐,令人一入餐廳就覺得成個人好放鬆,無壓逼感。而小編一入去就俾呢個富有日本特色嘅布簾所吸引,日式風情濃厚。 半開放式嘅廚房,你可以坐喺吧檯望住師傅精心炮製海鮮丼嘅過程,轉眼間一碗新鮮日本直送嘅海鮮丼就出現係你面前啦。 鍾意食新鮮海鮮嘅你,今次有口福啦!大漁豊洲水產海鮮丼特盛(HKD388)一碗特盛海鮮丼大約800克,絕對可以兩個人開心Share。呢碗有成12種唔同海鮮㗎,小編對黑鮪赤身最著迷,塊塊赤身新鮮又肥美,完全可以滿足到對海鮮丼有追求嘅你。 謹製雲丹丼伴三文魚籽溫泉蛋(HKD398)每日限定20客咋,望住層層叠嘅海鮮都唔知由邊開始入手好。面層馬糞海膽係來自北海道,入口隨即喺口度化開,甘香濃郁。如果覺得呢幾款海鮮食完都唔夠喉,仲可以自己加Topping,有成13款海鮮配料(HKD866)任你揀 。 鹿兒島產軟骨魚蛋串(HKD48)唔係魚蛋咁簡單,啖啖肉嘅魚蛋入邊混有雞軟骨,令咬感更有層次,味道濃厚。 豊洲水産海鮮丼専門店 地址:灣仔謝斐道415-421號積福大廈地下B舖 電話:2808 0292 營業時間:星期一至日: 12:00-15:00; 18:00-23:30 地址:油麻地彌敦道 558 -560560560號譽發廣場 1樓 電話:2869 6289 營業時間:星期一至日: 11:00-00:00