Tagged: 海鮮

0

【海鮮大咖合體酒吧推新菜 刁鑽麻辣串燒爽口彈牙】辣吧

鍾意返大陸食四川菜嘅朋友都可能食過海鮮大咖,呢種用一個大平底盤放滿唔同種類海鮮,再倒入麻辣湯嘅打邊爐食法近年好流行。上年第一間引入呢種食法嚟香港嘅麻辣派,早前由旺角搬咗去尖沙咀諾士佛臺,由20個位增加到有90個,仲改名為辣吧添。新舖除咗有海鮮大咖,仲有多款刁鑽部位嘅麻辣串燒、麻辣烤海鮮同四川冒菜等菜式;另外仲有中式cocktail同啤酒,將麻辣同酒吧合體。不過大家放心,都有極少數食物係唔辣嘅! 新店座位好闊落,亦有吧枱可以俾你飲酒吹水。嚟到新店,小編梗係試新菜先啦! 小編好想試嘅網紅海星(HKD128)真係要問店員點食先啱。廚師烤熟後用海鹽墊底上碟,反轉剪開底部挖綠色嘅內臟出嚟,就咁食幾似食緊蟹膏,濕濕哋有少少汁;正宗啲點芥末豉油亦得,不過會蓋過佢本身嘅鮮甜味,所以小編鍾意點海鹽,因為鹽可以提升鮮味呀!店長話有啲人都因為海星慕名而嚟,不過有人會覺得腥,但小編又唔覺喎,可能因為小編勁鍾意食蟹膏啦。 跟住到麻辣串燒喇,肉類同素菜加埋成四十款,老闆之一Sonic話四川嘅串燒食材比較爽口,有啲部位仲好刁鑽,所以餐廳用料多喺國內運嚟,香港其他地方未必有㗎。上菜嘅時候,會用火一路熱住鐵盤,不過建議大家趁熱食,擺得耐會乾。小編試嘅4款由左至右分別係: 鴨郡把(HKD26/串)係鴨腸同鴨賢之間嘅血管,口感比鴨腸爽口同厚啲,都易咬開。 豬鼻樑筋(HKD26/串)真係估唔到有得食,係呢幾款之中最彈牙,亦係小編最鍾意嘅,因為冇咁肥。 豬天梯(HKD26/串)係豬喉嚨,雖然都爽口,但質感會相對硬少少。 手打牛肉餅(HKD26/串)就係將手打牛丸壓扁整成餅,同煮湯麵嘅手打牛丸比會乾啲,但一樣彈牙。 食完呢幾款串燒,個咀都有啲麻,辣度似譚仔3小辣同2小辣之間,都容易接受。 魚喺燒烤菜式之中,最常見係多春魚,呢度反而烤耗兒魚(HKD32/條),Sonic話鍾意佢嘅肉質夠結實同鮮甜。小編平時好怕食魚要挑骨,但佢好易起肉,細骨亦唔多。 折耳根烤大茄(HKD48/條)面頭唔係蒜蓉,而係落咗折耳根,即係平時煲綠豆沙用嘅魚腥草(臭草),順便清熱一吓又幾好喎。味道就係平時燒茄子咁,微辣但非常多汁,好似右圖咁一壓落去就睇得出幾咁juicy呀! 熱鍋串串(HKD128/揀10款,每款3串)啱晒想輕食又想有食火鍋feel嘅朋友,餐廳煮好就一大碗咁上菜,拎起真係熱到冒煙㗎!葷素加埋有42款選擇咁多,小編揀咗素菜多啲同唔辣嘅蒜蓉汁。其中右邊嘅海帶薄薄哋幾軟滑,左邊嘅麻吉燒喺魚蛋裡面加年糕,煙韌唔覺膩喎! Sonic話好多鍾意食辣嘅人會追辣,因為愈食愈過癮,所以佢哋都有爆菊花系列滿足同好。不過小編仲想有命落樓,只係挑戰5隻辣椒。 湖南小米椒干爆雞軟骨(HKD88)雖然係當日食嘅嘢之中最辣,大約接近譚仔小辣。食嘅時候記住吞晒先好講嘢,否則啲辣粉好易嗆喉㗎。雞軟骨嘅炸漿唔算厚,都幾脆,係好正嘅下酒菜呀! 嚟到當然要試埋辣吧嘅招牌海鮮大咖(HKD288/一人份)啦!呢個大盤裝咗8人分量,但唔需要按人頭落order,如果4-5人可以叫2人分量,可以留肚試埋其他小菜吖嘛。餐廳每日提供6-8款海鮮,會按時節調整款式;仲有配菜俾你揀添,豆卜、芽菜、薯條、冬瓜、生菜、白蘿蔔、土豆粉可以揀四樣,食落都咪話唔飽。湯底有唔辣嘅蒜蓉汁同分大、中、小辣嘅麻辣汁,小編揀咗小辣,惹味又品嚐到海鮮嘅鮮味,依家近距離睇吓質素點先! 膏蟹係深得小編歡心嘅,微微炸過令膏同肉冇咁易散,啖啖甘香嘅蟹膏食到流晒口流㗎! 貴妃蚌同鮑魚仔平排,明顯睇到貴妃蚌堅好肉地,一咬就嗦嗦聲。 蟶子王同魷魚筒都同樣出色,尤其係魷魚筒,好少有咁大隻,一路煮都唔會韌。 酒類可以試吓cocktail,呢兩杯係兩位老闆嘅最愛,所以用返老闆個名命名。左邊SONIC(HKD118)用檸檬草浸嘅龍舌蘭酒、蘋果汁、蘋果花茶、百香果糖水等用料調製,果香中帶甜,不過唔會甜死人。右邊YU(HKD118)用咗廣東米酒、桂花陳酒、Rum酒、菊花茶同菊花糖水調製,真係好似飲菊花茶咁清新下火喎。兩款cocktail嘅酒精濃度唔算高,唔嗆喉,喺食濃味嘢同時可以refresh吓都幾好㗎。   辣吧 地址:尖沙咀諾士佛臺1號1樓 電話:6433 3362(WhatsApp) / 2363 0313 / 2363 7288 營業時間:星期一至日:17:00-03:00

0

【連日互插 網友剝花生 虎蝦變海蝦羅生門奇案】食焦

又有海鮮偷龍轉鳳事件發生喇!今次更加曲折離奇,苦主同店主都企硬仲互相出招,搞到件事喺網上洗晒版愈嚟愈激,真係好睇過戲呀!有網友喺群組大投訴,話自己買咗虎蝦去食店加工,等咗成個鐘唔在講,上枱嗰碟仲要全部係海蝦仔!「我買二百幾蚊斤虎蝦俾佢蒸,佢竟然求其拎碟普通海蝦俾我……呢間黑店係大埔街市三樓熟食中心,大家千其唔好幫襯,極度無良商家」。 有圖有真相,虎蝦成隻手掌咁大,上枱嗰碟又的確係細咗幾倍嘅海蝦仔!呢間喺大埔墟街市嘅新樂園即刻俾網友圍插啦,仲俾人數埋佢之前有疑似偷龍轉鳳嘅前科,3隻蟹俾佢蒸,出到嚟變咗3蟹4蓋,又係唔同晒樣! 繼續鬧哄哄,苦主同店主都有接受傳媒追問,搞返清楚嘅係,苦主原来只係俾咗3隻虎蝦啫,唔係成碟分量咁誇,食店最後係有賠返$390蚊虎蝦費,但冇退返百二蚊加工費;而店主兩姊弟就同傳媒呼晒冤添,話嗰日只係見到一隻虎蝦咁大把喎,仲話開咗邊嚟蒸係一定會縮水,又話可以同海鮮檔證明,苦主的確只係喺檔口買咗一隻虎蝦!店主仲話唔想俾人冤枉,已經去埋警署備案添! 跟住又再有疑似店主嘅人喺網上po文,長篇大論反擊,「我地都希望當時人會返黎當面對質。因為你一個動作。令到我公司及我本人受到好多不公平及無理嘅評擊!」潛水幾日嘅蝦主終於又開聲喇,「夾埋樓下魚檔造假,希望警方到街市調查」。大家都似咬住大家唔放咁款!兩方都企硬各有版本,呢單奇案睇嚟仲有大把花生剝喎!

0

【撳錯掣出事 網友叫外賣pizza「走海鮮」】食焦

叫外賣有時候真係要打醒十三分精神,一唔小心噏錯揀錯都會隨時瀨嘢㗎!最近就有兩單外賣意外事件發生,真係唔知好嬲定好笑喇!首先係有連登仔話自己外賣叫千島海鮮pizza嗰陣,唔小心撳錯掣,一click揀咗「走海鮮」(有呢個俾你揀已經夠好笑啦!),仲要係送咗出舖先發現喎,想打返個電話改都遲晒喇! 結果當然係一個走咗海鮮嘅pizza送到,116蚊當食個素pizza囉!網友見到呢個po梗係笑爆啦,原来樓主係喺pizza box度叫嘅,有網友就話如果喺pizza hut叫,係會再打返電話覆實喎,但係pizza box就冇喇!最好笑嘅提議就係叫樓主即刻叫返個海鮮pizza「走pizza」,咁咪可以食返個海鮮料囉!聽落又啱喎! 其實自己手民之誤就冇得怪人啦,惟有下次醒目啲啦,咁唔關自己事,係人哋落錯單又點計呢?除咗連登仔撳錯掣「走海鮮」之外,都有另一位網友外賣出事,今次輪到係麥記,叫包唔係叫pizza!事緣係有網友去咗屯門一間麥當勞外賣叫咗個板燒雞腿漢堡包,點知店員落錯單,將「走醬汁」變咗「不要板燒雞腿」。 有圖有真相,如圖所見就係得兩塊麵包夾住幾塊沙律菜,消失的板燒雞腿真係走咗啦!好彩嘅係,網友喺拎返屋企之前打開望吓,及時發現咗,最後都換得返咋!唔係就咁食兩塊麵包就真係唔抵喇,重點係,今次錯不在自己,咁樣冇咗塊雞腿,係更加唔抵嘛!

0

【貼地茶記打邊爐出晒名 雙龍海鮮鍋鮮甜多料】玫瑰餐廳陳儀興

呢排天氣真係好似女人咁好難捉摸呀!趁住仲有少少涼意,小編約埋班fd打吓邊爐喇,早就聽聞新蒲崗有間茶記玫瑰餐廳陳儀興打邊爐好食到出晒名,梗係唔執輸去試吓啦! 今次嗌咗呢個雙龍吐珠海鮮鍋(預訂價HKD298;原價HKD308),鍋底用蔬菜墊底,有栗米、南瓜、蕃茄同菇類,全部索晒海鮮嘅鮮味,正呀! 至於主角海鮮方面就有本地龍蝦仔、貴妃蚌、蝦、大大隻元貝同大蜆,款款都超鮮甜,肉質彈牙。呢個鍋係4人分量,大家早一日預訂就減10蚊!原價係HKD308㗎。 打邊爐除咗要有好嘅海鮮,湯底亦非常重要㗎!巨龍海鮮鍋用咗多款海鮮配料熬製而成,飲落啖啖龍蝦鮮味,鮮甜得嚟又清新,最重要係一啲都唔油膩,啱晒一眾怕肥又想打邊爐嘅為食貓喇! 如果嫌食海鮮唔夠喉嘅話,店內都提供多款火鍋配料俾大家選擇。小編揀咗呢個黑松露墨魚丸(HKD98)喇,咬入口相當彈牙,仲咬到粒粒墨魚添;而且黑松露特有嘅「煤氣味」亦相當出,聽侍應講,原來呢款墨魚丸係廚師親手打㗎!果然係機器做唔到嘅口感! 另外不得不推介呢個魚鰾(HKD68),其實小編咁大個人都未食過,因為一直覺得賣相麻麻,血淋淋又脹卜卜咁。不過侍應哥哥話,「平時你哋食嗰啲花膠呀,咪就係魚鰾本人囉,曬乾咗之嘛!」咁小編即管試吓,食落係有少少腥嘅,不過咬得出啖啖骨膠原嘅感覺,好「膠」呀! 雖然係海鮮鍋,但打得邊爐又點可以唔食牛喎!呢款超正牛爽肉(HKD68)食落滑嘟嘟,從肉上嘅花紋可以睇到佢嘅脂肪比例冇一般肥牛咁高,啱晒怕肥嘅女士們呀!另外如果男士們始終都係愛肥牛嘅話,亦可以嗌埋呢個招牌手切本地肥牛(大)(HKD218),比起平時食開薄過塊紙嘅肥牛呢,呢度嘅肥牛真係好有咬口,而且好有牛味,非常新鮮!   玫瑰餐廳陳儀興 地址:新蒲崗爵祿街33A-37A號百勝工廠大廈地下 電話:3583 1123 營業時間:星期一至六:07:00-23:00;星期日:18:00-22:30

0

【味蕾最高享受!九龍城巧手上品居酒屋】Sakaya

Sakaya位於九龍城獅子石道,食物以串燒為主,主打雞、和牛同埋海鮮。選材上乘講究,全部都由廚師精心巧手製作,簡單如燒蠔亦都會嚴選北九州蠔,加上自家製醬汁配搭,處處盡見心思。餐廳環境幽靜,講究情調,最適合同朋友一齊把酒聊天! 店外放滿日式碗碟同酒樽,再加上木製外牆,喺泰國菜館滿街嘅九龍城令人眼前一亮。 餐廳室內燈光較暗,想同朋友靜靜地傾計非常適合! 北九州燒生蠔(HKD68/隻)採用北九州蠔,肉質非常鮮甜,入口軟滑。再加上自家製醬汁,鮮嫩多汁,令人欲罷不能! 白露筍黑豚串(HKD38/串)  採用黑豚肉捲白露筍,口感清爽唔會膩,白露筍吸收咗黑豚肉嘅肉汁,配上沙律醬更加有入口即溶嘅感覺。 雞掌心(HKD45/串)以人手切出雞掌心,工序十分繁複,非常考驗廚師手藝。雞掌心脂肪均勻,燒完之後香氣四溢,雞皮金黃香脆而雞肉柔嫩多汁,加上size啱啱好一口一件,真係好食到停唔到口! Sakaya 地址:九龍城獅子石道15號地下 電話:2382 6988 營業時間:星期一至日:12:00-15:00;18:00-23:00

0

【25年經驗用心烹調 大歎西貢生猛海鮮宴】Big Fish Seafood and Grill

間中入去西貢鬆一鬆,當然唔少得去大刷海鮮!就咁睇名都知Big Fish Seafood and Grill就係其中一間大賣海鮮餐嘅食肆,無論海鮮拼盤抑或意粉同飯都應有盡有,想食鮮甜海鮮就要一齊同小編去睇睇! 睇到個帳篷都知有海鮮食啦,除咗可以喺室內坐低慢慢食,仲有歎下露天風味添。 室內裝潢雅致,落地玻璃門透入自然光,加上石牆,令人感到自然舒適,坐低慢慢食餐飯就最歎啦。 招牌香燒海鮮拼盤(HKD398)拼盤包括新鮮生蠔、帶子、原隻老虎蝦、青口、沙甸魚、魷魚各三件,仲有埋薯條!樣樣食材夠晒新鮮,每種海產嘅鮮甜一次過試晒。最開心係有埋脆炸厚切薯條,食完一輪海鮮,仲可以食埋薯條夠晒香口! 仲有賣相同樣討好又多料嘅海鮮雜錦飯(HKD218)材料包括魚柳、蝦、青口同腸,樣樣食材都大大舊,尤其係蝦,極為鮮甜爽口。至於米飯質感較為煙韌,索晒海鮮嘅鮮甜味道,食落口感同海鮮亦好夾! 除咗海鮮之外,都有肉類嘅選擇㗎!安格斯肉眼扒(12oz)(HKD298)牛肉味道濃郁,食落肉汁豐富略帶彈性,仲可以揀落黑椒汁或者蘑菇汁。配菜有焗薯同新鮮蔬菜,食完豐腴嘅牛肉之後再食可以帶嚟清新感覺。 Big Fish Seafood and Grill 電話:2751 9177 地址:西貢灣景街18號地舖 營業時間:星期一至日:11:00-23:00

0

【太子浪漫美食 邂逅迷人海鮮宴】Home Sweet Home

曾經係乳酪甜品店嘅Home Sweet Home,最近喺太子原址原名大轉型,轉為大賣西餐!點解突然間會作出咁大轉變呢?因為餐廳老闆鍾意享受美食,所以除咗甜品之外,都想同大家分享各類型嘅美食!一齊去睇睇啦! 山楂蘋果茶(HKD38)作為飯前茶,飲一壺酸酸甜甜夠晒開胃。選用新鮮山楂同蘋果,輕淡嘅鮮甜會慢慢散發出嚟,味道屬於輕口味,就算幾怕酸都唔會難入口。 空運海鮮生蠔套餐(HKD588)套餐包括澳洲新鮮空運生蠔6隻、紐西蘭藍青口4隻、澳洲小龍蝦1隻、智利原隻帶子2隻、南非鮑魚5隻、韓國灰蜆7隻,仲有兩杯白酒!各樣食材都非常新鮮,特別推介生蠔非常鮮甜,入口出奇順滑,鍾意食海鮮嘅朋友可以試試! 香檳麻油忌廉汁波士頓龍蝦(HKD148)大家無睇錯,喺蝦殼邊嘅滿滿都係蟹籽,大量嘅蟹籽加上龍蝦,夠晒鮮味脆口!龍蝦下面嘅薯蓉,用上新鮮薯仔壓碎再加奶油焗,散發住陣陣奶油香味,入口香滑,薯仔迷一定會愛上! 燒扒之夜晚餐(HKD98)套餐包括餐湯,主菜有燒美國殼飼豬扒、土耳其風味炸雞、燒原條法蘭克福腸配以黑松露燒汁。食物熱辣辣送到嚟,牛油輕輕喺豬扒上面融化,散發陣陣香味,加上牛油嘅豬扒入口有融化嘅感覺!炸雞外脆內嫩,法蘭克福腸外皮好脆加上黑松露汁,味道香濃惹味! Home Sweet Home 地址:太子基隆街13號永基樓地舖 電話:2567 9808 營業時間:星期一至日:11:00-02:00