Tagged: 深水埗

0

【探索Cafés新星】《太飽喇!》網上雜誌

以前話去深水埗,你會好直覺咁諗唔係買電子產品就係去搵布,但依家可以去enjoy life喎!最近呢區開咗唔少新café,有啲會擺埋展覽、生活用品,甚至係寵物友善餐廳,當然唔少得打卡呢個元素啦。小編挑選咗四間出嚟,等你揀返間心水風格嘅café去享受慢生活。

0

【深水埗滋補小店以酒入饌 花雕藥膳雞×酒香醉物】醉藥雞

叫醉藥雞並唔係因為佢哋「最弱雞」,而係少有地以酒、藥膳同時入饌嘅主題餐廳。喺深水埗新開嘅小店主打一系列嘅醉物以及唔同嘅養生雞鍋,究竟有幾滋補?睇埋落去啦! 呢度必試嘅砂鍋醉藥雞(HKD68)少有地以雞酒做湯底,雞酒特別用咗糯米酒同三斤三黃雞嚟煮,酒味唔會太濃烈,藥性比較溫和。再加入雲耳、紅棗、淮山、薑呢啲配料,湯底偏甜易入口,特別啱女士同注重養生人士㗎。 而醉雞藥膳湯米線(HKD58)就用熬咗12個鐘嘅雞湯加入當歸、淮山、北芪、黨蔘、圓肉等八種藥材嚟做湯底,火候十足。 呢度仲有唔同嘅醉物冷盤俾你歎,啱晒夏天食呀!當中嘅花雕酒加入桂花糖調味,醉物食落酒味突出之餘又唔苦。 其中嘅原隻醉乳鴿(HKD98)切片上都依然有啖啖肉嘅感覺,乳鴿肉滲透住淡淡酒香,咬落肉質結實嫩滑。 醉物之中小編大推呢款醉蝦(HKD88),驟眼望落分量唔少亦夠大隻。而餐廳對於唔同食材所用嘅花雕酒濃度同浸酒時間都特別講究,連殼嘅蝦浸酒嘅時間會比其他醉物耐,但如果浸得太耐就會令食材變苦,所以醉蝦浸酒嘅時間就大約維持喺2個鐘。咁樣蝦肉就會同樣入味而質感依然爽口彈牙,酒香濃郁喇。 想一次過試幾款海鮮冷盤,又唔想太多就可以嗌醉三鮮(HKD75)喇!除咗醉蝦之外,仲可以試埋彈牙唔韌嘅鮑魚同花螺添。   醉藥雞 地址:深水埗福榮街103號地舖 電話:3705 0477 營業時間:星期一至日:12:00-22:30

0

【純素法式甜點網店開門市 主打低糖馬卡龍+法式撻】moono

法式甜品就食得多,但純素版你又試過未呢?專賣純素甜點嘅moono由網店起家,最近終於喺深水埗開實體店喇,除咗招牌嘅純素馬卡龍、純素法式撻、手製曲奇外,更有店舖限定嘅件裝卷蛋糕添!呢間小店嘅甜點出品無論係賣相定味道配搭都係由店主主理,甜點外型設計簡約得嚟又小清新,而且味道同製法方面都有唔少嘅突破,希望俾人知道原來純素甜品都可以好好味。新店嘅甜點每日都會轉換唔同嘅限定口味推出,咁就Keep住有新鮮感啦! moono嘅實體門市開喺深水埗嘅「合舍」內,室內木系裝潢貫徹小店簡約風格,有幾個堂食位置,但都係以外賣生意為主。合舍內亦有售賣唔同嘅文學雜誌、書本,絕對係文青們嘅好去處。 店主想純素甜點無論喺賣相同味道都吸引到人,佢哋嘅迷你法式撻就係其中一個好例子喇。左邊嘅橙花水開心果撻(HKD32)底層有濃厚嘅開心果醬,中間唧入加有橙皮嘅橙花水Cream,鋪平後再唧上自家製嘅豆乳忌廉,灑上開心果碎做點綴。而右邊嘅蘋果金寶撻(HKD32)就係小店嘅熱賣之選,內餡有自家焗製嘅焦糖蘋果,喺出面未必搵得到㗎!值得一提嘅係,佢哋嘅撻皮每日都喺自家工作室新鮮焗製,保證撻皮鬆脆。  而件裝卷蛋糕係店舖限定嘅甜品,款式會不定期轉換。當日就食到柚子焦糖純素卷蛋糕(HKD49/塊;HKD185/卷),佢嘅內餡用咗自家製豆奶忌廉,中間加入黑糖豆乳做點綴,質感軟綿綿,味道清新又唔膩。而最近卷蛋糕更出咗新Menu,將會有新口味陸續推出,大家就要期待吓喇! 當然唔少得moono招牌嘅純素馬卡龍(HKD30/塊;HKD175/6塊)啦!當日精選有海鹽黑朱古力、紅桑子玫瑰、伯爵茶、開心果、黑芝麻五款,盒裝口味可以隨意配搭,咁精緻買嚟送俾朋友都好喎! 各款曲奇(HKD58/包)都係用咗自家製嘅植物牛油,確保曲奇入面嘅材料盡量無添加。而且呢度嘅曲奇口味獨特,冇乜地方食到㗎。 曲奇總共有6款口味,包括:京都宇治抹茶曲奇、花生焦糖曲奇、無麩質嘅豆乳雪球、紫蘇曲奇配紅莓醬夾心、味噌曲奇同粟米曲奇。   Moono 地址:深水埗大南街186號地下(合舍內) 電話:從缺 營業時間:星期三至日:12:00-19:00

0

【深水埗居酒屋獨創果味和食 「蟹黃」撈飯配蘋果叉燒】夜館

可能係全港首間主打水果入饌嘅日式居酒屋?!有別於一般日式食堂,深水埗新開嘅串燒居酒屋夜館主打水果做主題嘅健康和食料理,農家蟹黃撈飯配蘋果叉燒、果味雞扒定食、特色釀雞翼等等都係呢度獨創嘅特色菜。呢度更會密密換新菜、推新品,令大家有更多新鮮感,即刻睇吓有咩好食先! 由門口入到嚟店面都有唔少日本裝飾元素,而且仲有唔同品牌嘅日本酒樽滿佈成間居酒屋,好有日本地道小店嘅感覺。 小編見黑板上大大隻字寫上廚師推介,究竟呢道農家蟹黃撈飯配蘋果叉燒(HKD98)有幾特別先?叉燒用自家醬汁加入蘋果燘煮,蘋果香味融入叉燒當中,入口清甜不膩,而且叉燒選用梅頭肉嚟煮,肉質軟腍。另外,所謂「農家蟹黃」就係蟹黃嘅平民版,用咗甘荀、南瓜同薯仔加入蟹汁壓成蓉,做法非常創新,撈飯一流。 呢款果味雞扒定食(HKD55)棄用和食常用嘅味醂同現成日式醬油,自行研發用水果調配嘅醬汁,好食兼有益!雞扒連鮮橙一齊煮,橙汁嗦埋入雞肉度,酸甜開胃。定食裡面仲唔止有一塊大雞扒,仲拼咗兩隻雞翼,相當抵食喎。 去居酒屋就梗係要食日式串燒啦,平時原隻雞翼串燒就食得多,釀咗雞髀肉嘅雞翼又食過未呢?夜館特色釀雞翼(HKD38)係呢度嘅必食串燒,師傅將雞翼拆單邊骨,再釀上撈咗杞子同淮山嘅雞髀肉,燒到皮脆肉嫩嘅雞翼串食落有兩種雞肉質感,果然係心機菜! 賣相咁搶眼嘅響鈴彩椒(HKD38)喺三色椒入面加咗少量雞肉,師傅專登唔釀得咁滿,令佢有好似響鈴咁嘅效果。燒過嘅彩椒可以鎖住釀肉嘅肉汁,都係值得一試嘅佐酒小食! 日式串燒又點止咁少喎,好似即叫即燒嘅鹽燒牛舌(HKD38[上])同鹽燒豚肉(HKD28[下])都好啱佐酒㗎。鹽燒嘅方式可以食到食材嘅新鮮原味,而串燒蘸嘅秘製醬汁都會加入唔同嘅水果嚟提味。 依家唔少地方都有得食水果串燒,其中最受歡迎就係燒菠蘿。呢度嘅焦糖燒菠蘿(HKD58)比平時就咁燒有啲唔同,師傅將原條菠蘿燒到一半之後蘸上砂糖,再燒至融化帶陣焦香,一咬落去啲菠蘿汁唧晒出嚟,夠晒juicy。 除咗嘢食,呢度嘅重點梗係日本酒啦!店主會不時搜羅唔同嘅靚酒同食客分享,仲會駐場為客人調製唔同嘅特色Cocktail添。右邊嗰杯Roku Gin Tonic(HKD88)嘅Gin酒用咗櫻花、柚子、山椒等六種日本草本材料釀造,飲落層次豐富;而左邊嘅Chita Highball(HKD98)就用咗「知多」呢款單一穀物威士忌調製而成,入口比較順滑,唔係咁多地方可以飲到㗎!   夜館 地址:深水埗長沙灣道54號地下4號舖 電話:3596 7891 營業時間:星期二至日:12:00-02:00

0

【網民控訴老扒房三大罪狀 牛扒冇肉味質素似快餐】伏務台

有時食扒都會去啲港式懷舊扒房,鋸扒之餘又食吓氣氛。但係深水埗有成40年歷史嘅飛鷹餐廳就有唔少網民俾負評,仲提出三大罪狀添!究竟出咗咩事?睇埋落去等小編話你知啦。 罪狀一:留座唔俾人入 小編喺平日1點半左右入坐,店內只坐滿三分一。唔少網民提及嘅留座問題當日都存在,明明等候嘅食客唔多,但有三分一嘅枱都放咗「留座」嘅牌。有啲食客坐好先被要求調位,而小編都無一倖免。 罪狀二:餐湯冇味 小編點咗羅宋湯,蔬菜分量足但味道奇怪,飲落好似茄汁加水咁,陣甜味好重,唔似蕃茄本身嘅原味……有賣相但內涵欠奉,同場都聽到有客人話喺屋企煲罐頭湯都好飲過佢喎。 罪狀三:鐵板唔熱,牛扒過熟冇牛味,落咗勁多鬆肉粉 嚟到扒房梗係叫返個鐵板餐啦!究竟呢份配黑椒汁嘅新西蘭肉眼餐(HKD98)有冇網民提及嘅罪狀呢? 店員會幫客人淋埋汁先上菜,不過鐵板夠熱,上菜都聽到吱吱聲,未有發生網民講鐵板唔夠熱嘅情況。不過黑椒汁太多又太鹹,已經蓋過咗肉味。小編落單要牛扒5成熟,切開都見到肉心係粉紅色,但唔見有血水。雖然呢塊肉眼扒幾厚肉又大份,但肉味淡到近乎冇,質素同快餐店牛扒不相伯仲,但質感就冇網民講嘅落勁多鬆肉粉而太鬆軟。不過配菜方面就少咗啲咁,薯條數量十隻手指數得,哂得八條!仲有啲椰菜同一塊蕃茄,而成個餐最食到原味嘅就係塊蕃茄喇。其實嚟得扒房鋸扒都係想食得滋味啲,但質素似快餐的話真係勁扣分囉……   小編伏氣:4星(5星滿分) 入伏點:飛鷹餐廳 入伏價:新西蘭肉眼餐(HKD98,另收加一)[跟餐包、餐湯同餐飲] 中伏by #MOMO 美術by #MOMO 攝影by #MOMO 《伏務台》歡迎各界報料。

0

【新斗記班底開親民價冰室 鑊氣小菜+必食農夫包】春蘭冰室

傳統粵菜館新斗記班底最近靜悄悄,自己組隊喺深水埗開咗春蘭冰室,依家可以用親民價試到佢哋嘅小菜有幾鑊氣喇!話明係冰室,食物當然唔係傳統粵菜啦,而係大家熟識嘅菜式,即刻睇吓有咩啦! 冰室設計行懷舊風,牆上仲寫咗唔少為人熟悉嘅金句俾人話當年。負責人Jessica話原來好多人唔知「二仔底」係「死跟」咁解,因為咁同唔少食客打開話題添。 係人都知新斗記嘅咕嚕肉出名,但冰室都有其他小菜飯餐一樣正斗㗎。好似麻婆煮豆腐套餐(HKD55)配埋足料老火湯、飯同熱飲,見到呢個分量都飽咗。 呢個麻婆豆腐同平時有啲唔同,加咗榨菜增加口感之餘,微辣中帶點鹹香。而且豆腐同肉嘅比例近乎1:1,都落足料㗎。 自細去大排檔都鍾意食炸嘢,呢度都有,仲好夠火喉添!椒鹽九肚魚(HKD48)比一般酒家平成截,但都有約十件左右九肚魚。脆皮唔厚,魚肉炸到啱啱熟,滑嘟嘟,不過選用大條嘅九肚魚,魚骨粗啲唔可以食埋。 其他套餐同小菜都好抵食,而且款式都係大眾熱選嘅款式。 黑椒牛肉炒意粉(HKD48)係茶室人氣食品之一,呢度嘅意粉彈牙唔會發脹,睇落油光強勁但入口唔膩喎。黑椒香氣十足,牛肉就大件爽口。 除咗行親民路線之外,西式菜對粵菜班底都係新嘗試,不過絕對冇考起佢哋喎。皇牌馬來咖喱豬扒農夫包(HKD68) 係呢度嘅必食菜式之一,大大個超足分量。但提提大家唔好打卡太耐,要趁熱熱切開佢,等面頭嘅芝士滲埋入去!豬扒幾嫩滑有肉汁,咖喱香得嚟唔會好辣,香軟嘅麵包嗦咗咖喱汁更加令人食得滋味,令小編唔記得入面仲有飯添。 就算下午茶時間嚟都一樣有正嘢食,呢款朱古力紅豆法蘭西多士(HKD28)唔止賣相吸睛,西多士仲夾咗唔少花生醬! 蛋沙律西多士(HKD31)外表平平無奇,但一食係充滿兒時回憶嘅滋味囉!成口蛋沙律但配西多士,反而冇三文治乾噌噌嘅口感,又反傳統唔係配花生醬、牛油同糖漿。 竟然玩懷舊風又點少得黑牛(HKD22)同雪糕紅豆冰(HKD22)呢啲特色飲品呢?!而且紅豆仲好大粒㗎。   春蘭冰室 地址:深水埗福華街188號海峯地舖 電話:2881 8331 營業時間:星期一至五:11:30-22:30,星期六、日:11:00-22:30

0

【度小月分店進駐深水埗V Walk 獨家限定三款魷魚主題菜】度小月

鍾意食台灣菜嘅朋友對度小月應該一啲都唔陌生,佢最近開第三間分店仲走入深水埗新商場V Walk。新店除咗有招牌肉燥飯同擔仔麵之外,更推出三款獨家限定嘅魷魚主題菜同三款夏日開胃菜,帶啲新鮮感俾大家!另外,喺8月10日前嚟食仲有全店8折嘅新店優惠添。 V Walk喺南昌西鐵站上蓋,位置唔難搵。環境開揚嘅店面仲睇到店員喺度熬煮肉燥,貫徹返度小月嘅特色。呢度過咗中午時段仍然有唔少客人幫襯,幾乎滿座! 除咗有得食一眾招牌菜之外,新店仲獨家推出三款以魷魚為主題嘅限定菜式,全部都充滿台灣地道風味㗎! 食台灣菜又點少得魷魚羹呢?呢道沙茶魷魚羹(HKD38)有濃郁嘅沙茶香味,啱晒重口味嘅朋友仔!而且每一羹都潷到大大嚿魷魚同埋紅蘿蔔、木耳絲等唔同配料,咁足料好抵飲。 魷魚筒喺台灣叫中卷,呢款三杯中卷(HKD88)亦係地道嘅台灣快炒小菜。以三杯醬汁加入香葉、紅椒絲等配料快炒,入晒味嘅魷魚口感非常彈牙又唔韌,食落好惹味呀! 而加入露筍、紅蘿蔔、紅椒絲、西芹炒嘅台式炒花枝(HKD88)面頭打咗芡,有好香嘅麻油味,但入口唔油膩;花枝片質地軟腍彈牙,餸飯一流! 新店趁住夏天加推三款夏日小菜俾大家醒醒胃。有冇聽過咩係木須肉呢?其實木須肉(HKD88)就係以嫩豬肉同木耳炒蛋嘅特色中菜,蛋炒得乾身而嫩滑。 另外,仲有薑汁蕃茄(HKD38)同清香豆腐(HKD38)兩款冷盤,涼浸浸又口感清爽,夏天食就啱晒喇。   度小月 (深水埗新分店) 地址:九龍深水埗深旺道28號V WALK 二樓L2-142&L2-143號舖 電話:8300 2003 營業時間:星期一至五:11:30-22:00,星期六、日:11:00-22:00

0

【深水埗$23粉麵平通街 潮式扎肉河+爽滑牛筋麵】平霸

個個都話深水埗好多平嘢食,今次又俾平霸搵到一間喇!呢間喺元州街嘅雲吞成麵食(潮龍園)啲粉麵最平23蚊就食到,仲要全日供應添!平霸就係俾佢呢個價錢吸引咗入去,一於幫大家試吓抵唔抵食先! 呢間舖頭嘅招牌雖然係用「雲吞成麵食」,但其實同潮龍園都係同一個老闆開嘅,所以一啲宣傳海報、用具都有「潮龍園」字樣,而入面啲裝潢都大致相同。平霸幫大家格過價,呢度啲粉麵價錢大部分都比其他潮龍園分店平添㗎! 最平23蚊嘅粉麵都有幾款選擇,平霸揀咗呢碗潮式扎肉河粉(HKD23)。成碗有5塊扎肉,其中兩塊比較薄同細塊,驟眼睇都同平時食開嘅越式扎肉個樣唔同。河粉分量都幾足,食一碗當正餐都夠飽。湯底幾清,但略嫌上枱時啲湯太多,幾乎浸過晒啲扎肉。 潮式扎肉嘅外表炸到金黃色,個樣有少少似平時啲魚片。入口好有肉香,肉質幾鬆化。因為外皮炸過,所以比平時食開嘅扎肉油,但就更香口,第一次食呢種扎肉嘅平霸表示好有驚喜! 河粉係比較幼身嗰種,不過分量幾足,啱晒極速填肚呀! 呢碗爽滑牛筋麵(HKD25)望落都幾足料喎!有4-5 條牛筋、都幾大條。湯底就同頭先唔同,加咗腩汁,有啲色水咁。上枱嘅時候同樣覺得有太多湯,見唔到啲麵,賣相差啲啲。 牛筋真係好大條,用筷子都好難夾起成條。食落口估唔到又咁幾腍,仲好入味,膠質夠重,入口基本上唔使點咬就融化咗。 一開始食會覺得啲麵偏硬身,但食食吓啲麵吸咗啲湯,湯同麵嘅比例又啱啱好,啲麵軟身咗又幾爽口。所以鍾意食軟身嘅就可以先食牛筋,等啲麵浸一陣先食就更正喇! 呢度啲麵食全部都有一羹蔥喺麵面,仲加咗啲炸蒜喺蔥入面,撈落麵度就可以令成個麵都好有蒜香。   平霸小評:平霸對呢兩碗粉麵嘅評價都幾高㗎,起碼價錢喺同類型嘅食店入面平成截先啦,粉麵質素唔錯。除咗牛筋入味夠腍,潮式扎肉令平霸覺得幾有新鮮感添!雖然之前聽聞賣得仲平,最近已加咗價,但嗌咗兩碗麵食到咁飽都唔使50蚊,仲想點?   雲吞成麵食 地址:深水埗元州街1號A地下 電話:2319 2367 營業時間:星期一至日:09:00-23:00

0

【深水埗「素」街食好西 榴槤飛餅+新豬肉咖喱小籠包】素學堂

唔使去淘寶,今次要去深水埗!事關小編要帶各位素人去食小籠包呀!喺深水埗有兩間有得食素嘅小籠包店都大受好評,分別係誠記小籠包拉麵同上海生煎皇,唔講咁多,梗係試咗小籠包有幾素先啦! 首先去到喺西九對面嘅誠記小籠包拉麵,小店由父子檔拍住上,鎮店小籠包、生煎包同芋圓等等,都用新鮮食材全人手製作㗎,難怪深受街坊歡迎啦!兩個月前仲推出咗素食小籠包,啱晒素人胃口呀! 素食小籠包(HKD57/六隻)即叫即蒸熱辣辣,小籠包嘅皮都算薄,蒸嘅時間啱啱好,唔會太腍又唔會一夾就拮穿。有成8種餡料咁豐富㗎,有素雞、木耳、椰菜、冬菇、烤麩、松茸菇、紅蘿蔔同粟米,食落口感豐富同好清甜,雖然冇乜爆汁效果,不過清清哋都好滿足呀! 另外小編仲試咗榴槤飛餅(HKD48)同芋圓鮮椰露(HKD27),如果你係榴槤控就唔好錯過喇!榴槤夠香甜、飛餅亦煎到脆卜卜,不過榴槤餡就唔算厚,但都好夠味;芋圓鮮椰露就有芋圓、南瓜圓、地瓜圓、小丸子同西米,啖啖椰香廿七蚊碗都唔錯㗎! 誠記小籠包拉麵 地址:深水埗欽洲街58號米蘭軒地下 電話:2388 3538 營業時間:星期日至四:11:00 – 23:30,星期五至六:11:00-00:30   食完誠記,之後去到大家應該都唔陌生嘅正宗上海生煎皇啦!喺香港總共有4間分店,老闆係娛圈中人,大家叫佢做生煎包王子、亦係江若琳老公Oscar蕭潤邦啦!半個月前舖頭推出日式咖喱薯仔新豬肉小籠包,唔係唔試呀? 日式咖喱薯仔新豬肉小籠包(HKD40/四隻),金黃色外皮都夠薄,第一啖已經食到咖喱味,由於用咗新豬肉(Omnipork)嘅關係,食落口感同一般小籠包好似,而汁就比誠記多啲。小編覺得咖喱味幾過癮又新奇,就算唔係素人都啱食㗎! 店內都有提供新豬肉素食套餐(HKD72),有一份主食、小食同飲品,素人可以直接揀啦! 小編今次就試咗四季豆新豬肉碎飯同芥末柚子粉皮,四季豆同新豬肉都幾夠鑊氣,小編冇諗過咁好味喎;芥末柚子粉皮就偏甜,芥末味唔算好出,不過勝在粉皮夠滑亦唔厚,一條條滑溜溜食落口好特別!   正宗上海生煎皇 地址:深水埗福榮街100號地下 電話:2723 7723 營業時間:星期一至日:11:30 – 23:30

0

【$168平食原隻松葉蟹丼 老闆:希望搵到日本味道!】茶屋町

深水埗除咗多頹飯食,其實近年都開始有唔少新力軍進駐,好似呢間茶屋町就係其中之一喇!以日本鐵路為主題嘅小店,店內有唔少布置都同火車主題有關,幾有日本風情㗎!點解揀喺深水埗開餐廳?老闆話唔係想賺啲咩錢,只係希望將佢熱愛嘅日本飲食文化帶嚟香港,俾大家都試到!佢話開業至今真係唔少客人話喺呢度搵到日本旅行時食到嘅味道,相信呢啲feedback就係老闆繼續努力嘅最大動力!  除咗店內有唔少火車嘅擺設之外,客人嘅用餐位置隔離更有一個模擬火車窗,等大家一路用餐一路想像吓喺日本火車上食便當嘅旅行氛圍。 今次小編極力推介原隻松葉蟹飯(HKD168/原價298),每日只賣10隻,夜晚6點後開始供應,賣晒就冇㗎喇!你以為百幾蚊隻蟹實係細細隻㗎?錯喇,隻蟹相當足秤㗎!其實自己買隻蟹返嚟都唔止呢個價,呢個價錢堅良心呀!提提大家,$168呢個價錢只要大家用Facebook Like&Share佢哋專頁帖子就可以享用㗎喇! 蟹蓋同蟹身嘅肉,店家已經好貼心咁幫大家起晒出嚟,再用芝麻醬作調味,大家揭開個蟹蓋就食到啖啖蟹肉,好疏肝呀!雖然用芝麻醬調味,不過醬汁酸甜得嚟並冇搶去蟹肉鮮味,撈埋蟹子拌飯食就一流喇!呢隻蟹嘅蟹腳非常之肥大,肉質非常鮮甜,大家可以問店員攞蟹鉗慢慢拆肉食! 除咗松葉蟹之外,小編覺得牛面頰飯(HKD92)同樣咁出色呀!店員話日本餐廳普遍比較少用牛面頰做料理,呢道菜係主廚用法式慢煮嘅方式鎖實日本醬油汁,Slow cook足3個鐘,夠晒腍! 平時食法國菜都有機會食到紅酒燴牛面頰,通常比較好咬口,感覺充滿骨膠原咁。今次食呢個慢煮版又有另一種感覺,食落有骨膠原嘅彈牙感之外,肉質真係好嫩喎!日式醬油入晒味,唔錯呀! 除咗主食之外都有自家製甜品㗎!材料大部份都係用日本貨,一啲都唔馬虎!呢個期間限定嘅Tea Set(HKD148)以士多啤梨為主調,總共有7款甜品,分別係草莓大福、紅豆燒餅、草莓奶凍、抹茶千層蛋糕、黃豆粉蕨餅、煉奶士多啤梨同埋芭菲。當中最吸睛當然就係呢個士多啤梨芭菲啦!自家製雪糕超濃奶香味,加埋依家當造超甜嘅日本士多啤梨,極級享受呀! 另外草莓大福同抹茶千層蛋糕亦係自家出品。大福嘅糯米皮夠晒煙韌軟糯,好有日本風味;至於抹茶千層蛋糕就犀利喇,用日本頂級嘅靜岡抹茶粉整成,甘香得嚟中間嘅cream超軟滑,正! 唔知大家知唔知道,日本人好鍾意將新鮮士多啤梨配煉奶一齊食,成件事真係好邪惡!不過日本人用嘅煉奶當然唔係我哋喺香港用開嘅鷹嘜啦,店家為咗還原日本口味,特登喺日本入呢款森永煉奶。甜得嚟冇咁肥膩,用嚟點士多啤梨真係一流呀!不過香港普遍零售店應該暫時都冇得賣嘅,大家要食就要去呢度朝聖喇!   茶屋町 地址:深水埗長沙灣道217號 電話:2660 7722 營業時間:星期一至日:12:00-22:00