Tagged: 清吧

0

【深燒好去處 雙重爆芝流心大啡菇】Lava Shao

嚟到太子酒吧街一帶,除咗飲酒仲想食少少嘢?呢間Lava Shao就啱晒你啦。佢地除咗係一間清吧之外,仲主打串燒,無論你係想食嘢定飲返杯一樣都啱你心意!而且價錢合理,飲完幾杯食返少少嘢就啱晒啦! 店內裝修較為典雅,以木為主,襯托串燒煙燻風味,配以皮製梳化椅,型格得嚟,坐得又舒服。 燒過嘅蝦爽口又彈牙,仲散發住燒烤獨有香味,去到串燒店好難抵擋呢份誘惑!蒜蓉燒黃金大虎蝦(HKD68/隻)就有齊晒呢啲燒蝦風味,仲要加埋蒜蓉仲同你開埋邊,蝦肉一夾一拉就成條拎晒出嚟食,夠晒方便又香濃滋味! 呢份鹽燒黃立䱽(HKD98/客)成條上都係98蚊一份,好抵呀!條魚燒完之後魚皮超級脆身但唔係有燶味,仲留有少少魚油,鹽燒風超香口!鍾意食魚嘅小編一人可以食晒成條! 芝士大啡菇(HKD15/件)店主話佢地試咗好多隻芝士,最終試過最好食係用2種芝士混合去整,包括深黃色嘅車打芝士同比較淡色嘅Mozzarella芝士。2種芝士混合,濃淡適中又可以輕易做到拉絲效果!一切開大啡菇,2種輕輕烤過嘅芝士就即刻流出嚟,加埋彈牙大啡菇真係好好味呀! Lava Shao 電話:23622292 地址:太子西洋菜北街320號地舖 營業時間:星期一至日16:00-04:00

0

【今晚啤一啤 長沙灣最好hea掟鏢聖地】Overtime

放工之後帶住輕鬆心情去同朋友飲返杯傾下計就最梳乎!Overtime位於長沙灣,係呢一帶比較少有嘅清吧,嚟到除咗有大電視之外,仲有6部鏢機任你掟、任你飛!想靜靜傾計又得,想點玩都得! 酒吧裝修以木同磚為主,希望有別於一般大家對酒吧「黑媽媽」嘅印象,營造出英倫風。 酒吧除咗要夠大地方傾下計之外,最緊要有埋大電視,嚟到可以睇下波、會下班花生友! 成日都有人講呢邊無乜野玩,唔講唔知呢度有6部鏢機,係附近地區之中最多鏢機玩嘅酒吧之一,都幾多人嚟呢度練鏢㗎! 店主推介Guinness Draught(HKD69/杯)(Happy Hour)苦得嚟帶甘,而且無咁多氣,唔想飲到成肚氣可以試下。 招牌炸魷魚鬚(HKD58)炸得好酥脆,唔會一舊舊粉團,用嚟佐酒一流。成班人你一句我一句,食下食下好快就無晒。 肚餓嚟到都唔怕無好野食!日式燒一口牛(HKD68)醬汁食落甜甜地好得女仔鍾意,加埋芝麻同蔥,口感更多層次,不過最緊要都係味道啱晒送酒,嚟到有得飲有得食有得玩! Overtime 電話:2866 2722 地址:長沙灣順寧道47號嘉寧閣地下B舖 營業時間:星期一至日:17:00-03:00