Tagged: 減肥

0

【薯仔無辜變增肥殺手 含抗性澱粉質幫助減肥】懶健康貼士

嚟到五月天除咗諗起台灣歌手,仲會諗起天氣轉熱喇!又要減肥喇!然後個個都話戒澱粉質,唔通真係要戒晒?當然唔係啦,因為吸收一定嘅碳水化合物,包括澱粉質、糖分同膳食纖維先可以健康咁為身體提供能量。如果真係想減量,其實可以考慮用薯仔代替飯喎,而且煮得啱係可以幫助減肥㗎,想知點解就睇埋落去啦。 每100克薯仔嘅熱量大約有80卡,但同等分量嘅白飯大約有140卡,熱量低啲,起碼冇咁易增肥先。而且薯仔都係高鉀食物,可以幫助去水腫。而薯仔皮周邊存有綠原酸,可以抑制脂肪嘅分解同吸收,減低積聚皮下脂肪同內臟脂肪,所以最好連皮食埋呀。 薯仔含有高抗性澱粉質,身體好難吸收佢嘅糖分子,反而喺腸道會轉化成短性鏈脂肪酸,而且薯仔本身係高纖食物,更加幫助腸道蠕動同穩定血糖添。不過要注意食物加熱得愈耐,抗性澱粉就流失得愈多;而且抗性澱粉質會喺腸道發酵,容易有脹氣同放屁嘅問題。 蒸薯仔妙法 薯仔本身冇咩味,好多時煮食都加入大量油同調味,甚至係芝士,咁樣食法又唔夠運動量消耗實肥啦! 其實最好用蒸或煮嘅方法,只需要少量油同鹽調味。如果蒸,可以先蒸10分鐘後熄火焗10分鐘,又可以避免長時間加熱令抗性澱粉質流失。

0

【齋啡減肥係咪真係有效? 怕傷胃飲無糖豆漿咖啡】懶健康貼士

話說小編想研究吓點解齋啡傷胃,點知彈出嘅資料多數係「齋啡減肥法」,仲見有報導話早排影到苟芸慧飲齋啡溝西柚汁減肥添。究竟齋啡減肥法堅唔堅?分量又點掌握?一齊睇落去啦! 齋啡即係將咖啡豆磨成粉,再用熱水調製,唔加任何調味嘅咖啡。好多人飲齋啡係因為提神,不過咖啡因含量低嘅咖啡就冇呢個功效喇,但飲過量齋啡會令人焦慮不安、心跳加速、血壓上升等等。歐盟食品安全局(EFSA)喺2015年建議,健康成人每日嘅咖啡因攝取上限為400毫克,單次攝入200毫克後直接做運動都冇問題;而台灣嘅衛生福利部就再安全啲,建議上限約為 300 毫克。不過記住呢啲數據計唔到對身體潛藏疾病隱患有幾大影響㗎。下面形象化唔同飲品,飲幾多等於400毫克咖啡因俾大家參考: 齋啡減肥3大因素 1. 運動前飲增加熱量燃燒15% 西班牙喺「 國際運動營養學與訓練新陳代謝」專業期刊發表嘅一份報告提及,運動員喺運動前飲齋啡會令鍛鍊效果更好,而長時間運動3小時後仲會令熱量燃燒增加15%。點解?因為咖啡因會促進血液循環、刺激腦中樞神經,令運動反應更靈敏。咖啡因仲可以降低肌肉痠痛,當做耐力訓練嘅時候可忍受更大強度訓練,所以加強運動強度要循序漸進呀。要達到瘦身效果,需要嘅咖啡劑量按體重每磅需要約2.04毫克嘅齋啡計算。假設你係110磅,運動前要飲大約225毫克齋啡喇。 2. 分解脂肪細胞 齋啡中嘅咖啡因、可可鹼同茶鹼能夠促進多巴胺同正腎上腺素分泌,令脂肪細胞開始分解,再轉化成脂肪酸釋放喺血液中俾其他器官利用。 3. 加快新陳代謝 咖啡因可以增加3-11%嘅新陳代謝率,令身體機能維持正常運作要用更多能量。   點先飲得啱? 1. 熱齋啡好過凍齋啡 熱齋啡嘅瘦身效果比凍嘅好,因為熱飲會令身體升溫,有助燃燒體內嘅脂肪同提升新陳代謝率。 2. 無糖豆漿咖啡 飲唔慣齋啡,但又唔可以加糖或奶可以點?可以試半杯熱無糖豆漿加半杯齋啡,整成無糖豆漿咖啡,因為豆漿可以調節內分泌系統同降血脂。   誤解:咖啡去水腫? 含咖啡因嘅飲品雖然利尿,但身體會先用水份沖淡體內嘅咖啡因。如果體內水份不足再飲咖啡,身體會唔夠水份排走多餘嘅鈉質,反而加劇水腫問題。如果你有飲緊齋啡減肥,記得都要飲足夠嘅水呀!

0

【教練修身拒減碳水化合物 食麵唔食飯效果又點?】懶健康貼士

上集星級教練Ivan教咗大家肌力+帶氧嘅交叉訓練,有冇跟住一齊做先?要有效瘦身,配合運動之餘,其實點樣注意飲食都好重要㗎!Ivan話有好多客人開頭都會節食先,但後來去到樽頸位點節食都減唔到,始終要做運動先可以再減多啲。點解會咁?佢話因為好多人第一樣就減食碳水化合物,梗係唔得啦! Ivan話:「有啲人覺得唔食碳水化合物會減脂得好快,一節食就唔食飯。其實碳水化合物係為身體提供能量嘅來源,咁冇咗點維持健康嘅身體呢?最初身體咪燃燒脂肪嚟提供能量囉,所以開頭會覺得有效。喺缺乏碳水化合物嘅同時,身體會減慢新陳代謝速度去減低消耗能量,之後燒脂速度會愈嚟愈慢。呢個時候如果繼續節食,你會覺得好難突破樽頸位;如果覺得有成績就食返飯,反彈速度會更加快,因為新陳代謝速度未去返高水平。所以不論瘦身定keep fit都要均衡嘅飲食同運動互相配合,咁效果會比較理想。」 Ivan修身教學有片睇:https://goo.gl/2zxuxm 究竟食幾多碳水化合物先足夠呢? 連世衞及糧農組織都為碳水化合物攝取量設定下限,睇你仲敢唔敢忽視佢!小編明白有啲人想控制攝取量就會轉食麵,咁麵比飯係咪真.低碳水化合物呢?今次我哋隨機抽樣,check咗8款麵嘅碳水化合物含量俾大家睇真啲! 註:同類型產品唔代表所有牌子。 嗱,一碗白飯大約有50克碳水化合物,同一包上湯米粉差唔多啫,但上湯米粉嘅鈉含量仲超過一日所需添,如果揀錯麵嚟食真係得不償失呀!今次搜集完數據,小編就對烏冬改觀呀,估唔到佢肥嘟嘟反而最少碳水化合物,以後如果要控制食量可以考慮佢。不過最易令人跌入陷阱嘅都係低脂蕎麥麵,每100克有1445千卡,點低脂都彌補唔到啦!買嘢食真係唔可以就咁睇個名,記得睇標籤幫到好大忙呀!其實食飯唔係致肥關鍵,反而高鹽高油嘅餸先最致命囉,各位飯桶唔使有罪惡感喇。 *鈉:每日唔好攝取超過2000毫克(即5克鹽),排唔走就變水腫喇!相關資料: 【點解水腫減唔到? 高鈉食物要睇真啲】 / 【7大茶記小菜王 咕嚕肉鈉含量最低!】   Ivan做健身教練之前只係個做文職嘅打工仔,原來佢當年仲係個瘦仔嚟!究竟佢變身大隻仔嘅健身之路,要食啲乜做啲乜?留意下星期六嘅懶健康貼士啦!  

0

【全日能量靠晒佢 活力早餐要食啲咩?】懶健康貼士

由細聽到大話「一日之計在於晨」,阿媽成日都話早睡早起先會頭腦清醒,醫生又提醒大家一日嘅能量係來自早餐,可想而知早餐對身心係幾咁有益!不過最近就有調查發現,逾兩成港人放棄食早餐,原因係想減肥Keep fit喎。 其實,食早餐食得有營,唔止可以有效控制體重,更加可以預防低血糖同心臟病,甚至患胃癌風險添!今次我就教大家點樣食早餐可以食出活力同健康嘅體魄啦!早餐嘅組合中,碳水化合物同蛋白質都要有,而且最好食複合性嘅碳水化合物,例如全麥麵包同燕麥片等,血糖比較穩定。   點先係活力早餐? 蔬果 + 奶類製品 + 穀類 水果蔬菜提供足夠嘅維他命同纖維,減少便秘嘅現象;而奶類製品就含有豐富蛋白質、穀類就含有豐富碳水化合物,有助於脂肪燃燒。如果買早餐,要盡量選擇全麥多士、全麥芝土蛋飛碟、全穀漢堡,例如:      健康活力A餐:全麥芝土蕃茄蛋飛碟+無糖或低糖黑豆漿      健康活力B餐:全穀水煮蛋牛油果多士+脫脂奶咖啡   小貼士 1. 早餐前最好先飲一杯暖水,可以補充水分仲有清理腸道作用。 2. 食早餐切忌邊走邊食,造成消化同吸收障礙。 3. 早餐熱量不宜過多,攝取量依本身體型、年齡不同會有啲差異,不過建議約400-500大卡係比較適當嘅,約佔一天需要量嘅四分之一。 4. 避免油炸、油煎、油炒同重口味油脂過多等食物做早餐,例如:薯餅、蔥油餅同炒麵等,以免造成胃腸有太大負擔、增加血脂過高嘅危險。   Michelle Lau 營養諮詢公司NUTRILICIOUS創辦人及首席營養師(加拿大人類營養學碩士)。專注範疇包括運動營養學、體重管理、兒童和婦女營養學。致力推廣均衡營養飲食概念,為多間機構提供營養飲食服務及為顧客提供度身訂造的飲食計劃 。作為一個熱愛跑步和烹飪者,她深信 “Life is so endlessly...

0

【減肥中的零食控 食一包保證跳到崩潰 】10種香港人至愛零食

成日聽到有人話食零食好肥仔,小編精選咗10款大家成日食嘅零食計一計數話你知,究竟食一包零食,要做返幾多運動啦!香港地方少,夏天又多雨,十萬年都唔做運動嘅小編以跳繩做單位,粗略計算一下,食一包零食要跳幾耐同要跳幾多下先消耗到! 撇除年齡、性別、體質等等嘅因素,一個50kg嘅人,持續跳繩30分鐘(60-80下/每分鐘)所消耗嘅卡路里係225(Kcal)。假設無論跳咗幾多分鐘都好,平均1分鐘都可以保持跳到70下左右,咁樣食一包零食要跳幾多下! *記得大前提係:1分鐘60秒裡面跳到70下呀。(Keep到話你叻) 日版固力果百力滋(沙律味) :3267下 1盒有兩包嘅百力滋原來有成350Kcal,食晒一盒兩包就要跳3267下。食晒唔駛兩分鐘,要跳走佢就要47分鐘。真係跳到樓下盞吊燈飛埋落街都未必跳完!好彩百力滋都算方便開心share,千祈唔好自私食,一個人食晒全部呀! 時興隆芝士圈 : 3258下 童年最愛嘅芝士圈(中包裝)都有349 Kcal,食一包要跳足47分鐘!好彩當年有體育堂消一消脂咋,無做開運動真係要諗諗先! 媽咪麵:2610下  出事喇,原來開一個藍毛毛演奏會所需卡路里係279.6Kcal,閒閒地都要跳繩跳返38分鐘,想開個唱真係唔做運動唔得。 繽紛樂 :2278下  唔好意思,我繽紛樂緊……脆卜卜嘅朱古力外皮真係會令人忍唔住口食完一啖又一啖,不過小編話你知1包繽紛樂有成244Kcal,食1條就要繽紛樂33分鐘!唔想跳2千幾下,都係分幾格比人食啦。 童星點心麵(炒麵味) :1876下  前排轉咗吉祥物嘅童星點心麵,好多人都鍾意就咁倒晒入口,原來細細包都暗藏200.9Kcal!食晒成包唔駛1分鐘,但要消耗佢呢,就要27分鐘喇。 泰版熊仔餅:1672下  之前伏務台介紹過泰版同日版熊仔餅嘅分別,比較常見兼易買嘅泰版有179.1Kcal,玩下手就要跳24分鐘,都唔講得笑。 卡樂B蝦條(原味):1578下  睇戲良伴非蝦條莫屬。中包裝有169Kcal,要跳23分鐘,比起薯片算抵食。唔想做咁多運動,呃蝦條食之前都係要諗下先。 卡樂B熱浪薯片 :1270下  唔少香港人都係食熱浪食到大,原來細包裝已經有136Kcal,細細包已經19分鐘,諗諗下都係唔好再得閒就塞落口先得。 魚仔餅(紫菜味) :1247下  童年回憶其中一個經典,紫菜味魚仔餅1盒133.65Kcal,一跳就係18分鐘。最伏之處係食完唔覺自己食咗嘢,飽足感近乎零,好易搭單食其他嘢又要瘋狂跳。 善字魚肉腸(原味):327下 雖然包裝麻煩又難開,但係得閒無事食返條心情真心好!殘酷嘅係1條有35Kcal,食1條就要跳327下,救命呀! 入伏點:祥華食品公司

0

【夏天消暑恩物】粟米鬚茶

身為一個專業foodie,識飲識食之餘,要懂得愛錫自己身體,保持住身體健康先可以繼續放肆食好野架嘛!我都好明白,大部份人都好難乖乖地每日食得非常健康,所以就下決心開個專欄寫D輕鬆易明嘅健康貼士,等你地懶係健康一吓!希望大家會繼續支持我依個「懶健康貼士」專欄啦。 廢話就講完喇!想推介一下2+3出品,清甜粟米鬚茶。重點係,好飲!產品由新鮮粟米鬚連埋個粟米芯煲足成粒鐘,加入冰糖調味入樽,絕對飲得出真材實料,到期日又短(所以我信佢所講冇防腐添加劑),我成個夏天飲完一支又一支! 夏天消暑恩物?唔係我亂講架。 粟米生喺長過程會俾粟米皮包住,需要透過粟米鬚吸收營養,所以粟米鬚入面有好多營養成分!粟米鬚有效去除體內濕熱,利尿去水腫,係非常好嘅減肥去水瘦身飲品。其中包含營養物質可以速進人體新陳代謝,令皮膚更加細嫩光滑!所以韓國好多貪靚嘅女士都勁鍾意飲粟米鬚茶消暑架。 降三高? 高血脂、高血壓、高血糖嘅人飲左,可以降血脂、血壓、血糖。 對孕婦都有好處? 無錯!幫助預防習慣性流產、妊娠腫脹、乳汁不通問題! 零售地點? 自己去2+3網站搵啦 http://2plus3.com.hk/index.htm 唔想買,想自己煲,其實都好簡單,將新鮮粟米鬚連埋個粟米芯煲一粒鐘,加冰糖,搞掂!怕麻煩?Share依個blog俾你呀媽睇,叫佢煲俾你飲,搞掂!