Tagged: #滋潤

0

【皮膚乾爆叫救命 驅寒滋潤梨薑茶】懶健康貼士

冬天又凍又乾燥,皮膚唔好好保護就極易爆裂,搞到流血真係好無謂,快速煮個梨薑茶俾自己潤吓啦。 梨 —— 有「百果之宗」之稱,但生同熟嘅功效都唔同。生食對呼吸道感染、聲音沙啞同便秘嘅症狀都有療效;而熟食就對滋陰潤肺、止咳祛痰有效,所以好多媽媽冬天都會煮梨水㗎。不過梨始終偏寒,寒咳、胃酸較多、脾虛嘅人都唔應該過量進食。 薑 —— 除咗促進血液循環,手腳都快啲回暖。佢仲有抗炎功效,可以舒緩運動傷害或勞損關節引起嘅炎症。 梨薑茶 材料: 水 1L 水晶梨 1個 薑4片 黑胡椒 半茶匙 熟松子仁 半湯匙 蜂蜜 半湯匙 1. 把梨切成8件去芯,薑片切絲; 2. 每件梨釀3粒黑胡椒; 3. 水滾後放入梨同薑絲煮15分鐘; 4. 放涼之後加入熟松子仁同蜂蜜就飲得喇。光速注入水份,水嫩肌返晒嚟。

0

【秋冬認住呢隻色 橙黃色蔬果滋潤肌膚】懶健康貼士

有時覺得已經飲好多水,但都仲係好似皮膚乾乾哋?因為皮膚唔識鎖水囉!要皮膚識得正常運作就要好好保護細胞,維他命A可以加強細胞嘅保護同再生能力,幫助皮膚保持滋潤狀態。 維他命A常見於橙色或黃色嘅蔬果,佢哋嘅抗氧化能力可以舒解皮膚乾燥問題,保護皮膚不受外界環境的刺激和損傷;而大多數橙色食物都含有維他命C,可以幫助製造膠原蛋白,修復身體受損組織。依家就帶大家睇吓有咩橙橙黃黃嘅蔬果,佢哋除咗維他命A同C仲有好多營養㗎。 南瓜含有澱粉、蛋白質、維他命B族、鈣等營養,對咳嗽、美容、補中益氣、降血糖、止渴等都有療效,所以糖尿病患者都幾啱食㗎。南瓜仲含有豐富嘅鈷,可以活躍人體新陳代謝添。 木瓜含有豐富木瓜蛋白酶,可以將脂肪分解為脂肪酸,佢仲有一種酵素,可以消化蛋白質,幫助消化同吸收營養,有健脾作用。 燈籠椒有黃色、橙色、紅色同綠色,但係論營養價值只有黃色同橙色含有逾雙倍嘅維他命C,幫助吸收鐵質,所以貧血嘅朋友可以食多啲。 紅蘿蔔嘅纖維促進腸道蠕動,而當中β胡蘿蔔素係脂溶性,要同時食埋油份先可以令身體吸收到,所以建議煮過先食會好啲。 檸檬嘅檸檬酸可以防止同消除皮膚色素沉澱,亦對支氣管炎、百日咳同食慾不振都有療效。但係有胃潰瘍或胃酸分泌過多嘅人就唔好食太多喇。 橙有增強血管彈性嘅作用,橙仲含有果膠,能幫助將體內脂肪同膽固醇排出體外,變相降低血脂。