Tagged: #漢堡包

0

【灣仔新店手製漢堡配咖啡 泰式生菜包+三牛漢堡】Mad Burger

食漢堡包就要飲汽水?灣仔呢間新開嘅小店就話你知原來漢堡配咖啡都可以好夾㗎!Mad Burger主打創意特色漢堡,自家製嘅漢堡扒用咗三種牛肉mix出嚟,牛味突出。佢哋更自創出一款泰式肉碎生菜包漢堡,真係成個肉碎生菜包夾喺Burger入面,夠晒創新啦!除咗漢堡之外,佢哋將咖啡呢個元素配漢堡做pairing,唔知又會擦出啲咩火花呢? 呢間漢堡新店店面以白色水泥簡約設計,同外國啲小店一樣咁Chill呀!而呢度係以外賣生意為主,店內只有兩張Bar檯、幾個座位,但就少有地見到漢堡店有一部專業級嘅咖啡機坐鎮喎。 佢哋嘅Burger選擇唔算多,勝在款式夠特別,就連最Classic嘅Right Mad(HKD78)喺度都唔簡單㗎。入面嘅牛肉漢堡扒係自家製,由本地牛小扒、牛腩同美國牛肩胛扒三種部位嘅牛肉,加入牛油blend埋一齊;牛油可以鎖住漢堡內嘅肉汁,食落有牛味之餘仲juicy啲添!另外,Burger內夾咗炒香嘅焦糖化洋蔥嚟增加甜味,成個感覺好和諧。 應該大部分人都同小編一樣冇諗過泰式肉碎生菜包可以做Burger啩?!呢度就好有創意咁研發出呢款Thai Mad(HKD78)喇。佢哋跟足泰國傳統做法炒泰式肉碎,加入金不換、檸檬葉、泰式辣椒粉同米碎等材料一齊炒香,入口微酸都幾開胃喎。 仲有一款素食嘅選擇就係Veggie Mad(HKD78),以牛油果做主角,同樣加入炒過嘅洋蔥,食落味道層次豐富唔單調。Burger除咗單嗌之外,仲可以加配自家製薯條(+HKD20)添。冇錯呀,呢度連薯條都自己整,真係好’Mad’!將本地黃肉薯仔去皮切浸冰水再切條,先焗一次,等客人落單先拎去炸,咁樣會令薯條表面更薄脆,薯仔香味亦會比較重。 小店好有創意咁將Burger同咖啡組合埋一齊,原來咖啡嘅香味係可以提升肉本身嘅炭烤風味,層次都唔同啲!而呢度選用本地烘焙嘅咖啡豆,其中比較特別嘅係呢杯Dirty(HKD38)。以冰凍嘅鮮奶做基底,面頭再加入熱辣辣嘅Espresso,飲嘅時候兩者就慢慢融合埋一齊。 小編當日嘅Pastas of the Day係香辣魷魚意粉(HKD88),以意大利傳統Agli E Olio方式用香蒜、橄欖油同辣椒炒香意粉,再加入新鮮魷魚,鮮甜惹味。   Mad Burger 地址:灣仔灣仔道181A-181G號長春大廈地下A號舖 電話:6792 5926 營業時間:星期一至日:12:00-19:00

0

【太子小店有包食有衫賣 招牌手工漢堡陀地西多】包販子

最近小編喺太子行街周圍逛,發現「太子酒吧街」附近有間Logo設計得幾Cute嘅包販子,望吓門口嘅Menu,係間專賣Burger嘅Café喎,望落都幾闊落。 上次經過嘅時候發現人客幾多,於是小編今次揀平日下午先去,環境幾舒服。 見到牆上用粉筆畫嘅公仔同Menu都幾可愛,另外門口有個Corner係賣餐廳Logo嗰個公仔嘅周邊產品。好少見到餐廳會用自己Logo做Tote Bag呀、名信片咁,感覺幾新奇呀! 老闆阿鋒話,坐喺靠牆嗰張枱嘅係一位本地設計師,名叫嘉寶。成間舖頭嘅設計都係佢負責,阿鋒話嘉寶同餐廳嘅關係既係一部分,又係獨立嘅。有時候客人入嚟食嘢見到佢嘅作品會幫襯,又有客人專為嘉寶嘅作品慕名而來,順便坐低食個Tea。呢種似係合作又非常獨立嘅經營模式幾新鮮!一間有Designer坐鎮嘅餐廳,小編feel到唔止係一間for醫肚嘅地方,反而比較似一個放鬆自己嘅小場所,有種台灣文青咖啡店嘅悠閒感覺。 梗係要試吓Burger啦。小編今次叫咗青咖喱軟殼蟹包(HKD78)同北京填鴨包(HKD62)。呢兩款食物就食得多,夾入Burger入面都係第一次。軟殼蟹炸得非常酥脆,雖然夾咗落包仲落埋沙律醬,但都冇因此變腍,咬落依然脆卜卜,仲食到蟹膏嘅甘香味,食材質素滿分呀;另外填鴨包亦冇我想像中咁油膩,清爽嘅青瓜絲同鴨絲夾埋北京填鴨專用嘅甜麵醬,一啖過咬落去肉+醬+青瓜食晒,完全滿足到填鴨迷嘅口腹之慾呀! 阿鋒話:「專整Burger嘅小店,其實真係多到十隻手指都數唔晒。我希望帶啲新鮮感俾客人,同時又令自己嘅競爭力高啲咁!」。如果只係賣手打牛肉漢堡,要連鎖有連鎖、要小店有小店,要突圍而出唔係咁簡單。所以呢度嘅賣點除咗餡料比較古靈精怪,大部份都係Handmade嘅。「好多人為咗慳成本同慳時間,會買現成嘅嘢返嚟砌埋就算。不過我就覺得既然自己識,冇理由唔做啫!」。 阿鋒做廚師做咗十幾年,入廚經驗當然非常豐富啦!不過今次就係第一次做老闆,「係有啲唔慣㗎!身份唔同,諗嘢嘅角度都唔同。以前會覺得『點解明明有隻靚料貴少少唔用,死都要慳嗰少少用隻平但質素差一截嘅?』呢個就係廚師同老闆嘅分別,老闆係唔會明白貴嘅食材同平嘅分別,淨係知要用最低嘅成本賺最多錢咁囉,不過佢又冇錯喎,咁佢係老闆嘛!但依家我個角色又唔同,我既係廚師又係老闆,用料我可以自己話事,亦都易啲做到平衡……其實係辛苦過打工好多,搵錢又少啲,要顧慮嘅嘢好多,不過咁講啦,有種自由係打工嘅時候冇嘅。」。 除咗手工Burger,甜品亦係招牌。陀地西多(HKD66)好受歡迎,除咗賣相靚,食落都好特別!不過一個人食就有啲heavy喇,底層係自家製港式西多,老闆將佢做成圓形,西多外脆內軟,加埋頂層嘅花生醬雪糕,再淋上焦糖醬同灑上花生碎,超邪惡啊!  另外呢個用點心籠裝住嘅會溶嘅流沙包(HKD22/件)同樣係handmade嘅,口感有少少煙韌,食落竟然係鹹蛋黃嘅味道,好特別!雪糕上嘅流沙滿瀉,拎起食嘅時候要小心啊!   包販子 地址:太子通菜街254號地舖 電話:2656 5605 營業時間:星期二至日:12:00-22:00  

0

【黑椒漢堡攝影大賽又嚟 高登仔一人一張過招】食焦

麥記又回歸咗黑椒漢堡啦,即係高登仔又要做嘢,之前趁麥記推出嗰陣,又再推黑椒漢堡攝影大賽,截止日期係今日喎!呢個咁深入民間嘅攝影大賽,真係高手在高登喎!睇吓嗰三大參加條件啦,「1. 一定要係出自麥當勞既黑椒漢堡 2. 一人一個reply只可以貼一張 3. 禁用真屎」! 重點係,最緊要多汁啦,記得落order嗰時就要叫多汁呀,咁先至可以影出一張爆汁嘅靚靚黑椒漢堡相嘅!開咗po之後,高登仔一人一張影出嚟啦,有啲真係爆晒汁,但係有啲就相反,乾過沙漠呀仲!熱心高登仔就有好提議喇,「要影得靚,除咗角度,個包嘅濕潤度都好緊要」! 其實每次嘅黑椒漢堡攝影大賽,最想睇嘅就係有幾核突影到有幾核突啫!爆晒黑汁嘅效果梗係最得高登仔歡心啦!除咗濕潤度要夠,有高登仔再有溫馨提示㗎,就係一不做二不休啦,「其實呢個世界仲有樣嘢叫茄汁可以加埋落去」;「唔爭在加埋粟米」……真係夠晒創意呀! 仲有個永恆嘅問題係,如何可以食到唔會成手都係?高登仔話次次食親黑椒漢堡,唔止成手都係喎,仲食到連件衫都係喎!咁呢個先係黑椒漢堡嘅魅力啫!黑椒漢堡回歸咗喇,又令高登仔懷念起消失咗嘅咖喱漢堡喎!唔知幾時又推返個咖喱攝影大賽呢?

0

【兄妹檔炮製手工漢堡包 慢煮牛堡爆汁熱賣】嘉寶漢堡

邊個係漢堡迷?係就留意吓喇,喺尖沙咀嘅嘉寶漢堡口碑唔錯,呢間以港式手工漢堡包為賣點嘅小店,堅持用慢煮方式烹調漢堡,目的就係為咗保持肉質嘅最好質素,咬落去啖啖咁juicy,加上小店嘅價錢超級親民呀!呢間小店由兄妹檔組成,Mable同哥哥之前已經喺葵涌開咗間嘉寶小食,開頭抱住「試吓先」嘅心態,結果由小食到漢堡包都深受街坊歡迎,生意仲好穩定!下一步,梗係想衝出葵涌,於是就開埋尖沙咀店! 由葵涌嘅嘉寶小食到尖沙咀嘅嘉寶漢堡,呢對兄妹檔都堅持慢煮方式最少90分鐘,保證肉質多汁好咬!雖然新店租金比葵涌店貴成三倍有多,兩兄妹都決心博一博。 新店環境唔錯,仲有落地玻璃,感覺好開揚,配合以木為主嘅裝修,令人好舒服,食住burger都可以好hea好chill! 漢堡包款式有牛、豬、羊,雞同蝦,仲有素漢堡賣!每個漢堡即叫即做,大概等5-6分鐘就有新鮮熱辣漢堡送上。 蜜糖芥末菠蘿豬堡(HKD35),漢堡包先放入多士爐烤熱,微脆外層加上秘製醬汁同芝士溶入包內,超大塊菠蘿伴蜜糖配豬扒,加埋生菜同蕃茄,即時中和油膩感。 自家芥末籽同蜜糖混成嘅芥末醬係靈魂,食落香濃帶有微辣,配埋菠蘿一齊食好開胃! 黑松露芝士牛堡(HKD48),真空慢煮牛堡最少90分鐘,明顯更能鎖住肉汁,juicy到爆; 濃濃嘅黑松露加埋沙津醬味道獨特,係店內最受歡迎漢堡包之一呀! 香辣牛脷堡(HKD36),坊間比較少見到呢款burger,單係慢煮牛脷都要用上兩日時間,真係用心製作!成個包辣辣哋,牛脷煎得夠香,加埋烤炒過嘅洋蔥,好惹味呀! 生菜同蕃茄新鮮爽脆,整體平衡得好好,唔會過於油膩,而醬汁雖然微辣但同牛脷又好match喎! 每款漢堡包都大大件分量十足,加多15蚊可自選升級套餐,會有埋一款小食同一罐罐裝飲品,抵食呀! 蕃薯條(HKD20)即叫即炸,香脆可口,完全唔需要點茄汁或其他醬料已非常夠味,食落甜甜哋,分量又多,食厭咗薯條可以叫呢款試吓! 孜然雞翼(HKD20/3隻)同樣即叫即炸,上面嘅孜然食落辣辣哋,雞翼外皮又脆卜卜,有驚喜! 嘉寶漢堡 地址:尖沙咀金巴利道78號金輝閣地下A號舖 電話:9521 4405 營業時間:星期一至日:12:00-23:00

0

【灣仔港式包店人氣勁 17蚊煎蛋漢堡爆juicy】平霸

講起漢堡包,原來灣仔都有一間港式老字號㗎!樂景快餐店喺灣仔好出名,稱得上係街知巷聞唔係誇張喎! 當中最出名梗係漢堡包啦,最平14蚊就有交易,真係非常之抵呀! 雖然舖位細細,但人氣不減,一直都有好多熟客幫襯。 蛋漢堡包(HKD17),漢堡扒用上新鮮牛肉再用手打,漢堡扒分量十足,加咗啲洋蔥喺入面,食落非常juicy,口感一流!麵包夠鬆化,醬汁用返最傳統嘅蕃茄醬,食落帶點甜,好有小時候嘅味道,令人好回味呢!加埋隻流心半熟蛋,好正! 滷水雞翼(HKD9/2隻),睇色水似乎醃到入晒味咁,不過食落真係鹹咗少少囉!食完漢堡包唔夠飽,食多兩隻雞翼啱啱好! 平霸小評:今次嚟到老字號幫襯,老實講,座位唔算多亦真係幾逼吓,但店員好醒目,即刻清咗個位俾小編坐,服務唔錯喎;仲會主動問客人使唔使將個包切半易啲食,超細心呀! 樂景快餐店 地址:灣仔巴路士街17號地下 電話:25721843 營業時間:星期一至六:07:00-21:00;星期日休息 《平霸》平食四方,歡迎各界報料。

0

【大熱漢堡4區巡禮 爆芝爆肉流心大包圍】時新漢堡飽、Top Blade Steak Lab、Vortex American Snack Bar、MR&MS BURGER

依家潮興食Burger,最好就大件夾抵食啦!我哋就同大家精選咗4個區,由港式、美式同英式都搵到Burger之最,一齊食盡佢! 黃埔代表 港人港味 時新漢堡飽喺黃埔重開直頭係港人福音,那些年嘅回憶返晒嚟!好多公公婆婆同學生哥都去幫襯㗎。 單層漢堡包(HKD20)係時新第一代嘅「雜港包」,只係依家嘅漢堡扒轉咗用純牛肉,唔係早期咁溝雞肉同豬肉,依家兒童餐都係跟呢款包。入口一食到沙律醬,嗰種味道仲令你想講「係香港嘅味呀!」。 單層可能唔夠大人攝牙罅,雙層漢堡芝士蛋包(HKD30)就豐富得多。呢個配搭非常Juicy,加上煎到啱啱好嘅蛋同惹味漢堡扒,真係必食首選。不過重開之後大家都好踴躍支持,所以雙層漢堡包嘅供應會隨機應變,轉做只賣單層款式,因為老闆想嚟到嘅人都可以試到時新嘅包。   時新漢堡飽 地址:紅磡德康街398-402號黃埔新天地家居庭地下G22-G23號舖 電話:2387 2868 營業時間:星期一至日:11:00-20:30   何文田代表 英式風情 喺何文田嘅Top Blade Steak Lab專賣Flat Iron牛扒(牛肩胛部位嘅翼板肉),但都會用嚟整Burger。Flat Iron肉質軟腍似牛柳,但又似西冷扒咁肉味香濃,不過要花時間挑筋,所以少地方賣囉。 輕怡版漢堡包 (HKD68/平日12:00-16:00供應)用咗半份牛扒整成,夾住成片肉見到都為之瘋狂!裡面仲有自家製嘅原粒醃蕃茄,令成個包更加Juicy!知大家想健康啲,所以沙律醬溝咗藜麥。跟埋一份黑松露鹽味薯條,又飽又抵食! 大胃王可以食新出嘅終極漢堡包餐(HKD160/全日供應),塊漢堡扒用咗兩款牛扒嘅肉整成,有7安士咁多,小編一啖只係咬到成個包2/3嘅厚度咋。個包仲夾咗兩款芝士、墨西哥脆片,所以配咗啲醃紫洋蔥、蕃茄同沙律菜,少少酸味味令你冇咁滯。今次薯條可以無限任食,唔少人都會re-order,因為真係幾脆口同惹味。呢度兩款包都想俾大家食到多啲牛嘅原味,唔會用太多醬汁去封殺你嘅味蕾,反而用多啲蔬菜去令Burger增加口感同清甜嘅口味。   Top Blade Steak Lab 地址:何文田梭椏道4A號榮英大厦地舖 電話:3956 2011 營業時間:星期二至日:12:00-16:00,17:30-22:00  ...

0

【80後創業開Café 免加一 慢煮德國豬手賣斷市】CAFE 1980s

一班80後好懷念細個嗰陣食得開心又簡單嘅生活,於是喺荔枝角開咗賣點「無味精!免加一!」嘅CAFE 1980s。呢度啲食物有創意得嚟仲幾抵食添! CAFE 1980s座位唔少,老闆想大家輕鬆啲,仲用返兒時食品同玩具做裝飾,大家有冇回憶返緊嚟呢?佢哋有兩款食肉獸啱晒嘅食物做緊HKD50優惠*添: 第一款係法國農家白酒忌廉烤慢燉春雞(原價HKD88),用60-65日嘅春雞,好嫩滑,切開都幾多肉汁。唔好睇少佢,食晒半隻雞其實都好飽。 第二款係蜂蜜烤慢煮去骨德國豬手(HKD78),幾乎日日賣斷市,想食要早啲嚟呀!豬手仲真係由德國返貨,肉質軟腍啲。味道甜甜哋,都幾Juicy。 *只要Like TOO FULL FOR FOOD同CAFE 1980s嘅Facebook,就可以由即日起至5月17日內享用呢個優惠喇!(供應時間為每日晚市6點半後開始)如有任何爭議,Too Full For Food Ltd.及CAFE 1980s保留最終決定權。 呢度Lunch最受歡迎之一嘅和牛車打芝士漢堡配粗薯條(HKD88),個包脆脆哋幾有口感;雖然有大大塊漢堡扒、芝士、沙律醬,但有生菜同洋蔥中和返,好似冇咁罪惡啦。 想輕食啲有特色野菌釀茄子船瑞士汁(HKD58),入晒味嘅焗茄子配大量雞髀菇、冬菇、本菇,好有口感!仲有沙律菜,啱晒OL同素食朋友啦。 蘋果醋烤豬扒飯(HKD68)煎得幾嫩滑,味道酸酸甜甜,主要靠蘋果提味,所以冇咩落糖,都算健康㗎。 仲有個必試D24大菠槤(HKD48)!大量嘅馬來西亞頂級榴槤D24配牛角包已經好香,加埋兩球雪糕,真係冇得頂!當然個名就仲頂癮啦! 想消滯不妨試吓士多啤梨檸檬果茶(HKD25),微酸嘅感覺都唔錯。 另外有玫瑰花果茶(HKD28),都幾清香㗎。   CAFE 1980s 地址:荔枝角青山道538號半島大廈地下G1-G2號舖 電話:2780 3015 營業時間:星期一至六:08:00-22:00

0

【將軍澳有間高質漢堡店 老闆話要享受食物呀!】Vortex American Snack Bar

有時候想食到美式漢堡唔一定要到中環嘅,依家將軍澳屋苑就有間Vortex American Snack Bar,老闆阿Ken喺澳洲讀過兩年廚,因為熱愛美式文化,所以返到香港就開咗間名為Vortex嘅美式小食店,希望可以吸納多啲人去佢個漩渦到,一齊chill吓,relax吓,希望大家唔好睇價錢,而係要享受食物嘅質素,享受人生,chill your life。 洛杉磯漢堡(HKD108),阿Ken話係特登為呢間舖而特別設計嘅。入面主要係煙燻豬肉,冇牛嘅成份,咁就啱晒啲唔食牛肉嘅朋友仔啦。 而且入面有腸仔,所以食落嘅口感係比較脆身。而且仲用咗Bagel嚟夾住,一啲都唔乾身喎。 芝加哥漢堡(HKD138),呢個簡直係巨無霸嚟,雙層芝士同雙層牛肉,勁爆juicy!超好食呀!而且啲肉啱啱好,唔會過熟,仲會見到啲粉紅色,食到小編舔晒脷呀!再配埋薯片同牛油果醬,真係OMG喇! 德州燒牛肉(HKD78),呢個價錢食到咁嘅質素絕對物有所值!分量一啲都唔嘢少,而且好鮮,牛味又好重,好受客仔歡迎㗎。 帕爾馬火腿薄餅(HKD128),估唔到漢堡出色,連薄餅都咁高質呀! 勁足餡料又勁夠味,濃濃嘅蕃茄醬,加埋啲芝士同火腿一齊食,真係好正㗎! 馬介休(HKD18),比較少有嘅小食,入面係用咗鹹魚同薯蓉一齊做,食落口感滿滿,未食過嘅可以一試㗎。 Vortex American Snack Bar 地址:將軍澳將軍澳唐明街1號富康花園地下46號舖 電話:2388 7133 營業時間:星期一至日:18:30 – 03:00

0

【回頭率爆燈! 豬頸肉×烤菠蘿漢堡至尊】Burger Lab

99.9%嘅人離開校園就唔會再入實驗室,但喺佐敦嘅Burger Lab你一定會入完再入,用料新鮮、份量足唔在講,兩位老闆仲試驗咗好多醬料同配料嘅mix and match,令每款漢堡包都別有一番風味。 等候嗰陣完全睇到漢堡製作過程㗎。 小編好鍾意呢度嘅包整得又香脆又鬆軟,強烈推介嘅係烤豬頸肉漢堡(HKD58),大大塊豬頸肉用叉燒醬同蜜糖醃,烤完會有少少焦香。中間仲有件20mm厚嘅烤鮮菠蘿,咬落啲汁會爆出嚟,要拎定紙巾食呀,成個包同沙嗲沙律醬仲好夾添。 特級牛肉漢堡(HKD88)嘅特選美國牛肉雙層漢堡扒肉味好濃,只需要極少黑椒吊味,你仲可以揀要幾成熟,老闆就話有客人試過五成熟都好得。如果想再juicy啲可以篤穿隻水煮蛋,啲黃會流晒出嚟。再配上煙肉、蕃茄、生菜、美式芝士同微微酸甜開胃秘製燒烤醬,真係食到舔舔脷。提一提各位細食Lady,成個包差不多13cm高,驚太飽可以揀返經典款。 日燒吞拿漢堡(HKD88)用吞拿魚刺身嘅肉整漢堡扒,為咗保持鮮嫩口感唔會煎到全熟。大蒜都幾多幾辣下,連埋用日式照燒醬煮嘅本菇一齊大啖食會更好,因為有啲甜味中和返。 新鮮即炸芝士馬鈴薯條(HKD28)配秘製醬汁甜甜地,再灑上芝士粉都唔覺好Heavy,小編覺得唔點茄汁仲好味。 7月開始仲會有神秘新品推出——小店試管漢堡,老闆試咗咩食物夾得好先有得買,每個月都唔同㗎。   Burger Lab 地址:九龍佐敦庇利金街14-22號3號舖 營業時間:星期一至日:11:00-21:00 電話:9213 3315