Tagged: 灣仔

0

【灣仔新扒房獨賣頂級牛扒餐 安格斯肉眼×任食薯條】Moo Moo’s

如果你係牛魔王,一定要試灣仔新開嘅Steakhouse Moo Moo’s!呢度只有一款牛扒餐(HKD298),自然要夠高質先可以滿足大家要求啦。餐廳選用USDA Prime嘅頂級安格斯肉眼,仲係原件牛肉入貨,再自己解肉,務求令肉質保持新鮮,依家睇埋成個set包咩先。 餐廳座位唔多,英式裝潢感覺幾高級,如果黃昏時間嚟仲睇到少少日落添。 前菜先食香口鬆軟嘅自家製餐包,可以搽肉桂醬,怕甜嘅朋友可以落鹽調味,都幾特別㗎。仲有分量十足嘅田園沙律,配埋溏心蛋更顯心思喎。 跟住到重頭戲8安士安格斯肉眼扒喇!為咗配合唔同人嘅口味,亦俾大家有多啲體驗,隨餐有鹽、黑椒、自家製黑椒牛油汁、自家製辣醬俾你蘸。 USDA Prime嘅等級已經幾高,肉質好軟腍易切。小編建議大家先試原味,因為佢肉味非常濃郁,而且本身用牛脂整成嘅牛油煎香,再滲咗啲迷迭香嘅香氣都好有層次,唔加味都好出色。而醬汁方面配自家製黑椒牛油汁就令牛味更突出,辣醬反而有少少蓋過肉味。 任食薯條即叫即炸,入口外脆內軟,時間控制得啱啱好。 想有更完美嘅配搭可以升級配紅白酒(HKD69/杯),或者加配甜品(HKD59)。甜品款式稍後可能會有調整,但呢個朱古力布朗尼都好吸引,唔算好甜膩,配埋雲呢拿雪糕係雙重享受呀!   Moo Moo’s 地址:灣仔軒尼詩道239號18樓 電話:2387 7168 營業時間:星期一至日:12:00-14:30,17:00-22:00

0

【人氣雞翼專賣店$98起任食 灣仔新店開業「一齊叫雞」】Wingman

香港有幾間炸雞專門店,其中港島區嘅Wingman就喺灣仔開咗新店,而且全線推出全食雞翼放題呀!想試齊佢哋所有雞翼一定係揀頂級任食套餐啦,不過想食平啲都可以試到3款指定雞翼嘅,依家睇吓有咩選擇啦。 灣仔店有兩層,上層有請畫師嚟畫上代表性牆畫,仲有羽毛吊飾做裝飾添。 任食套餐(HKD98起)有5個選擇,或者lunch想小試牛刀亦得。 13款雞翼口味基本有乾濕兩類,有辣到爆炸嘅,有經典口味嘅,亦有吉列豬扒呢啲好像真又有趣嘅味道。不過店主之一嘅Jack,佢現時其中最鍾意嘅雞煲口味就冇包喺任食套餐之中,要另外order。 如果食2小時All You Can Eat任食放題(HKD350/位),咁就可以試勻13款雞翼、所有nibbles同配菜。小編都試咗其中三款配菜,都好有驚喜㗎。 平時小編好怕食牛油果,覺得質感太蓉蓉爛爛,但呢個火燒牛油果(單點HKD75)竟然俾到小編帶爽口嘅感覺!Jack話因為佢哋特別挑澳洲品種,又唔太熟嘅牛油果,都幾用心喎。燒嘅時候只喺落少少鹽同黑椒調味,食嘅時候唧啲青檸汁,再點秘製辣醬特別開胃喎。 牛油燒粟米(單點HKD65)雖然冇落肉,但燒到咁上下加埋醬汁同香草,咬落juicy之餘竟然有陣好似煙肉嘅鹹香味! 燒嘅菜式之中點少得茄子呢?!西日fusion嘅烤麵豉茄子(單點HKD85)加咗麵豉醬同紫菜絲嘅日式元素,但味道唔會好鹹,都算清清哋嘅配菜。   Wingman 地址:灣仔船街33號地下 電話:2669 9309 營業時間:星期一至五:10:00-16:00[有時會收17:00] (星期六、日休息)

0

【鬧市秘藏露天餐廳似綠洲 咖喱燜鴨髀「泰」香滑】RUAM

依家出街食嘢都想搵間露天餐廳,主打泰國菜嘅RUAM雖然置身喺灣仔商廈,但大部分座位都係露天㗎,仲有唔少盆景令你感覺更加relax。呢度嘅主食惹味得嚟幾清新,配埋小食、雞尾酒同甜品真係歎到令人唔想走囉。 呢度嘅佈置俾人感覺好似去咗外地旅遊咁,高度通風嘅感覺係香港餐廳少見嘅。 餐廳一到週末就有Brunch(HKD248起)俾大家食得盡興又他條啲,其中呢味Pad Thai Kung泰式大蝦炒金邊粉(單點HKD148)仲好受歡迎添。雖然有三款醬俾大家自己加調味,但本身味道已經酸甜開胃,要加的話都係加辣。大蝦、花生碎豆干同芽菜分量都唔少,撈埋一齊食口感好豐富㗎。 如果散叫,一定要試炸魷魚鬚(HKD98)!大大條魷魚鬚沾上少量炸漿,微脆彈牙嘅口感令人好滿足。本身味道有啲辣,但蘸埋醬汁就更加辣,而且感覺幾juicy喎。 如果有三、四個人齊齊食,不妨試吓烤全鱸魚(HKD338/時價)。搽滿泰式香料嘅鱸魚用錫紙包好就入爐烤,質地嫩滑仲好多肉。配上加入新鮮香料特調嘅醬汁,酸辣之中有種好fresh嘅感覺。想再惹味啲的話,呢道菜亦可以揀炸嘅煮法 食泰國菜一定要有咖喱!紅咖喱荔枝燜鴨髀(HKD188)配上兩塊薄餅,蘸上香辣又滑身嘅紅咖喱汁,加埋帶有香烤味又燜到鹹香軟腍嘅鴨髀肉,係完美嘅配搭呀!而大大粒荔枝肉咬落好多汁,令你難得食咖喱會有種清新嘅感覺。 平時食泰式甜品都會諗起芒果糯米飯,但呢度一定要試椰絲湯圓(HKD68)!湯圓包住製過嘅椰絲,甜中帶鹹有咬口,連埋煮過嘅椰漿汁一齊食好滋味㗎。 想Chill吓又點少得雞尾酒呢?One Night In BKK(HKD88)以芒果、新鮮橙汁、龍舌蘭、薄荷葉等調製,再用辣椒抹杯邊。配上兩片同樣沾有辣椒嘅青芒果,一杯俾你有齊甜、酸、辣嘅味道。   RUAM 地址:灣仔莊士敦道60號J Senses1樓9號舖 電話:3160 8535 營業時間:星期一至五:11:30-15:00,17:00-23:00,星期六:11:30-23:00,星期日:11:30-22:00

0

【米芝蓮粵菜食府明閣進駐灣仔 新設酒吧配輕食午餐】明閣

米芝蓮粵菜食府明閣啱啱進駐灣仔開首間分店,今次仲加入唔少西式元素,好似酒吧、Chef Table都係粵菜少見,但廚藝總監曾超敬師傅就話「無論點變,都會堅守粵菜煮法,同時又俾到新鮮感大家。」。唔講咁多,即刻帶大家睇新店環境同呢度特設嘅菜式! 一行入餐廳就係吧枱位置,可以喺度飲杯Cocktail,再試唔同嘅佐酒輕食。新店特別加重用清酒嘅元素,大家想試可以問吓有咩重點推介。 酒吧以西式擺盤呈獻中式小食,例如鮮香嘅薑蔥茸煎元貝(HKD168[上])同惹味脆口嘅鵝肝醬百花乳豬件(HKD238[下]),喺口感同味道上好啱配酒一齊食。 如果想試lunch set亦有明閣酒吧輕食午餐(HKD198)俾你揀。湯同主菜都係二選一,小編就揀咗清甜嘅茶壺松茸竹笙湯、濃味有鑊氣嘅油雞樅菌彩椒百合澳洲牛柳粒伴鮮蝦荷葉飯;再以清溜潤喉嘅黑糖桃膠薑汁3.6牛乳奶凍收尾,喺附近返工嘅朋友可以嚟食好啲喎。 呢度有一間房設置Chef Table(HKD2,888位/8人起),可以見到大廚點樣炮製美食㗎。你可以揀廚師發辦,亦可以要求餐牌上冇嘅菜式,大約有8道菜,最終視乎菜式而定。呢道前菜醉人三弄就以三款蝦整成唔同口味嘅爽口冷盤,而且廚師會先用玻璃蓋儲起乾冰嘅煙,不過開蓋唔止可以打卡,仲會聞到陣陣酒香添。 如果坐舒適光猛嘅大廳或以茶葉名命名嘅獨立房(4至16人),亦可以點各款主餐牌菜式同點心。 嚟到當然要試總廚推介啦,呢道蔥香鵝肝和牛窩燒飯(HKD208)雖然用咗鵝肝、和牛同日本醬油炒成,但依然係粵菜煮法。味道香口濃郁。 嚟到當然要試總廚推介嘅新菜啦,呢道鮮蘆筍油泡大虎蝦片(HKD338)以油泡方式令大虎蝦片保持爽口肉嫩嘅口感,加上蘆筍平衡油膩感,係一道清爽鮮味嘅菜式。 而珊瑚百花蒸釀鮮元貝(HKD428)就有一口大啖肉嘅嘅滿足感。 想要啲飯氣?梗係試用鵝肝、和牛同日本醬油炒成嘅蔥香鵝肝和牛窩燒飯(HKD208)。西式材料配粵菜煮法,味道幾濃郁香口。   明閣  地址:灣仔港灣道23號鷹君中心2樓 電話:2878 1212 營業時間:星期一至五:11:30-14:30,17:30-22:00,星期六、日及公眾假期:11:00-15:00,17:30-22:00

0

【實測網民負評灣仔老茶記 湯麵冇味菠蘿油嗦水氣】伏務台

最近留意到灣仔老字號茶記金鳳茶餐廳嘅菠蘿油同湯麵喺網上有好多負評,湯麵又少湯到變撈麵,小編就去試吓係真係假先。 呢度舖面細細,但出名程度都令佢有唔少客,所以坐得都幾逼。卡位設計都比一般嘅細張,就算兩個成人夏天坐都好易手踭碰手踭,唔好講依家凍啲著多咗衫。 好多網民俾菠蘿油嘅負評係包唔夠熱,外皮唔脆同有水氣,所以小編叫咗特價午餐(HKD49),有餐包或菠蘿包(加HKD3)、奄列同一碗湯麵。不過呢間舊式茶記仍然未裝熱櫃,如果冬天嚟又撞唔唔啱出爐時間,都難啲食到熱辣辣嘅包。 好彩小編去食嗰陣啱啱出爐,所以菠蘿包溫度適中,表面脆口;味道上都只屬一般及冇咩甜味,完全靠牛油嚟支撐;不過塊牛油只係偏室溫嘅溫度,完全唔「冰」,食唔到冰火交融嘅感覺。 雖然包本身都熱,但包底就有嚴重嘅水氣問題,令到包底嗦晒水變成發水麵包咁腍晒。 奄列正常,但湯麵就有網民話少湯到好似撈麵,而且唔夠熱。不過小編又好彩冇遇上呢個問題,取而代之係冇味囉。無論湯麵定係另外再叫嘅沙嗲牛肉烏冬(HKD34),都好似用滾水煮完裝起先加湯,而且兩碗麵條上枱已經有啲發脹。 不過烏冬嘅湯仲淡過湯麵,加上冇味又發脹嘅烏冬,真係有啲難入口。好彩沙嗲牛肉味道合格,唔會太鹹,不過將沙嗲汁撈埋落湯都唔係好救到啲烏冬。之後小編見有兩枱客人淨食餸,烏冬都冇咩點食囉……。成餐只有出名嘅奶茶OK,有時都唔可以因為老字號嘅光環而以為全間舖都有一致嘅水準。   小編伏氣:3星(5星滿分) 入伏點:金鳳茶餐廳 入伏價:特價午餐(HKD52)、沙嗲牛肉烏冬(HKD34) 中伏by #MOMO 美術by #MOMO 攝影by #MOMO 《伏務台》歡迎各界報料。

0

【灣仔新開日式燒肉小店 廚師發辦食盡各式牛肉】初心日式燒肉店

食燒肉想食得精緻啲,可以試吓灣仔新開嘅初心日式燒肉店,呢度主打Omakase燒牛肉,會不時轉換牛肉產地同部位,令你品嚐到各種肉香。成個餐約有十道菜,大廚會按時節調配新菜式,依家就睇吓小編試到咩款式啦! Hatsukoko Omakase(HKD688/位)主要以牛肉為主,亦配有醋鯖魚同日本薩摩雞隔開純牛肉嘅濃烈肉味。先食有蘿蔔、青瓜、牛蒡同蒜頭4款清爽醃菜開開胃,然後就品嚐第一道菜喇! 先嚟選用日本A3和牛製作嘅牛肉他他,撈咗用牛脂整成嘅秘製蒜牛油、岩鹽同柚子皮等調味,入口清香滑溜,完全唔似食緊生牛肉喎。 然後到澳洲牛舌薄燒,一次可以試到爽口嘅牛脷尖同有咬口嘅牛脷芯。 為咗令大家唔會連續食太多燒肉而覺得油膩,跟住就食醋鯖魚解油。加咗秘製芥末柚子醋汁味道酸辣,配埋清香嘅芽蔥同海帶一齊食就更加有口感喇。 醬燒M5和牛下牛肩肉味道唔會太重,自家調配嘅醬汁鹹中帶甜,肉邊燒到微微焦香仲更加惹味添。 跟住到壽喜燒濕濕口,蔬菜以牛油炒香,比平時食到嘅壽喜燒多咗層鑊氣嘅感覺。而且呢鍋仔有3大塊肉咁多,食到呢度都有啲飽添。 然後係鹽燒M5和牛上牛肩肉,別配上微辣嘅山葵漬(左)同香口嘅柚子胡椒醬(右),一味兩食試到唔同感覺幾滋味喎。 然後仲有燒薩摩雞髀肉、加入牛肉嘅燒飯糰同牛肉味噌湯真係大滿足呀! 不過點飽都好,最後一定要食埋以岩鹽、蜂蜜同話梅粉提味嘅燒菠蘿收尾先夠圓滿嘅。 餐廳嚟緊就會考試推出本地鮮牛肉為題嘅Omakase,肉迷要留意喇!   初心日式燒肉店 地址:灣仔麥加力歌街13號地下 電話:5905 7753 營業時間:星期一至五:11:30-15:00,18:00-22:30,星期六:18:00-22:30 (星期日休息)

0

【4大新晉正宗船麵合集 食勻港九新界泰味之最】船皇、THAIPEI、豆姨姨泰國招牌船河、阿叔泰麵

香港人鍾意食船麵嘅程度有增無減,唔止愈來愈多泰國人開店,仲吸引埋泰國餐廳直接過江嚟開分店!依家等小編同大家總結一下,近半年突出啲嘅船麵有邊四間啦,由過江龍、夫妻檔、泰國雜貨舖轉營到家庭船麵都有,睇吓邊間啱你心水啦! 泰國過江龍 View this post on Instagram : 🇹🇭泰國過江龍🍜船皇撈麵$58 配料豐富🥰有牛腩、牛肉片、牛丸、雞絲、雞翼、豬肉、豬肉丸和豬潤👍🏻 共有三種辣度,可以選擇辣、小辣、不辣。 共有四種麵,可以選金邊粉,河粉,蛋麵,米粉。 加埋佢地既泰國獨有醬汁, 都辣得幾過癮🌶 我就揀左小辣金邊粉,略嫌有點乾,唔夠sauce. 飲品既杯好特別👍🏻 有得揀泰式奶茶、青檸梳打等等🍹 . 📍#船皇 (銅鑼灣) 銅鑼灣謝斐道526號地舖 #eatingchingching正餐 #eatingchingching銅鑼灣 A post shared by @ eatingchingching on May 20, 2019 at...

0

【酒店期間限定抵食首選 親民價鋸懷舊鐵板餐】Monkey Café

每次講起「花樣年華」,就想食港式鐵板餐。英皇駿景酒店嘅Monkey Café,最近推出期間限定懷舊鐵板餐。由即日起至5月31,百零蚊喺酒店鋸扒,抵到暈啦!。美式什扒餐同串燒牛柳餐,配秘製黑椒汁夠晒滋味。加20蚊食埋啫喱或即整格仔餅拼雪糕,七十年代嘅感覺返晒嚟。餐廳仲有留聲機擺設,而酒店二樓嘅空中花園又有霓虹燈牌,啱晒大家食完飯去打卡。即刻睇吓係點嘅先! 餐廳格局夠晒摩登,座位望落都幾寬敞舒服。 酒店二樓仲有個空中花園,有霓虹燈牌做裝飾,啱晒同Friend傾偈打卡啦! 呢款鐵板串燒牛柳配薯條及烤蕃茄(HKD108)啱晒鍾意食牛嘅你!串燒牛柳肉香味濃之餘,仲好方便食添!記得淋埋個黑椒汁,係酒店大廚親自調製嘅,夠晒滋味! 一次想試多幾款?可以揀呢個鐵板美式什扒配薯條及烤蕃茄(HKD118),種類多又夠大份呀! 除咗鐵板餐,呢度都有大家鍾意嘅焗豬扒飯(HKD98)。黃金炒飯底,豬扒面頭仲有半溶嘅芝士,睇見都想食囉。 甜品仲有即整格仔餅配雪糕(主菜加HKD20),真係好似返返去七十年代咁!   Monkey Café 地址:香港皇后大道東373號英皇駿景酒店地下 電話:2961 3340 營業時間:星期一至日:07:00-23:00

0

【灣仔小店街坊價名物 大塊厚切豬扒鬆軟入味】平霸

講到食豬扒,平霸真係不得不提呢間喺灣仔嘅鳳城小食。呢度嘅豬扒除咗大件,質素更加有保證,價錢仲好合理添。即刻去試吓佢先! 舖頭開喺十字路口,位置幾顯眼,有唔少開放式座位,係比較地踎嘅小店。除咗咁開揚嘅店面,前後仲有兩間堂食嘅細舖,就算繁忙時段都唔怕搵唔到位啦! 平霸早就聽聞呢度嘅豬扒出名好食,31蚊豬扒連粉麵,價錢幾抵呀!其實除咗豬扒,仲有好多餸揀㗎,可以揀自己啱心水嘅餸,沙嗲牛肉同南乳豬手都有唔少人喜愛。 呢碗蒜香豬扒米線(HKD31)上到枱都幾大碗,一個人食絕對夠飽,而且真係俾足一整塊豬扒,差唔多有成塊面咁大,仲好細心咁幫客人切到一條條,食得冇咁狼狽。如果唔想啲豬扒浸喺湯度,都可以叫豬扒另上,咁就唔驚浸腍晒啦! 豬扒一睇就知夠厚身,表面煎得金黃,食落肉質幾爽口,唔會韌亦唔乾身,係出色嘅!明顯啲豬扒醃得好入味,唔會淡茂茂,不過蒜味就唔算濃喇;成碗粉亦搭埋幾條生菜,唔會太油。 呢度啲粉麵有成七種麵底揀,連烏冬都唔使加錢。佢哋嘅米線比平時食開嘅幼身,有韌度,又唔會煮得太腍。 湯頭就冇咩特別,不過豬扒擺喺麵入面,個湯會變咗幾油吓,如果想食清啲嘅,記得要叫碟豬扒分開上喇!   平霸小評:咁大塊厚切豬扒加埋碗麵先$31,仲要咁好味,啲豬扒肉質鮮嫩爽口,好有水準!一次過食晒咁大塊豬扒,平霸特別滿足呀!呢啲咪真係大件夾抵食囉! 鳳城小食 地址:灣仔交加街18號地下A1號舖 電話:2893 8278 營業時間:05:30-19:00