Tagged: #炎症

0

【減輕痛症要少啲打邊爐? 復健師:食Omega-3消炎!】懶健康貼士

成日話禍從口出,病從口入,新一年即刻提吓大家有痛症嘅時候要避免食咩啦!食素嘅JointFit嘅運動復康教練Jay,除咗上星期教咗大家兩招簡易舒緩肩頸痛(睇片:【頸緊膊痛2招自救 復健師教你簡易網球操】),仲建議大家少啲打邊爐啦!「如果痛症好嚴重嘅時候,盡量唔好成日打邊爐喇。因為食體溫同你差唔多,或者比你高嘅動物會令你身體處於一個炎症嘅狀態,例如雞、牛、鵝、豬、鴨、羊。而且裡面有隻成分係Omega-6(奧米加6)會令身體同關節發炎。不過Omega-3(奧米加3)就可以消炎,所以點解要食多啲魚同植物性嘅嘢呢?一來佢體溫比你低,而魚油同亞麻籽呢啲食物又有好多Omega-3(奧米加3)。」。 食多啲Omega-3就可以照食Omega-6? 「好難㗎,你出去餐廳食嘢多數都係Omega-6。而且有Omega-3嘅食物都貴啲啦,所以都係自己調節食少啲好啲。」不過講到發炎,其實好多人都忽視慢性發炎,因為身體冇咩大問題或痛楚,只係有少少紅腫或者發熱就唔當係一回事。不過咁都會加速身體老化,令皮膚容易形成皺紋、長斑、體力衰退、健忘、久病不癒等問題。既然係咁,睇吓咩常見食物含有多啲Omega-3先(以下食物按每100克計算): 亞麻籽:約20.3克Omega-3 奇亞籽:約17.5克Omega-3 秋刀魚:約2.8克Omega-3 三文魚:約2.3克Omega-3 鯖魚:約2.3克Omega-3   Omega-3小知識 植物提供嘅係短鏈Omega-3脂肪酸-α-亞麻酸(ALA),但食咗ALA之後,只有約15%可以轉換成人體需要嘅較長鏈DHA和EPA。所以好似亞麻籽油即使有高含量嘅Omega-3,都唔可以完全取代魚油嘅功效。

0

【高糖引發炎症快衰老 生果糖分多到嚇死你】懶健康貼士

好多時都聽到人叫檸茶走甜或少甜,其實攝取過多嘅糖除咗會肥之外,仲會引致身體發炎! 血糖過高會造成「梅納反應」,身體會累積大量糖化蛋白產物,加速身體嘅氧化反應。過程中會產生細胞毒素,引發一連串炎症(皮膚或關節都可以因為咁而發炎)、免疫力下降、器官衰退等情況,亦係造成老化嘅主因之一。 目前醫學已經確定糖化作用會造成身體老化同引發疾病嘅重要「兇手」,糖尿病就唔使講大家都知,但仲有好多疾病都因為攝取過多嘅糖而出現,例如動脈硬化、白內障同皮膚提早老化等等。所以有效控制血糖先可以幫助身體預防疾病。 有咩糖分食咗都唔多覺? 果糖:食水果係好事,但有啲水果嘅糖含量多到嚇死你。以每100g計,荔枝有15.23g糖,芒果有14.8g糖,連香蕉都有12.23g糖。 糯米飯:好多人冬天都會食。 薯蓉:豐富碳水化合物嘅食物都會令血糖指數升高。 每日食幾多糖好呢? 世界衛生組織建議每日糖攝取量應少於熱量嘅10%,而美國心臟協會就建議每日最多只能攝取5-8茶匙。 想易啲控制身體糖分指數,除咗留意食物本身嘅特質之外,最緊要唔好食太重口味或放縱飲食。