Tagged: 炒麵

0

【$30抵食日式套餐 香脆燒餅足料炒麵打孖上】平霸

今次平霸出動去到九龍灣嘅匠工房秀吉搵食,想食平價又高質嘅日本嘢就啱晒喇! 想飽肚,最平$30已經有套餐,有炒麵又有燒餅,真係平靚正!匠工房秀吉有幾間分店,今次小編就去咗德福廣場Piago超市入面嗰間,位置都幾方便。 不過小店就只係得企位,旁邊叫做有個L形嘅立食區位置,起碼唔使揸住食咁狼狽啦! 餐牌一眼睇晒,有齊套餐、小食、主食同甜點,實有一款啱心水。 平霸叫咗SET A-燒餅+炒麵(HKD30),有燒餅同炒麵,即叫即炒,上到枱香噴噴!炒麵本身好夠味,配料有雜菜、蘿蔔、洋蔥同豬肉等。炒麵就咁食會較為乾身,但勝在分量都算多。 平霸最鍾意呢個炒麵嘅質感,唔係腍身嗰種冇乜咬口,反而係有啲韌勁,而且油膩感唔重,唔會食到成口油呢! 除咗炒麵好味,燒餅都十分唔錯!燒餅面頭有滿滿嘅燒汁,再淋上沙律醬同木魚碎,好邪惡吓啫! 燒餅入面嘅材料主要都係雜菜,燒餅邊位燒到脆卜卜,香脆可口! SET B-燒餅+奄列炒麵(HKD32)同SET A大同小異,只係炒麵變咗做奄列炒麵。加多咗隻雞蛋,味道應該唔會相差太遠,點知食落又好唔同喎!雞蛋上面淋上蕃茄醬同沙律醬,將雞蛋連同炒麵一齊食,比起齋食炒麵冇咁乾身,而且味道更突出。 蕃茄醬完全係加哂分,酸酸甜甜好開胃,雞蛋又滑口,滿意呀! 食完正餐平霸又點會咁快滿足,見到餐牌有大判燒,梗係食埋先走啦!大判燒有兩款口味,分別係紅豆同吉士。 大判燒-紅豆味(HKD8),非常鬆軟,未入口已經聞到蛋香味,流緊口水啦!呢個燒餅有啲似pancake口感,紅豆餡料都多喎,味道濃郁又唔甜膩,作為輕食好啱身份呀! 大判燒-吉士味(HKD8),吉士甜度剛剛好,creamy得嚟又有食緊奶皇嘅味道,一咬就爆餡咁滯,like呀!   平霸小評:依家想食燒餅同炒麵唔使捱貴價喇,$30蚊已經可以食晒兩樣嘢,價錢親民又抵食! 匠工房秀吉 地址:九龍灣偉業街33號德福廣場二期4樓Piago內 電話:2997 2731 營業時間:星期一至日:10:30-21:30 《平霸》平食四方,歡迎各界報料。

0

【西環卓記貼地良心價 $6鑊氣炒麵新鮮炸兩】平霸

今次平霸去西環搵食!之前聽同事講過西環卓記好抵食,平霸梗係要出動啦!其實卓記被喻為係西環三寶之一,其他兩寶係祥香茶餐廳同新中華飯店,不過卓記搬咗竇、新中華結業,依家得返祥香仲喺卑路乍街囉!仲有喎,卓記原先喺卑路乍街原址嗰舖,俾人頂手接咗嚟做,都係叫返卓記嘅!咁正宗卓記呢,就搬咗去士美非路熟食中心喇,所以招牌都會見到大大個「正宗」兩個字,話晒真.卓記有成五十幾年歷史,熟食中心呢個間先係老字號,唔好去錯呀! 提提大家,卓記只做到午市三點,過咗早餐潮之後好多嘢食賣完就冇,想食就記得唔好做懶瞓豬,早啲起身食返個靚早餐先喇!卓記嘅粥出名綿滑又足料㗎喇,不過平霸喺依家呢種悶熱天氣,又唔想食咁多熱嘢入口,一於試吓其他更加超抵價小食,睇吓水準又如何先? 叉燒腸粉(HKD15)即叫即蒸。 就咁睇好似蒸得幾靚喎,入口雖然唔算好滑溜,但勝在每一條都有足料叉燒餡,真材實料,新鮮熱辣上碟令人回味呀! 炒麵(HKD6),你冇睇錯,係六蚊!分量ok喎,堆到成個小山丘咁滯,抵到咁,小編無話可說!最鍾意炒麵放好多芽菜落去炒,食落爽口夠鑊氣,加埋甜醬冇得彈呀! 炸腸(HKD6),即係炸兩,6蚊有成兩條炸兩咁多,食一碟再加個炒麵已經夠飽肚喇,如果油條可以再脆口啲就仲正啦!一次過滿足晒想食油炸鬼同腸粉嘅慾望,仲要咁鬼平,小編滿足! 本身想食埋蘿蔔糕,點知原來得星期六、日先有得賣,sad咗3秒之後,決定叫返個鹹肉粽(HKD13)補償吓!任你揀點豉油定白糖,兩樣要晒都得! 小編就鍾意鹹肉粽點豉油,入面嘅綠豆蓉綿密到入口即化咁滯,點豉油食唔怕乾爭爭啦。不過,豬肉就得細細一嚿,而且偏瘦,好彩入面仲有半粒仔邪惡鹹蛋黃,算佢啦!   平霸小評:卓記價錢真係平霸,咁高人氣都冇話大幅加價,絕對係良心小店,抵佢儲到一班街坊熟客仔,日日去幫襯啦! 卓記 地址:西環堅尼地城士美非路12K號士美非路市政大廈2樓熟食中心 營業時間:星期一至日:06:00-15:00 《平霸》平食四方,歡迎各界報料。