Tagged: 炸雞脾

0

【小食部兩蚊起仲有鐵皮玩具 九龍灣食真懷舊茶座口味】九五茶座 – 放宮樂園

成日話懷舊,冇啲舊嘢又點夠味道呢?!但九龍灣Megabox 嘅九五茶座 – 放宮樂園就明白呢點喇。呢度有好似士多咁有小食同舊時代嘅玩具俾人話當年,啲零食都係兩蚊起,就連茶座嘅食物都係舊時嘅味道,仲冇加一添!所以呢度除咗懷舊,都希望等大家收工之後可以喺度放鬆吓。呢度仲有好多打卡位㗎,即刻帶大家睇吓啦。 門口有大大副,由本地插畫家全神畫嘅牆畫扮士多,set埋枱櫈俾你,任影唔嬲。 小食部有好多款細個成日食嘅可樂糖、士的朱古力、BB糖等等,都係兩蚊起咋! 康樂部仲有好多舊式鐵皮玩具、火車、飛機等等。聽到有啲客人同小朋友講「爸爸媽媽細個就係玩呢啲喇。」,仲忍唔住會買返一、兩件添。 行入啲就係茶庭喇,有埋圍欄、雀籠、同本地插畫家畫嘅六、七十年代香港環境,食嘢之前要再打卡囉。不過小編影到有啲餓,真係要開餐喇! 先嚟個咖喱牛腩(HKD68),可以配飯、意粉或者蒜蓉包。平時見到餸同飯分開上,都會感覺碟餸細咗,不過呢碟食落係拮極都仲有牛腩,唔係薯仔多過肉㗎。而重點嘅咖喱汁好有梛香味,咖喱味會慢慢滲出嚟,質感好滑唔會杰晒。牛肉亦燜得夠腍同仍然有咬口。 呢個蕃茄燴炸髀(HKD52)都好驚喜,炸雞髀唔上大隻,炸漿嘅質感就係舊式嘅感覺,鹹度啱啱好。外脆脾肉嫩,仲有少少肉汁流出嚟添。而估佢唔到嘅係蕃茄汁燴意粉都做到舊式嘅酸甜味,原來呢度真係請返當年喺茶座嘅人嚟做大廚,用返蕃膏,唔怪得味道可以咁傳神啦。 如果想食個下午茶簡簡單單,加料邪惡西多士(HKD30)就啱晒喇。面頭放咗塊牛油之外,仲灑咗勁多糖霜!切開入面發現,原來有3層麵包,即係用嘅醬都多啲。不過邪惡嘅嘢喺核心地帶,因為入面再夾咗芝士!令士身炸到鬆軟香甜嘅西多士,增加一份鹹香味。 豬仔包唔一定夾豬扒嘅,咸牛肉蛋豬仔包(HKD26)都一樣咁掂。豬仔包鬆軟又有空氣感,加埋厚厚嘅咸牛肉蛋,唔埋朝早定下午茶食都咁滿足囉。 而無敵風火輪(HKD98)有五款大家鍾意嘅港式小食,炸雞翼、煙伕腸仔卷、炸墨魚餅、炸幼薯條同雞肉串燒。睇落唔多,食落幾飽,因為好多肉呀!跟埋必點嘅茄汁、沙律醬同酸甜醬,惹味同滋味程度極高囉。 門口嘅小食檔好似道具咁?真係有嘢賣㗎!下午茶時段會推出師傅每日新鮮製嘅撻(HKD7/件),會視乎材料決定當日整咩,當日小編就試到蛋撻同椰撻。呢兩款都好驚喜,蛋撻酥皮薄到咬落去唔會feel到一層層,蛋仲滑到好似水蛋咁。椰撻中間冇咗粒紅色車厘子差啲唔認得佢,焗到面頭香脆,入口係滿滿香軟嘅椰絲,唔會太甜,直得再食呀! 但平日嚟食嘢就要注意喇,因為餐廳做到六點就截單,不過出面零售嘅位置會繼續開俾大家買糖果同玩具㗎。   九五茶座 – 放宮樂園 地址:九龍灣宏照道38號企業廣場5期Megabox 9樓23號舖 電話:2458 6032 營業時間:星期一至五:08:00 – 21:00,星期六、日:08:00 – 22:00

0

【小編freestyle實測 有無咁多必食炸脾】三多、華星冰室、小食堡、勁之味

夏日炎炎,脆卜卜煎炸香口嘢當道,最爽皮梗係食返隻炸脾做下午茶啦!不過由街市到小食店再到茶記,炸雞脾都有得賣,究竟邊一間好食、邊一間最抵你又知唔知?一於跟住小編同你齊齊食雞脾啦。 講起炸雞脾,又點可以唔提三多?大埔三多幾乎無人不識,呢間位於筲箕灣嘅三多,除咗有得食炸脾,仲有得飲手工啤。全香港得佢一間三多有得一次過歎晒兩樣嘢咋! 賣相:★★★★★ 以麵包糠做炸衣,雞脾炸得非常金黃香脆,可以見到滾燙肉汁滲出。 肉質:★★★★☆ 咬落去雞皮非常酥脆,雞肉嫩滑又夠味,肉汁豐盈有油香但唔會有舊舊肥膏或黃油。 味道:★★★★☆ 食落外皮脆卜卜,香脆而唔嚡口。醃料夠香,雞肉保持到嫩滑有肉汁。每隻雞脾有支竹籤拮住,仲會比埋手套你拎住食,好貼心! 價錢:★★★☆☆ 有沙律45蚊。唔包沙律,就咁一隻盛惠30蚊。 三多筲箕灣 電話:3705 2257 地址:筲箕灣筲箕灣東大街28-40A號東興大廈地下12號舖 營業時間:星期一至日:12:00-22:00  華星冰室首間分店,舖頭入面歌星簽名嘅唱片做裝飾,裝修懷舊feel。上菜速度快,乾淨企理,都幾好坐。 賣相:★★★☆☆ 顏色有少少似煎,唔算超級金黃。灑上唔少淮鹽,睇落幾厚肉。 肉質:★★★★☆ 雞皮薄薄地,好似脆皮煎蛋咁香脆,好容易切開。雞肉唔乾身,食落有微微油香但唔肥膩。 味道:★★★☆☆ 淮鹽味道濃郁,相對之下雞肉唔夠入味。雞肉結實有肉汁,但唔會痴牙。 價錢:★★★☆☆ 下午茶有埋薯條盛惠35蚊。 華星冰室 電話:2677 6666 地址:筲箕灣筲箕灣東大街185-187號順景樓地下 營業時間:星期一至日:07:00-19:00 長沙灣嘅小食店小食堡,賣炸物而出名,當中最多人食就係蒸炸雞脾。店主話佢嘅特製雞脾,特色就係蒸完再炸,食落別有一番風味! 賣相:★★★★☆ 金黃色大大隻,不過雞皮起咗幾個水泡。 肉質:★★★★☆ 雞皮好薄,食落脆得嚟有啲彈性,但係又唔會一啖就扯走成層皮。雞肉結實,無乜肥膏。 味道:★★★★☆ 店主好貼心咁會同你切幾刀,將後面嘅雞肉反埋出嚟,拎住食好方便。雞皮同雞肉都有陣陣鹹香,加少少辣好惹味! 價錢:★★★★★ 抵食價18蚊。 小食堡 地址:長沙灣元州街340號地下2號舖 營業時間:星期一至六:14:00-21:00;星期日:全日休息 雞脾點會限於一間間舖頭先有得賣,最近九龍灣啟業邨街市,翻新之後重新開幕,個樣成個貨櫃咁,好有特色!裡面有好多街頭小食,其中一間勁之味就有惡魔炸雞脾賣,即刻試下街坊風味。 賣相:★★★☆☆ 超大隻,不過顏色比較深,有少少炸過咗龍。 肉質:★★☆☆☆ 雞肉結實得嚟都幾嚡口,外皮都幾脆。 味道:★★☆☆☆ 個樣大隻又靚仔,不過雞肉略嫌有啲嚡同乾身,外皮都有少少韌唔夠脆。 價錢:★★★★★ 街坊價19蚊。...