Tagged: 炸雞

0

【旺中小食店大大盒炸物$15三款 脆口惹味任加30種醬料】平霸

旺中出名多平嘢,今次平霸就帶大家去到一樓嘅美食立食區度尋寶,聽聞呢間365炸雞嘅小食性價比夠晒高,$15三款大大盒炸物,仲有成30種調味醬料任加?!想知質素如何就睇埋落去啦! 呢間小食店舖面細細,門面貼滿餐牌,有咩賣都一眼睇晒。 $15就有三款小食似乎幾抵食喎,梗係要試試佢啦!一睇個餐牌真係眼都花埋,炸物嘅選擇竟然有成三十種咁多,有選擇困難症嘅朋友真係唔知點揀好。 平霸最後揀咗炸雞粒、拉絲芝士條同啤酒薯條(HKD15/3款)。呢度啲小食都係即叫即炸,小編落單前未有人點嘢,等咗5分鐘左右就有得食。本來以為15蚊應該都會細份啲,點知竟然幾大盒喎,每款分量望落唔少之餘,拎上手仲熱辣辣添! 呢款拉絲芝士條真係拉到絲㗎!一咬落去就有外脆內軟嘅質感,入面嘅水牛芝士味道唔算好濃,但都幾香口。而啤酒薯條嘅炸漿同平時食開嘅唔同,個感覺有啲似食緊薯格咁,雖然冇咩啤酒味,但鹹香十足好惹味。 而炸雞粒分量唔少,都有成8、9粒,炸漿夠薄又煮得透心,成粒外至內都熱辣辣!加埋唔同嘅調味料就試到各種風味喇。 特別要介紹呢間小食店嘅一大特色,就係有成30幾種醬料嘅醬料架!客人可以依照自己嘅喜好自由加入唔同嘅調味醬料,西、日、韓、台等口味都有,好有新鮮感。除咗平時食開嘅醬料外,仲有比較偏門嘅調味料,好似麻辣小龍蝦、黃金鹹蛋黃、Pizza味等等。 除咗性價比極高嘅炸物之外,呢度嘅芝士撈麵都幾平喎。其中一款就係吉列芝心豬扒芝士撈麵(HKD18),俾吉列脆皮包住嘅豬扒肉質夠腍,仲有一層融化緊嘅芝士夾喺中間,雖然啲芝士冇一咬即流心嘅效果,但用兩款芝士mix埋嘅夾心都對得住佢個價錢有餘。而芝士撈麵就似放咗大量芝士粉落去,味道偏鹹,食晒成碗會有少少膩。另外,仲有海鮮芝士撈麵(HKD20)、什錦芝士撈麵(HKD18)同招牌炸雞中翼芝士撈麵(HKD18)俾你揀,如果芝士味唔啱你食,全部亦可以免費轉沙爹汁。如果肚仔餓,平平哋食佢嚟填肚都係唔錯嘅選擇。 舖頭不定期都會做買一送一優惠,今期就有三式燒賣(原價HKD15)。本身7粒一份嘅燒賣買一送一後有成14粒,唔買都對唔住自己啦。話明三式燒賣,裡面其實有黑松露豬肉燒賣、蝦肉燒賣同魚肉燒賣三款。燒賣嘅size比平時食開嘅細粒少少,但口感都幾彈牙,而且有三種口味食晒都唔會悶,其中黑松露豬肉燒賣就最好食。不過略嫌蒸得過熟,有啲燒賣皮同肉會分離。   365炸雞 地址:旺角彌敦道688號旺角中心一期一樓F88A 電話:6279 7023 營業時間:星期一至日:11:30-23:00

0

【台灣炸雞早餐店登陸土瓜灣 必食花雕炸雞配芋頭椰奶】初茶×山雞部

台式小食之中,炸雞係重中之中嘅款式,依家台灣嘅山雞部同初茶落戶土瓜灣,大家都可以試到正宗嘅台灣風味喇,因為炸雞用嘅醃料都喺嗰邊運過嚟,而煮法同分量都跟足台灣㗎。加上一系列台式飲品,邊飲邊食都幾過癮。 香港店雖然同台灣茶飲店初茶聯乘,但都保留牆畫設計,而成間店就營造出café嘅感覺。 嚟呢到唔係食雞扒先,而係招牌嘅花雕雞腿塊!不過要飽肚嘅就食花雕雞腿塊-中華功夫麵(HKD48),可以順便試埋台灣運過嚟嘅中華功夫麵,煮起撈埋香蔥油,質感幾似冷烏冬咁幾彈牙,而且肉量大約有160g㗎。花雕雞腿塊將雞髀肉連雞皮一齊切開磋成球狀,醃料就加入花雕酒,炸完之後外皮香脆肉質嫩滑,而且花雕酒味好濃郁添。 另外仲有壽喜燒肉-銷魂飯(HKD36)都值得一試,用壽喜燒汁煎巴西五花肉,味道鹹中帶甜,又有少少焦香嘅口感。連埋撈勻蔥花、炒香嘅黑白芝麻等配料嘅香蔥油飯底一齊食,味道同口感層次豐富又唔會過鹹。 台式五香厚雞排(HKD30)大約有180g,分量都算重秤。炸漿唔會好厚,雞肉亦醃得入味,口感都幾嫩滑。 薯餅起司千層蛋餅(HKD25)嘅餅皮都係台灣運過嚟,口感煙韌又唔會好酥。餅皮煎到咁上下就放喺蛋皮上,令佢哋痴埋一齊,再放上芝士同炸到香脆嘅薯餅,灑上海苔粉調味就可以捲起喇。趁熱食就可以品嚐到外皮微脆,入面「厚肉」嘅滋味。 早餐食起司肉蛋綿吐司(HKD25)就一定全日都好醒神喇!鬆軟嘅麵包有陣奶香,夾上厚厚嘅蛋肉同壽喜燒肉都幾滿足,但最驚喜係入面搽咗甜甜哋嘅青瓜沙律醬,令成份吐司增添清新嘅感覺。 初茶嘅飲品之,芋頭椰奶(HKD32[左])係最受歡迎,幾乎一返貨就好快賣晒;將台灣運嚟嘅芋頭壓成芋泥,沖入椰奶之後再加入5、6件芋頭塊,真係勁足料囉。另外落咗質感輕滑嘅海鹽奶蓋雪戀蘋果(HKD30[右]),同埋奶同抹茶近乎5:5嘅抹茶先奶綠(HKD32[中])都同樣受歡迎,而且味道唔會好甜,加上以蔗糖調味又健康啲,唔嗜甜嘅朋友都飲到。 店內仲各式口味嘅芝士蛋糕(HKD19-22),藍莓、荔枝芒果、北海道紅豆、焦糖朱古力等口味都算多選擇。   初茶×山雞部 地址:土瓜灣農圃道18號LG03舖 電話:6976 2328 營業時間:星期一至日:11:00-21:00

0

【KFC概念店獨賣新款菜式 燒春雞+薄餅雞香辣脆口】KFC概念店

銅鑼灣重新開嘅KFC概念店以半café形象登場,仲首次推出唔少即點即煮菜式,等你好似喺餐廳點菜咁,又可以同朋友share食物。而且以後有新嘅食物都會喺呢度首先推出做試點,等小編帶大家睇吓有咩新款食物登場啦! 今次店內走年輕路線,有唔少Pop Art設計,打卡都幾靚㗎。 燒春雞套餐(HKD138)配埋經典格格脆薯塊、田園沙律同兩杯汽水。原隻春雞以BBQ醬汁調味,烤焗到肉嫩皮脆。 薄餅雞(HKD88)有四件雞配兩杯汽水。呢款將薄餅同雞二合為一,用香辣脆雞做「餅底」,配上芝士、菠蘿、粟米同茄汁,香脆微辣好惹味。如果獨食可以點普通版(HKD49),都有兩件雞配一杯汽水㗎。 醬烤脆雞翼拼盤(HKD88)配一客大薯條、沙律同兩杯汽水。一盤雞有三款醬烤脆雞翼,有芝士蒜香、蜂蜜燒烤同泰式辣醬口味各三件,啱晒重口味嘅朋友。 今次都有健康啲嘅菜式俾大家揀,醬燒雞扒田園沙律餐(HKD52)會配埋蕃茄湯,OL或健身人士都食得,而且沙律醬有三款可以揀添。 鍾意食飯嘅朋友可以試家鄉雞皇雞扒焗飯餐(HKD52),呢款配田園沙律或蕃茄湯同一杯汽水。以家鄉雞皇飯做基礎,加上三款芝士同雞扒做成焗飯。 今個中秋仲推出KFC「全桶」月餅(HKD275),即日起以月餅劵形式喺全線香港肯德基餐廳發售(香港大球場、馬場及亞洲國際博覽館分店除外),仲有兩種配搭俾大家揀添: 1.  「全桶」流心奶皇月一桶有六個黃金流心奶皇月餅,味道偏甜。 2. 「全桶」雙月・雞絲×奶皇有質感有啲似雞仔餅嘅香辣雞絲果仁月餅同黃金流心奶皇月餅各三個,鹹甜兩食齊晒。 早鳥優惠價: 8月5 日或之前購買月餅券就攞到首輪早鳥優惠價(HKD189)或CITI 信用咭優惠價(HKD179);8月6日至9月10日購買月餅券就有第二輪早鳥優惠價(HKD199)或CITI 信用咭優惠價(HKD189)。 憑月餅劵可於 2019 年8月13日至2019年9月10日於指定香港肯德基餐廳換領。 購買兩盒或以上,每盒仲送你「KFC $10禮劵」一張。   KFC概念店 地址:銅鑼灣軒尼詩道479-481號及波斯富街29號東南大廈地下至二樓A1號舖 電話:3125 3113 營業時間:星期一至日:08:00-00:00

0

【搞搞新意推果漾炸雞 韓風鰻魚扒包芝麻葉】The Joomak

韓式炸雞冇人唔鍾意食,但食得多都想有新口味。尖沙咀The Joomak就特別喺四月至六月,推出果漾炸雞系列,每月轉一款充滿果香嘅炸雞。仲有新加入嘅韓風鰻魚系列同開胃大碗麵午餐,即刻睇吓食邊樣先! 今個月率毛推出嘅炸雞新味係巴西莓炸雞(HKD198),用巴西莓蛋黃醬為炸雞增添淡紫色,配上菠蘿乾、紅莓乾、穀物片同南瓜籽,酸甜又脆口喎。 下個月就係紅火龍果炸雞(HKD198),今次用上紅火龍果蛋黃醬,配上南瓜乾、南瓜籽同核桃,感覺健康啲。 最後係六月嘅白桃炸雞(HKD198),白桃蛋黃醬清甜唔膩,配埋紅莓乾、香蕉乾、楊桃乾同杏仁片,果香味更加濃郁。 如果你都係鍾意邪惡口味,仲有新加入menu嘅川香麻辣炸雞(HKD198)!先爆炒四川辣椒逼出麻辣香氣,再淋上韓式辣椒醬、辣椒粉同蛋黃醬,食完要跑幾日消耗返囉。 叫份炸雞,配埋啖啖肉嘅鰻魚就大滿足喇。韓式烤美洲巨鰻扒(HKD288)經過韓式炙烤,比日式蒲燒鰻彈牙爽脆啲,焦香味更加明顯。再用生菜同韓國常見嘅芝麻葉包住一齊食,解膩又可以食多啲喎。 想輕食啲可以揀鰻魚泡菜炒飯(HKD168),以日式鰻魚炒飯為基礎,加入酸辣清爽嘅自家製泡菜,令炒飯甜辣香口,開胃又過癮。 未到晚餐,想lunch食得清爽啲?呢三款大碗麵應該幫到你。大醬豆卜大碗麵配素清湯(HKD68/純素)、香辣豬肉大碗麵配泡菜湯(HKD82)同韓式牛肉大碗麵配雪濃湯(HKD88)都有湯俾你濕濕口㗎。   The Joomak 地址:尖沙咀廣東道17號海港城海運大廈3樓LCX 34號舖 電話:2111 0851 營業時間:星期一至日:12:00-22:30

0

【大力水手炸雞名大於實? 雞胸肉太乾唔使再encore】伏務台

自從旺角嘅T.O.P開咗之後,食炸雞又多個選擇,因為網民高呼唔使入機場食大力水手炸雞,依家旺角都有得食喇!可能期望愈大失望愈大,評價係keep住有人話雞胸肉幾乾同細隻,話寧願入返機場食喎。事實有幾差?小編當然去親身試啦! 小編當日喺平日嘅下午茶時段去到,人流冇初開嘅時候咁多人,keep住一、兩個人望吓又走開,唔知係咪覺得冇下午茶餐貴咗少少呢? 小編叫咗原味3號餐(HKD48),諗住一次過試晒炸雞胸同炸上腿,點知埋位先見到上腿變咗全翼,不過照試啦。 一隻雞全翼有幾大隻?拼落包茄汁度就答到你喇,真係幾細隻……小編自問好鍾意食雞翼尖,即刻咬落去第一個感覺係脆,第二個感覺係硬同鎅口,因為要咬開皮肉嘅時候唔易分離。味道ok,可能因為細隻所以易啲入味。不過炸漿幾唔平均…… 呢嚿炸漿喺全翼嘅鎚搣出嚟,都幾大嚿,仲要大力搣都唔爛,你諗吓佢幾硬。 跟住到雞胸喇,size幾大隻,不過好快由驚喜變失望,亦明白點解網呢話佢乾! 撕開皮一睇已經冇咩水分,但未至於一堆油漏出嚟。咬四週嘅肉少少乾,而且味道幾淡吓。 食到中間位置嘅時候,啲肉已經係睇得見嘅乾,應該係件雞胸太大件喇,要炸耐啲反而令肉質變乾,搞到不停飲汽水先吞到。愈咬入啲味道就愈淡,最後好似白烚嗰種冇味囉。 薯條幾熱辣辣,胡椒味夠嘅。開頭食都覺得脆,但入面唔鬆軟;5分鐘左右後仲開始變得有少少韌。   小編伏氣:以外形計,小編呢份雞已經好過之前網上睇到嘅,起碼啲肉叫做脹卜卜,不過估計味道同質感就應該同網民試過嘅差唔多喇,因為都有胸肉乾同雞翼細隻嘅問題。食完再飲埋汽水,口腔仲有層油封口嘅感覺沖唔走添。今時今日HKD48食個炸雞快餐未至於好貴,但以質素計就難免唔同另外兩個大牌子炸雞快餐比較。如果唔係大家吹捧到入機場必食佢,可能失望指數冇咁高,但肯定未必會回頭囉。 入伏點:大力水手炸雞 入伏價:3號餐(HKD48) 中伏by #為食加菲貓 美術by #車雲 攝影by #為食加菲貓 《伏務台》,歡迎各界報料。

0

【10蚊15隻雞翼尖 大嚿炸雞套餐食肥你】平霸

話說小編上次同朋友行行吓街,咁啱見到有間小食店啲雞翼尖10蚊有成15隻,心諗咩料!平到咁都有㗎咩?即係一隻先6毫子咋喎,傻的嗎?再睇真啲,原來呢間小食店其他嘢都一樣抵食喎!有好嘢,平霸小編梗係要益吓大家啦! 今次呢間鴻興寶小食店喺調景嶺嘅街市入面,有少少尋寶feel不過都算易搵嘅!小編嗰日下午時段去,好多嘢食都已經賣晒,我估應該係中午學生放飯,所以好多都沽清,犀利犀利。 雞翼尖(HKD10),唔到收錢嗰刻,小編都唔信真係10蚊有15件雞翼尖呀!炸好之後會再落鹽做返少少調味,開頭食會覺得有啲啲鹹,但食落又覺得ok喎!有成15隻咁多,慢慢食都唔過份。 韓式炸雞套餐(HKD30),可自選粉麵,再加大約五、六嚿炸雞,仲要包埋飲品。小編叫咗炒烏冬,可惜就麻麻哋喇,食落口覺得自己似食緊油多啲,食完覺得好口乾,真係太油啦!不過佢嘅炸雞又幾好食喎,同埋都算大嚿,即叫即炸,啲皮炸到金黃色,食落口一啲都唔嚡,加埋醬汁好食喎!衰在都係油太多啦,食多兩嚿就出事,不過如果炸雞癮起,食呢個係絕對可以㗎! 平霸小評:今次食物質素雖然唔算高質,不過又真係好平嘅,如果少番啲油膩感就更好喇!買嗰時都有幾多學生哥幫襯,有時放學口痕買返包雞翼尖,10蚊搞掂啦! 鴻興寶小食店 地址:將軍澳彩明街1號彩明商場一期1樓彩明街市CM59號舖

0

【 $12食正宗泰國船麵 必試獨創粉紅湯底】泰麵膳

尖沙咀寶勒巷出名多美食,呢度靜靜地開咗間泰國船麵餐廳 —— 泰麵膳。食材有九成喺泰國入貨,包米粉、金邊粉、黃麵同河粉,比香港嘅麵煙韌啲又軟啲。甚至細微到蒜頭都用返泰國嘅出產,食落真係同去咗泰國冇咩分別。 門口粉綠色拉閘設計都好有泰國特色。 安格斯牛肉船麵(HKD66)參照泰國傳統製法,用八角、桂皮、花椒、泰國南乳等等,熬3-4個鐘嘅自家豬骨湯底,有少少似沙嗲嘅味道。配埋豬肉丸、安格斯牛小排等配料一齊食,真係大滿足呀! 每晚21:00-23:00仲會供應一般喺泰國傳統市場先有嘅三款「正宗船麵」 —— 牛肉船麵、粉紅湯粉同魚片魚蛋湯粉。小巧精緻嘅份量完全跟返泰國嘅size,可以一次食幾碗唔同口味啦。 泰麵膳必食推介泰式雞槌(HKD30/4隻) 以蒜頭、胡椒、魚露等香料醃過夜,極度入味!即叫即炸嘅香氣,外脆內嫩又多汁,令人想食完一碟又一碟。 大廚獨創嘅炸蝦蛋(HKD30/粒)有成個橙咁大,用豬肉碎、菜脯碎、芫茜頭、蒜頭、花生等材料,翻炒後做成肉餡,用蝦膠包住再沾麵包糠後炸成。口感彈牙,味道鹹鹹香香好惹味,幾個人share都好抵呀。   泰麵膳 地址:尖沙咀寶勒巷1號玫瑰大廈地下E&F1號舖 電話:2788 3060 營業時間:星期一至日:11:30-23:00

0

【炸雞大對決 肯德基VS Jollibee邊個贏? 】伏務台

雖然呢幾年,韓國炸雞進軍香港市場,搞到快餐店炸雞好似冇以前咁受歡迎,其實一個套餐有得食又有得飲,小編都好like㗎,今次搵咗炸雞界前輩同新力軍,睇吓兩間啲餡乜料先! 邊兩間呢?小編就分別喺KFC(油麻地分店)同Jollibee(旺角分店)買咗外賣,入手嘅都係最基本嘅炸雞套餐,由價錢到食後感,全部講你知!菲律賓雞Jollibee挑唔挑戰到KFC呢個大哥地位呢? 1.KFC KFC嘅M1餐賣HKD39.5,除咗有雞髀同雞胸各一件同汽水一杯,仲可以喺五選一嘅配搭度揀一款,為咗兩個比較更加貼近,呢次我揀咗薯格。 以”We do chicken right”走入香港人嘅世界,無論雞髀同雞胸都比較乾身,油份唔算好多,墊底嘅牛油紙並無透晒底。有人同小編講過,食雞最緊要雞皮,不過KFC嘅雞皮就唔夠吸引啦,淋晒!真係少少脆都俾唔到呀! 除咗薯格,其他選項仲有兩款細飯、薯蓉同埋粟米杯,如果唔夠飽嘅朋友可以嗌個細飯再加多HKD3 轉做大飯。薯格夠味,唔使另外再落茄汁,睇落都幾大塊,但數量唔多,最後喇,有時炸嘢炸好晒,到出餐都可能淋咗啲。 KFC 價錢︰★★★★✰ 香味︰★★★✰✰ 肉質︰★★✰✰✰ 份量︰★★★✰✰ 分店︰★★★★★ 總分︰17粒 ★ (滿星25粒) 2.Jollibee 依家除咗星期日皇后像廣場有好多菲律賓姐姐,平日仲可以係Jollibee度搵到佢哋! Jolibee嘅c1餐賣HKD43,除咗有雞髀雞胸各一件,再配汽水同薯條為一個餐,薯條仲可以揀轉做薯蓉、粟米杯同白飯,加多HKD3轉做風味薯條,有芝士同BBQ味揀。 每份雞都新鮮熱辣,味道唔會太濃恰到好處,食落仲嫩口多汁,啲皮絕對無得輸,啖啖肉之餘,仲係卜卜脆,不過代價就會油膩啲喇!如果想要濃味啲,可以配埋佢哋嘅Gravy醬汁,一樣無得彈! 薯條絕對合格,條條都金黃色,又唔會炸到硬晒,份量方面就細啲啦,似M記細薯條,無多餘嘅鹽,味道啱啱好,一樣啦,鐘意嘅咪點吓茄汁。 Jollibee 價錢︰★★★✰✰ 香味︰★★★★★ 肉質︰★★★★★ 份量︰★★★★✰ 分店︰★★✰✰✰ 總分︰19粒★ (滿星25粒) 豬太郎點指兵兵 KFC對我嚟講絕對係炸雞界嘅代表,但近幾年食都覺得隻雞愈嚟愈瘦,睇到都覺得唔飽;而Jollibee分店暫時唔多(5間),搵食就難啲啦。話時話,食炸雞最開心就係隻雞夠熱辣辣,啲皮就夠脆卜卜,我就覺得爺爺啲雞質素每況愈下啦!希望啲雞皮出返嚟啦!...

0

【尋找正宗韓國滋味 麼地道隱蔽韓燒】ChumChum味

尖沙咀韓國街有好多韓國餐廳就係人都知啦!其實麼地道都有一間韓國餐廳ChumChum味,食物好有水準,又夠晒私隱度,同成班朋友吹水傾下計好舒服㗎! 韓式炒粉絲(HKD80)雖然係炒,但係一啲都唔油,味道調得剛剛好,除咗食得到少少鹹味,仲食得到每樣食材嘅鮮味。豬肉、蘿蔔絲、菇、洋蔥、菠菜每樣都新鮮爽脆。粉絲有彈性,入口彈牙煙韌。就算係唔識揸筷子嘅小編都唔怕夾到斷晒! 八爪魚沙律(HKD138)小編極力推介!整個沙律配搭好出色!所有食材都好新鮮爽脆,尤其係士多啤梨好爽脆鮮甜,藍莓好甜,每一啖都有水果鮮甜味爆發出嚟。加埋八爪魚新鮮有彈性爽口實肉,同埋新鮮到脆卜卜嘅沙律菜,配上微酸嘅沙律醋,一次過帶出食材鮮甜味。 西冷(HKD145)睇住牛肉慢慢燒,肉汁慢慢滲出嚟,真係等到流晒口水!入口嘅時候牛肉肉汁非常豐富,入口較實肉,慢慢咀嚼更會發現牛肉味道香濃。 特級牛頸肉(HKD250)牛肉脂肪分佈好平均,肥瘦好均勻,鮮紅牛肉加上雪白脂肪,望到都知道好食!將牛肉一塊塊擺去燒嘅時候仲散發住濃濃牛肉香味呀!可能係先天條件好脂肪分佈平均,呢款牛肉入口質感柔嫩,但係仍然可以保持到少少彈牙嘅口感,食落牛肉味道濃郁,仲有豐富肉汁添! 超級醃製牛肋骨(HKD188)可能係一早已經醃製好嘅關係,牛肋骨嘅肉質比較腍,有入口即溶嘅感覺。醃料配搭非常得宜,牛肉味道除咗加倍惹味之外,仲食得到牛肉鮮味,帶有輕輕甜味。 韓式醬油炸雞(HKD178)呢款醬油炸雞口感十分酥脆,一咬落去完全唔會感覺到黏稠,值得一讚嘅係佢亦都唔會鬆散,咬落去唔會雞皮四散,論論盡盡嘅小編都無食到一身都係。甜甜地嘅醬油味道加上香脆芝麻,令香味加倍香甜。雞肉質感嫩滑,食完一件又想食多件! ChumChum味 地址:尖沙咀麼地道37-41號港匯廣場17-20 & 31-34地下 電話:2363 1100 營業時間:星期一至日:12:00-00:00