Tagged: #燉湯

0

【中環燉湯外賣店上班族最愛 花膠桃膠燉鮮奶滋陰養顏】湯譜

平時返工忙,又冇乜湯水滋潤,呢間燉湯專門店湯譜就啱晒你喇!主要係做外賣,等中上環返工嘅上班族有得飲吓唔同嘅滋補湯水。即買即飲咁方便,但係其實每款燉湯至少要燉3-4個鐘,仲落足料,一啲都唔馬虎㗎!舖頭入面仲有列明每款湯水用咩材料同好處,客人可以揀返啱自己嘅湯嚟飲。依家就等小編精選四款湯水介紹俾大家啦! 舖頭風格比較西式,牆上面嘅餐牌全部都係用英文。除咗做燉湯外賣之外都可以堂食嘅,如果堂食就會用燉盅上。座位唔多,只得一排吧台、得5-6個座位左右,旁邊仲有張雙人枱。 小編最鍾意飲呢款椰子燉雞湯(HKD58),貪佢清甜又滋潤。除咗用雞肉、雞腳同瘦肉去燉,仲加咗椰子肉同椰子水,所以一飲落去有好甜嘅椰子香味,好有驚喜。聽講呢款湯所用嘅椰子都幾講究,因為唔同品種嘅椰子都有唔同甜味,而舖頭選用嘅印度椰子喺味道上就同成個湯好夾喇。 花膠燉鮮奶湯(HKD68)最啱女仔飲,每碗湯都指定要有15克花膠,落足料㗎,而且啲花膠都燉到好腍身,加埋桃膠,令到成個湯嘅膠質幾重,不過小編覺得奶味就唔算好濃。呢啲咁養顏嘅食材喺晒成碗湯度,唔知飲完係咪真係有美顏功效呢? 見到原粒黑蒜喺碗湯入面就知呢款係黑蒜螺頭燉湯(HKD58)喇,黑蒜幾有益就好多人都知,但唔係咁易煮得好味,原來將佢用嚟燉湯又估唔到咁好飲。成個湯嘅黑蒜味幾重,又夾到螺頭個味,啲螺頭燉到好腍,放咗唔少桂圓肉同瘦肉去調味,係喺咁多款湯入面算係比較濃嘅一款。 黃耳雙菇竹笙燉湯(HKD58),雙菇其實係指茶樹菇同猴頭菇,湯入面仲加咗黃耳同滋陰養顏嘅桃膠。呢款湯味道偏淡,有少少來自紅棗嘅甜味,感覺比較溫和,唔同體質嘅人都飲得。 除咗燉湯之外,舖頭仲有賣粥、點心同糖水,呢款咁得意嘅企鵝奶黃包(HKD38)就係其中一款特色點心,入面唔係流心奶黃,味道正正常常啦。   湯譜 地址:中環善慶街5號 電話:6386 4688 營業時間:星期一至日:12:00-21:30

0

【40年粵菜老字號開分店 古法點心配鎮店住家菜】生記海鮮酒家

喺灣仔出晒名嘅生記海鮮酒家以傳統粵菜同地道海鮮馳名,連續五年入選米芝蓮食店,40年功力真係唔嘢少。依家佢哋開到去荃灣喇,新店除咗堅持做傳統古法手工粵菜之外,仲特設點心添,灣仔總店都冇得食㗎。 新店大部分位置係開放式設計,裡面有部分係間房。 話明精於古法菜式,懷舊點心一定有得食。出爐鮑魚酥(HKD28/件)嘅鮑魚幾彈牙,用炒香嘅嫩滑雞肉粒墊起,增加香氣同惹味嘅感覺;食落只有少少油膩感,飲啖茶就解咗喇。 懷舊鳳眼餃(HKD30)有大大啖嘅蝦肉,好爽口!配上西芹粒嘅青香、鮮甜嘅魚籽同蟹籽,食完會想追call多件。 新店梗係有新嘅小菜啦,柚子少林骨(HKD98/例)唔係腍到離晒骨嗰種,少少煙韌有咬口,酸酸甜甜幾醒胃。 馳名菜式一樣會喺新店有得食,好似生記住家味道之一魚翅撈飯(HKD128/例)雖然係素翅,但口感十足,湯底清澈唔混濁,好考功夫。炒飯乾身唔會黏埋一嚿嚿,真係夠鑊氣,仲炒到粒粒都俾蛋包住,金鑲銀唔多地方食到喇。仲有金華火腿提味,令成個飯更加滋味。 生記住家味道之二籠仔糯米蒸肉蟹(時價)好清甜,蟹汁滲晒落糯米,令你想一食再食。 生記魚鮮三寶之一玉樹麒麟斑*(時價)嘅魚肉、金華火腿同冬菇厚薄都差不多,魚肉好滑溜亦唔腥,真係好新鮮! 生記鎮店燉品滋補菘茸花膠燉雞*(HKD288/6位用;HKD488/12位用)味道甘香,少少藥膳feel,幾好飲。大大隻菘茸俾你食,夠晒滋補養顏。 *需一天前預訂   生記海鮮酒家 地址:荃灣悅來坊2樓203號舖 電話:2614 1848 / 2614 1884 營業時間:星期一至日:07:00-16:00,17:30-23:00