Tagged: 燒味

0

【買半斤燒腩仔少咗2兩 燒味店疑似呃秤仲發惡】食焦

俾人呃秤仲要受氣,係咪嬲先?好多時買燒味海味,俾足秤你係合理、唔足秤都成日聽聞喇,但去買嘢唔通真係要帶埋個磅出街咩!不過連肉眼睇得到都覺得少嘅,就真係呃秤喎!好似有網友喺馬鞍山石門一間燒味店度,買咗半斤燒腩仔,就咁睇都覺得少喎,咁就返屋企搵個磅磅吓,點知真係少得可憐! 事主喺馬鞍山之友群組度話,「真心嬲……我拎左外賣望左一眼,都覺得有啲少……反(返)到屋企秤,連盒秤得263g,淨重得236g咋!半斤應該有302.4g囉!」事主仲細心到po埋張重量單位換算表出嚟,即係少咗成66.4g,計返斬少咗差唔多成2兩肉喎! 都係嗰句啦,過咗海就神仙,除非當場斷正話佢呃秤又或者真係帶埋個磅出街啫!所以,事主都識趣,只係諗住打返個電話落舖頭,問吓佢係咪俾錯咗例牌嘅,結果「求其答『我地跟中國秤』…… 跟住佢一句 『係咁啦!』cut左我媽線!」事主梗係嬲爆啦,講明冇下次,幾好食都假! 呢間疑似呃秤嘅燒味店就係石門新開嘅「沙田一」,呢間自稱係至尊燒鵝同生滾粥品嘅專門店,賣點係現燒現賣古井燒鵝喎!據事主話佢lunch time嗰陣買咗盒燒腩仔飯覺得好食,於是夜晚諗住再外賣加料,結果變咗俾人減料!其他網友就叫事主報海關啦,又話呢間嘢嘅燒鵝皮又硬又唔好食,最重要係服務態度差!呢個先係最接受唔到囉!

0

【老牌燒味店】永祥

跑馬地多年來屹立不倒地踎燒臘店!只提供最基本摺檯摺凳,地面濕滑,但卻會令人心思思想番去再食,食物水準當然夠高先得啦。叉燒乃是永祥水準之作,不得不試! 叉燒肉雙拼飯$42,係比一般地踎燒臘店貴,但都係抵俾架!叉燒蜜汁香甜,肉質非常稔滑同鬆化,燒肉皮脆肉肥,好快就食完,勁滿足呀!食過番尋味,一定會回頭再幫襯。 永祥燒臘飯店 跑馬地景光街2號地下 星期一至日: 09:00-20:30