Tagged: 燒肉

0

【情人節他條開餐外賣精選 燒肉至星級名菜都食到】情人節

仲係十五十六聽日情人節點過?不如索性外賣返屋企撐枱腳啦!今年唔少餐廳提拱外賣套餐,等大家唔使去街市同超級市場撲食物,喺屋企他他條條開餐!   1. 牛角 外賣自取日本燒肉 牛角日本燒肉專門店依定開始推出外賣自取餐目(HKD59起),有配搭豬或牛嘅牛角飯、炸物小食之外,仲有十幾款自選口味嘅和牛、豚肉同雞肉,選擇咁多都拍得住出街食喎。   牛角日本燒肉專門店 地址:九龍灣徳福廣場2 期4 樓425 號舗 電話:3101 0128 營業時間:星期一至日:11:30-22:30   2. Double Chefs Market BRUNO功能電熱鍋送燒肉拼盤 屋企冇燒烤爐又想食燒肉?主打鍋物同燒肉嘅Double Chefs Market有各式和牛拼盤,最近仲聯乘BRUNO推出情人節超值優惠(即日起至3月14日)!只要買BRUNO全新多功能電熱鍋(原價HKD998)就送一份特上燒肉拼盤(價值HKD358-668),有大約2-3人分量,啱晒兩小口情侶或小型家庭。如果用埋網站近期嘅優惠,用PayMe付款就額外享有1%折扣優惠,咁去完露營返屋企都有爐可以繼續燒啦!如果想就咁訂肉,佢都有鹿兒島黑毛和牛、鹿兒島A4黑毛和牛牛三角、澳洲M5和牛西冷等口味俾你揀㗎。   Double Chefs Market 地址 : 黃竹坑業勤街35號金來工業大廈第1座6樓Q室 電話:6772 6338 營業時間:星期一至六 10:00-19:00(星期日休息) 網店:www.doublechefsmarket.com.hk...

0

【灣仔新開日式燒肉小店 廚師發辦食盡各式牛肉】初心日式燒肉店

食燒肉想食得精緻啲,可以試吓灣仔新開嘅初心日式燒肉店,呢度主打Omakase燒牛肉,會不時轉換牛肉產地同部位,令你品嚐到各種肉香。成個餐約有十道菜,大廚會按時節調配新菜式,依家就睇吓小編試到咩款式啦! Hatsukoko Omakase(HKD688/位)主要以牛肉為主,亦配有醋鯖魚同日本薩摩雞隔開純牛肉嘅濃烈肉味。先食有蘿蔔、青瓜、牛蒡同蒜頭4款清爽醃菜開開胃,然後就品嚐第一道菜喇! 先嚟選用日本A3和牛製作嘅牛肉他他,撈咗用牛脂整成嘅秘製蒜牛油、岩鹽同柚子皮等調味,入口清香滑溜,完全唔似食緊生牛肉喎。 然後到澳洲牛舌薄燒,一次可以試到爽口嘅牛脷尖同有咬口嘅牛脷芯。 為咗令大家唔會連續食太多燒肉而覺得油膩,跟住就食醋鯖魚解油。加咗秘製芥末柚子醋汁味道酸辣,配埋清香嘅芽蔥同海帶一齊食就更加有口感喇。 醬燒M5和牛下牛肩肉味道唔會太重,自家調配嘅醬汁鹹中帶甜,肉邊燒到微微焦香仲更加惹味添。 跟住到壽喜燒濕濕口,蔬菜以牛油炒香,比平時食到嘅壽喜燒多咗層鑊氣嘅感覺。而且呢鍋仔有3大塊肉咁多,食到呢度都有啲飽添。 然後係鹽燒M5和牛上牛肩肉,別配上微辣嘅山葵漬(左)同香口嘅柚子胡椒醬(右),一味兩食試到唔同感覺幾滋味喎。 然後仲有燒薩摩雞髀肉、加入牛肉嘅燒飯糰同牛肉味噌湯真係大滿足呀! 不過點飽都好,最後一定要食埋以岩鹽、蜂蜜同話梅粉提味嘅燒菠蘿收尾先夠圓滿嘅。 餐廳嚟緊就會考試推出本地鮮牛肉為題嘅Omakase,肉迷要留意喇!   初心日式燒肉店 地址:灣仔麥加力歌街13號地下 電話:5905 7753 營業時間:星期一至五:11:30-15:00,18:00-22:30,星期六:18:00-22:30 (星期日休息)

0

【日本肉料理大師傳授燒肉秘技 推純血日本和牛限定餐單】JFOODO

和牛係日本嘅高級食材,當地人亦以100%統血和牛招呼重要嘅人同聚會,因為佢哋嚟講係最高級別嘅款待方式之一。咁我哋喺香港可以去邊食到真正100%純血和牛?JFOODO就同逾50間餐廳合作推出以「和牛100% 款待100%」為主題嘅100%純血和牛限定餐單,仲請嚟日本燒肉大師田邊晉太郎先生分享烹煮日本和牛嘅最佳方法添,即刻睇吓有咩秘技同邊度可以食到最純正嘅和牛啦! 唔少人都鍾意食燒肉,但燒得靚真係好講技巧。日本燒肉大師田邊晉太郎先生話想避免啲肉痴住個網,好似西冷呢啲多油脂又厚切嘅部位,燒嘅時候要夾住嚿肉一吓一吓去掂網面,慢慢迫出油脂後先放喺網面慢慢燒,避免直接放喺網上燒令肉塊痴網。 如果薄切嘅和牛就慢火烤,大火會容易令肉片過熟,見到肉片轉成淺粉紅色都已經可以食用。 燒到咁上下好易令油脂凝結喺網面,呢個時候可以將隨燒肉附上嘅檸檬喺網面來回摩擦,以後記住唧完檸檬汁落肉度都唔好咁快掉咗塊檸檬喇。 知道小技巧梗係去搵食啦,依家就睇吓合作餐廳之一嘅298 Nikuya Kitchen有咩好食啦!和牛盛合(HKD358)燒肉拼盤有西冷、肩里脊肉、牛肋條同腿肉。 和牛涮涮鍋(HKD358)配以牛肩肉同七式蔬菜盤,味道清香又冇咁膩。 和牛壽喜燒(HKD358)湯汁相對濃味啲,令牛肩肉嘅肉味更濃郁。將煮好嘅肉蘸落生雞蛋,口感會更滑溜。 參與「和牛100% 款待100%」統血和牛限定餐單餐廳如下,每間都會推出唔同菜式㗎! 298 Nikuya Kitchen 肉料理 廣 溫野菜 太古店 牛角 香港仔店 牛涮鍋 粉嶺店 溫野菜 尖沙咀店 牛角 銅鑼灣店 牛涮鍋 九龍灣店 S2 鐵板燒 牛角 黃埔店 牛涮鍋...

0

【柞木炭家新店推王道御膳 餐車自選日韓高質靚牛】柞木炭家

相信唔少鍾意食韓燒嘅朋友仔對柞木炭家都唔陌生喇,呢間炭烤韓燒店繼上年喺旺角開業之後,早幾日喺銅鑼灣開第二間分店,正式進駐港島區!新店有新菜單是常識,「王道」同「御膳」套餐就令大家食盡唔同部位嘅牛肉,因為揀完套餐之後,店員會推出擺滿牛肉嘅「牛肉餐車」俾你自選日韓產地靚牛,食得夠晒精囉。除咗套餐之外,有幾款新菜式都唔可以錯過㗎,即刻睇落去啦! 銅鑼灣新店一樣氣派十足又夠開揚,裝潢都好有韓風,真係好似去咗韓國嘅餐廳咁。 睇meun係易明啲,不過睇埋實物仲正! 先介紹「王道」套餐(HKD356/位),食客可以自選一款西冷產地,而韓牛牛肩同日本和牛牛胸腹就係指定款式。 而「御膳」套餐(HKD420/位)就再豐富啲,西冷同牛肩肉可以自選產地;另外仲配埋日本和牛牛胸腹、日本和牛牛胸同「是日稀有部位」三款牛肉添!呢兩款套餐仲有其他燒烤食物同主食,黑毛豬同柞木韓牛飯都令人好滿足呀! 揀完套餐之後,牛肉餐車就出動喇,車上係來自韓國全羅南道同日本岩手縣兩個產地、唔同部位嘅牛肉。睇住牛脂嘅雪花紋自選牛肉產地,更加易揀中心水口味啦。 除咗兩款咁有霸氣嘅套餐之外,仲有幾款新菜式㗎。柞木甕漬牛肋骨(HKD288)用咗韓式嘅甕漬古法加入秘製醬汁嚟醃製牛肋骨,肉質軟腍又入味。 最上等牛小排(HKD240)係牛胸腹肉,每塊肉嘅雪花紋都好靚,油脂分佈得咁均勻,食起上嚟有油香又有牛味喎。 即叫即整嘅牛柳三明治(HKD188)就用咗頂級1++韓牛最嫩嘅牛柳整成,烘底多士嗦晒啲肉汁精華,值得一試㗎。由即日至5月28日仲做緊開業優惠,試食價HKD88就可以食到喇!   柞木炭家 地址:香港銅鑼灣記利佐治街 1號金百利廣場 3樓 301-322舖 電話:2320 9993 營業時間:星期一至日:11:30-23:00

0

【新宿燒肉店蠱惑餐牌 價錢唔同貴1倍劏遊客】食焦

日本嘢就乜都好?其實,都係嘅,不過樹大總有枯枝!成日話去日本食燒肉又平又好味,點會諗到會去咗間「黑店」俾人劏呢?有台灣網友一心諗住去東京食買玩,其中一餐必然揀返間燒肉店啦,於是佢就搵咗一間喺新宿歌舞伎町嘅燒肉店,結果中晒招呀! 呢位台灣事主喺爆料公社群組度還原當晚情況,當晚事主去到燒肉店預備點餐,店員知道佢哋係遊客,好順手咁就遞咗本有中英對照嘅餐牌俾佢點菜。據事主形容開頭相安無事,仲食得好開心,直到佢要加點嘅時候,見到隔離枱嘅餐牌,咦?咁古怪嘅? 古怪在除咗一個係日文一個係中文之外,最蠱惑嘅地方係兩個餐牌嘅價錢係唔一樣囉!同樣係牛肋骨,圖片係一樣嘅,但喺日文餐牌嘅價錢只係500円(約$35港銀),而喺中文餐牌呢?牛肋骨嘅價錢係1000円(約$70港銀),即係貴咗成倍喎!事主再仔細對照埋其他食物,連牛舌都係咁,幾乎全部都要貴1倍喎! 事主話睇見呢個情況真係連食慾都即刻冇晒,「因為我不是日本人所以價格要貴一倍……結帳時結帳單也註明 【外】 我想應該就是這樣吧……」喺群組度反應好熱烈,有熱心網友仲忍唔住為事主私訊燒肉店,嗰間喺歌舞伎町嘅燒肉店叫做「李苑」,得到嘅回覆係認咗有呢件事喎,話因為系統上不同所以價格都會不一樣。咁難明嘅? 乜嘢系統呢?網友死心不息繼續追擊燒肉店,又有更新回覆話中文菜單嘅價格的確係貴過日文餐牌,但店方就話呢個做法絕冇任何歧視外國遊客嘅意圖,仲話會即日起將中文餐單廢除喎!咁本身個日文餐牌價格會唔會即時調高返呢?  

0

【冠軍和牛限量出爐 獨家歎鹿兒島「浪漫牛」】千里屋食堂

香港唔少地方有得食和牛,但大家可能會疑惑食緊咩品質嘅牛。今次介紹喺銅鑼灣嘅千里屋食堂一定令你放心,因為佢喺日本有25年歷史,不過唔係經營餐廳,而係售賣肉類,絕對係專家級別!如果你有去AEON超市買餸有機會食過佢供應嘅肉,因為5年前佢已經進軍香港,直至近日先開埋食堂,保證貨源一等一新鮮純正啦!而新一屆極品和牛就係去年獲得冠軍嘅廘兒島黑毛和牛「Kimotsuki浪漫牛」,年產50隻㗎咋,依家都可以喺千里屋食堂品嚐到,係全港唯一一間供應呢款和牛嘅餐廳!部份菜式喺7月28 日至8月5日期間仲有半價優惠添! 研發團隊核心人物齊集介紹會現場,當日喺千里屋食堂解答大家問題,佢哋對「Kimotsuki浪漫牛」嘅重視就好似帶住自己小朋友見人咁呀! 但係點解要研發呢種和牛呢?鹿兒島大學教授就話好多人會覺得愈靚嘅和牛就愈肥膩,所以「Kimotsuki浪漫牛」專登針對呢點作改善,減低肥膩感嘅同時保留返引死人嘅雪花油脂。教授仲提到日本好多和牛都食外國入口嘅飼料,但「Kimotsuki浪漫牛」只會食由鹿兒島Kimotsuki郡生產嘅飼料,唔知係咪咁所以肉味特別清甜呢。 千里屋食堂今次重點推介三個部位嘅「Kimotsuki浪漫牛」:和牛西冷牛扒(圖上)、和牛五花肉牛扒(圖左)、和牛夏多里昂牛扒(圖右),見到啲雪花紋就流口水喇!為咗令大家可以完美咁品嚐美味嘅肉質,餐廳準備咗唔同嘅烹調方式。快啲睇吓有咩正嘢食先! 浪漫牛涮牛肉套餐(HKD380)最易品嚐到食材嘅原味。涮涮鍋湯底走清淡路線,套餐有牛肉同豚肉兩款。試完原味再配埋2款招牌醬汁:芝麻醬同柚子汁就perfect喇!雖然係食日本菜,但係除咗烏冬、白飯、漬物、飲品同甜品之外,餐廳搞鬼地配咗韓式涼伴菜3拼添。 一隻牛只有大約1kg嘅夏多里昂部位,係牛隻中最頂級同稀有嘅部位,鐵板上嘅浪漫牛和牛夏多里昂牛扒套餐(HKD580)俾你大大啖咁食,勁豪氣呀!肉質嫩滑得嚟有咬口,亦係三款推介部位中最甜嘅,係帶有果香嘅甜味。肉唔會好油膩,點極少鹽就已經好提味,小編私心最愛呢款呀!另外仲有醬汁燒牛肉、韓式涼伴菜三拼、燒蔬菜、味噌湯、飲品同甜品,你都咪話唔飽。 冠軍和牛當然要配豪華套餐先襯得起佢嘅尊貴,極 – 和牛西冷牛扒套餐(HKD980)*一次過品嚐鐵板和牛牛扒、醬汁燒牛肉、鹽燒牛舌、牛大腸同牛心三種食法。西冷肉質比牛柳更加軟腍,係三款肉中油脂比例較低,但都好香滑。前菜三拼菜式就按季節轉換食材,仲有配燒蔬菜、味噌湯、飯同甜品。 醬汁燒牛肉如果想試其他部位嘅浪漫牛和牛牛扒,可以點雅 – 嚴選和牛牛肉里脊肉牛扒(HKD780)*口感幾爽;或庵 – 嚴選和牛五花肉牛扒(HKD580)就油脂豐富啲。主菜牛扒轉咗但配菜同極 – 和牛西冷牛扒套餐一樣㗎。提一提呢三款套餐每日限量供應,要事先預訂呀。 *7月28日至8月5日期間,凡2人以上預約惠顧極 – 嚴選和牛西冷牛扒套餐 或 雅 – 嚴選和牛牛肉里脊肉牛扒套餐,其中一人就有50%半價優惠。 想平食都有選擇,鹿兒島精品浪漫牛特別套餐(HKD280)係100%純牛肉嘅和牛漢堡扒,入口有啲洋蔥粒,令味道更加香甜。漢堡扒煎到微微焦香,再淋上唔會過鹹嘅芝士汁就更加惹味;另外仲有燒牛肉,一次食到兩種煮法都唔錯㗎! *7月28日至8月5日期間,每日限量供應50份,仲有50%半價優惠,想食個happy lunch都係唔錯嘅選擇。 丼套餐(HKD168)就有韓式燒牛肉拼鹽燒雞肉蓋飯。牛肉用咗韓國泡菜風味嘅醬汁炮製,少少辣啱晒夏天食。加埋前菜、沙律、烏冬同飲品,真係飽到上心口呀!   千里屋食堂 地址:銅鑼灣駱克道 447-449號中威商業大廈地下2號舖 電話:2336 2770...

0

【日本過江龍牛繁燒到嚟 歎激罕限量厚切和牛】牛繁

又嚟喇!日本另一大熱燒肉連鎖店牛繁,尋日喺尖沙咀正式開業喇!Menu差唔多有七成會跟返日本,另外加咗香港先有嘅肉類,滿足一眾燒肉迷嘅口福之慾呀!店內提供嘅醬汁依然由日本提供,不過香港條例好難批到用炭爐,所以轉用鐵板燒爐,呢樣就同日本最大分別喇。暫時餐廳只做晚市,希望快啲有午市啦! 店內牆身同地面用返水泥略帶粗糙嘅質感,同食燒肉嘅豪邁不謀而合。座位算寬敞,坐得幾舒服。跟住梗係主角出場啦! 燒肉基本款一定有蔥燒鹽香牛舌(HKD88),分量幾大碟,粗略數都有十幾片,3-4人食都冇有怕。燒嘅速度要快,因為薄切好快熟。反轉另一面燒嘅時候可以加埋蔥喺上面熱一陣,令蔥香薰少少入肉,更加惹味! 啖啖肉都係不可缺少嘅,特上霜降牛五花(HKD148)一如其名,口感真係同五花腩幾似,肉質偏爽有咬口。 跟住到重頭戲,每日限量嚴選霜降黑毛和牛西冷(HKD288)有成22cm左右長,細密嘅雪花令口感好滑,而西冷口感爽身啲啲。 到香港限定款式喇,澳洲M9極上厚切和牛板腱排(HKD198)每日限量只有8碟!因為牛板腱多數做薄切款,厚切係好少有㗎!軟腍得嚟又有咬口,呢款相對冇咁多油脂,想light啲嘅朋友都啱。 仲有澳洲M9極上霜降和牛肩翼板扒(HKD178),呢款啖啖肉,油脂又重返啲,仲有香濃嘅肉味。如果唔係有個燒爐仲以為自己鋸緊扒囉。仲有咩食?俾多少少Menu大家睇吓啦:   牛繁 地址:尖沙咀金巴利道40號MW Plaza地舖 電話:2638 8099 營業時間:星期一至四及日:17:00-01:00,星期五、六:17:00-03:00

0

【鹿兒島頂級燒肉店襲港 豪食「4%奇跡之牛」】Beefar’s

近排好多過江龍日式燒肉店相繼攻港,即係小編嘅脂肪比例又再度提高啫(唔想係真囉)!不過話時話,A4和牛大家就食得多,但A5級別嘅牛可能就少啲機會食到喇(好貴呀,又唔知有咩分別)!今次就帶大家嚟到呢間專提供A4等級或以上和牛嘅鹿兒島過江名店Beefar’s,試吓嬴過日本和牛大賽嘅和牛係咪真係咁好食先! Beefar’s所賣嘅薩摩牛被譽為「4%奇跡和牛」,真係聽到個名都嚇一嚇,心諗:「有冇咁勁呀?」。不過再聽餐廳經理講,原來鹿兒島每年生產嘅13000隻薩摩牛入面只有大約500隻能夠成功入選,又真係好矜貴咁喎!好,小編決定試吓佢哋嘅Beefar’s全牛盛合(HKD848),一次試勻薩摩牛嘅牛柳扒、牛肋肉、牛赤肉、頂級西冷、頂級牛小排、上等牛舌、和牛面頰肉同埋頂級安格斯側腹橫肌牛肉。經理話呢個set係4人分量嘅,望落去肉上嘅紋路都好靚,除返開每人200左右食到晒唔同部位嘅靚牛肉,其實價位合理嘅 ! 師傅建議燒嘅時候盡量唔好well done佢,半生熟就perfect喇!入口超嫩滑,嚿肉幾乎喺口入面融化咁滯呀!就咁易沾少少盬同wasabi就食得,師傅話咁樣食係最原汁原味嘅,當然店內亦有提供燒肉專用醬汁,可因應個人喜好選取。 如果食完和牛盛合覺得唔夠喉,可以再追加呢個4%奇跡之牛極上牛肩肉(HKD238)。呢個牛肩肉唔喺和牛盛入面嘅,因為呢個奇跡之牛肩肉屬於A5級別,霜降程度達10級或以上呀!其實食牛食到A5真係唔係咁多機會,所以呢,食嘅時候記得嗒真啲喇!師傅都係建議大家唔好燒得太熟,見到肉上面有啲格仔坑紋就夠㗎喇!入口真係超有牛味,直頭可以話喺小編食過最好食嘅燒肉,「奇跡之牛」浪不虛名呀! 呢個和牛海膽壽司&和牛甜梨卷(HKD118)亦都係Beefar’s嘅特色菜式嚟。小編唔太習慣食「和牛刺身」,不過食落口又ok。和牛上嘅海膽好新鮮,鍾意食海膽嘅朋友一定啱!不過小編最鍾意都係呢個甜梨卷,和牛嘅油膩感喺咬落口嘅一瞬間被梨嘅甜味中和,好好味呀!呢個甜梨卷好有驚喜! 如果嫌晚市套餐都係有啲貴嘅話,可以試吓佢哋嘅午市套餐,極上烤肉午餐(HKD298)亦分別有4%奇跡之牛極上牛肩肉同牛肩眼肉㗎,咁就可以用平啲嘅價錢試吓4%奇跡之牛喇!另外仲有定食添喎,食材同樣係頂級嘅薩摩牛,會有師傅幫你燒好再送上,Lunch time想食好西冇難度啦!   Beefar’s 鹿兒島燒肉 地址:尖沙咀金馬倫道8號Otto酒店2/F 電話:2557 6286 營業時間:星期一至五:11:30-15:00;18:00-01:00;星期六至日:11:30-01:00

0

【台北米芝蓮冇乜台味 港客熱門燒肉店攞星】食焦

頭炮台北版《米芝蓮指南》今年新鮮熱辣首頒,話晒係米芝蓮喎,梗係每間餐廳都想攞星啦,之前已經率先公佈咗《必比登推介》,有唔少星級牛肉麵同夜市食物都有入圍,輪到上星期三頒重頭戲,公佈結果之後,有賽前熱門好似法國餐廳L’Atelier de Joël Robuchon只得一星、鼎泰豐只得推介直頭冇星!奪得三星嘅就得一間獨贏,就係台北君品酒店嘅粵菜餐廳頤宮。 至於最受港客歡迎,幾乎成間店坐滿遊客嘅燒肉店「大腕」,就成為17間入圍米芝蓮一星嘅其中一間喇!有唔少港人遊台,講到食燒肉除咗乾杯同胡同之外,好多人都會推介「大腕」,雖然價錢相對比乾杯同胡同高價啦,但比起喺香港食就叫做抵食添喇! 其實耐唔時就有網友喺討論區大推「大腕」,有人話次次飛親台灣都要食佢,雖然少少貴但真係食過翻尋味,不過就預咗會撞到唔少港客囉!喺「大腕」食燒肉有專人燒埋俾你,一份霜降牛五花賣港銀80蚊左右,抵啦!想食豪啲更加可以點澳洲和牛同日本和牛,和牛橫膈膜百零蚊一份,到千幾蚊一件牛小排都有,睇你點揀! 睇返今次個得獎名單,其實有唔少港人功勞㗎喎!好似三星嘅頤宮就係由港人、人稱強哥嘅做主廚,招牌菜係火焰片皮鴨;又好似攞咗一星嘅歐洲菜餐廳MUME,老闆兼主廚亦係香港人喇!二十間入圍餐廳,得兩間食台菜咋,就係老字號「金蓬萊遵古台菜」同「明福台菜海產」,真係物以罕為貴喎!   台北米芝蓮2018 星級餐廳入圍完整名單 https://goo.gl/9QoSBU

0

【2粒鐘任食燒肉放題 澳洲靚和牛停唔到口】熊本燒肉

香港放題一大堆,最搶手梗係燒肉放題啦!依家熊本燒肉推出120分鐘燒肉放題,加多28蚊仲有埋任食和牛,食肉獸今次點忍呀?餐廳負責人Chris成日都會去日本,眼見日本周圍都有燒肉放題,佢都好想可以喺香港開返間,取名叫熊本,想有少少日本feel咁啦。三百幾蚊咁抵食?Chris就話希望用一個價錢,提供多樣化嘅食物,滿足到大眾,唔怪得日日都咁好生意啦! 牛肉拼盤種類都好多,每樣有2-3嚿,咁就每人都可以試到啦。除咗牛肉拼盤,仲有雞肉同豬肉類,夠晒多選擇呀! 和牛拼盤(牛小排)見到啲雪花紋路係好靚好清楚,放落去燒5-10秒就已經ok㗎喇,廚師會將牛肉切薄啲,方便客人燒嚟食,入口即溶咁滯! 和牛拼盤(肉眼)邊款最正?Chris自己最鍾意食肉眼,因為脂肪比較豐富,燒完再加返啲鹽做少量調味已經好好食!Chris教路咁樣食先會最凸顯牛肉本身嘅味道,牛味超濃呀! 啲牛肉燒起上嚟仲有埋啲肉汁喺度,見到都好想食呀! 依家餐廳加多60蚊就可以任飲生啤,食肉梗係唔少得配啤酒啦,咁先係perfect match 呀!正! 飲完啤酒諗住完?未得住,餐廳仲會每人送返杯Haagen Dazs俾你,真係唔肥就假喇,不過食咗先減啦! 晚市任食120分鐘 星期一至四: 大人 (HKD268)、小童(HKD128) 星期五至日及公眾假期前夕: 大人 (HKD298)、小童(HKD148) 熊本燒肉 地址:銅鑼灣謝斐道477-481號3樓 電話:2617 3328 營業時間:星期一至四及星期日:12:00-15:30;17:00-00:00;星期五至六:12:00-15:30;17:00-01:00