Tagged: 燒餅

0

【$30抵食日式套餐 香脆燒餅足料炒麵打孖上】平霸

今次平霸出動去到九龍灣嘅匠工房秀吉搵食,想食平價又高質嘅日本嘢就啱晒喇! 想飽肚,最平$30已經有套餐,有炒麵又有燒餅,真係平靚正!匠工房秀吉有幾間分店,今次小編就去咗德福廣場Piago超市入面嗰間,位置都幾方便。 不過小店就只係得企位,旁邊叫做有個L形嘅立食區位置,起碼唔使揸住食咁狼狽啦! 餐牌一眼睇晒,有齊套餐、小食、主食同甜點,實有一款啱心水。 平霸叫咗SET A-燒餅+炒麵(HKD30),有燒餅同炒麵,即叫即炒,上到枱香噴噴!炒麵本身好夠味,配料有雜菜、蘿蔔、洋蔥同豬肉等。炒麵就咁食會較為乾身,但勝在分量都算多。 平霸最鍾意呢個炒麵嘅質感,唔係腍身嗰種冇乜咬口,反而係有啲韌勁,而且油膩感唔重,唔會食到成口油呢! 除咗炒麵好味,燒餅都十分唔錯!燒餅面頭有滿滿嘅燒汁,再淋上沙律醬同木魚碎,好邪惡吓啫! 燒餅入面嘅材料主要都係雜菜,燒餅邊位燒到脆卜卜,香脆可口! SET B-燒餅+奄列炒麵(HKD32)同SET A大同小異,只係炒麵變咗做奄列炒麵。加多咗隻雞蛋,味道應該唔會相差太遠,點知食落又好唔同喎!雞蛋上面淋上蕃茄醬同沙律醬,將雞蛋連同炒麵一齊食,比起齋食炒麵冇咁乾身,而且味道更突出。 蕃茄醬完全係加哂分,酸酸甜甜好開胃,雞蛋又滑口,滿意呀! 食完正餐平霸又點會咁快滿足,見到餐牌有大判燒,梗係食埋先走啦!大判燒有兩款口味,分別係紅豆同吉士。 大判燒-紅豆味(HKD8),非常鬆軟,未入口已經聞到蛋香味,流緊口水啦!呢個燒餅有啲似pancake口感,紅豆餡料都多喎,味道濃郁又唔甜膩,作為輕食好啱身份呀! 大判燒-吉士味(HKD8),吉士甜度剛剛好,creamy得嚟又有食緊奶皇嘅味道,一咬就爆餡咁滯,like呀!   平霸小評:依家想食燒餅同炒麵唔使捱貴價喇,$30蚊已經可以食晒兩樣嘢,價錢親民又抵食! 匠工房秀吉 地址:九龍灣偉業街33號德福廣場二期4樓Piago內 電話:2997 2731 營業時間:星期一至日:10:30-21:30 《平霸》平食四方,歡迎各界報料。

0

【北京烤鴨煎餅打爛招牌 醬甜肉乾冇汁皮太腍】伏務台

有網友話食咗老Come煎餅覺得伏,話個烤鴨煎餅最致命!口碑似乎麻麻,但竟然港九都有分店喎,小編見旺角店近近哋,咁就去試真啲睇吓點啦!點知一去到旺中店,見到靜蠅蠅已經心知不妙喇,食完之後更加明白大家唔食佢係好正常囉…… 小編一直覺得招牌食物整得好唔好,係代表整間餐廳嘅水準,所以試咗招牌系列北京烤鴨煎餅(HKD38)。外表真係好正常,入口就開始嚟料!皮嘅質地軟腍偏濕潤,連平時唔食蔥嘅小編都食到呢個佈滿蔥嘅餅皮,因為蔥香味欠奉。 餡料睇落豐富但唔熱,而且望真啲有一半厚度係皮囉。開頭食冇咩北京烤鴨嘅醬料,食到差唔多中間有醬喇,但超級極甜!勁過甜醬呀!雖然青瓜絲都唔少,但沖淡唔到個甜味。 厚切鴨肉粒分量唔少,但唔係北京烤鴨嘅薄切片狀感覺有啲失真。肉幾乾吓,冇肉汁先係最失望囉。食到後尾甜味減退,即係醬料集中喺中間唔平均啦。 食到好中間見到少少厚又硬硬哋嘅脆片喇,如果分佈得平均啲,唔係積喺個芯度會好好多。 酥炸香菇貢丸(HKD12)冇咩菇溝咗入丸度,同普通貢丸差不多。冇咩調味,但唔使炸到咁乾啩…… 反轉俾大家睇,全部開邊……即係其實HKD12得3粒,唔算勁貴嘅,係心情有啲失落囉。   小編伏氣:煎餅同貢丸加埋HKD50,喺旺中小食區嚟講算貴,用同一個價錢可以食到其他好食嘅午餐或下午茶啦。一路食,小編個心就一直呼叫好甜同好乾,連招牌系列嘅煎餅都整到咁,其他真係唔使試。小編都經常鍛鍊企喺小食區食嘢,雖然呢度有張小食枱,但大家知有幾乾淨啦,望住只用包裝紙包住嘅煎餅,想放低搵張紙巾都幾麻煩,設計上唔夠細心添。 入伏點:老Come煎餅旺角分店 入伏價:北京烤鴨煎餅 HKD38,酥炸香菇貢丸 HKD12   中伏by #為食加菲貓 美術by #車雲 攝影by #為食加菲貓 《伏務台》星期一伏務大眾,歡迎各界報料。

0

【8蚊3個出爐靚麵包 4蚊花生燒餅落足料】平霸

小編除咗鍾意食肉,亦都係一個不折不扣嘅麵包控嚟㗎!路過呢間明華餅家,見到好多人喺度排緊隊,小編又去湊吓熱鬧,睇吓有咩咁正先!行到過去先發現,原來呢間嘅麵包賣緊8蚊3個,仲要有超多款式選擇!咁平,小編都唔輸蝕,買呀! 椰子奶油包(HKD8/3個) 已經好少麵包舖有得買啦,完全係小時候嘅味道,雖然啲奶油好肥,不過久唔久食一次,肥都冇所謂啦!啲奶油真係超級多,但食起上嚟又甜而不膩,好正㗎! 芝麻包(HKD8/3個) 都幾大個吓,本身諗住就咁食會好寡冇乜味,但完全相反喎!食落少少甜甜再帶點芝麻香味,愈簡單嘅食物反而愈好食!入面仲要好鬆軟添! 火腿蛋包(HKD8/3個) 雖然係細包,但起碼入面嘅火腿同蛋冇呃秤,而且一啲都唔難食。8蚊雞食足三個麵包,小編覺得好OK啦! 食完包,小編買埋佢哋嘅花生燒餅同光酥餅,兩款都係4蚊雞,唔係唔食呀? 花生燒餅(HKD4) 本身諗住入面係花生醬,點知竟然係花生絲,有啲驚喜喎!燒餅食落去煙煙韌韌,拎到上手仲熱辣辣,皮薄餡靚,高質高質! 光酥餅(HKD4) 超大塊!就咁食會有少少乾,不過唔乾就唔係光酥餅啦,而且都偏鬆軟,4蚊可以食到飽,力撐香港小店呀! 平霸小評:依家喺香港想食到呢啲平價麵包買少見少,呢間仲要好食又抵食!真係要多謝呢班良心店主,等我哋可以食到又平又正嘅嘢,大家行過記得幫襯吓呀! 明華餅家 地址:旺角煙廠街1-3D 營業時間:星期一至日: 07:00-12:00

0

【飯糰散晒燒餅爛嘅 桃園眷村貴夾難食】伏務台

最近朗豪坊新開咗間桃園眷村,好多人都以為係台灣名店,但其實佢係來自上海嘅連鎖早餐品牌店,大家唔好搞錯呀!小編本身都幾有興趣去食吓,但睇真啲,劣評如潮喎,網民都話:「又貴又普通又難食,食過最散嘅飯糰,唔值咁貴唔會再去。」咁唔掂,小編一於實測吓佢有幾伏啦!    就咁睇個餐牌,嘩!一杯凍豆漿都要成22蚊,上海店8蚊人仔有啦,依家咁貴,啲豆漿唔通加咗金箔咩?仲有一條普通嘅油炸鬼,喺香港賣16蚊,貴總店成個double,過江龍真識做生意喎! 食物方面,小編就食咗台式香腸蔥蛋飯糰(HKD42)同玉米蛋燒餅(HKD42)。睇見個樣都知出事,個燒餅爛嘅都可以照上俾客人,冇咗一忽,唔講以為係特色囉! 台式香腸蔥蛋飯糰 不得之了,食落口果然同傳聞一樣,一啲都唔熱,只可以稱得上係暖。食落口啲蛋得上半份有(冇蔥嘅蛋),腸都好啲,起碼都有一條,不過咬多兩啖,個飯就開始散,肉飯分離咁款,食到好狼狽呀,乜粢飯會咁散㗎咩?話晒都叫做過江龍,俾啲誠意好喎! 重點係,佢入面嚿油炸鬼係炸到燶!晒!咁都可以當冇事放落個飯糰度俾客人食?定抑或真係特色嚟?小編真的不解喇!燶晒嘅油炸鬼食落口又苦又澀,hea極都唔係咁呀? 玉米蛋燒餅 又係劣到爆炸。燒餅皮爛咗都照俾客啦,佢入面嘅配料真係dry到爆炸,冇任何醬汁提供,乾到一個點;而且塊蛋係冇味,超級薄,再加多幾粒仔粟米仔俾你就變咗粟米蛋喎,咁都得? 小編真係一路食一路O嘴呀! 小編伏氣:唔係講笑,呢間桃園眷村食到小編眼都凸埋,食埋啲又凍又燶嘅嘢,大家千祈唔好好似小編咁作賤自己個胃呀,唔好諗住過江龍就唔伏,一樣都可以伏到爆炸!網民果然冇講錯,真係又貴又普通又難食!難聽啲講句,小編煮嘅都好食過佢呀!唔好影衰上海個朵啦好嗎? 入伏點:桃園眷村 中伏by #愛吃的旅人 美術by #Mui Mui 攝影by #愛吃的旅人 《伏務台》星期一伏務大眾,歡迎各界報料。