Tagged: #牛扒

0

【人氣扒房新店踩入沙田 限時$58牛肉飯+增設早餐】Top Blade Steak Lab

由何文田開到銅鑼灣,人氣扒房Top Blade Steak Lab都係地舖,今次開第三間分店終於走入商場喇。負責人之一Oscar話:「今次商場主動搵我哋,俾咗個相宜嘅租金,咁啱我哋都想開分店就試一試。呢度比另外兩間店大好多,其實都係一種挑戰。我哋依然想推廣Flat Iron牛扒俾更多人知,因為一隻牛呢個部位只係開到5-7件扒,少有而質地同肉味都幾出色,加上橫切同直切口感都唔同㗎。」。主餐牌變化唔多,但新店多咗早餐;而配合夜晚禁堂食安排,全線暫時增設HKD58起嘅外賣餐牌添。

0

【灣仔新扒房獨賣頂級牛扒餐 安格斯肉眼×任食薯條】Moo Moo’s

如果你係牛魔王,一定要試灣仔新開嘅Steakhouse Moo Moo’s!呢度只有一款牛扒餐(HKD298),自然要夠高質先可以滿足大家要求啦。餐廳選用USDA Prime嘅頂級安格斯肉眼,仲係原件牛肉入貨,再自己解肉,務求令肉質保持新鮮,依家睇埋成個set包咩先。 餐廳座位唔多,英式裝潢感覺幾高級,如果黃昏時間嚟仲睇到少少日落添。 前菜先食香口鬆軟嘅自家製餐包,可以搽肉桂醬,怕甜嘅朋友可以落鹽調味,都幾特別㗎。仲有分量十足嘅田園沙律,配埋溏心蛋更顯心思喎。 跟住到重頭戲8安士安格斯肉眼扒喇!為咗配合唔同人嘅口味,亦俾大家有多啲體驗,隨餐有鹽、黑椒、自家製黑椒牛油汁、自家製辣醬俾你蘸。 USDA Prime嘅等級已經幾高,肉質好軟腍易切。小編建議大家先試原味,因為佢肉味非常濃郁,而且本身用牛脂整成嘅牛油煎香,再滲咗啲迷迭香嘅香氣都好有層次,唔加味都好出色。而醬汁方面配自家製黑椒牛油汁就令牛味更突出,辣醬反而有少少蓋過肉味。 任食薯條即叫即炸,入口外脆內軟,時間控制得啱啱好。 想有更完美嘅配搭可以升級配紅白酒(HKD69/杯),或者加配甜品(HKD59)。甜品款式稍後可能會有調整,但呢個朱古力布朗尼都好吸引,唔算好甜膩,配埋雲呢拿雪糕係雙重享受呀!   Moo Moo’s 地址:灣仔軒尼詩道239號18樓 電話:2387 7168 營業時間:星期一至日:12:00-14:30,17:00-22:00

0

【網民控訴老扒房三大罪狀 牛扒冇肉味質素似快餐】伏務台

有時食扒都會去啲港式懷舊扒房,鋸扒之餘又食吓氣氛。但係深水埗有成40年歷史嘅飛鷹餐廳就有唔少網民俾負評,仲提出三大罪狀添!究竟出咗咩事?睇埋落去等小編話你知啦。 罪狀一:留座唔俾人入 小編喺平日1點半左右入坐,店內只坐滿三分一。唔少網民提及嘅留座問題當日都存在,明明等候嘅食客唔多,但有三分一嘅枱都放咗「留座」嘅牌。有啲食客坐好先被要求調位,而小編都無一倖免。 罪狀二:餐湯冇味 小編點咗羅宋湯,蔬菜分量足但味道奇怪,飲落好似茄汁加水咁,陣甜味好重,唔似蕃茄本身嘅原味……有賣相但內涵欠奉,同場都聽到有客人話喺屋企煲罐頭湯都好飲過佢喎。 罪狀三:鐵板唔熱,牛扒過熟冇牛味,落咗勁多鬆肉粉 嚟到扒房梗係叫返個鐵板餐啦!究竟呢份配黑椒汁嘅新西蘭肉眼餐(HKD98)有冇網民提及嘅罪狀呢? 店員會幫客人淋埋汁先上菜,不過鐵板夠熱,上菜都聽到吱吱聲,未有發生網民講鐵板唔夠熱嘅情況。不過黑椒汁太多又太鹹,已經蓋過咗肉味。小編落單要牛扒5成熟,切開都見到肉心係粉紅色,但唔見有血水。雖然呢塊肉眼扒幾厚肉又大份,但肉味淡到近乎冇,質素同快餐店牛扒不相伯仲,但質感就冇網民講嘅落勁多鬆肉粉而太鬆軟。不過配菜方面就少咗啲咁,薯條數量十隻手指數得,哂得八條!仲有啲椰菜同一塊蕃茄,而成個餐最食到原味嘅就係塊蕃茄喇。其實嚟得扒房鋸扒都係想食得滋味啲,但質素似快餐的話真係勁扣分囉……   小編伏氣:4星(5星滿分) 入伏點:飛鷹餐廳 入伏價:新西蘭肉眼餐(HKD98,另收加一)[跟餐包、餐湯同餐飲] 中伏by #MOMO 美術by #MOMO 攝影by #MOMO 《伏務台》歡迎各界報料。

0

【父親節飲飽食醉精選合集 免費飲酒任食烤牛肉】Kömune、FRITES Belgium on Tap、逸東軒、花月庭

下星期就係父親節喇,小編為大家精選四間各有特色嘅餐廳同爸爸慶祝!有免費飲酒、任食烤牛肉、米芝蓮夏日中菜、同送禮自助餐,實可以氹到佢開開心心,快啲睇吓邊間啱心水啦! 免費飲酒 黃竹坑有露天花園嘅Kömune,喺6月16日由12:00-15:00推出父親節早午餐(HKD390/成人,HKD195/6至10歲小童)。有精選牛扒淋配淋上自家製荷蘭醬嘅水波蛋,加上香軟薯蓉同鮮炒菠菜好滋味㗎。又有龍蝦班尼迪蛋,或配太陽蛋同夾咗香辣蛋黃醬嘅嫩滑炸雞三文治。想要較清淡嘅主菜亦有淋上車厘茄醋醬汁嘅粟米翠玉瓜沙津配紅魚、蔬菜意大利麵等等。 每位爸爸仲可以免費暢飲啤酒、紅白Sangria同Kömune火辣嘅Bloody Mary。如果你想陪爸爸飲返杯,同行大人可以加配2小時任飲優惠: The Classic(HKD258)包括Cava有汽酒、紅白酒、Bloody Mary、Bellinis同Mimosas雞尾酒。 The Premium(HKD358)就升級至Veuve Cliquot香檳、樽裝啤酒同Kömune精選推介雞尾酒,包括Chinese Ink同Follow the Call of the Disco Ball。 呢求逢星期日12:15-15:00,喺露天花園仲設有現場樂隊演奏添!   Kömune 地址:黃竹坑黃竹坑道64號Ovolo奧華 ∙ 南岸4樓 電話:3460 8157 營業時間:星期一至日:06:30-23:00   任食烘烤牛肉 間中推出牛扒優惠嘅FRITES,今次全線分店一齊同你慶祝父親節!當日12:00-17:00推出「幸福烤肉任食日 Scrumptious Carvery」(HKD295/位),可以無限量享用香氣撲鼻嘅烘烤牛肉呀!   FRITES Belgium on...

0

【週末揸車玩轉大埔 滑草打卡歎老字號蟹粥】Local自駕遊

放假唔一定要去外地嘅,留喺香港都有大把好玩好食嘅選擇,週末短短哋嚟個本地一日遊都夠晒充實㗎。今次就喺大埔瘋狂打卡食嘢,再殺入沙頭角滑草,保證大家玩到唔捨得走,即刻出發! 活化打卡熱點 綠匯學苑前身係舊大埔警署,呢個一級歷史建築物活化之後成為文化保育中心,亦還原咗唔少舊警署昔日嘅面貌。報案室、羈留室、槍房等唔止可以參觀,有啲位仲可以打卡添,鍾意懷舊風嘅一定要嚟喇。呢度間中會舉辦導賞團或工作坊,有興趣就留意佢哋官網啦。 綠匯學苑 地址:大埔運頭角里11號 電話:2996 2800 開放時間:星期一至日:10:00-17:00 [最後登記入場時間:16:30](星期二休館) 費用:全免   午逅星馬菜 都算區內新店嘅果子Life Café主打新加坡同馬來西亞菜,有得食經典嘅海鮮喇沙(HKD66)同埋肉骨茶(HKD88),味道突出之餘分量都幾多㗎。 果子Life Café 地址:太和汀角路11-13號啟昌樓地下13號舖 電話:2812 6038 營業時間:星期一至日:11:30-22:00   四驅滑草 食完晏可以揸大約30分鐘去禾田喜山種植園,入面有70米滑草道俾你風馳草道嘅滋味,大人細路都玩得㗎! 呢度仲有得餵羊仔、玩高卡車、泡泡足球等等添,買全日(HKD120/位)或半日套票(HKD90/位)就可以任玩園區設施。不過呢度冇得wallk in,想去就要預約喇。 禾田喜山種植園 地址:沙頭角塘肚村 電話:6010 5978 / 5118 1740 營業時間:星期五至日:10:30-16:30,星期一至四休息 停車場:HKD80/日泊(園區內)...

0

【BIG SUR週末新推 牛扒全日餐肉迷必歎】BIG SUR

去得蘇豪食嘢,就係想hea吓抖吓。BIG SUR無論店內店外都充滿悠閒嘅感覺,加上新出嘅全日餐單同晚餐,幾點嚟食嘢都係一種享受呀!即刻睇吓有咩新菜式引人流口水先。 西式嘅佈置好似去咗外國咁,人都不自覺慢落嚟。 Weekend Breakfast之中,AVOCADO TOAST(HKD95)啱晒素食者同牛油果控。香烤麵包上鋪滿牛油果醬同牛油果切片,再灑上Cotija芝士、油漬蕃茄、羅勒同粟米片,既香又脆口。 STEAK AND EGGS(HKD195)就啱晒喜肉嘅朋友,5安士炭烤無骨西冷牛扒配雙蛋、蕃茄、蘑菇同炸薯餅,惹味又飽肚。 All Day Menu都一樣有新品,想飽肚嘅唔少得CALIFORNIAN CHICKEN BURGER(HKD155)。加州雞肉漢堡有大大塊香烤椰汁雞腿肉,夾埋青瓜、蕃茄、壘勒、牛油果醬、紅辣椒莎莎醬又有fresh嘅感覺添。 BIG SUR BBQ PLATE(HKD255)就啱晒同朋友開心share,有Memphis肋骨、Nashville手撕豬肉、烤豆、椰菜同啤油麵包。大家試少少又可以試其他菜啦 晚市嘅SQUID(HKD115)酥炸新鮮魷魚配柚子胡椒蛋黃醬,作為前菜定佐酒小食都一樣咁開胃。   BIG SUR 地址:蘇豪士丹頓街22號地舖 電話:2529 3001 營業時間:星期一至五:12:00-00:00,星期六、日及公眾假期:10:00-00:00

0

【情人節素人福音 甜蜜蜜鋸心形牛扒】素學堂

咪話小編唔提大家呀,幾日後就到情人節啦,各位男士們訂咗枱未呢?如果想食返餐精緻素菜慶祝吓,可以去呢間素食咖啡店OVOCAFÉ,餐廳特別為情人節設計咗五道盛宴,連非素食者都會覺得好好味㗎!各位情侶諗諗佢啦!一齊嚟睇吓呢個情人節限定甜蜜套餐(HKD488/兩位)有啲咩先! 首先登場係素三文魚他他、牛油果醬、蕃茄茸配檸檬欖油汁,口感清新得嚟食落都層次分明㗎! 之後到就南瓜湯,口感香滑細膩,視覺上都好滿足! 主菜二選一,可以揀心形牛扒、薯茸同雜菜配素燒汁或蕃茄汁雜菜天使麵配炸素雞粒,心形牛扒以素肉扒Impossible Meat再加上餐廳秘製配方製作而成,食落啖啖肉質感,鮮嫩多汁,好似食緊真肉咁,唔記得咗係食緊素呢;香濃惹味嘅蕃茄汁雜菜天使麵配上香脆可口嘅素食炸雞粒,酸酸甜甜幾開胃,令人食指大動。 最後甜品都係二選一,可以揀 士多啤梨雜果撻配青檸雪葩或純素甜品:啤梨燉杞子、紅棗、桂圓(需2日前預訂),士多啤梨雜果撻味道清新,配埋甜中帶酸嘅青檸雪葩味道好夾;燉啤梨就啱哂女士們啦,滋潤又養生,不過揀呢個甜品就記得要早2日預訂喇! 提埋你呀,呢個咁豐富嘅情人節套餐,分咗18:00-19:30/20:00-21:30兩個時段享用,各位巴打仲唔快啲打去訂位!   OVOCAFÉ 地址:灣仔灣仔道1號地下 電話:2527 6011 營業時間:星期一至日:11:30 – 22:00

0

【一百有找牛扒餐中大伏 塊扒嚡口𡁻到出渣】伏務台

開心鋸扒、唔開心都鋸扒係小編嘅生活之道。見到逸東酒店Food Court嘅Confusion STEAK有平價牛扒食,即刻爬文睇吓食唔食得過,點知伏評如潮囉……好多都話牛扒勁難食,唔值排個幾鐘去等呀!小編卒之試咗,想講嘅係,希望廚師唔好浪費嚿肉啦! 為咗避開多人嘅時段,小編五點幾就去鋸扒。見到個牌寫按重量計牛扒價錢,以300g一刀起計,最平嘅肉眼扒只需要HKD78就有交易,再加HKD18可轉套餐,有飯、味噌湯、沙律、汽水或烏龍茶俾你四揀三添。話明平食,小編就試最抵嘅肉眼扒餐! 落order時廚師喺你面前即時切肉上磅秤重,小編嘅肉眼扒最終係293g,所以係HKD76+18(轉餐),HKD94都唔錯吖!不過,第一個驚嚇點嚟喇!廚師冇帶手套切肉唔緊要,但撳收銀機同找錢都係用呢隻手喎,就算有抹手都係咁話啦,嚇到小編個心離一離,好想大叫唔夠人手就請人啦! 廚師跟住用類似針機嘅工具拍鬆嚿肉之後就煎。嗱,餐廳貼咗張紙話建議三成熟係最好,而小編平時食開七成熟嘅,希望出到嚟似樣啲啦! 攞到份餐之後都覺得外表好正常吖,牛扒用洋蔥墊底,有啲血水滲出嚟。三款汁小編揀蒜油,諗住同黑椒汁最夾吖嘛,但淋黑椒汁之後,竟然出奇地唔夾喎,仲有少少酸味添。 唔理咁多切肉先,但驚嚇位又嚟喇!隻叉差啲拮唔入塊扒,小編真係眼都凸囉……一切開,入面唔係粉紅色嘅?搞到全熟咁嘅? 唔信邪再切都係咁,切到中間都仲係咁,條筋仲好有力扯住添。雖然失望都咬下啦,不過唔係好咬到,起渣喎。渣嘅畫面太有礙觀瞻,小編就唔影俾大家睇喇。不過依家小編明白點解三成熟係最好,因為出到嚟都係會變咗五至七成熟,應該係,除非唔係…… 轉戰食沙律同飯啦,正常冇咩特別,但唔能夠用肉送飯都冇咩好食囉,惟有飲汽水啦。小編仲聽到隔離枱話下次食貴啲嗰款扒可能好啲,睇嚟佢都齊齊中伏。   小編伏氣:以小編自己喺屋企煎牛扒嘅經驗,都好難過熟到成塊𡁻出渣,更何況出自一間餐廳?件扒食又咬唔落,唔食又好浪費,呢個先係最兩難嘅位。雖然價錢平到笑,但咬到喊,真係補唔返囉! 入伏點:Confusion STEAK 入伏價:HKD94 中伏by #為食加菲貓 美術by #車雲 攝影by #為食加菲貓《伏務台》星期一伏務大眾,歡迎各界報料。

0

【冠軍和牛限量出爐 獨家歎鹿兒島「浪漫牛」】千里屋食堂

香港唔少地方有得食和牛,但大家可能會疑惑食緊咩品質嘅牛。今次介紹喺銅鑼灣嘅千里屋食堂一定令你放心,因為佢喺日本有25年歷史,不過唔係經營餐廳,而係售賣肉類,絕對係專家級別!如果你有去AEON超市買餸有機會食過佢供應嘅肉,因為5年前佢已經進軍香港,直至近日先開埋食堂,保證貨源一等一新鮮純正啦!而新一屆極品和牛就係去年獲得冠軍嘅廘兒島黑毛和牛「Kimotsuki浪漫牛」,年產50隻㗎咋,依家都可以喺千里屋食堂品嚐到,係全港唯一一間供應呢款和牛嘅餐廳!部份菜式喺7月28 日至8月5日期間仲有半價優惠添! 研發團隊核心人物齊集介紹會現場,當日喺千里屋食堂解答大家問題,佢哋對「Kimotsuki浪漫牛」嘅重視就好似帶住自己小朋友見人咁呀! 但係點解要研發呢種和牛呢?鹿兒島大學教授就話好多人會覺得愈靚嘅和牛就愈肥膩,所以「Kimotsuki浪漫牛」專登針對呢點作改善,減低肥膩感嘅同時保留返引死人嘅雪花油脂。教授仲提到日本好多和牛都食外國入口嘅飼料,但「Kimotsuki浪漫牛」只會食由鹿兒島Kimotsuki郡生產嘅飼料,唔知係咪咁所以肉味特別清甜呢。 千里屋食堂今次重點推介三個部位嘅「Kimotsuki浪漫牛」:和牛西冷牛扒(圖上)、和牛五花肉牛扒(圖左)、和牛夏多里昂牛扒(圖右),見到啲雪花紋就流口水喇!為咗令大家可以完美咁品嚐美味嘅肉質,餐廳準備咗唔同嘅烹調方式。快啲睇吓有咩正嘢食先! 浪漫牛涮牛肉套餐(HKD380)最易品嚐到食材嘅原味。涮涮鍋湯底走清淡路線,套餐有牛肉同豚肉兩款。試完原味再配埋2款招牌醬汁:芝麻醬同柚子汁就perfect喇!雖然係食日本菜,但係除咗烏冬、白飯、漬物、飲品同甜品之外,餐廳搞鬼地配咗韓式涼伴菜3拼添。 一隻牛只有大約1kg嘅夏多里昂部位,係牛隻中最頂級同稀有嘅部位,鐵板上嘅浪漫牛和牛夏多里昂牛扒套餐(HKD580)俾你大大啖咁食,勁豪氣呀!肉質嫩滑得嚟有咬口,亦係三款推介部位中最甜嘅,係帶有果香嘅甜味。肉唔會好油膩,點極少鹽就已經好提味,小編私心最愛呢款呀!另外仲有醬汁燒牛肉、韓式涼伴菜三拼、燒蔬菜、味噌湯、飲品同甜品,你都咪話唔飽。 冠軍和牛當然要配豪華套餐先襯得起佢嘅尊貴,極 – 和牛西冷牛扒套餐(HKD980)*一次過品嚐鐵板和牛牛扒、醬汁燒牛肉、鹽燒牛舌、牛大腸同牛心三種食法。西冷肉質比牛柳更加軟腍,係三款肉中油脂比例較低,但都好香滑。前菜三拼菜式就按季節轉換食材,仲有配燒蔬菜、味噌湯、飯同甜品。 醬汁燒牛肉如果想試其他部位嘅浪漫牛和牛牛扒,可以點雅 – 嚴選和牛牛肉里脊肉牛扒(HKD780)*口感幾爽;或庵 – 嚴選和牛五花肉牛扒(HKD580)就油脂豐富啲。主菜牛扒轉咗但配菜同極 – 和牛西冷牛扒套餐一樣㗎。提一提呢三款套餐每日限量供應,要事先預訂呀。 *7月28日至8月5日期間,凡2人以上預約惠顧極 – 嚴選和牛西冷牛扒套餐 或 雅 – 嚴選和牛牛肉里脊肉牛扒套餐,其中一人就有50%半價優惠。 想平食都有選擇,鹿兒島精品浪漫牛特別套餐(HKD280)係100%純牛肉嘅和牛漢堡扒,入口有啲洋蔥粒,令味道更加香甜。漢堡扒煎到微微焦香,再淋上唔會過鹹嘅芝士汁就更加惹味;另外仲有燒牛肉,一次食到兩種煮法都唔錯㗎! *7月28日至8月5日期間,每日限量供應50份,仲有50%半價優惠,想食個happy lunch都係唔錯嘅選擇。 丼套餐(HKD168)就有韓式燒牛肉拼鹽燒雞肉蓋飯。牛肉用咗韓國泡菜風味嘅醬汁炮製,少少辣啱晒夏天食。加埋前菜、沙律、烏冬同飲品,真係飽到上心口呀!   千里屋食堂 地址:銅鑼灣駱克道 447-449號中威商業大廈地下2號舖 電話:2336 2770...