Tagged: 牛油果

0

【Avobar新品推亞洲風味 創意夏日餐單葷素共融】Avobar

召集牛油果控!嚟自倫敦嘅人氣牛油果主題餐廳Avobar推出夏日餐單喇,新菜式同飲品都一如以往咁清新健康、賣相吸引同充滿牛油果。依家仲有期間限定雙重優惠,快啲睇吓有咩正嘢啦! 夏日餐單以亞洲菜式為基礎,創作全新嘅牛油果主食、輕食同清新特飲,滿足唔同飲食需要嘅客人,真係超貼心呀! 加入創新元素嘅Avobar雞肉飯(HKD128),以切雞、新鮮牛油果片同薄餅組成;配有必備嘅薑蔥油、辣醬同雞湯之外,仲特別加入沙律同蔬菜,變奏成為fresh版海南雞飯喎。 想再light啲可以試吓夏日風味沙律(HKD108),以牛油果、腰果、紅蘿蔔、青瓜等多款新鮮蔬果整成。加入青檸汁同夏威夷沙律醬,撈埋底部嘅冷烏冬一齊食,酸酸哋好開胃,素食人士都啱食。 仲有牛油果Smoothie Bowl啱晒一眾OL㗎!活力早餐碗(HKD88)用牛油果、香蕉、菠菜、青瓜、西芹同芒果製成,牛油果味超濃郁!營養豐富之餘不含麩質同奶類製品,全素食嘅你都可以order。 呢個和風雞肉牛油果多士(HKD128)最有驚喜!煎到金黃嘅雞胸肉好juicy,配埋牛油果粒同日本香鬆,有種BBQ醬嘅鹹香感覺,惹味得嚟口感幾豐富添。 佢哋仲推出兩款凍飲俾大家解暑,香蕉可可果仁奶昔[左]同香草牛油果杏仁奶昔[右](各HKD80/杯)用杏仁奶打成冇加水,口感比較杰身。前者嘅香蕉同可可好夾,兩隻味入口都好濃郁,不過因為有埋椰棗會帶少少苦澀味;後者就似雲呢拿味多啲,容易入口,而且清新健康冇負擔。 Avobar期間限定優惠 店內所有菜式都係全日供應同可以外賣,如果唔想自取都可以喺Deliveroo落單,記得keep單第日用埋以下優惠呀! 1. 7月31日至8月2日期間喺Avobar消費即送名信片一張,恢復堂食時憑單據同名信片可獲全單85折。 2. 直至恢復堂食時,帶埋7月29日至8月4日期間喺Avobar嘅消費單據,點任何菜式即送牛油果布朗尼一份。   Avobar 地址:尖沙咀梳士巴利道18號K11 MUSEA B201-4號舖 電話:從缺 營業時間:星期一至日:11:00-21:00

0

【鰻魚牛油果貨不對辦 齋舖知衰:可能搞錯咗!】食焦

又有貨不對辦喇!不過今次就誇張啲,唔係話件雞少咗幾嚿、碗麵得返半碗喎(都係唔可以接受㗎喇),而係叫嗰樣嘢直頭係冇咗,有冇離譜啲呀?話說有網友去咗旺角一間齋舖度買外賣,叫咗個鰻魚牛油果卷,點知一打開個盒,鰻魚呢?鰻魚呢? 呢位事主中晒伏,po上網俾大家睇吓個分別,餐牌上面張相同實物真係差得遠,就咁睇完全唔會發現係同一樣食物先勁囉!事主留言話「又係乜都唔駛講睇圖就知伏喺邊……外賣鰻魚牛油菓卷,返到公司一打開盒已經X咗出聲,打落去齋舖全程㩒住把火投訴,最終忍唔住鬧咗句:有冇錯得咁X離譜」,其他網友睇完都話唔可以接受啦! 鰻魚卷變咗青瓜卷,事主仲話「買俾個食齋嘅客食嘅,一打開盒,我以為自己拎咗盒廚餘」,不過有網友就話去過呢間旺角齋舖,之前食過都冇出事,仲話好食添,事主都有回應嘅,原來事主都算係熟客,佢話上次都有叫過個鰻魚牛油果卷,正正常常,只係要佢等咗成45分鐘搞到有啲燥底啫! 咁事主打返去間齋舖度投訴又點呢?事主話「聽電話件阿姐攬晒上身話:唔好意思,我啱啱返咗三日工,乜都唔識可能我攪錯咗,對唔住~」有網友就話肯道歉都算態度好喇,但係令人莫名其妙嘅係,如果真係搞錯咗,消失的鰻魚又去咗邊呢?明明餐牌上面係冇青瓜卷或者牛油果卷㗎喎,咁真係搞錯得太離譜喇!雖則話係食齋啫,唔係真係齋到咁吓話?

0

【牛油果百變食得又飲得 3大輕食店吸睛首選】素學堂

「好脂肪」唔怕食,1個牛油果熱量大約有230千卡、21克總脂肪(大約4茶匙油),不過近7成係不飽和脂肪,就係「好脂肪」喇!佢幫助增加好嘅膽固醇,同時降低壞膽固醇同預防心血管疾病。牛油果仲含有鉀、葉酸同葉黃素,幫助降低體內嘅鈉水平同降低血壓。咁正嘅食物當然有餐廳將佢收入menu啦,今次小編走訪3間餐廳,介紹佢哋嘅牛油果素食俾大家。 以花會友 :jrink 喺大坑嘅:jrink以售賣特色茶飲爲主,仲有其他輕食(沙律、多士等等),食物會以花做點綴,好嘗心悅目。 牛油果吐司沙律(HKD80)以歐式麵包做底,口感偏乾同麥味重啲,上面搽咗牛油果蓉,有微微檸檬嘅酸味,幾fresh。沙律菜上再灑上食用鮮花,配埋嫩滑流心蛋,篤爆佢撈落沙律菜食,味道會更香濃。   :jrink 地址:大坑安庶庇街21號地舖 電話:2284 4203 營業時間:星期二至六:12:00-20:00;星期日:12:00-18:00(星期一休息)   咖啡×水果 Athletic Juice & Espresso Bar 咖啡小店Athletic Juice & Espresso Bar隱身喺灣仔星街,仲有健康果汁同用蔬果打出嚟嘅冰沙,夏天飲唔到熱咖啡都可以歎杯透心涼嘅飲品解渴啦。 Avolatte(HKD48)將牛油果刮空倒入Latte取代咖啡杯,仲可以食埋墊底嘅牛油果蓉㗎。果香蓋過咗Latte嘅咖啡味,但奶香味夠,味道都幾match。   Athletic Juice & Espresso Bar 地址:灣仔星街2E號地下 電話:2385 1013 營業時間:星期一至五:07:00-19:00;星期六、日:07:30-19:30...

0

【夏天手腳涼浸浸點算? 辣辣果醬打通任督二脈】懶健康貼士

身體好唔好?睇吓自己喺夏天手腳有冇涼浸浸啦!其實血液循環差自然會有呢個情況。都市人難抽時間做運動,咁不如試吓食辣搞搞佢吖。 原來新鮮指天椒含有嘅維他命C遠遠超過柑橘、蕃茄、士多啤梨等等大家熟悉嘅水果,新鮮指天椒仲可以促進血液循環、幫助腸胃蠕動、增加食慾添。依家介紹個配方俾大家,以5星為滿分計呢個就有3星辣度。 越式香辣牛油果醬 材料: 青紅指天椒 4隻 牛油果1個 車厘茄 3粒 紅蔥頭 2粒 橄欖油 3茶匙 檸檬 半個 鹽 隨意 黑椒 隨意 1. 將牛油果、車厘茄、青紅指天椒同紅蔥頭切碎; 2. 加入鹽、黑椒、橄欖油同檸檬汁調味攪勻。推介配法包食,勁有越式早餐feel。 血液暢通勁過瀑布,冬天唔使著羽絨。

0

【一杯夠頂肚 超濃厚果汁幫你排埋毒】Zero Plus

今時今日,人人都注重健康飲食,最好可以多啲選擇添。平時要飲杯有質素嘅鮮果汁都可能去到中上環先揾到,依家荃灣都有啦!Zero Plus嘅店主留意到香港成日飲果汁都係兩、三種傳統蔬果壓榨,經常以甘筍做底就算,佢反而想似外國咁,可以混合多款唔同種類嘅蔬果。除咗鮮果汁,蔬果汁之外,仲有營養代餐、鮮果昔同乳酪沙冰,全部甜度都嚟自新鮮蔬果,無人造糖份㗎。      舖頭設計時尚簡約,小編以為入咗coffee shop,感覺幾西式,唔似一般見慣成個凍櫃都係蔬果。店主花嘅心思不單單係舖面設計,點樣混合一杯飲品都參考好多地區配方,先設計出今日主打嘅健康營養瘦身飲品。一講到瘦身大家就覺得要捱餓,店主話唔洗咁辛苦㗎!佢揀牛油果做主要特飲,因為牛油果油除咗蘊含大量維他命E,當中嘅不飽和脂肪和蛋白質含量比一般水果高好好好好多!除咗咖啡之外,所有飲品仲可以加蛋白粉,為身體提供更多能量所需。 小編大愛呢杯Mind Reload(HKD38),飲得營養豐富又飽肚,大大個牛油果做主角,仲有杏仁、香蕉含高蛋白質同熱量,而燕麥可以代替澱粉質做早餐,完成一朝工作都唔覺餓,杏仁奶質感薄啲唔會滯,真係男男女女大人細路都啱飲! 簡單啲當營養補充的話,可以揀Avo Shakes (HKD34),牛油果配鮮奶,淨係睇顏色都已經好fresh,飲完腸道一定好健康。 Lunch之後小編建議點杯Berry Blaster (HKD34),雜莓酸酸地解滯又幫助消化,仲有蜜糖、希臘乳酪同鮮奶,每樣都係對皮膚好,女士必選! 務求照顧到多啲人,連素食都有選擇!熱烘意式三文治Avocado w/ Italian Pesto Sauce (半份HKD22/全份HKD38) 全份有半個牛油果咁多,絕不戲場,真係物超所值!三文治配上意大利青羅勒醬,大大減低漿口感覺,又保持到素食應有嘅清新。 Zero Plus 電話:2890 6000 地址:荃灣荃錦中心212號舖 營業時間:星期一至五:07:30-19:30 星期六:09:00-20:00 星期日及公眾假期:12:00-20:00