Tagged: #牛肉飯

0

【日本過江牛肉丼飯$25起 鰻魚肥厚嫩滑有驚喜】Sukiyaすき家

每個人去日本其都有個必食food list,唔知你嘅list有冇牛肉丼飯呢?走高質親民價嘅Sukiyaすき家上星期正式過江嚟到旺角開店,即刻牽起排隊熱潮。呢度丼飯款式逾 40款,最平嘅細牛肉丼飯25蚊有交易;店內會按唔同時段推出個別款式,例如05:00-11:00就有早餐,15:00-00:00就有鍋物,連壽喜燒(HKD60)都有呀! 排隊嘅朋友注意,堂食同外賣分兩條隊嘅。堂食的話食低後按枱面嘅掣,店員會埋嚟幫你落單同提供水。 店內有兩幅畫,一幅係日本富士山,另一幅就描繪香港維多利亞港景色,係咪好有親切感呢?香港menu仲增設香港限定嘅雙拼款式,不過小編當日朝早十點嚟到未返齊貨,所以試唔到,不過都試咗其他款式,即刻睇吓邊款令你流口水啦! 牛肉元氣早餐(HKD29)啱晒鍾意有米氣嘅朋友,仲有齊前菜、味噌湯、牛肉同溫泉蛋拼秋葵,睇見都豐富呀!其中前菜本身係配漬物,但如果賣晒就有機會轉成泡菜,最終用料視乎當日食材而定。 用美國牛肉煮成嘅牛肉本身已經裝咗牛肉汁喺入面,但無論食邊款牛肉飯都好,想多汁就要落單時講埋,廚部會喺製作嘅時候直接加埋。想就咁夾滑嫩嘅肉配飯食又得,或者跟日本人食法,加少少豉油落溫泉蛋同秋葵撈勻後,連埋牛肉放晒落飯再撈埋一齊食亦得,咁樣口感會更加滑溜,仲不失日本蛋嘅香氣添;加上秋葵令呢份早餐增添一份清新感,唔覺得一早食肉會膩喎。 想惹味啲可以試吓泡菜燒肉丼(HKD48/M),牛肉輕輕煎過令肉邊有少少脆口同更加香,配埋爽口嘅泡菜就更濃味。 呢度雖然主打係牛肉,但估唔到鰻魚牛肉丼(HKD79/M)都令小編充滿驚喜!鰻魚厚肉冇骨,入口滑嫩有油香而唔會過肥,真係幾高質。 咖喱係日本人另一款傳統菜式,炸雞芝士咖喱(HKD62/M)雖然有兩隻辣椒,但入口只係比平時嘅日式咖喱辣啲,大部分人都食到嘅。撈式兩款芝士碎令咖喱杰啲,但芝士味唔算濃,所以唔會好膩。炸雞皮脆肉滑唔會太鹹,成碗嘅調味都控制得幾好。 飲品選擇唔多,但布甸宇治抹茶(HKD32)同布甸牛奶朱古力特飲(HKD29)嘅抹茶同朱古力味都好濃郁!牛奶味相對輕啲,布甸就非常滑溜,想有口感啲就唔好攪太多喇。   Sukiyaすき家 地址:旺角亞皆老街31號地下 電話:從缺 營業時間:星期一至日:24小時

0

【學生熱捧外賣店 14蚊足料三文魚丼飯】平霸

今次平霸小編又搵到間正嘢俾大家喇!呢間寿千歲出前寿司喺葵芳廣場附近,有少少難搵,不過都超多人幫襯呀!點解?食過就知佢啲丼飯同壽司除咗夠平之外,仲要係超水準!小編嗰日食咗四樣嘢都係48咋,手卷好食過爭X多多聲喎! 汁燒牛肉便當(HKD16) 牛肉飯食落其實有少少似吉野家,不過啲醬汁就好濃味同埋偏甜咗少少,其他都好ok,而且牛肉分量一定多過吉野家,啲牛又唔會話煮到太老,最鍾意佢啲洋蔥煮到淋晒又夠甜,同埋啲飯係珍珠米嚟㗎,配埋啲燒汁超好食! 醬燒三文魚丼(HKD14) 呢個價錢我真係搵唔到任何嘢可以挑剔佢,面層鋪滿晒三文魚同埋啲芝士,食落好creamy,分量又足,加上啲三文魚好似有再燒過咁,食落一啲都唔會腥,撈飯一流呀!而且飯本身有加工過好似壽司醋飯咁,所以就算呢個飯冇汁,食落都好有味,一啲都唔乾! 章魚小丸子(HKD10)     平時出面都要十幾廿蚊先食到,呢度10蚊就有成5粒呀,入面堅有章魚粒㗎!仲要唔係成粒都係粉漿,推介! 玉子手卷(HKD8) 手卷嚟講我都覺得算平㗎喇,同埋嚿玉子又真係食到落底都仲有喎!手卷簡直係學生哥至愛,有餸有飯又夠飽,8蚊搞掂! 平霸小評:小編嗰日咁啱係喺中午去到,完全俾啲學生哥包圍咗,逼到出又出唔到、入又入唔到,真係好誇張!睇嚟呢度真係學生哥嘅開飯熱店喇。雖然只係外賣店,但食物同衛生都唔馬虎㗎,而且啲丼飯同拉麵都用熱櫃裝住,就算外賣返去都唔會凍晒,最重要係咁嘅價錢,超抵啦! 寿千歲出前寿司 地址:葵芳仁芳街4號美豐大廈地下9號舖 營業時間:星期一至日:10:30-21:00 《平霸》平食四方,歡迎各界報料。

0

【 吉野家新款飯零芝味 松露都救唔返冇味雞扒】伏務台

吉野家耐唔時就出新款飯,依家最新出品就有黑松露芝士系列。如果睇圖唔睇字,小編以為係黑松露配白汁。就咁睇,或者你會好覺得咁樣配牛肉浪費晒,但事實係完全相反! 小編試咗黑松露芝士牛肉飯同黑松露芝士煎雞扒飯,兩碗一比較,雞扒嗰碗黑松露分量極少!牛肉飯嘅分量就似返圖嘅樣,其實同一個客人買見到咁已經唔happy啦。 長形珍珠米冇咩咬口,軟啲,都可以接受。 芝士汁都幾稀,見到有啲黑胡椒粉喺面已經驚驚哋,直覺係唔好味或者唔夠味先會咁溝。入口質感似白汁,仲有蘑菇添,但零芝味;味道少少黑胡椒嘅辣就完喇,但同黑松露唔夾囉(利呻:小編平時OK鍾意黑松露)。食多幾啖仲滯滯哋有啲反胃嘅感覺……咬到一半真係想放棄。 諗住食件雞沖淡吓,點知真係好淡!雞扒好似冇醃過咁,冇味仲要少少乾,慶幸嘅係冇雪味……雞皮係有少少煎過嘅香,但真係少少咁大把。 當小編以為黑松露芝士牛肉飯會仲悽慘嘅時候,反而牛肉係平時咁煮,有牛肉汁啲味幫手蓋過芝士汁嘅味,夾黑松露反而好啲啲,所以迫於無奈攞碗牛肉汁撈落去。你冇睇錯,小編真係冒住「絞腸痧」嘅危險,咁樣救返碗飯!但注意,救返係指食得落肚,唔係好食。   小編伏氣:兩個飯本身都唔夠汁,睇圖都知唔係拉芝,唔期望都冇諗過零芝味,黑松露咁獨特嘅食材真係唔好亂玩mix and match。曾經都只係覺得野菜煎雞飯嘅野菜唔好食啫,但原來冇咗嗰個汁嘅雞扒勁遜色。希望佢哋下次出新款前試真啲先啦,反正都係主力做牛肉飯,冇新款都明㗎。以後去吉野家叫飯,繼續食返獨孤牛肉飯啦!   入伏點:吉野家觀塘寧晉中心分店 入伏價:黑松露芝士牛肉飯 HKD46;黑松露芝士煎雞扒飯 HKD44 中伏by #為食加菲貓 美術by #Mui Mui 攝影by #大食積 #為食加菲貓 《伏務台》星期一伏務大眾,歡迎各界報料。