Tagged: #牛肉麵

0

【台灣冠軍牛肉麵香港連開兩店 湯濃肉腍必試火炙小牛膝】洪師父牛肉麵

一聽係過江龍,大家都會諗嚟到香港可唔可以保持水準先?洪師父牛肉麵為咗解決呢個問題,唔係用台灣食材咁簡單,而係將湯底、牛肉等用料喺台灣店煮好再冷凍包裝運嚟香港,保證唔會走味咁話喎,唔怪得神速就喺東涌同油麻地連開兩店啦。依家就即刻試佢哋嘅冠軍牛肉麵先。 五花牛腩(HKD88)係2007年牛肉麵節比賽—清燉冠軍,湯底好清澈,但味道幾濃,入口順滑。呢款有牛腩同牛小排,肉質軟腍易咬。麵條可以揀台式幼麵同粗麵,不過清湯就同幼麵夾啲。 組麴蕃茄麵(HKD88)係2008年牛肉麵節比賽—創意冠軍,唔講都唔覺原來以蕃茄融入湯底已經咁多年。再提提大家,所以湯底都係台灣煮好,再冷凍包裝運過嚟,所以啲蕃茄都係台灣貨!呢款味道幾香甜,但唔會好杰身,依然似到牛肉湯味添。同樣都有牛腩同牛小排,呢款配粗麵會吸味啲,而且放耐咗都只係厚少少,唔會勁發漲。 想試多啲配料又想特別啲,就要嗌攞到2010年牛肉麵節比賽—紅燒冠軍嘅唯吾獨專(HKD328),呢碗可以2-3個女仔食㗎!不過想抵啲一定係點二人套餐(HKD398),會包埋兩款自選台式小食同兩杯飲品。 泊埋五花牛腩即刻睇到size嘅分別!唔係淨睇湯碗,連肉都大嚿好多,而選用嘅部位都好刁鑽;好似牛腱只用兩邊尖尖,油脂少啲又有咬口;牛肚就用蜂巢牛肚邊最「Q」嘅位置,質感好爽彈:連牛筋都特別大條,但煮得軟腍,又唔會失去咬勁,平衡得幾好。 小牛膝同樣連埋炆煮嘅湯汁一齊包好冷凍,嚟到香港加熱同火炙。大家記得唔好掛住影相,最好一上菜就試咗湯先,因為小牛膝火炙過嘅味會慢慢滲落湯,變成另一種層次。 紅燒湯本身已經好濃厚,因為混合咗秘製三寶湯同小牛膝嘅湯,幾重牛味。想再有層次啲可以加少少辣椒油,因為入面加咗牛脂一齊煮,所以入面有真「牛油」㗎! 但最估唔到綜合鮮肉湯水餃(HKD42/牛湯底)都係包好先運嚟香港煮,高麗菜(右)就比青韭菜(左)口味清啲;飽得滯想解膩可以飲返杯檸檬薏仁水(HKD18)。   洪師父牛肉麵 (旺角店) 地址:油麻地彌敦道565-567號銀座廣場地下1號舖 電話:2838 3978 營業時間:星期一至日:11:00-22:00

0

【台灣人氣麻辣牛肉麵勝面登港 湯底慢煮3日牛香撲鼻】勝面

成日都係拉麵店過江,今次終於到台灣牛肉麵喇!以人氣精燉牛腱心同招牌麻辣牛三寶出名嘅勝面,2018年攞咗《犇Fun嘉年華台北國際牛肉麵節大獎》,依家喺旺角朗豪坊已經開業一排都不斷有人嚟潮聖。究竟係咪台味十足?等小編話你知啦! 店內裝潢行簡約風,灰白色為主調感覺幾乾淨。每位店員以普通話同大家溝通,令你好似置身台灣咁,不過你可以用廣東話落單嘅。 餐廳用嘅三款麵都喺台灣入貨,有新竹米粉、關廟麵同手工刀削麵俾大家揀,如果點拌麵就會配一客蛋花湯。不過小編今次試晒湯麵,事關佢用美國牛肉同牛骨,文火慢煮湯底72個鐘,味道香純清爽。 所以一嚟先食原汁原味嘅人氣精燉.牛腱心湯麵(HKD68),湯底夠甜又唔羶,飲晒都得喎。牛腱煮得好軟腍嫩滑,用力啲夾都易散開。呢款配關廟麵幾吸味,質感似冷烏冬,幾彈牙。 跟住到限量供應嘅招牌麻辣.牛三寶湯麵(HKD82),當日三點左右就聽到店員話售罄喇。湯底可以揀小、中、大辣,小編呢碗小辣開頭似譚仔5小辣,但後勁接近3小,味道香麻中帶甜。餸料有牛腱心、牛頰肉、牛頸脊、滷豆腐同鴨血咁多款,性價比幾高。而且新竹米粉唔會點發脹,食晒都唔會滯。 想有米氣落肚就一定要點台式甜不辣拼花枝丸滷肉飯(HKD62),呢碗差不多有兩碗飯量㗎!滷肉主要用腩肉整成,入味唔過鹹,但口感一啲都唔肥膩。仲配咗台灣直送嘅甜不辣同花枝丸,炸過後更加充滿台灣味。 小菜有冷熱款式,呢味香港限定嘅涼拌綜合手撕無骨鹽水雞(HKD65)有1/4隻雞嘅雞肉、豆腐、青瓜、雞蛋同甜不辣,帶微微蒜香幾開胃。 另外一定要試嘅係芝士肉鬆雞蛋手工手抓餅(HKD38),外皮脆脆哋,夾住滿滿嘅肉鬆同芝士,煙韌鹹香好惹味! 呢度仲有好多飲品,左邊嘅鴉片黑糖波波奶茶(HKD30)用奶茶代替鮮奶,感覺冇咁甜。仲有加入綠茶調配嘅果茶系列,有紅葡萄柚、百香果、荔枝、鳳梨等口味;右邊嘅初嚐春日(HKD30)就用咗芭樂,果味好濃,但仍然飲到淡淡嘅茶香,蒟蒻仲好爽口添,感覺勁清爽解滯。   勝面 地址:​旺角朗豪坊11樓25-29號舖 電話:3105 9826 營業時間:星期一至日:12:00-23:00(星期日至四22:00截單,星期五、六及公眾假期前夕22:30截單) *設有加一服務費(入座最低消費為HKD50/位)

0

【尖沙咀新派台菜登場 白湯牛肉麵胡椒雞味濃】忠孝東路

相信去開台灣嘅朋友仔對於「忠孝東路」一定唔陌生,依家香港都有「忠孝東路」喇!呢間喺尖沙咀嘅忠孝東路,單睇個名就知係一間食台灣菜嘅餐廳啦!當然唔少得牛肉麵、滷肉飯、三杯雞呢啲充滿台灣風味嘅地道菜式,仲喺呢啲傳統台菜中加入一啲新元素添,想知有咩特色即刻睇落去啦! 有開放式水吧兼賣台式飲品,除咗堂食,客人仲可以喺門口買飲品。成間餐廳空間感幾大,座位都唔少,感覺舒適悠閒。 呢度嘅忠孝牛肉麵(HKD73)有黑湯同白湯兩種湯底,黑湯係傳統牛肉濃湯,小編今次就試咗白湯。所謂白湯即係胡椒雞湯,雖然都係台灣常見嘅麵湯之一,但喺香港食牛肉麵就比較少配搭呢種湯。湯底呈奶白色,胡椒味比較重,入面啲牛肉夠厚身又腍,真係幾有台灣風味喎! 麵條同一般食開嘅牛肉麵唔同,原來係有自家工場製作嘅,完全確保返個品質;麵嘅口感有啲似刀削麵但更薄身。 呢道慢煮香草小牛排骨(HKD298)切片上碟,面頭灑上黑白芝麻,表面燒得幾脆口,賣相特別吸睛!食落估唔到仲好有驚喜,牛排骨煮得夠腍,肥瘦均勻,肉質仲幾鮮嫩。牛排骨本身牛味已經好重,應該只係用咗少少香草配料醃味,比較重口味嘅朋友可以配搭碟邊嘅玫瑰鹽(右)、辣椒粉(中)同孜然粉(左)三種調味粉,會有另一番風味喇! 前菜冷盤可以試吓花雕醉牡丹蝦(HKD168),淨係擺盤已經好吸引,而且每隻牡丹蝦肉質好飽滿,Size比手指仲要粗,望見都流晒口水呀!浸咗花雕酒嘅大蝦夠入味,有好濃酒香。 今次試咗三杯酒系列嘅香葉三杯鴨舌(HKD128),呢度嘅三杯酒系列唔係好辣,啱晒鍾意食得惹味又唔受得辣嘅人食! 忠孝魯肉飯(HKD65)分量夠多,有埋酸菜、流心蛋呢啲配料。雖然叫魯肉飯,但因為入面啲肉比較瘦,小編就覺得似係台式肉燥飯嗰種多啲。 呢兩杯係熱賣嘅招牌台式飲品,右邊嘅黑魔(HKD33)其實係黑糖牛乳奶蓋,有黑糖掛杯賣相唔差,奶蓋夠厚、奶味都好濃,啲黑糖珍珠就比較硬身、有咬口;左邊係忠孝生果茶(HKD38),杯邊有唔同嘅水果切片夠美觀,飲落好重熱帶水果味,感覺幾清新! 食完味道較濃嘅台菜之後,飲返呢杯生果茶可以解膩,真係小編大愛!值得一提係,生果茶入面啲冰都係用咗果汁整成嘅,就算啲冰溶咗都唔會整到成杯飲品淡晒!   忠孝東路 地址:尖沙咀彌敦道63號國際廣場3樓306號舖 電話:2873 3288 營業時間:星期一至日:11:30-22:00

0

【獨家台式茶壺麵元朗突圍 重量牛骨湯日煲10個鐘】二悅

文青風嘅餐廳有好多,上ig隨便search都搵到,但想食特別啲嘅茶壺麵,依然係要去元朗嘅二悅。開業八個月,就快可以準備慶祝一週年,老闆之一嘅Tammy竟然話:「我哋冇諗過做到咁耐㗎,以為三個月就要執,因為創業容易守業難,依家我哋守緊業。當初真係諗住試吓,我哋只係想做自己鍾意嘅嘢,因為我哋好鍾意台灣,想人客入到嚟都同樣有嗰種旅行舒服嘅感覺。我又覺得一小碟一小碟咁好靚,於是就整成依家咁囉,總之要睇落靚又食得開心。」小編去到個人都文靜咗,因為旅行要慢活嘛!不過點解叫二悅(招牌上的二字是打直放)?等Tammy姐夫,亦係老闆兼廚師Johnny解話啦。 「我同Tammy都係二月生日,呢間舖都係二月攞返嚟,同埋啲食物整得靚,都係想大家開心喜悅咁食,所以叫二悅。不過當時好快攞到個舖位,但食物未設計好,都搞咗兩、三個月先開舖。」但點解諗到用牛肉麵做主打?Tammy即刻搶答:「我老公有親戚喺台灣,所以我哋間中就會過去。Johnny 又好鍾意煮嘢,有次去黐餐,一打開門就聞到陣同台灣好似嘅牛肉麵味道,加上佢又想轉吓工作環境,大家就鼓勵佢試吓開餐廳啦。」 既然係咁,小編當然要試吓招牌二悅紅燒牛肉麵(HKD68)先啦!呢款配紅燒湯汁會重口味啲,如果想清啲可以揀牛骨濃湯。配料有大大件厚切牛腱同牛肚,好重料喎!Johnny笑笑口話:「咁樣食落開心度高啲同高級啲。」配料煮到好入味,牛腱腍之中保留啲咬口,令人好滿足喎。麵底已經撈咗啲自製蔥油,可以當拌麵咁食。 食到咁上下,倒啲茶壺保暖住嘅紅燒湯汁出嚟,唔會好油。湯汁用牛骨湯再加蔬菜、薑、蒜等材料熬煮,濃味中食到蔬菜嘅甜味,可以飲啲試吓。其他湯可以加入麵中變成湯麵,咁就一味兩食啦。 鍾意食台灣嘢,又點少得手工肉燥乾拌麵定食(HKD62)。不過點解啲肉燥咁大粒呢?「初初整冇咁大粒,但大家都叫我(Johnny)整大粒啲,就變成依家咁。揀咗近骨位嘅豬腩肉,三七肥瘦左右。」肉嘅分量夠撈勻成個麵,入口好軟腍,入口唔覺食咗肥肉添。 仲有用廿幾斤牛骨,煲咗最少十個鐘嘅牛骨濃湯清清喉嚨,純粹嘅牛骨味食得出係用心機同時間熬出嚟,加埋前菜更加平衡返肉肉嘅感覺;小食就六揀二,有牛腱、牛肚、香炸花枝丸、台式蜜糖腸、糖心蛋同香炸雞翼。 如果想再light啲,非蔥油乾拌麵定食(HKD62)莫屬。唔好睇少呢個蔥油乾拌麵,蔥油香濃到好似直接食緊蔥咁,非常驚艷!Tammy即刻好激動咁話:「梗係呀!呢個麵嘅蔥油分量,比二悅紅燒牛肉麵多三倍,而且係我哋自製㗎。」小店對味道嘅執著可以有幾盡?食過就明!   二悅 地址:元朗合益路9-15號紀業樓地下G號舖 電話: 9143 3347 營業時間:星期二、三、五至日:12:00-15:00,18:00-21:00,星期四:12:00-15:00(星期一休息,如果星期一係公眾假期會順延一日休息)

0

【下雨天總掛念從前! 拉埋中同去懷舊Café食蛋餅】小食糖

中學嘅時光總係令人最懷念嘅,通常大家最好嘅朋友都係嗰時識落,久唔久大家約埋食飯聚舊,講吓當年邊個鍾意邊個、講吓當年是非都幾過癮㗎!今次小編就搵到個私竇,平日下午冇乜人,靜靜哋最啱好朋友聚會,加上成間Café嘅裝修都走懷舊課室Style,一坐入去成個青春回憶返晒嚟呀! 呢間小食糖係台式Café,喺美麗華商場入面,位置唔算好好搵,不過勝在唔怕多人逼,座位都幾闊落,仲有露天位可以坐添! 除咗裝修走校園風,連餐具都有精挑細選過㗎!好似筷子係顏色筆造型,好可愛呀!台式嘢No.1必選item當然係紅燒牛肉麵(HKD60)啦!湯底熬足8個鐘,配方跟足台灣,口味偏濃,但係湯頭濃味而未至於會飲到好口渴,忍唔住一口接一口咁飲晒成碗湯! 牛肉亦炆得相當腍,咬落超嫩口,入口即溶,咬都唔係好使咬咁滯,正呀! 除咗牛肉麵,滷肉飯(HKD50)都係相當signature嘅台式招牌菜!台灣滷肉基本上分兩種,一種係肉燥版嘅滷肉;另一種就係用大片肥豬肉版嘅滷肉(又名焢肉)!而小食糖所賣嘅正正就係呢種肥豬肉版滷肉飯喇! 雖然話係肥豬肉,但其實仔細睇塊肉係分肥中瘦3 part,肥肉部分咬落爽口,夾埋碗內嘅酸菜撈飯食落啱啱好! 唔知大家係咪同小編一樣,去親台灣都會特登早啲起身去早餐店食蛋餅呢?呢度就配合返香港人嘅生活習慣,將蛋餅整成下午茶,方便大家三點三Tea Time就歎得到,附近返工嘅朋友可以一試呀!今次小編就試咗呢個肉鬆蛋餅(HKD35),賣相當然比台灣街邊蛋餅店精緻啦! 蛋餅食落餅皮比台灣普遍嘅蛋餅略厚少少,餡料亦比較單一。台灣版嘅蛋餅通常都會俾你揀2-3款配料,但呢度一個蛋餅只有一款配料,食落好似單調咗少少,不過止吓台灣癮都唔錯嘅! 最後試埋呢個台灣特調-冬瓜檸檬茶(HKD28)。賣相就夠晒得意喇,用咗科學堂實驗室嘅三角燒瓶同量杯,好卡哇伊!味道酸酸甜甜幾得意,冬瓜味唔算好重,不過夾埋檸檬嘅酸味就好match,有少少柑桔檸檬嘅感覺。成間餐廳坐得舒服,食物同價錢又幾公道,大家可以約埋成班中同聚舊喇!   小食糖 地址:尖沙咀彌敦道132號2樓 電話:2771 7828 營業時間:星期一至日:12:00-21:30

0

【牛筋驚現毛髮超噁心 牛肉嚡口湯底死鹹重口味】伏務台

最近有朋友食完呢間小王牛肉麵,即刻同小編呻爆中晒伏!上網睇返真係各區分店都有唔少劣評喎,最多人彈佢個半筋牛肉麵,有網民留言「湯底相對上較鹹,可能是味精放得太多吧,吃完後口很渴……牛筋反而煮得過份軟腍……湯頭醬油同味精味好濃,完全失去水準……」,咁小編又要出動喇! 下午茶時段,價錢比正價平,半筋牛肉麵(HKD47),唔使等好耐,上菜速度都幾快。 不過睇真啲有啲唔對路喎,小編呢碗麵,牛筋上面有條疑似頭髮嘅物體,小編表示好驚慌,見到都唔想食啦! 即刻同店員講啦,店員就解釋話係牛筋啲毛,但係小編橫睇掂睇都覺得似頭髮多啲喎,店員見到咁嘅情況,都識做話即刻換過碗俾我,唔係點敢食落肚呀! 終於換過碗麵喇(希望呢碗乜毛都冇啦),呢個下午茶餐包埋飲品,小編叫咗杯熱桂花雪梨茶,唔係講笑,呢杯熱飲真係唔飲好過飲!見到啲桂花糖漿沉晒喺底,攪勻飲啖味道勁死甜,一啲桂花味都飲唔到,似杯熱嘅糖漿水呀!輪到個主角牛肉麵喇,上到枱係聞到香係幾香,不過飲啖湯試真啲,個湯底真係鹹到飛起,好重口味呀!冇晒牛味香料味藥材味,只有死鹹嘅湯底,成個麵又點會好食呢? 湯底出事,牛筋又點?正常牛筋應該有少少煙靭口感,但呢款就好似食緊一嚿棉花糖咁,全冇嚼頭,以為食緊嚿大肥膏,嗰種質感令人怕怕呀! 牛肉就嚡口到不得了!入口好靭又唔夠入味,完全破滅咗我對半筋牛肉麵嘅幻想,一啲台灣風味到冇! 麵條叫做正常少少,雖然偏腍身冇乜咬口,但對比起個湯底同牛筋,算係咁。   小編伏氣:一間食店仲要連鎖式經營,見到咁多負評係咪要認真改善吓食物質素呢?食物衛生問題更加要正視啦,就算條毛真係牛筋毛,都要洗乾淨晒先得㗎!呢間小王牛肉麵果然夠伏呀! 入伏點:小王牛肉麵 (將軍澳分店) 入伏價:半筋牛肉麵(HKD47) 中伏by #愛吃的旅人 美術by #車雲 攝影by #愛吃的旅人 《伏務台》星期一伏務大眾,歡迎各界報料。

0

【不滿連環檢舉遭霸凌 程班長小店停業抗議】食焦

遊行抗議靜坐抗議就聽得多,搞到要停業抗議又發生咩事呢?喺荔枝角工廈嘅程班長台灣美食,一直以來都有口碑又夠人氣,7月12日忽然喺fb專頁度公告要自主性停業抗議,「這些自從開業以來就沒完沒了從暗地裡飛來的箭;告訴這些發射暗箭的人(一個、兩個、或幾個……隨便啦),都因你們讓我們越來越堅強!」停業期間只會喺下午時段有外賣便當服務! 搞到要停業抗議,無非係因為開業5年來,程班長呢間小店不斷被惡整,近來情況仲似乎愈嚟愈嚴重添!據程班長所講,懷疑有人針對食店不斷向政府部門投訴,搞到食店成日俾人上門查巡。忍無可忍,唯有作出呢個抗議行動!程班長仲話「所有檢查、檢證、牌照我們通通有、也都通過檢核」!但只要一俾人投訴、又快速地有政府部門人員即刻跟進喎! 停業呢個星期以來,有唔少人都趁午飯嗰時幫襯買返個便當,更多人就選擇留言支持嗌加油,程班長見到有窩心留言鼓勵,都會親自回覆多謝!其實回顧吓程班長呢位台灣人,帶住自家出品移居香港開店,近年的確有唔少荒謬情節發生過,最經典係有疑似打手寫食評話程班長嘅珍珠奶茶奶味差,其實程班長根本都冇賣過珍奶囉! 唔止打手追擊,仲試過有飲食KOL將佢同一樣係賣台菜嘅阿元來了相比,結果就捧阿元踩程班長,有說係因為程班長唔肯俾錢做廣告鱔稿而惹來追擊!心灰意冷仲俾人狂檢舉,不得不選擇停業抗議啦!唔好以為停業就停晒手腳喎,程班長依家忙緊為美食節籌備,佢仲話呢段期間唔會接受任何傳媒訪問,就係唔想令人誤會佢呢次抗議行動係變相為美食節宣傳! 程班長仲寫明「賺錢不是人生唯一的重點」、「開店做生意也要有尊嚴」、「營業額損失事小」、「社會正義需要大家一起維護」,更難得係停業期間員工會照樣有糧出,真係良心老闆呀!停工應會至到8月頭,希望到時重新開業之後一切順利啦!

0

【銅鑼灣插旗牛肉麵開舖 超蓮:我哋真材實料】玖五牛肉麵

超蓮話:「一睇就知我完全係一個吃貨啦!」傾足三、四年時間,終於引入台灣牛肉麵老店玖五牛肉麵嚟香港,喺銅鑼灣插旗正式開業。連日來,超蓮馬不停蹄喺舖頭落場,既要招待傳媒又更加落力招呼客人。呢次自資七位數開舖,超蓮緊張程度爆燈,對於呢個「親生BB」,佢嘅參與度超高,舖頭內由menu、價錢到設計甚至餐具擺位,每一個細節超蓮都落足心機,真係超認真㗎! 咁多間牛肉麵,為何偏偏選中佢?超蓮話:「點解會將佢引入嚟?除咗係因為我同佢哋老闆好熟之外,我仲好鍾意佢哋嘅牛肉麵係冇味精,唔會好鹹,食完唔會口乾!」為咗保留台灣風味,超蓮專登喺台灣店調來兩位師傅來港坐鎮,香港廚師就喺開店前過去學藝!講到賣點,超蓮就話:「我哋係真材實料,所有嘢都好均真,連飲品嘅珍珠都係自己炒嘅!」正式開店難免緊張,超蓮話都幾擔心回本問題,因為台灣店日賣一千碗牛肉麵,佢話都驚香港店嘅客量唔夠喎!小編就話使乜驚,真材實料自然冇得輸啦! 紅燒招牌三合一麵(HKD95)湯底主料用牛大骨熬足三日非常入味,牛肉、牛筋同牛肚三種材料分量好足,牛肉同牛筋軟腍得嚟亦相當有咬口;麵底用上粗麵口感煙靭,索晒牛肉味正呀!湯底香濃,味道啱啱好! 麻辣臭豆腐(HKD32)將豆腐先炸再紅燒,配上青花椒同各種滷香料煮成嘅麻辣湯,未上枱已經香氣撲鼻,食落口又麻又辣好醒胃! 滷味甜不辣、豆干(HKD28/3款)三款選擇仲有蘿蔔、滷蛋、海帶、素雞和百葉豆腐可選;而豬血糕(HKD38/2款)、豬大腸同豬耳就可以任選兩款!滷味味道唔會好鹹,甜不辣完全係台灣風味,食到停唔到口呀! 燙青菜(HKD28)即係比較少見嘅地瓜菜,清清哋加埋醬油味濃嘅肉燥,用嚟送飯送麵真係一流啦!   玖五牛肉麵 地址:銅鑼灣駱克道399號金禧大廈地舖 電話:2892 0320 營業時間:星期一至四:11:30-23:00;星期五至六:11:30-02:00;星期日:11:30-23:00

0

【膠味濃食到脷都苦 花雕酸菜牛肉麵敗陣】伏務台

小編對杯麵、碗麵同即食麵嘅愛有如滔滔江水,但係今次真係敗陣喇!一向都有衣食嘅小編今次衰到唔想食晒碗麵,連平時飲晒湯水嘅舉動都做唔出……本來諗住台灣牛肉麵有新搞作,整個花雕酸菜牛肉麵咁中式就試吓啦,點知虐待咗條脷…… 一打開見到藍色包裝嘅牛肉調理包已經覺得怪怪哋,不過指示話碗麵沖熱水後放喺面溫熱佢,咁就唔拆住啦。 開咗膏狀辣油物體就開始擔心喇,聞落去陣味幾化學,少少臭,不過feel唔到好辣。再開花雕料理酒,聞落勁有酒味,都似花雕,暫時安心返啲。 沖水後牛肉調理包放面,但水機嘅熱水唔夠勁傳熱到調理包,所以摸落只係微暖,都係照倒落去直接浸熱算數。 個麵要浸幾耐係一個謎,因為睇完滿晒字嘅封面都搵唔到指示,憑經驗浸4分鐘啦。浸開咗終於認到啲酸菜喇,一試……嗯……比雪菜更淡味……惟有當食清啲……攪勻啲湯料再食,麵質似福字湯麵,算正常。不過小編終於明點解牛肉唔可以一早放落碗,因為浸一陣攪兩吓已經變咗碎牛,得返一兩粒肉仲可以保持完整。牛肉、牛筋同肥膏樣樣有啲,啲肉鹹鹹哋但乾咗啲。 但成個麵最伏嘅係湯!辣油唔辣,算!花雕酒味俾水溝稀咗,仲有少少味,都算!但係所有味加埋一齊,食到苦味!Omg,冇飽飯食已經夠慘情,仲要係一個苦味麵,人生可以甜啲嗎? 味道︰●●○○○ 湯汁︰●○○○○ 份量︰●●●○○ 價錢︰●●○○○ 小編伏氣:本身見牛肉幾大粒應該開心嘅,但變咗碎牛就好難食到。本身期待花雕嘅味道,但見係獨立包裝,唔係一齊浸就有啲失望。成個麵最令人激氣嘅係,為咗醫肚想食個好少少,豐富少少嘅碗麵懶係氹自己開心,但入口啖啖苦味,叫人情何以堪!唔食又浪費,食又對唔住個胃。如果真係有人買咗呢個麵,建議你試咗味先決定落唔落花雕;未買嘅正正常常食個牛肉麵算啦。   入伏點:759 阿信屋 入伏價:花雕酸菜牛肉麵 HKD20.8 中伏by #為食加菲貓 美術by #Mui Mui 攝影by #大食積 《伏務台》星期一伏務大眾,歡迎各界報料。