Tagged: 牛腩

0

【黃竹坑地踎泰菜CP值爆燈 滿分青咖喱牛腩撈汁送飯】街霸

暑假唔經唔覺又到尾聲,今日街霸介紹呢間街市餐廳都係啱啱放完暑假喎,就係黃竹坑南朗道街市嘅青咖喱屋!唔好睇個名以為好普通,食物CP值同水準爆晒燈㗎! 環境同一般街市餐廳冇咩分別,最搞笑係每張枱上面都會放一枝假玫瑰花,搞到懶浪漫啫!望住枝花差啲唔記得自己喺街市食緊嘢囉! 其中一道招牌菜就係泰式海南雞飯(HKD48/午市)。呢個海南雞飯無論飯同雞嘅分量都好驚人,2個人share絕對冇問題。雞大嚿得嚟皮嫩肉滑超新鮮。唯一美中不足就係當日油飯賣晒,如果唔係就perfect喇! 啲雞賣相真係超靚仔,嚿嚿都油光十足,大件夾抵食,女仔食真係可以帶定個盒打包一半食多餐,CP值爆燈! 食泰國嘢又點少得泰式冬蔭功湯(HKD58/細)?又係超足料,大蝦大隻又新鮮,再望吓啲湯,唔係水汪汪㗎!海鮮同香料嘅精華喺晒湯入面,每啖超香濃惹味,送飯啱晒!順帶一提,呢個湯幾辣吓,唔太食得辣嘅朋友可能要問吓店員有冇得小辣喇! 話明係青咖喱屋,點都要試「青咖喱」啦!泰式青咖喱牛腩(HKD68)必食呀!又係超大份,咖喱味道濃而不鹹,唔係好食得出味精咁。撈汁送飯是常識吧,唔怕同你講,街霸食呢碗咖喱食到問店員加飯……你就知道呢個汁真係出事喇!好味到停唔到口,牛腩炆得夠晒腍,完全唔使用牙「齒」開啲肉搞到攝晒落牙隙咁,又夠晒入味。呢個我俾滿分! 食到有啲口渴,叫咗呢杯番石榴沙冰(HKD30)。由食物到飲品嘅分量真係從一而終咁……大份。呢杯沙冰大到嚇親我,凸咗出嚟嘅沙冰同杯裡面嘅分量差唔多,即係等於一般餐廳分量嘅double喎,30蚊真係超抵囉!味道甜得嚟唔係糖漿嘅假甜,係番石榴本身淡淡嘅果香味。唯一有啲無奈係實在太大杯,飲得唔夠快就會瀉出嚟,所以店員事先已準備好一隻碟仔,等你唔使流到周圍都係,都幾貼心嘅,哈哈! 街霸最愛:其實今集真係難以抉擇,不過必食嘅係青咖喱牛腩同埋番石榴沙冰。街市都食到高級泰菜嘅水準,價錢仲要超親民貼地。如果2個女仔去食,嗌一個飯一杯沙冰加個小食已經夠飽!無錯,連嘢飲都淨係叫一杯好喇……街霸上次同朋友一人一杯真係飲唔晒㗎! 青咖喱屋 地址:黃竹坑南朗山道熟食市場1樓5號舖 電話:6273 2861 營業時間:星期一至五:11:45-14:30;18:00-22:00;星期六:不定

0

【至強中西合壁】Bread & Beast

未去之前已經一早聽聞過Bread & Beast有個慢煮牛腩包好出名,有朋友去食過都大讚好味!餐廳位於最近極旺既利東街隔離,有少少隱蔽但容易搵到。黑色併黃色高凳非常型格。 負責人Chris好細心講解裝修背後既概念,原來係特意將餐廳加入Butcher Shop(肉店)元素,旁邊小圓檯係一塊塊砧板,牆上面又掛住切肉刀! 牆上面有不同瓷磚畫,係代表住Bread & Beast幾位年輕有活力既拍檔,好有趣。依幅係代表住其中一位牛頭拍檔將一把刀飛去另一邊,而對面一幅公雞頭拍檔喺度閃避! 由於當日比較眼訓,即刻叫飯杯latte飲下,咖啡味頗濃,好飲! Lotus Root Chips蓮藕脆片(HKD30)唔好以為佢普普通通,其實用左好特別既腐乳花雕醬再灑上蔥花,最尾食到好飽都堅持要食到最後一塊先肯收手!真係名符其實“至強中西合璧”! 三文治係餐廳主打,以破格的手法烹調,當然要試!Birdman炸雞三文治(HKD78),雞肉外面炸得好鬆脆,裡面保持juicy,再加上自家製提子酸菜去中和油膩感,即刻加晒分! 麵包份量十足,就算好多肉汁流出黎都唔會令麵包變得過濕,失去口感。 登登登凳,重點黎喇!Ngau Lam Wich柱候醬12小時慢煮牛腩三文治(HKD88),配合白蘿蔔,一點點蔥花,真心“哇”左一聲!坑腩煮到好稔,好入味,果然係招牌之一,完全無令我失望! Bread & Beast 灣仔汕頭街3號地下 星期一至五: 12:00-20:30 星期六及日: 12:00-20:00