Tagged: #牛魔王

0

【燒肉店自助斟酒逐ml找數 A5肉眼扒成塊燒勁爆汁】Yakiniku More

尖沙咀棉登徑呢條食街,最近進駐咗一間高科枝嘅日韓燒肉店Yakiniku More,不過老闆之一嘅Ivan就大嘆︰「雖然我哋中文名叫牛魔,但唔係只食牛肉㗎!豬肉、雞肉、羊肉、海鮮、小食、沙律同飯類都有,係想俾大家有多啲體驗,一次試到唔同嘅嘢。我哋嘅設備參考咗日本高級燒肉店,油煙抽向地底排走。冇咗條煙囪,同朋友傾偈影相都方便啲靚啲,亦都唔會一身燒肉味添。每枱都有自助啤酒機,客人可以睇住屏幕知自己飲咗幾多酒,有時差少少唔夠喉又可以斟啖嚟飲,唔使好似平時咁限住叫一杯。」。 餐廳除咗玩高科技亦行高格調,專登搵嚟法國「壁畫藝術家」Elsa Jeandedieu,喺餐廳牆身畫咗「鐵扇公主」,令成間餐廳嘅氣氛更加有藝術感。呢個時候大家可能諗「咁有格調啲價錢咪好鬼貴?」,價錢又幾正常喎! 平時燒肉店嘅牛肉款通常一個國家起、兩個國家止,不過Yakiniku More就有齊日本、美國同澳洲三個地區,等總廚兼老闆之一嘅Jeff同大家解話啦!「鍾意食牛嘅朋友通常都鍾情某啲口味,唔係人人鍾意A5豐滿嘅油脂,所以又有A4俾人揀;有人鍾意美國牛夠濃味;想平均啲嘅就鍾意澳洲牛。所以最後落menu嘅時候揀晒唔同地區同部位,選擇上冇咁局限,亦想餐廳多啲新元素。」既然係咁,即刻睇吓呢款限量嘅日本A5牛魔肉眼扒(HKD550),分量一啲都唔少,雪花紋多而平均,咁燒起嚟係點呢? 平時影燒肉一定影到煙,但呢間真係好難影到,因為啲煙堅向下吸走。肉眼扒燒成塊燒到差唔多先剪開,入面係點就賣個關子先,睇埋另外兩款肉一次過揭曉。 五花肉多數都係豬肉,不過呢度就有澳洲和牛牛五花(HKD195),因為正式啲嘅日本燒肉店都會有呢款。牛五花近横隔膜嘅位置,接近內臟所以肉味相對濃啲。 美國Prime牛肋骨(HKD198)就係唯一一款有醃過嘅牛肉,感覺韓式啲。呢個部位連接筋位,醃過會入味啲,而肉吸咗啲汁會更juciy添。 即刻睇吓三款牛肉燒好係點啦。左邊嘅A5牛魔肉眼扒入面仲係粉紅嫩滑,油脂係三款之中最重,口感好軟腍,肉汁幾多,即使怕油人士都可以一試;中間嘅和牛牛五花肉味最重,燒過之後反而油份唔高;右邊嘅美國Prime牛肋骨好爽口,因為醃過,燒完表面有微微焦糖化嘅感覺,油分同肉味都幾平均。前兩款建議大家點岩鹽或自家調製嘅醬油,醬油落咗醋、蘋果同雪梨,味道清甜啲;而後者就咁食已經好夠味。 唔食牛但又想大啖肉?不妨試吓老全天然豚肉五花腩(HKD130),一樣俾到油分同肉肉嘅效果㗎。 蝦都係唔少人鍾意食嘅,最經濟就有越南巨物虎蝦(HKD85)。本身已經撈咗醬汁,燒到咁上下再唧啲檸檬汁就更醒胃喇。蝦肉幾爽,味道都調得啱啱好,就咁食或者點岩鹽會夾啲。 餐廳另外都注重海膽做嘅菜式,海膽拌飯(HKD165)就係其中一款喇。飯底撈入咗自家醃製一晚嘅蘿蔔苗葉,味道清清哋。依家用緊嘅係韓國海膽,遲吓貨源穩定啲會轉用日本海贍。食嘅時候先唧檸檬汁,再將海膽同蔥花撈勻,食落唔滯,反而有啲清香同鮮味。 食咗咁多肉,當然要食啲菜啦。68度溫泉松露醬沙律(HKD88)有微微嘅松露香氣,篤爆隻溫泉蛋之後直接將菜點落蛋汁,口感會滑身啲同香啲。 自助啤酒機有Hoegaarden同Suntory兩款酒(HKD60/330ml),每次斟幾多酒都任得你,價錢會按ml數除返,最大嘅杯裝就裝到330ml。自己啤酒自己斟,想俾朋友知自己飲咗幾多,記得影埋屏幕post相呃like喇!想知仲有咩食就睇餐牌啦,仲有set添㗎:   Yakiniku More 地址:尖沙咀棉登徑8號地下5-6號舖 電話:2750 8800 營業時間:星期一至日:12:00-15:00,18:00-00:00

0

【日本過江龍連開兩店 挑戰重量級牛肉山蓋飯】牛布拉日式牛肉麵

由日本殺嚟香港嘅牛布拉日式牛肉麵,有幾受歡迎?睇佢開馬鞍山店同旺角店前後只差一個月就知啦!咁受歡迎,因為主打嘅牛布拉拌麵同牛布拉蓋飯肉量驚人囉,一眾牛肉迷又點會錯過呢!小編今次去旺角新店,除咗試佢切到好似一塊塊布咁嘅牛肉拌麵之外,仲有其他香港店獨有嘅丼飯、小食同飲品。提提大家,食拌麵嘅時候唔好一上枱就撈勻呀,因為有4個步驟,睇埋落去你就知係點㗎喇。 餐廳以木做裝潢,感覺放鬆啲,悠閒啲。 大受女士歡迎嘅辛味牛布拉拌麵(HKD88/70g),呢個最細分量女仔食都夠飽,男士多數揀130g(HKD118)或者190g(HKD148)。未撈勻之前,先夾一塊牛肉食佢嘅原味先。牛肉以鹽、黑胡椒調味,然後用300度高溫焗製,之後再慢煮個半鐘煮成。本身已經肉嫩多汁,仲咬到好似牛?嘅爽口筋腱位,口感一級棒。跟住就可以做第二步,撈勻食喇。 小編搞咗陣先攤開到俾大家睇吓塊牛肉,係咪好似布咁呢?肥嘟嘟嘅麵係粗身白麵,少啲梘水又好吸汁;唔需要煮太耐,麵冇咁易變腍,口感似烏冬咁有彈性。為咗令白麵品質更好,發酵後仲要喺21度嘅室溫存放24小時,真係每條麵都得來不易呀!廚師用特製嘅京都地獄味噌將麵撈好再上枱,你只需將牛肉、肉碎同花生碎撈勻,口感層次就更豐富。佢嘅辣唔係即時爆發,係有後勁慢慢滲出嚟。如果想再辣啲,可以做第三個步驟:加辣油! 食晒成碗麵就到第四個步驟喇,咪以為得返少少醬汁就冇搞作,店員會俾一口飯你撈汁食。雖然只係一口飯,但店長Roy話有時客人已經好飽都仲想試,但會要求一口飯再細份啲囉。 另一款人氣拌麵係忌廉芥末牛布拉拌麵(HKD118/130g),Roy話反而多男士鍾意食呢款喎,唔知係咪覺得佢淡啲呢?忌廉醬汁用日本芝士忌廉醬再加鮮奶溝成,味道的確偏清,好處係冇咁膩,而且同芥末味非常夾!撈勻之後麵同牛肉都滑啲添。 呢款不妨加埋餐廳自家製嘅芥末醬同咖喱炸蒜。芥末醬用鮮山葵磨成,山葵粒嘅味道辣中帶啲清爽。炸蒜幾脆,但加埋咖喱粉就更加香,令成個麵嘅味道層次更加豐富。其實辛味同忌廉芥末味都各有千秋,如果俾小編揀就會夏天食忌廉芥末味、冬天食辛味喇,因為夏天食嘢想清新啲囉。 牛布拉蓋飯(HKD198/390g)係其中一個牛肉迷之選,因為佢係全個menu中最多肉,師傅話差唔多有30塊肉㗎!Roy話唔少人都挑戰呢個重量級蓋飯,男仔多數都成功,女仔暫時就只見過1個可以KO佢。嗱,俾咗貼士你計吓其他分量大約有幾多塊,怕食唔晒又想試就睇吓130g(HKD88)同190g(HKD118)邊個size啱你啦。蓋飯淋咗啲忌廉汁同醬汁煮過嘅爽口鹹洋蔥粒,味道層次相對冇拌麵咁豐富,但食得呢碗梗係重點食牛啦!如果唔夠汁都可以同店員講,可以另外上俾你,唔怕一次過淋上面太重味喇。 跟住要介紹香港店獨有嘅丼飯、小食同飲品喇!爆丼系列之中,雜錦魚生爆丼(HKD128)係最多款刺身嘅。廚師會按當日有咩新鮮食材而決定用邊款,小編當日就有劍魚、吞拿魚、帶子、油甘魚、八爪魚、北寄貝、帆立貝、三文魚、三文魚子同甜蝦,樣樣都好新鮮甜美。呢度嘅丼飯同卷物嘅飯都落咗黑糖壽司醋,比平時壽司飯嘅醋味濃啲但帶少少甜味,好開胃! 下午茶如果想試小食飲杯嘢都有選擇,炸物籃(HKD58)喺14:30-17:30期間供應,有紫芋甘栗餅、忌廉蟹肉薯餅、吉列蠔、炸雞拼野菜沙律。小編最鍾意紫芋甘栗餅,咬到大大粒甘栗,香甜有口感;跟住就係吉列蠔喇,肉地幾飽滿。 飲品全日供應,小編勁like左邊嘅戀戀沖繩(HKD38),椰子、奶同菠蘿味道超夾又濃郁;質感喺奶同奶昔之間,感覺好足料;右邊嘅草莓雪山(HKD48)都唔錯,草莓濃度好高,唔會因為沙冰質感而變淡,同戀戀沖繩比就相對甜啲,不過都接受到。   牛布拉日式牛肉麵 地址:旺角彌敦道700號T.O.P This is Our Place 4樓406-408號鋪 電話:3467 7871 營業時間:星期一至日:11:30-23:00

0

【日本過江龍牛繁燒到嚟 歎激罕限量厚切和牛】牛繁

又嚟喇!日本另一大熱燒肉連鎖店牛繁,尋日喺尖沙咀正式開業喇!Menu差唔多有七成會跟返日本,另外加咗香港先有嘅肉類,滿足一眾燒肉迷嘅口福之慾呀!店內提供嘅醬汁依然由日本提供,不過香港條例好難批到用炭爐,所以轉用鐵板燒爐,呢樣就同日本最大分別喇。暫時餐廳只做晚市,希望快啲有午市啦! 店內牆身同地面用返水泥略帶粗糙嘅質感,同食燒肉嘅豪邁不謀而合。座位算寬敞,坐得幾舒服。跟住梗係主角出場啦! 燒肉基本款一定有蔥燒鹽香牛舌(HKD88),分量幾大碟,粗略數都有十幾片,3-4人食都冇有怕。燒嘅速度要快,因為薄切好快熟。反轉另一面燒嘅時候可以加埋蔥喺上面熱一陣,令蔥香薰少少入肉,更加惹味! 啖啖肉都係不可缺少嘅,特上霜降牛五花(HKD148)一如其名,口感真係同五花腩幾似,肉質偏爽有咬口。 跟住到重頭戲,每日限量嚴選霜降黑毛和牛西冷(HKD288)有成22cm左右長,細密嘅雪花令口感好滑,而西冷口感爽身啲啲。 到香港限定款式喇,澳洲M9極上厚切和牛板腱排(HKD198)每日限量只有8碟!因為牛板腱多數做薄切款,厚切係好少有㗎!軟腍得嚟又有咬口,呢款相對冇咁多油脂,想light啲嘅朋友都啱。 仲有澳洲M9極上霜降和牛肩翼板扒(HKD178),呢款啖啖肉,油脂又重返啲,仲有香濃嘅肉味。如果唔係有個燒爐仲以為自己鋸緊扒囉。仲有咩食?俾多少少Menu大家睇吓啦:   牛繁 地址:尖沙咀金巴利道40號MW Plaza地舖 電話:2638 8099 營業時間:星期一至四及日:17:00-01:00,星期五、六:17:00-03:00

0

【太子小店賣花膠米響朵 新推嫩滑牛頸脊湯米】潮州人

店名叫潮州人唔一定要食潮州菜嘅!身為潮州人嘅老闆Atta都話好多人會以為佢做潮州菜,其實店名嘅由來只係Atta爸爸成日話做人要有潮州人刻苦打拼嘅精神咁解啫!Atta就話,佢只係想煮自己鍾意嘅住家菜同大家分享咋。 舖頭雖少,但心機同用料一啲都唔少!試過有段時間舖頭嘅鎮店花膠斷咗貨源,Atta並冇將價就貨用次級嘅花膠頂上,因為佢想大家都可以食到又平又靚嘅花膠,依家仲有新menu添。 蠔皇花賿撈米(HKD68)同湯麵款一樣,有原條肥厚花膠㗎!花膠炆得幾入味,好有肉地又軟熟彈牙;膠質都豐富,有少少漿口,男士食都爆心心眼呀!配上幼細嘅新竹米粉,吸湯吸汁都易啲,又唔會搶咗花膠嘅味道。米粉都隔得幾乾水,手勢唔錯呀。 本身嘅menu係海鮮食物多,不過遇上有靚食材都會變動吓。新鮮手切肥牛湯米(HKD53)加入menu冇耐,用肉味濃嘅本地新鮮手切牛頸脊肉,煮到啱啱熟即起,保存到佢彈滑嘅質感,所以你都唔好浸咁耐先食呀。湯底同花膠麵一樣,用大量雞精煮而成,仲有洋蔥等材料提味,好鮮甜㗎。 仲有兩款小食都係新出嘅,貴妃蚌(HKD56/2隻)聽落有啲貴,但上枱見佢大隻過湯匙即刻嘩咗聲!有肉爽口又鮮甜,食得出係靚海鮮,豉油都唔好點太多,食原味堅正! 酒釀溏心蛋(HKD18/隻)選用日本蛋,浸酒都要兩至三個鐘,酒香喺口腔慢慢散發都唔錯。 老闆仲會每日煲唔同嘅滋補靚湯,有成十幾款㗎!   潮州人 地址:太子界限街12號A地舖 電話:6536 6626 營業時間:星期二至日:15:00-00:00