Tagged: 玫瑰花

0

【召喚花系文青女孩 花茶會+工作坊一take過】嚐品慕茶

嚐品慕茶耐唔時就會同本地藝術家合作搞啲小展覽或者Workshop,今次輪到同花道藝術家、自由創作人嘅Gillian Hui合作搞蝶古巴特印花袋工作坊,每位只要幫襯下午茶就可以加165蚊參加,大家自己handmade完印花袋之後再慢慢歎返個靚tea,係咪諗起都吸引呢? 想淨係歎個下午茶咩,又得啫!呢個賞花.嚐花下午茶(HKD298/2位)餐盒嘅每款小食都粉粉嫩嫩咁,忍唔住心心眼呀!講真,有邊個女仔唔鍾意花吖?今次嚐品慕茶就為大家準備咗兩種特級嘅花茶,分別係玫瑰茉莉花茶同埋薰衣草烏龍茶。兩款都咁fresh、咁pure、咁true呀! 先睇吓鹹食有咩食先!梅子冷麵伴玫瑰蕎麥汁顏色好鮮豔,加咗梅子做出嚟嘅冷麵酸酸甜甜好開胃,配埋味道清新自然嘅玫瑰蕎麥汁,fresh爆呀! 另外迷你花卷同埋一口蟹籽玉子燒亦都非常精緻㗎,真係下午茶size,唔驚食得太飽食唔落甜點嘛! High Tea嘅甜點環節先係重點呀!睇見款款甜品都咁吸晴,都唔知食邊款先好喇。一於就試吓最易溶嘅雪糕先啦。 雪糕係handmade,出面食唔到㗎!左手邊粉紅色就係玫瑰茉莉花茶手工雪糕,口感滑得嚟仲有陣陣芳香,唔係嗰種假膠花味;右手邊就係薰衣草烏龍茶手工雪糕,清新解膩嘅福建烏龍令雪糕感覺一啲都唔heavy,mix埋濃郁嘅薰衣草香味,估唔到又幾夾喎。 荔枝玫瑰慕絲蛋糕好有驚喜,用咗荔枝玫瑰果凍鋪面,中間係好creamy嘅荔枝慕絲,底層係鬆軟嘅牛油海綿蛋糕,三款口感夾埋層次十足!同好朋友開心share,食嚿蛋糕歎啖茶,chill呀! 玫瑰蝴蝶酥同乾花牛油曲奇真係靚到唔係好捨得食,尤其係乾花曲奇,面層用咗日本食用乾花,先壓喺粉團表面再加以烘焙,火喉要控制得非常好,如果唔係好易會乾花變焦花㗎!另外玫瑰蝴蝶酥咬落超鬆化,仲有濃濃焦糖味,完全滿足到螞蟻人嘅心呀! 夏天大家可能未必想飲熱嘅花茶,其實花系飲品都有冰涼選擇嘅!冷泡烏龍茶伴桂花茶冰(+HKD40升級)真係幾呃like,喺冷泡烏龍茶入面加咗一粒「桂花茶冰」,冇錯呀,成粒冰都係桂花茶,冰溶得越多桂花味越濃,完全唔會沖淡咗茶味,另外仲有玫瑰味揀添!今個夏天大家又多一個High Tea選擇喇,記住去之前要book位呀,下午茶每日限供應㗎! 嚐品慕茶-賞花.嚐花下午茶 地址:觀塘偉業街89號昌興工業大廈M字樓 電話:3421 1944 供應日期:2018年8月6日至12月7日;星期一至五:15:00-21:00;星期六:13:00-21:30 (印花袋工作坊時間詳見嚐品慕茶facebook專頁)  

0

【貼地茶記打邊爐出晒名 雙龍海鮮鍋鮮甜多料】玫瑰餐廳陳儀興

呢排天氣真係好似女人咁好難捉摸呀!趁住仲有少少涼意,小編約埋班fd打吓邊爐喇,早就聽聞新蒲崗有間茶記玫瑰餐廳陳儀興打邊爐好食到出晒名,梗係唔執輸去試吓啦! 今次嗌咗呢個雙龍吐珠海鮮鍋(預訂價HKD298;原價HKD308),鍋底用蔬菜墊底,有栗米、南瓜、蕃茄同菇類,全部索晒海鮮嘅鮮味,正呀! 至於主角海鮮方面就有本地龍蝦仔、貴妃蚌、蝦、大大隻元貝同大蜆,款款都超鮮甜,肉質彈牙。呢個鍋係4人分量,大家早一日預訂就減10蚊!原價係HKD308㗎。 打邊爐除咗要有好嘅海鮮,湯底亦非常重要㗎!巨龍海鮮鍋用咗多款海鮮配料熬製而成,飲落啖啖龍蝦鮮味,鮮甜得嚟又清新,最重要係一啲都唔油膩,啱晒一眾怕肥又想打邊爐嘅為食貓喇! 如果嫌食海鮮唔夠喉嘅話,店內都提供多款火鍋配料俾大家選擇。小編揀咗呢個黑松露墨魚丸(HKD98)喇,咬入口相當彈牙,仲咬到粒粒墨魚添;而且黑松露特有嘅「煤氣味」亦相當出,聽侍應講,原來呢款墨魚丸係廚師親手打㗎!果然係機器做唔到嘅口感! 另外不得不推介呢個魚鰾(HKD68),其實小編咁大個人都未食過,因為一直覺得賣相麻麻,血淋淋又脹卜卜咁。不過侍應哥哥話,「平時你哋食嗰啲花膠呀,咪就係魚鰾本人囉,曬乾咗之嘛!」咁小編即管試吓,食落係有少少腥嘅,不過咬得出啖啖骨膠原嘅感覺,好「膠」呀! 雖然係海鮮鍋,但打得邊爐又點可以唔食牛喎!呢款超正牛爽肉(HKD68)食落滑嘟嘟,從肉上嘅花紋可以睇到佢嘅脂肪比例冇一般肥牛咁高,啱晒怕肥嘅女士們呀!另外如果男士們始終都係愛肥牛嘅話,亦可以嗌埋呢個招牌手切本地肥牛(大)(HKD218),比起平時食開薄過塊紙嘅肥牛呢,呢度嘅肥牛真係好有咬口,而且好有牛味,非常新鮮!   玫瑰餐廳陳儀興 地址:新蒲崗爵祿街33A-37A號百勝工廠大廈地下 電話:3583 1123 營業時間:星期一至六:07:00-23:00;星期日:18:00-22:30

0

【美女與野獸未了緣 再聚上環玫瑰傳說下午茶】DK Cuppa Tea

引起大家廣泛討論嘅《美女與野獸》,除咗套戲好睇之外,位於上環嘅DK Cuppa Tea仲出埋主題下午茶,比大家感受一下電影帶比大家嘅感動。一系列主題下午茶、有機茶、咖啡、輕食同甜點,比客人盡情享用!除此之外,餐廳仲會舉辦各式各樣嘅工作坊,以及為客人度身訂造私人派對或者企業活動添。 餐廳佈滿花草,猶如一個世外桃源,大家可以坐低慢慢歎返餐。 事不宜遲,先介紹呢個玫瑰傳說下午茶(HKD298/位 兩位起)甜品包括:玫瑰榛子朱古力,蛋白糖餅,玫瑰甜品杯,玫瑰草莓tiramisu、魚子珍寶帶子配法式焗薯、法國蝸牛、法國黑松露蘑菇蛋批、法式蘆筍薯蓉番茄湯配法國橄欖包同埋玫瑰蘋果有機茶。以玫瑰為主題,係咪令你諗返起《美女與野獸》入面嘅浪漫情節呢? 下午茶當中餐湯法式蘆筍薯蓉番茄湯配橄欖包,以典雅青花瓷碗盛湯,薯蓉配以酸甜蕃茄濃湯,再配搭橄欖包,食嘅時候佐上湯汁,酸酸甜甜嘅暖意盈盈。想享用呢個浪漫滿分嘅下午茶,記得帶埋相機啦! 帶得相機去,梗係要影埋玫瑰下午茶嘅玫瑰甜品啦!款款外型都相當精緻,榛子朱古力、玫瑰甜品杯、玫瑰草莓tiramisu,總有一款口味合你心意。搵日下午茶去試下啦。 DK Cuppa Tea/ DK Aromatherapy (上環) 地址:上環新街市街19號地下 電話:‪2386 3588 營業時間:星期一至日11:30-20:30

0

【送朵花花俾媽媽】MAKE IT

仲諗住送束真花俾媽媽做母親節禮物?唔好咁out啦!梗係同媽媽去Make It食個玫瑰花雪糕,媽媽即刻心都甜晒!Make it係Papagallo 旗下既店,主打雪糕同乳酪。 有插滿雪糕玫瑰花既蛋糕,係好靚,不過盛惠$2688! 店內用餐位置唔多,都頗逼,好多人都選擇買走一路行一路食。 試左個Pink Lady玫瑰花,係strawberry yogurt既味道。本身期望不大,反而覺得驚喜。士多啤梨味好出,好好味!店員拎出黎既時候仲係雪得好硬,可以影一大餐相先開始食都得。要同佢擺100個post影selfie既港女都絕對無問題。 Make It 旺角亞皆老街8號朗豪坊B2層1號舖