Tagged: 珍珠奶茶

0

【珍奶控人生必食甜點 精選6款韓台話題口味】人生必食

珍珠奶茶紅遍台灣、香港、韓國等地方,除咗飲料之外仲推出好多出其不意嘅珍珠奶茶創新甜點。小編精選6款喺台灣同韓國牽起熱潮嘅甜點零食,如果作為珍奶控嘅你仲未試過,快啲搵吓有冇代購幫到你啦! 台灣篇 皇族珍珠奶茶大福 呢個珍珠奶茶大福(約HKD16/4個)有三層,煙韌嘅麻糬外皮配搭奶茶豆沙內餡,而最內層就係黑糖珍珠粒。你可以室溫食佢軟糯嘅口感,想煙韌啲可以放入雪櫃凍食添。佢曾經喺香港7-11有售,你有冇錯過呀? 銷售點:台灣麻糬主題館   卡滋爆米花(珍珠奶茶口味) 睇戲必食嘅爆谷都可以整成珍珠奶茶味?一杯珍珠奶茶口味爆谷(約HKD13/80g)入面有2隻味,深色嘅係黑糖珍珠味,而淺色就係奶茶味。脆口嘅爆谷真係癲覆咗對珍珠奶茶煙韌嘅想像呀!。 銷售點:台灣7-11、康是美   珍珠奶茶酥 鍾意食鳳梨酥嘅朋友不如試吓珍珠奶茶酥(約HKD100/ 10包),佢外皮同一般鳳梨酥冇咩分別,內餡以珍珠奶茶調味,用冬瓜蓉混合椰果製成珍珠嘅口感。呢款傳統甜點加入新口味,都幾特別喎。 銷售點:台灣新東陽門市   黑糖珍奶雪條 黑糖珍奶雪條(約HKD26/4條)嘅外表完全係一枝冰凍咗嘅黑糖珍珠奶茶囉!以奶茶混合焙炒黑糖,濃味中帶啲焦香,再加上超級Q彈嘅珍珠,夏天食真心正! 銷售點:台灣全聯福利中心、萊爾富便利商店、OK便利商店   韓國 黑糖珍珠奶茶波波 韓國人氣零食黑糖珍珠奶茶波波(約HKD10/40g),係用厚厚嘅朱古力包住Q彈嘅黑糖珍珠,唔少食過嘅朋友都表示陣奶茶香味好濃郁,好似飲緊黑糖珍珠奶茶咁! 銷售點:韓國7-11、CU、GS25   黑糖珍珠奶茶味杏仁 韓國Tom’s Farm嘅堅果有好多種口味,連黑糖珍珠奶茶味杏仁(約HKD48/190g)都出咗喇!黑糖奶茶味朱古力包住香脆嘅杏仁,口感一流,啱晒鍾意甜食同果仁嘅朋友呀! 銷售點:韓國CU便利店   相片來源:104659、floral_floral_room、xiaoailovetaiwan、jessicaaa1007、livingconsultant、daveltk、yogisisfood、chocoduk_who、jyun791004、choo_permarket、busan_waboiso、bokhee.duck

0

【老媽拌麵進軍荃灣開分店 新推三款香港限定台菜】老媽拌麵

前排喺將軍澳開咗香港第一間海外店嘅老媽拌麵,再下一城喺荃灣開分店喇!仲推出咗三款香港限定嘅新菜式,不過依然保存台灣風味㗎,快啲睇吓係咩嚟啦! 舖頭喺商場4樓嘅轉角位,有少少入但唔算難搵。全店以木系裝潢,同台灣店嘅風格一致。店內都幾寬敞,大約有40幾個座位。 嚟到呢間台式料理店,梗係要食台灣小菜啦!滷鴨舌(HKD46)、滷雞翅(HKD42)同百頁豆腐(HKD30)都滷得幾入味。 呢三款就係香港限定嘅新菜式,以鹽酥雞、魷魚圈同紅燒牛肉幾樣標誌性嘅台式食物入饌,自然充滿台灣風味啦! 講起台菜,梗係諗起牛肉麵!呢款新推出嘅川味紅燒半筋半肉牛肉麵(HKD78),牛肉同牛筋嘅比例係1:1!牛肉夠腍,牛筋就爽口彈牙,焦糖色嘅湯底感覺好濃。一般紅燒牛肉麵入口通常都會有啲辣,但呢款就唔係好食到辣味,而係花椒、八角等香料味比較突出嘅濃郁牛肉湯。 麵底係比較粗身嘅刀削麵,麵質唔會太腍,幾有咬口。而且每條麵都嗦晒牛肉湯,夠入味喎。 除咗牛肉麵之外,呢兩款新推出嘅飯食都值得一試!左邊嗰碗豆乳香香雞飯(HKD62)用台灣嘅腐乳配炸到酥脆嘅鹽酥雞,味道非常特別,但唔覺意蘸多咗腐乳醬就好鹹。而右邊嘅魷魚圈滷肉飯(HKD68)以時令嘅魷魚入饌;魷魚圈滷到入晒味,但食落依然軟腍鮮味,同地道嘅台式滷肉飯好夾呀。 呢杯老媽黑糖珍珠朱古力(HKD33)都係新品嚟㗎!朱古力做到少少掛杯效果,除咗黑糖味之外,朱古力味都好濃郁,唔鍾意飲奶茶都有多一個選擇啦。 如果都係想飲傳統啲嘅台式飲品,呢度都有老媽黑糖珍珠鮮奶茶(HKD33),有三層唔同顏色,賣相都唔差喎,飲落黑糖味都幾重同偏甜,但茶味就略嫌唔夠濃;想fresh啲就可以揀樽裝嘅阿里山高山冷泡茶(HKD22)。   老媽拌麵 地址:荃灣大壩街4-30號荃灣廣場4樓441A號舖 電話:2385 3330 營業時間:星期一至日:11:30-21-30

0

【台灣出珍珠奶茶拉麵 開店2粒鐘賣清食客讚好】食焦

珍珠乜乜乜真係去到乜都可以加珍珠嘅地步!以為pizza同梳乎厘加珍珠都已經夠出奇啦,依家連拉麵都可以喎,整咗味台日crossover嘅「極品」出嚟!最近喺高雄嘅一間拉麵店,真係諗咗呢條橋出嚟,珍珠拉麵呀!你敢唔敢試? 呢間喺高雄嘅拉麵店「極道ラーメン 」,上個星期推出咗珍珠拉麵,喺碗拉麵上面見到鋪滿一粒粒珍珠奶茶嘅珍珠,喺佢哋個專頁度話「台灣珍奶VS日本拉麵,鮮奶茶的圓潤口感做為湯底,配上珍珠新食感,台日混血珍珠拉麵就此誕生顛覆你的想像!珍奶也可以這樣吃……」 個個睇見張相都覺得難以置信,估佢唔到珍珠都好以加埋落拉麵度,好多人都紛紛留言問究竟係咩味,即係鹹定甜?有勇士去食咗喇,竟然係話整體味道係ok喎,仲解開咗大家都好想知嘅謎底,原來珍珠係無!味!道!㗎!「整體很好吃 多了珍珠(沒味道)的口感還附上鮮奶油讓湯頭有淡淡的奶香!」 呢碗限量供應嘅珍珠拉麵,賣270蚊台幣,計返大約70蚊港銀,拉麵店仲話開賣無耐,就即刻賣清添!反應咁好,好多人梗係貪新奇想去試吓啫,keep唔keep到熱賣真係要再睇多一輪時間喇!話晒咁有創意嘅配搭真係未必人人頂得住,湯底係雞湯+紅茶+牛奶,而話時話,無味嘅珍珠其實加落去又為乜呢?下次會唔會炒埋啲黑糖落去呢?咁就真係又喊又甜,加埋麻辣湯底,乜味都有喇!

0

【台灣調酒師開茶飲店 特調「香港好難混」咩味?】田籽茶事

小編去旺角飲珍奶通常都係幫襯啲大牌連鎖店,今日行過快富街發現開咗間新嘅台式茶飲店田籽茶事!位置唔算話超就腳,不過環境算清靜,起碼唔使大排長龍先啦!舖頭隔離仲有個打卡位,攞住杯嘢飲同花花牆selfie冇得輸啦! 茶店由一對年輕夫婦主理,老公係台灣人,因為同香港妻子結婚,年幾前就搬咗嚟香港定居。老闆本身喺台灣已經係調酒師,一直對做飲品市場有興趣,來到香港之後他發覺開茶飲店比開酒吧容易得多,於是就喺旺角搵舖位。成間舖加埋打卡牆都由兩夫婦一手設計,舖名更係用囡囡名字命名嘅!好warm呀! 小編當日見到有客人買咗5、6杯飲品,仲清一色係買田籽波霸厚鮮奶(HKD24),睇嚟招牌飲品真係好得咁喎!老闆教落要先飲一啖厚鮮奶,再插飲管飲珍珠;飲厚鮮奶嘅時候會先飲到面層嘅濃滑奶霜,繼而飲到香滑兼夾雜黑糖香嘅鮮奶,口感的確唔錯! 除咗飲品之外,人情味亦係加分位!喺香港買珍珠奶茶經常大排長龍,大家同店員嘅交流可能只係30秒內嘅事,想問多句都難呀!店主話之所以選擇開喺人流唔旺嘅地方,係想為客人提供一個悠閒少少嘅環境,「唔想大家排隊,甚至要等個幾兩個鐘先買到杯嘢飲!」。小編其實都好認同,有時放假想放鬆吓,點知度度都排晒長龍,真係冇晒心機!另外,老闆娘亦好樂意幫助有「選擇困難症」嘅大家,好似小編等緊攞飲品嘅時候,見到有客人望住Menu有啲迷惘,老闆娘就好主動咁問想飲啲咩,鍾意味道濃定淡,呢啲就係其他人龍店唔會有嘅細心同貼心囉! 除咗招牌厚鮮奶,不正經特調亦相當吸睛!如果有睇過台片《等一個人咖啡》,相信對「特調」唔陌生,即係咖啡師特別調製嘅口味,第二度未必飲到㗎!咖啡有特調,茶飲一樣有,小編今日就試咗香港好難混(HKD22),其實即係蜜檸檬烏龍,味道酸甜帶有烏龍茶嘅清新,來自台北嘅老闆話嚟到香港呢一年體會到香港節奏實在「不好混」。雖然飲品比現實生活多咗一點甜,但至少望落呢杯特別命名嘅茶,大家都會笑吓!Menu仲有其他特調嘅名都相當盞鬼,例如前男友酸溜溜(HKD22)即係喺台灣成日飲到嘅多多綠茶。問老闆娘做乜改到啲名咁特別?佢話:「其實都係想令客人記得我哋,就算今日經過冇幫襯,但都可能因為啲名吸引而返嚟幫襯,當然,我哋係賣質素嘅!」。 最後梗係要喺外牆影張靚相打個卡啦!原來牆上嘅畫係有意思㗎,台灣有個傳統文化叫做「奉茶」,喺一啲比較傳統啲村落,屋出面會備有免費嘅茶水,俾辛苦工作嘅農夫享用,以答謝佢哋嘅辛勞。喺香港要做到奉茶梗係難啦,台灣老闆話:「我們希望客人來到我們這裡可以獲得一種悠閒感覺,可以慢下來,放下忙碌的步伐!」。花花牆吸睛之餘原來背後仲有一種台灣文化,所以話台灣人經營嘅,總係有另一番味道㗎! 田籽茶事 地址:旺角快富街37號地下 電話:2341 0023 營業時間:星期一至日:12:00-23:00

0

【果昔店衝出葵廣開地舖 獨創自家製椰糖珍珠】素學堂

葵涌廣場勁多小食、飲品舖,人多爭食競爭大,好多時啲舖頭好快就轉手第二間,眨眼冇咗!不過都有例外,好似主打鮮榨水果果昔、唔加防腐劑同人造糖嘅告白果屋就相反喇,可以衝出葵廣去太子開地舖呀,終於有個更加舒適嘅環境,可以俾客人坐低慢慢飲。老闆嘅家族做水果批發生意,所以對各種水果嘅味道同配搭有一定認識,而且保證新鮮!新舖大啲,飲品選擇都多咗,好似首創自家製椰糖珍珠鮮奶、北極企鵝等,可見老闆不斷求變呀! 店內以黑白色為主,加啲乾花點綴,簡潔中感覺幾寫意。 老闆為咗整自家珍珠,喺台灣買咗呢部珍珠機。由開粉到成品,每日新鮮製造,冇加防腐劑同人造色素㗎。椰糖係咁多款糖之中,升糖指數最低嘅一種。當粉糰變成珍珠粒,就放落鍋用椰糖糖水煮熟。告白果屋嘅「果昔」一定要試,因為水果比例高,質地似奶昔咁杰杰哋,所以叫「果昔」。 青出於藍(HKD28/杯,HKD46/2杯)用羽衣甘藍、蘋果、菠蘿同牛奶整成,再用士多啤梨點綴。被指有抗癌功效嘅羽衣甘藍本身味道唔重,冇乜草青味,反而因為有菠蘿,所以帶點微酸,咁多杯果昔之中佢算最唔甜嘅。 左邊嘅小確幸(HKD29/杯,HKD48/2杯)用雪梨、木瓜、蘋果同牛奶整成,味道有啲似平時飲嘅木瓜牛奶,但多咗雪梨嘅清甜味;右邊嘅恐龍遇上噴火龍(HKD28/杯,HKD46/2杯)用咗紅肉火龍果、蘋果同提子,再用香蕉點綴。呢杯顏色勁吸睛,亦係咁多款果昔中甜度最高,不過所有甜味都來自水果,冇添加人造糖,所以都算清新。小編就最鍾意呢杯,因為飲落有火龍果果籽可以咬吓。 龍珠爺爺(HKD29/杯)係新品之一,自家製嘅椰糖珍珠配鮮奶,撞出紋理。珍珠好煙韌,面頭仲有層芝士奶蓋添。牛奶味同椰糖嘅香甜加埋一齊又香又滑。 新品仲有北極企鵝(HKD29),烏龍茶係即叫即焗,唔係用一壺壺沖定嘅茶,大家要耐心等等喇。茶沖好會加入蜜糖調味,面頭有層奶蓋,清淡得嚟帶點奶香。   告白果屋 地址:太子彌敦道785-787A號利達大樓地下C鋪 營業時間:星期一至日:13:00-21:30

0

【一芳水果茶似飲緊糖漿 百花蜜青先係終極Boss】伏務台

話說一芳水果茶之前喺觀塘apm開Pop-up store嗰陣已經引嚟一大條人龍排隊,小編都係其中一份子,不過嗰陣飲落真心覺得冇乜特別,只係好普通嘅水果茶同珍珠奶茶,完全唔明點解可以引到咁多人去排隊囉! 唔通真係過江龍就值錢啲?好喇,到依家短時間内開到港九新界都有分店添,小編都覺得好勁,心諗唔通質素改善晒?諗住俾個機會佢,點知都係唔飲好過飲喇…… 一芳水果茶(HKD33/L size),為咗試最原始嘅味道,今次小編點嘅飲品全部都「正常」,冇少冰少甜!呢個水果茶俾我嘅感覺似係飲緊糖漿加茶,入口甜到爆呀!本身水果茶應該係好清好fresh,但呢個完全錯晒。雖然入面係有好多水果,但完全唔覺自己係飲緊水果茶囉!水果嘅清香帶唔到出黎,得返死甜;同埋想問一聲,密封咗杯嘢,啲水果完全食唔到,要食係咪要夾硬篤穿整開個膠膜呢?諗到呢度,算罷啦! 粉圓鮮奶茶(HKD29/M size),奉勸大家記得要叫半糖/微糖,唔係盞甜到一個點!另外啲粉圓細粒到呢,口感極差,咬又咬唔到,唔知想點!話明係奶茶,但我真係一啲茶味都飲唔到,淨係好重奶味,似煉奶加水多啲喎! 百花蜜青(HKD24/M size),飲咗兩杯都咁伏,原來終極Boss先係呢個!第一啖飲落去除咗難飲,我真係諗唔到有第二個形容詞去形容。飲完一啖係需要有勇氣先飲到第二啖,入口係超級苦澀嘅茶葉味,再加埋啲蜜糖,兩者完全格格不入,成件事又係錯晒!茶同蜜糖夾唔到,呢種先苦後甜嘅味道超怪,澀得不得之了! 小編伏氣:雖然台灣嘅一芳係好好飲,但開到嚟香港,好似差咗啲喎,你話佢價錢平都可以接受,但咁嘅質素,就算開多幾多間都冇用啦!不如試吓改良吓,輕手啲唔好咁甜、轉返做大珠,會唔會好啲呀? 入伏點:一芳台灣水果茶 入伏價:一芳水果茶(HKD33/L size),粉圓鮮奶茶(HKD29/M size),百花蜜青(HKD24/M size) 中伏by #愛吃的旅人 美術by #miumiu 攝影by #愛吃的旅人 《伏務台》星期一伏務大眾,歡迎各界報料。

0

【台灣殿堂級珍奶襲港 黑糖波霸厚鮮奶超邪惡】老虎堂

依家珍珠奶茶店幾乎開到好似7仔咁,梗有一間喺你左近,尤其過江龍開完一間又一間!大家都知台灣盛產黑糖乜乜乜,不過喺台灣夜市見得多嘅黑糖波霸就一直喺香港唔多見,今次以黑糖波霸厚鮮奶打出名堂嘅台灣珍奶名店-老虎堂正式喺香港插旗,第一間分店就選址喺旺區銅鑼灣! 同一眾珍珠奶茶店一樣,老虎堂係純外賣店,舖頭細細咁。小編採訪當日仍未正式營業,但唔少人行過都已經好心急咁問「係咪開咗喇?」、「有咩揀?」咁樣,到咗上星期六正式開店以来,更加係日日大排長龍!依家就等小編介紹吓佢哋嘅招牌飲品有啲咩啦! 虎虎生風厚鮮奶(含奶霜/波霸+珍珠)(HKD30)老虎堂之所以叫老虎堂,其實就係因為佢呢杯招牌飲品,利用獨家虎式炒黑糖再混合波霸同珍珠,加入純鮮奶製作咗呢種signature嘅「虎紋」效果。獨一無二嘅黑糖虎紋好吸引呀!未飲已經想像到濃郁嘅黑糖口味,不過飲品攞到手都唔好咁心急即刻插飲管呀,睇埋個「飲用教學」先啦! 由於老虎堂嘅珍奶同一般珍珠奶茶店嘅手搖式製作方法唔一樣,佢哋飲品嘅重點係現煮嘅黑糖波霸,而沉底嘅黑糖波霸需要大家上下搖晃15下(係杯嘢搖咋唔係你個人啊!)。因為現煮嘅波霸係熱嘅,口感較軟,所以要同頂層嘅冰塊同厚鮮奶搖勻先會有Q彈Q彈嘅口感啊!飲落口首先會飲到超濃郁嘅厚鮮奶,外加黑糖甜而不膩嘅香味,真係好正呀!唔係糖漿嗰種死甜,而係慢慢喺口中融化嘅甜味,黑糖波霸+厚鮮奶配搭真係一絕!留意返,因為黑糖同波霸珍珠係一齊炒嘅,所以就做唔到少甜喇!同埋因為要有足夠冰塊令波霸珍珠能夠降溫至Q彈口感,所以都係冇得少冰㗎!放心,冰塊嘅分量係經過悉心量度過嘅,唔多唔少啱啱好! 老虎堂嘅大size珍珠叫做波霸,而細size先叫做珍珠!大家可以揀兩款混合或者純波霸或純珍珠,其實小編就覺得兩款mix埋係最好飲嘅,咬落口有唔同層次,好QQ呀! 另外如果大家都係心思思想飲吓奶茶嘅話,可以試吓呢款紅茶拿鐵(HKD24),唔鍾意太甜嘅朋友可以叫店員去甜或半甜;另外可以外加黑糖波霸/珍珠(+HKD3)㗎!雖然係拿鐵但唔會太甜膩,黑糖味依然係好清香! 呢兩款就好適合行街行到就熱死嘅時候救急用喇!有時想飲嘢但又可能啱啱食完飯,唔想飲奶咁heavy嘅話可以試吓醇紅茶(HKD19)[左]或者醇綠茶(HKD19)[右],同樣係用黑糖製造甜味,亦可以選半甜或走甜,亦都可以加3蚊要波霸或珍珠!紅綠茶味道好fresh好清新,黑糖味濃,唔係嗰種台灣嘅古早味,而係一陣清新嘅黑糖香,夏天飲夠晒解暑喇! 作為台灣過江龍店,老虎堂都真係有位台灣負責人坐陣㗎!呢位就係台灣店長Joy,因為長期喺香港工作,佢嘅廣東話都唔錯㗎!試吓店長手勢啦! 地址:銅鑼灣渣甸街36號 電話:2614 1717 營業時間:星期一至日:11:00-22:00

0

【台灣大熱手搖店過江龍 鎮店芋頭鮮奶No.1】迷客夏

最近又有新嘅台灣手搖店登陸香港喇!港迷有口福了,迷客夏喺台灣人氣爆燈,仲喺2017年獲得台灣大學生票選嘅第一名手搖飲品專門店添,犀利犀利! 大甲芋頭鮮奶(HKD32),小編飲完終於都明點解咁受歡迎了!芋頭做得非常綿密,加埋鮮奶真係無敵,芋頭味勁香,甜度剛剛好,讚! 珍珠紅茶拿鐵(HKD28),紅茶味入口好香濃,用上比較少見嘅白珍珠,入面加咗蜂蜜而製成,同平時飲開嘅黑珍珠唔同,更加清甜,珍珠都好Q彈呢! 出雲抹茶鮮奶(HKD30),紅豆加4蚊,算唔算係隱藏餐單呢?原來加咗紅豆之後有如神來一筆,將口感昇華咗,超好飲呀!紅豆口感係粒狀與綿密之間,同抹茶鮮奶勁夾!大家不妨都試吓加埋紅豆啦! 高峰烏龍拿鐵(HKD26),珍珠加4蚊,茶底入口香醇,唔會苦澀,非常順滑!加埋珍珠口感更豐富。 迷客夏 地址:銅鑼灣利園山道17號地舖 電話:2361 8328 營業時間:星期一至日:11:30-22:00

0

【盤點3間特色茶店  吸客絕招賣點大不同】春風三月、Flamingo Bloom、了不起

珍珠奶茶幾乎成為咗大家嘅「必需品」咁喎,開心要飲,唔開心都要飲;夏天解渴要飲,冬天保暖都要飲!不過珍珠奶茶店愈開愈多,開到好似便利店咁「梗有一間喺左近」之後,間間差唔多冇咩特別咁。今次小編就同大家精選近來三間唔同特色嘅茶飲店,睇吓有冇你心水? 元朗小店 自家製珍珠 喺元朗千色店地下嘅春風三月有別於普通賣台式珍珠奶茶嘅小店,佢哋嘅珍珠唔係由台灣進口,而係用台灣嘅原材料做成嘅「手工珍珠」。人手製珍珠所用嘅人力物力都比較高,不過老闆娘之一嘅方小姐就話希望顧客可以有多啲選擇,同埋飲到有信心保證嘅珍珠奶茶。唔講唔知,原來春風三月呢個名係來自一首唐詩《茶山貢焙歌》,「使君愛客情無已,客在金台價無比。春風三月貢茶時。」呢首詩仲印咗喺舖頭內壁上,飲珍珠奶茶都咁有詩意,好文藝呀! 自家製珍珠有幾款,除咗最Original嘅黑糖口味之外,小編認為焦糖Baileys口味珍珠就最特別喇,全港應該只有呢度食得到!老闆娘話挑選合適嘅酒類製作珍珠時都試過好多種,結果發現焦糖味Baileys製成珍珠後可以保留到焦糖嘅香味,食落冇乜酒味,大人細路都啱食!另外桂花珍珠同玫瑰珍珠亦係舖頭嘅招牌之一,小編今次試咗鐵觀音玫瑰珍珠(HKD30),珍珠咬落口好QQ,而且玫瑰味好濃!鍾意花香味嘅朋友記得試試喇! 如果夜晚想飲返杯嘢但又驚飲茶會瞓唔著嘅話,可以試吓呢款嫩仙草奶凍(HKD28)或者Double芋頭奶(HK36)!呢兩款飲品都係不含任何茶或咖啡因成分嘅,而且仙草入口超幼滑,仲滑過小編隻手仔呀!大人細路都啱飲。 春風三月 地址:元朗教育路1號元朗千色匯地下G34號舖 電話:6060 4907 營業時間:星期一至日:11:00-22:00   中環潮店 健康果茶OL最愛 中環石板街旁嘅呢間茶店用咗搶眼醒目嘅Flamingo做吉祥物,成個舖頭設計都好有熱帶風情呀!直頭有一種鬧市中綠洲嘅感覺,店主亦希望客人入到嚟可以暫時放下工作,好好歎返杯茶。佢哋分別主打茉莉毛尖綠茶、高山油入烏龍、四川蝶蘭紅茶同埋胎菊普洱黑茶,飲品款式多數搭配新鮮水果,夠晒健康呀!小編問過負責人,佢話因為老闆本身唔鍾意飲咖啡,而返工需要提神嘅時候就會選擇飲茶,因為茶同咖啡一樣都有咖啡因,不過比咖啡更加健康同埋容易入口。老闆亦知道好多女士都未必鍾意飲咖啡,所以就開咗呢間Flamingo Bloom,希望大家可以多一個健康新選擇。 近年興健康飲食,Flamingo Bloom都堅持用新鮮水果和蔗糖代替傳統糖漿,仲會不定期更新Menu,可以係唔同季節飲到最好味嘅水果茶;而茶葉方面亦嚴選唔同產地嘅茶葉,並用原片沖泡,茶底夠濃夠甘香!由於2-3月係士多啤梨當造期,所以佢哋就推介咗呢杯草莓茉莉珍珠綠茶(HKD44)俾小編。望落好粉紅好少女心呀!飲落口既有士多啤梨嘅酸甜果香又有淡淡茉莉花嘅香味,飲落唔會好Heavy,如果你同小編一樣怕肥就啱晒喇! 如果Tea Time想飲得滿足少少嘅話,亦可以試吓呢杯奶蓋玫瑰烏龍(HKD36)。奶蓋上層放原粒玫瑰真係好賞心悅目,奶蓋同帶有淡淡玫瑰香嘅烏龍茶好夾,呢杯小編畀5粒星呀!雖然奶蓋係有少少肥,但吃貨係應該所向無懼㗎哈哈!另外Flamingo Bloom亦有提供無糖無咖啡因嘅Nacked Zero系列,呢個系列sell嘅係純果汁,甜味只靠杏仁奶同烏魯木齊提子,連大肚婆都啱飲! Flamingo Bloom(中環店) 地址:中環士丹利街50號信誠廣場地下B號舖 電話:5177 8255 營業時間:星期一至六:11:00 – 21:00;星期日:11:00 – 20:00   台灣過江龍...

0

【25蚊食到飽一飽 5蚊13粒魚蛋邊度搵?】平霸

放完個聖誕假,係咪食咗唔少好嘢?呢次平霸帶大家去一間小編由細食到大嘅舖頭,咁多年都冇乜加到價,真係平到講你都唔信呀!一講起將軍澳慧安園,街坊諗到嘅可能會係良記餃子,不過其實呢間楚塋小食都好好喎!有啲咩食?等小編教路啦! 楚塋小食價格全部都好平,專做學生哥生意,次次一到放學時段都排晒長龍,好受學生哥歡迎㗎!今次平霸用咗25蚊已經食到太飽喇!   5蚊      咖喱魚蛋(HKD5/13粒)你冇眼花,賣5蚊嘅魚蛋已經好少見,仲要有成13粒,好癲呀!雖然一定冇長洲大魚蛋咁好食,不過味道正正常常又彈牙,5蚊嚟講直頭超值喇! 4蚊 印尼撈麵(HKD4)留意返,佢嘅細撈都係賣4蚊咋,咁平應該得佢一間,另外大撈7蚊兩個,加大撈10蚊三個,又係平到黐線,一啲都唔誇張!有時糧尾10蚊就食到飽,窮人恩物仲唔係佢? 8蚊 朱古力味雞蛋仔(HKD8)最多人食呢個味,8蚊有雞蛋仔仲要唔係原味,小編好知足喇!啱啱整起入面熱辣辣,外脆內軟,同出面賣18蚊嗰啲有得揮㗎。好食好食! 8蚊 珍珠奶茶(HKD8)呢個雖然好平,不過味道就唔得喇,奶茶冇茶味,偏奶多,而且飲落有陣花香味,好奇怪,都幾難飲吓 ;而且啲珍珠勁軟淋淋,一啲都唔Q彈,呢個失水準喇! 平霸小評:今次帶大家食到小編細細個食開嘅舖頭,希望你哋都會鍾意呢啲平民小店啦!呢間價格係好平,但平得嚟又好食,絕對可以一試! 楚塋小食 地址:將軍澳毓雅里9號慧安商場地下A35號舖 《平霸》星期四食咩平嘢?歡迎各界報料。