Tagged: 班戟

0

【旺角活化唐樓天台變茶室 三式和食×茶香班戟】蟲二

想搵個地方放空吓,旺角嘅蟲二就值得一去喇!呢間天台茶室最近就由百年唐樓活化嘅上海街618,打造成房內同戶外露天空間兼備嘅茶室。喺咁熱鬧嘅市區劃出寧靜一角享受中日料理,仲有兩款喺本店3rd Space人氣極高嘅茶香燒海鹽芝士麻糬班戟添。 蟲二呢個店名其實係指「風月無邊」,當「風月」去邊後就淨低「虫二」喇。雖然本店係上環普慶坊3rd Space嘅西式cafe,但呢度就主打中日料理,風格好唔同!日式擺盤融合中菜元素,室內有好多偏中國風嘅壁畫㗎。而cafe更設有露天空間,上嚟食嘢可以放鬆吓平日緊張嘅心情。 一汁三菜(HKD140/配熱茶)係呢度其中一款招牌料理,日式擺盤賣相好簡約別緻。成set有一款主菜、兩款漬物、慢煮蛋同柴魚湯。以漬物做配菜都落足心思,去皮車厘茄用咗杏脯汁醃製,仲有兩塊花蜜漬山藥添,夠晒特別。而個飯其實有兩種食法,除咗就咁配餸食之外,食到一半可以將慢煮蛋加入飯撈勻,再落柴魚湯當茶漬飯咁食。 三揀一嘅主菜就有赤味噌清酒燉豬肉、紅酒黑醋無花果燉牛肋粒同埋蘋果野菜咖喱日式雞肉,今次就試吓佢哋嘅燉牛肋粒啦!牛肋粒同蘿蔔都切成一口size,方便入口,而且都燉到非常軟腍,肉質有咬口又唔韌。個菜名有無花果,但搵唔到佢?原來無花果已經燉到融晒,令成道菜更加清甜,仲有淡淡無花果獨有嘅果香添! 3rd Space上環店嘅班戟咁出名,嚟到呢度梗係唔可以錯過啦!呢款伯爵茶傳統班戟(HKD85)並唔係梳乎厘班戟嚟嘅,而係比較有口感嘅厚身班戟,質感鬆軟有蛋香。賣點之一就係淋喺香蕉上面嘅海鹽芝士忌廉醬,炙燒後口感薄脆,味道微鹹,就好似濃稠版嘅芝士奶蓋咁,非常特別呀! 一切開原來內有乾坤!班戟中間夾住煙韌嘅伯爵綠茶味麻糬,配埋面頭嘅牛乳雪糕同芝士忌廉香蕉一齊食就夾晒喇! 想fresh啲可以試吓呢杯熱情果梳打(HKD55),入面嘅熱情果醬都係自家調配,酸甜度適中,飲落清爽開胃。 茶座嘅茶具都充滿日式簡約風格,好似香茅薄荷茶(HKD55)就用茶壺裝住上枱俾你慢慢斟嚟飲,唔驚啲茶凍得快。呢款聞落帶有淡淡薄荷香味,入口幾清新舒爽。   蟲二 地址:旺角上海街618號頂樓天台 電話:9220 9785 營業時間:星期一至日:12:00-22:00

0

【粉紅打卡甜品店服務差 梳乎厘班戟夾雜粉粒】伏務台

最近小編嘅朋友都不約而同推薦小編試一間超伏甜品店 ,佢哋個個食完返嚟唔止嬲,仲谷到一肚氣!見佢哋咁情緒高漲,小編就實地調查吓啦。 依間位於上環嘅甜品店飲吧已經開張三個月,但食物質素同服務方面都仲未調節好囉…… 一入到去,廚房三個人都集中處理外賣單,但外賣速遞員都等唔落走咗,情況幾混亂。可能真係好多單啦,但店舖應該量力接單囉。而且店員完全將堂食客人置之不理,由得客人俾錢落單後之後呆等,直到全場客人集體催單先開始處理堂食order。其實呢度本身座位唔多,得4、5枱客都搞到咁,真係好差囉,所以小編都等咗15分鐘先成功落到單咋。 小編點咗1款飲品同2款甜品。首先嚟嘅係提子多瑙河梳打(HKD42),雖然呢度標榜喺打卡店,但深棕、深紫色同少量藍色嘅配搭令小編打咗個凸。入口味道奇奇怪怪,提子味好淡,仲膠膠哋咁;而且冇乜梳打水嘅「汽」,唔太甜,似用普通汽水沖出嚟多啲。加上啲味溝唔埋,好似飲緊兩樣咁。 不過兩個甜品先係今次嘅伏食主角,櫻花車厘子梳乎厘(HKD58)等咗30分鐘先嚟,賣相普通已經對唔住佢個價錢,分量同口感先令人最失望!車厘子果醬都係有一陣膠味,而且梳乎厘班戟好重粉味,完全冇蛋香,試咗少少已經唔想食。 本身以為咁已經夠差,班戟唔挺身仲勁濕,食食吓仲分開上下兩層裂開,唔使10分鐘就凍晒。最誇張係小編食到有啲「粒粒」嘅口感,吐出嚟先知係超多未打攪勻嘅粉粒,咁嘅出品真係極求其呀! 輪到漏單,要成45分鐘先上嘅沖繩海鹽檸檬窩夫撻(HKD58)。分量好似喺葵廣嘅小店買咁,窩夫撻硬到無論用叉定用手都要大大力先分得開;而且小編見到店員冇帶手套,直接將窩夫放上手定型,驚嚇度有十粒星呀!而海鹽雪糕除咗藍色有啲feel之外就淡而無味,仲淡過雲呢拿雪糕;雖然配嘅檸檬醬係唯一有味啲部分,但同個甜品好唔夾囉。   小編伏氣:5星(5星滿分) 其實由等15分鐘落單,到要小編發現啲員工好得閒,自行追問先知漏單,實在太粗心大意,食到人都火火哋!埋單盛惠HKD158都唔覺得有食完甜品嘅開心同滿足,每款都係失色又奇怪嘅味道,服務又亂,食完唔嬲先係奇蹟呀! 入伏點:飲吧 入伏價:提子多瑙河梳打(HKD42)、櫻花車厘子梳乎厘(HKD58) 、沖繩海鹽檸檬窩夫撻(HKD58) 中伏by #MOMO 美術by #MOMO 攝影by #MOMO 《伏務台》歡迎各界報料。  

0

【三大梳乎厘班戟 震騰騰食完好治癒】gram cafe & pancakes、am.pm、LAYER’S Cafe & Pancakes

日式梳乎厘班戟近年成為咗大家嘅至愛,有過江龍名店又有自家小店炮製,最近有唔少好選擇喎!今次小編精選咗三間梳乎厘班戟店俾你,留定肚歎返個靚甜品啦! 最新過江龍 東京嘅FLIPPER’S舊年攻港進駐希慎就爆晒場,最新鮮熱辣嘅例子就有呢間來自大阪嘅人氣no.1名店gram cafe & pancakes,喺大阪店嘅「特製Premium Pancake」仲要每日限定60份,唔怪得條人龍長到見唔到隊尾啦。 過江龍暫定三月中殺入尖沙咀THE ONE,雖然唔知會唔會都係玩限定推出,不過想食嘅朋友都要做好排隊嘅準備喇。點解會咁出名?就係因為佢食落口鬆軟,入口即溶嘅感覺囉!班戟好有厚度,搭配住奶油、雪糕同楓糖一齊食,成件梳乎厘班戟就好似棉花糖咁喺口入面化開,超級正呀! gram cafe & pancakes 地址:尖沙咀彌敦道100號The ONE L408 開店日期: 暫定2018年3月 本土名牌 am.pm雖然有賣雞蛋仔呢啲港式小食,但佢哋嘅炎燒布丁梳乎厘都好出名!炎燒布丁梳乎厘(HKD48)每日限定30份,手快有手慢冇。梳乎厘麵糊漿打得厚實挺身,燒完之後都仲Keep到空氣感,又唔會一出嚟就即刻塌。咬落口感幾實在,唔會一陣風好似咩都冇食過。梳乎厘班戟面層淋咗布丁漿,再灑上砂糖去燒,食落有3種口感:上層焦糖好香脆、中間係濕潤嘅布丁層同埋鬆軟嘅pancake底,配埋自家製3.7牛乳製嘅雪糕,特別香濃順滑。不過餓底可能辛苦啲,因為佢即叫即煎,多人嘅時候真係要等半個鐘先有得食。 am.pm 地址:油麻地彌敦道560號譽發廣場地下B舖 電話:2725 4318 營業時間:星期一至日:12:00-22:00 網民熱捧 而呢間LAYER’S Cafe & Pancakes係最近新開嘅café,位於九龍城,開咗無耐已經吸引咗唔少網民去食喇!招牌班戟(HKD68)好厚身㗎,食落非常香軟,蛋味濃郁。 除咗原味,又點可以冇綠茶味呢?綠茶紅豆班戟(HKD88)綠茶味濃郁,帶有甘香,好食喎! LAYER’S Cafe &...